Yu Laikim Wanem Kain Musik?

OL SPEN bilong bipo i save tok: “Olgeta man i save liklik long musik na long marasin.” Tru, ating yumi olgeta inap wisel o singsing liklik. God i wokim yumi bilong laikim musik na singsing. Wanpela man bilong mekim ol tok olsem tok bilong song, em Longfellow, em i tok: “Musik i olsem wanpela tok ples olgeta man i save long en.”

Long pastaim tru ol man i bin harim musik na singsing! Taim yumi harim pisin i singsing, yumi save amamas, a? Ol pisin i gat kain kain krai o singsing bilong ol na yumi save amamas long harim.

Taim mama i singsing isi long pikinini bambai pikinini i slip, pikinini i save amamas. Nau ol man i tok, taim pikinini i stap yet long bel bilong mama, em i save amamas long harim gutpela musik o singsing, tasol em i save kirap nogut sapos musik o singsing i pairap tumas. Em i meknais insait long bel na mama inap save, pikinini i amamas long samting em i harim o nogat.

Ol Samting Bilong Wokim Musik i Kamap Olsem Wanem?

Ol man i no save gut, ol samting bilong wokim musik i bin kamap olsem wanem long pastaim. Wanpela bikpela (Encyclopaedia Britannica) i tok: “Sampela lain bilong bipo ol i gat bikpela save long wokim ol samting bilong musik, em ol lain bilong Esia na Not Afrika … long pastaim tru, long Mesopotemia na long Isip, ol i gat dispela kain gita ol i kolim harp.”

Tasol Baibel i tok klia olsem: Wanpela tumbuna pikinini bilong Adam, em Jubal, em i “tumbuna bilong ol man i save mekim musik long gita na mambu.” (Jenesis 4:21) Jubal i wokim namba wan gita na mambu samting o em i kirapim pasin bilong wokim musik long gita na mambu, em yumi no save. Tasol 5,000 samting yia bipo ol i gat gita na mambu na ol i save wokim musik!

Bihain long taim bilong Bikpela Tait Wara long taim bilong Noa, ol i save wokim musik na mekim singsing. Leban i krosim tambu pikinini bilong em, Jekop, na em i tok: “Watpo yu giamanim mi, na yu ranawe hait tasol, na yu no toksave long mi? Sapos yu tokim mi pastaim, orait mi inap salim yu i go wantaim amamas na singsing long kundu na gita.”—Jenesis 31:27.

Planti handet yia bihain, long haus lotu long God i gat “foa tausen [Livai] ol i litimapim nem bilong Jehova, ol i paitim gita samting em Devit i tok, ‘Mi bin wokim bilong litimapim nem bilong God.’” (1 Kronikel 23:5, NW) King Devit long Isrel em i save tru long paitim dispela kain gita ol i kolim harp i gat 10-pela string bilong en. Na ating em i bin wokim sampela nupela kain gita samting bilong wokim musik na singsing.—Sam 144:9; Kronikel 7:6; 29:26, 27; Emos 6:5.

Musik Long Nau

Long nau yumi save harim planti musik na singsing long redio na long ol plet singsing na long ol kaset. I gat kain kain musik na singsing! I gat ol musik na singsing bilong bipo, na singsing bilong bikpela lain wantaim olsem kwaia, na kain kain nupela musik na singsing, olsem jes (jazz), na kantri-an-westen, na musik na singsing bilong disko, na rok-musik. Pastaim ol man i save laikim narapela kain musik na bihain ol i lusim na ol i kirap laikim narapela kain musik. Mekim mekim olsem.

Orait, yu laikim wanem kain musik? Em bikpela samting o nogat? Musik na singsing yu save harim, em inap senisim tingting bilong yu? Em inap senisim ol samting bai painim yu long bihain?

[Piksa long pes 6]

Gita na biugel bilong bipo i kam inap long nau