Sapta 3
Holimpas Tok Bilong God
TAIM ol Isrel i sindaun pinis long Graun Bilong Promis, Josua i tokim ol hetman: “Yupela i save pinis, God, Bikpela bilong yumi i bin givim yupela olgeta gutpela samting em i bin promis long yupela. Olgeta samting em i bin promis i kamap pinis, i no gat wanpela promis i popaia.” Tasol bihain ol Isrel i no bilip tru long Tok Bilong Jehova, na planti taim ol i no bihainim dispela tok. Orait wanem samting i kamap? Jehova i tok pinis, sapos ol i bihainim tok bilong em bai ol i kisim blesing, tasol sapos ol i sakim, bai strafe i painim ol. Olsem na nau strafe i painim ol. (Jos. 23:14-16) Ol dispela tok na ol narapela tok bilong Baibel, God i lukautim bilong givim save long yumi bambai yumi “bilip na wetim God,” na yumi no ken mekim wanpela samting na bai yumi lus long kisim ol samting yumi bilip na wet long en.—Rom 15:4.
2 Ol man i raitim ol tok bilong Baibel ol inap olsem 40 samting. Ol i mekim wok olsem kuskus. Tasol Jehova yet i as bilong ol dispela tok ol i raitim. Olsem wanem? Em i as bilong olgeta tok bilong Baibel? Yes. Pol i tok stret, olsem: “Spirit bilong God yet em i bin kamapim olgeta tok bilong Baibel.” Yumi bilip tru long dispela samting, olsem na yumi save kirapim ol narapela manmeri bilong olgeta hap long harim dispela tok na bihainim olsem yumi yet i wok strong long mekim.—2 Ti. 3:16; 1 Te. 2:13.
Wanem Samting Inap Helpim Ol Narapela Long Bilip Long Baibel?
3 Planti manmeri yumi autim tok long ol, ol i no bilip olsem Baibel em i Tok Bilong God. Yumi ken helpim ol olsem wanem? Gutpela rot em olsem: Yumi mas opim Baibel na soim tok bilong Baibel long ol. “Tok bilong God i gat laip, na em i wok strong i stap. . . . em i save skelim olgeta tingting na laik bilong bel bilong yumi.” (Hi. 4:12) “Tok bilong God” em tok promis bilong em i stap long Baibel. Dispela tok i no stori tasol long ol samting i bin kamap bipo na i pinis. Nogat. Dispela tok i gat laip na i wok long kamap tru. Na taim ol manmeri i lukim ol samting i kamap olsem Baibel i tok, em nau, ol samting ol i mekim i kamapim tingting tru i stap long bel bilong ol, ol i laik bihainim ol dispela tok bilong Baibel o nogat. Dispela tok i gat bikpela strong, na em i save wok insait long bel bilong ol man, na i winim ol tok yumi yet i mekim.
4 Planti manmeri ol i lukim tasol nem bilong God long Baibel na ol i bilip. Na sampela, taim wanpela man i soim ol tok bilong Baibel long ol i stori long as bilong i stap bilong yumi, na bilong wanem God i larim pasin nogut i stap, na as bilong ol samting i kamap long nau, na gutpela tok bilong Kingdom bilong God, ol dispela tok i kirapim tru tingting bilong ol na ol i laik stadi na lainim tok bilong Baibel. Long sampela hap, ol manmeri i mekim sampela pasin bilong lotu i opim rot bilong ol spirit nogut i ken mekim nogut long ol. Orait, taim ol i lukim Baibel na ol i save long as bilong dispela samting nogut i painim ol na rot bilong sakim ol spirit nogut, ol i amamas na ol i laik lainim tok bilong Baibel. Olsem wanem na ol dispela tok i kirapim tru tingting bilong ol? Long wanem Baibel tasol i kamapim as tru bilong ol dispela bikpela samting.—Sam 119:130.
5 Tasol olsem wanem sapos wanpela man i tok: ‘Mi no bilip long Baibel’? Ating yumi no ken toktok moa wantaim em? Nogat. Sapos em i laik harim, yumi ken toktok wantaim em. Yumi gat wok long tokim olgeta manmeri Baibel em i buk bilong God. Ating dispela man i ting, Baibel em i buk bilong ol misin bilong Krisendom, na em i lukim ol dispela misin i mekim planti pasin giaman, na ol i insait long wok politik, na ol i save singaut long mani, olsem na em i no laikim Baibel. Yu ken askim em, em i gat dispela tingting o nogat? Na yu ken tokim em, Baibel i no orait long pasin bilong ol dispela misin. Na yu ken skelim pasin bilong ol wantaim lotu Kristen tru. Ating dispela samting inap kirapim em long bilip long Baibel.—Lukim Matyu 15:7-9; Jems 4:4; Maika 3:11, 12.
6 Na sampela man, sapos yu tokim ol long ol samting bilong Baibel i makim olsem spirit bilong God i as bilong en, ating bai ol i laik harim tok bilong Baibel. Orait, olsem wanem long yu yet? Wanem samting i kirapim yu na yu bilip olsem Baibel em i Tok Bilong God? Baibel i tok spirit bilong God i as bilong ol tok bilong en, orait, dispela i kirapim yu long bilip olsem Baibel em i Tok Bilong God? (2 Ti. 3:16, 17; Re. 1:1) O yu bilip olsem God em i as bilong ol tok bilong Baibel, long wanem ol tok profet bilong Baibel i kolim stret ol samting i mas kamap bihain? (2 Pi. 1:20, 21; Ais. 42:9) Planti man i bin raitim Baibel insait long 1,610 yia, tasol tok bilong ol i stret wantaim. Ating dispela i mekim na yu bilip olsem Baibel em i Tok Bilong God? O ating ol narapela samting i kirapim tingting bilong yu, olsem tok bilong Baibel i stret wantaim saiens; ol man bilong raitim Baibel i no haitim rong bilong ol; ol birua i bin wok long bagarapim Baibel, tasol Baibel i stap yet. Wanem wanem samting i bin kirapim tingting bilong yu, orait kamapim dispela long man na ating yu inap helpim em long bilip olsem Baibel em i Tok Bilong God.
Yumi Yet Yumi Mas Kaunim Baibel
7 Yumi mas helpim ol narapela man bambai ol i bilip long Baibel, na yumi yet yumi mas kaunim long olgeta taim. Yu save mekim olsem? Dispela buk em i nambawan bikpela buk. Tasol nogut yumi ting yumi inap i stap wanpela tasol na kaunim Baibel na skelim na kisim save long en na i no gat wok long ol narapela i mas helpim yumi. Nogat. Baibel i tok yumi no ken ting olsem. Tru yumi yet yumi mas stadi, tasol yumi mas bung wantaim ol narapela Kristen tu long ol miting na bai yumi inap kamap gutpela Kristen na tingting gut.—Pro. 18:1; Hi. 10:24, 25.
8 Bilong helpim yumi Baibel i stori long wanpela bikpela man bilong Itiopia. Em i kaunim tok profet bilong Aisaia na ensel i tokim evanselis Filip long i go long em. Filip i tok: “Ating yu save as bilong dispela tok yu ritim, o nogat?” Long pasin daun Itiopia i bekim tok olsem: “Sapos man i no soim rot long mi, bai mi inap save olsem wanem?” Na em i tokim Filip long kamapim as bilong dispela hap tok bilong Baibel. Filip i no kamapim tingting bilong em yet long dispela hap tok bilong Baibel. Em i no save stap wanpela tasol na long tingting bilong em yet em i skelim tok bilong Baibel. Nogat. Em i save bung wantaim ol aposel long kongrigesen long Jerusalem, na em i insait long lain bilong Jehova long graun. Em i skul long ol tok bilong Jehova i kam long rot bilong oganaisesen bilong Em long graun, olsem na em inap givim dispela save long man bilong Itiopia. (Ap. 6:5, 6; 8:5, 14, 15, 26-35) Olsem tasol long nau, yumi wanpela tasol i no bin kisim stretpela save long laik bilong Jehova, a? Jehova i bin helpim yumi. Na em i mas helpim yet yumi long rot bilong oganaisesen bilong em.
9 Oganaisesen bilong Jehova i wokim Wastaua na ol narapela buk bilong Baibel na long dispela rot ol i helpim yumi long kisim save long ol tok bilong Baibel na bihainim. Long ol kongrigesen bilong ol Witnes Bilong Jehova i gat wanpela Skul Bilong Wok Autim Tok, na insait long dispela skul ol i makim hap bilong Baibel bilong kaunim long olgeta wik. Sampela Witnes, taim ol i kaunim pinis dispela hap bilong Baibel, ol yet i save wok long kaunim Baibel, kirap long Jenesis i go inap long Revelesen, mekim mekim olsem. Sapos yumi skelim gut ol tok bilong Baibel, dispela inap helpim tru yumi. (Sam 1:1-3; 19:7, 8) Yu yet yu bin kaunim olgeta tok bilong Baibel? Sapos nogat, yu ken traim mekim olsem, na wok strong long mekim. Maski yu no save gut long olgeta tok yu kaunim, tasol sapos yu kaunim, dispela bai helpim yu. Sapos yu kaunim fopela o faipela pes long olgeta de, orait, long wanpela yia samting bai yu inap kaunim Baibel olgeta.
10 Wanem taim yu yet yu ken kaunim Baibel? Sapos yu inap makim 10-pela o 15-pela minit long olgeta de, em gutpela! Sapos yu no inap mekim olsem, orait, makim sampela hap taim long olgeta wik bilong kaunim. Yu save kisim kaikai bilong skin long olgeta taim, na olsem tasol yu mas kaunim Baibel long olgeta taim. Yu save, sapos wanpela man i no kaikai gut, bai sik i painim em. Na i wankain tu long kaikai bilong spirit. Oltaim yumi mas kisim “olgeta tok i kamap long maus bilong God” bambai yumi inap i stap laip.—Mt. 4:4.
11 Taim yumi kaunim Baibel yumi laik mekim wanem? Nogut yumi tingting tasol long inapim sampela pes o long kisim laip i stap oltaim. Nogat. Gutpela tingting i mas kirapim yumi long kaunim Baibel, olsem yumi laikim tumas God na yumi laik save gut long em, na save long laik bilong em, na yumi laik lotu long em long pasin em i laikim. (Jon 5:39-42) Yumi mas i gat tingting wankain olsem wanpela man bilong raitim Baibel, em i tok: “God, yu skulim mi long pasin bilong yu, na soim mi long rot bilong yu.”—Sam 25:4.
12 God i skulim yumi na yumi mas laik long kisim stretpela save. Sapos yumi no kisim save i stret, bai yumi no inap bihainim na bai yumi no inap lainim gut ol narapela man. (Kl. 3:10; 2 Ti. 2:15) Sapos yumi laik kisim stretpela save, yumi mas kaunim gut ol tok, na sapos sampela tok i strongpela tok, ating yumi mas kaunim tupela o tripela taim bambai yumi inap kisim as bilong dispela tok. Na yumi mas tingim gut ol tok bilong Baibel yumi kaunim. Long pes 27 ol i makim 5-pela samting yu ken tingim bilong helpim yu long tingim gut ol tok bilong Baibel yu kaunim. Sapos yu tingim dispela 5-pela samting, dispela inap helpim yu long skelim gut planti tok bilong Baibel. Taim yu bekim ol askim i stap long dispela pes na long ol narapela pes hia, bai yu pilim dispela samting.
(1) Planti tok yu kaunim long Baibel i helpim yu long save long ol pasin bilong Jehova.
Taim yumi tingim gut ol tok bilong Baibel i tokim yumi long ol samting Jehova i bin wokim, dispela i helpim yumi long kisim wanem tingting long Jehova? (Sam 139:13, 14; Jop sapta 38-sapta 42—skelim gut Jop 38:1, 2 na Jop 40:2, 8 na Jop 42:1-6.)
Tok bilong Jisas long Jon 14:9, 10 na ol samting i bin kamap olsem Luk 5:12, 13 i stori long en i soim yumi, Jehova i gat wanem kain pasin?
(2) Bikpela as tok bilong Baibel em olsem: Kingdom bilong God long han bilong Krais, em Pikinini God i tok promis long em, dispela Kingdom bai stretim bek nem bilong Jehova. Taim yu kaunim Baibel yu mas tingting olsem: Olsem wanem dispela hap tok mi kaunim i helpim bikpela as tok bilong Baibel?
Ol hevi i painim ol Isip, olsem wanem dispela i insait long bikpela as tok bilong Baibel? (Lukim Eksodas 5:2; 9:16; 12:12.)
Olsem wanem long stori bilong meri Moap, em Rut, na bikpela as tok bilong Baibel long Kingdom? (Rut 4:13-17; Mt. 1:1, 5)
Tok Gebriel i givim long Maria olsem Maria bai karim Jisas, olsem wanem dispela i stret long bikpela as tok bilong Baibel? (Luk 1:26-33)
Na taim spirit holi i kam daun long ol disaipel bilong Jisas long Pentikos, olsem wanem dispela tu i bikpela samting bilong dispela as tok bilong Baibel long Kingdom? (Ap. 2:1-4; 1 Pi. 2:4, 5, 9; 2 Pi. 1:10, 11)
(3) Bilong save long insait bilong wanpela skripsa, lukim ol narapela ves klostu.
Pol i givim tok bilong Rom 5:1 na Rom 8:16 long lain bilong heven o lain bilong i stap long graun? (Lukim Rom 1:7.)
Yu ting ol tok klostu long 1 Korin 2:9 i soim yumi olsem dispela ves i stori long kisim laip long graun long Nupela Taim God bai kamapim o olsem wanem? 1 Korin 2 Ves 6-8 i helpim yumi long save ai na yau bilong husat i no kisim gut ol samting Pol i toktok long en?
(4) Taim yu kaunim Baibel, askim skin bilong yu yet: ‘Olsem wanem mi ken bihainim dispela tok?’
Stori bilong Ken i kilim i dai Ebel em i bilong yumi ken save tasol long ol samting i bin kamap bipo, o em i bilong skulim yumi long sampela samting? (Jen. 4:3-12; 1 Jon 3:10-15; Hi. 11:4)
Taim yumi kaunim stori (kirap long Eksodas i go inap long Diuteronomi) bilong ol samting i bin painim ol Isrel long ples nating, dispela tok i mas lainim yumi long wanem samting? (1 Ko. 10:6-11)
Sampela tok bilong Baibel i kolim pasin ol Kristen bilong kisim laip long heven ol i mas bihainim. Tasol olsem wanem? Ol Kristen i wet long kisim laip oltaim long graun, ol tu i mas bihainim dispela pasin? (Skelim Nambas 15:16; Jon 10:16.)
Maski yumi gat gutnem long kongrigesen, tasol yumi mas wok long bihainim moa yet ol tok bilong Baibel yumi save pinis long en, o nogat? (2 Ko. 13:5; 1 Te. 4:1)
(5) Taim yu kaunim Baibel, tingting long olsem wanem yu ken mekim wok long dispela tok bilong helpim ol narapela man.
Stori bilong Jisas i kirapim bek pikinini meri bilong Jairas, ating dispela stori inap helpim husat? (Luk 8:41, 42, 49-56)
13 Sapos yumi kaunim Baibel na tingim gut ol tok olsem, dispela bai helpim tru yumi! Em hatwok liklik—em wanpela wok yumi ken wok strong long mekim long olgeta taim yumi stap laip. Tasol sapos yumi kaunim Baibel, bai yumi kamap strong long spirit. Bai yumi stap wanbel moa yet wantaim gutpela Papa Jehova na ol brata Kristen. Na bai yumi inap bihainim dispela tok, olsem: “Holimpas tok i gat laip.”—Fl. 2:16.
Stori Gen Long Ol Dispela Tok
●Bilong wanem God i kirapim ol man long raitim Baibel na em i lukautim inap long nau?
●Olsem wanem yumi ken helpim ol narapela man long laikim Baibel?
●Sapos oltaim yumi yet yumi kaunim Baibel, dispela bai helpim yumi olsem wanem? Taim yumi kaunim, yumi ken tingim wanem 5-pela askim na dispela bai helpim yumi?
[Askim Bilong Stadi]
1. (a) Wanem samting i painim ol Isrel bilong bipo na ol i save tok bilong Jehova i tru? (b) Bilong wanem yumi mas tingim dispela samting?
2. (a) Olsem wanem “spirit bilong God yet em i bin kamapim olgeta tok bilong Baibel”? (b) Yumi save long dispela samting, olsem na yumi gat wanem wok?
3. Ol manmeri i no bilip olsem Baibel em i Tok Bilong God, wanem gutpela rot bilong helpim ol?
4. Kolim sampela tok i tru bilong Baibel, taim ol man i kisim save long en, ol i senisim tingting na ol i bilip long Baibel. Olsem wanem na ol dispela tok i kirapim tru tingting bilong ol?
5. Taim wanpela man i tok em i no bilip long Baibel, ating i gat wanem as bilong dispela? Olsem wanem yumi inap helpim em?
6. (a) Wanem samting i bin kirapim yu na yu bilip olsem Baibel em i Tok Bilong God? (b) I gat wanem samting moa em inap helpim ol manmeri long bilip olsem Baibel em i buk bilong God?
7, 8. (a) Yumi olgeta wan wan i mas mekim wanem long Baibel? (b) Yumi yet yumi mas kaunim Baibel na i mas i gat wanem samting moa bilong helpim yumi? Baibel yet i kamapim dispela samting olsem wanem? (c) Yu yet yu bin kisim save long laik bilong Jehova long wanem rot?
9. I gat wanem ol wok bilong kaunim Baibel em inap helpim yumi olgeta?
10. (a) Wanem taim yu yet yu save kaunim Baibel? (b) Bilong wanem i bikpela samting yumi mas kaunim Baibel long olgeta taim?
11. Taim yumi kaunim Baibel, yumi mas tingting long mekim wanem?
12. (a) Bilong wanem yumi mas kisim stretpela save? Yumi mas mekim wanem bambai yumi inap kisim stretpela save taim yumi kaunim Baibel? (b) Bilong helpim yumi long skelim gut ol tok yumi kaunim long Baibel, yumi ken tingim wanem ol samting olsem yumi lukim long pes 27? (c) Bekim ol askim wan wan i stap long pinis bilong paragraf 12 na stori long ol dispela 5-pela samting. Mekim wok long Baibel bilong yu.
13. Sapos oltaim yumi wok long kaunim Baibel na stadi wantaim lain bilong Jehova, dispela bai helpim yumi olsem wanem?
[Blok/Piksa long pes 27]
Taim Yu Kaunim Baibel, Yu Mas Tingim Ol Dispela Samting:
Dispela tok i lainim mi olsem wanem long pasin bilong Jehova?
Em i stret olsem wanem wantaim bikpela as tok bilong Baibel?
Olsem wanem ol tok klostu long wanpela ves i kamapim insait bilong dispela ves?
Olsem wanem mi ken bihainim dispela tok?
Olsem wanem mi ken mekim wok long dispela tok bilong helpim narapela man?