Long Nau Planti Manmeri i Save Mekim Tok Doti

WANPELA, meri, nem bilong em Ines (Inez) em i wok long wanpela haus faktori long Klivlan, Ohaio, long Amerika. Long dispela haus faktori Ines i nambawan meri bilong mekim tok swea. Wanpela taim Alis (Alice) i popaia na bamim Ines na tupela i tok pait. Alis i kirap mekim tok swea long Ines. Ol wanwok i kirap nogut, long wanem Alis i no pret long tok swea long Ines.

Nau Ines i bekim tok swea. Em i tok swea nogut tru. Tupela i resis long mekim tok swea. Narapela i tok swea na tok doti long narapela na tupela i bikmaus. Planti wanwok i ran i kam bung na ol i laik save husat bai win. Pastaim tupela wantaim i strong. Narapela i bekim tasol tok swea long narapela.

Tasol Ines i gat save tru long pasin bilong swea. Planti taim em i save mekim. Em i kolim ol narapela narapela kain tok swea na tok doti tu wantaim na isi isi em i daunim Alis. Alis i sem na em i pasin maus na lusim Ines. Ol wanwok i ure long Ines na ol i go bek long wok bilong ol. Ines tu em i kirap tasol mekim gen wok bilong em.

Long nau, planti taim kain samting olsem i save kamap. Bipo ol man i no save mekim tok swea olsem. Tasol long nau planti man i save mekim. Na nau ol manmeri i no gat tok long meri o pikinini i mekim kain tok olsem. Bipo, sapos wanpela pikinini i mekim tok swea, ol i save holim em na wasim maus bilong em long sop. Na bipo ol i no save raitim ol tok swea long ol buk na nius samting; ol i save putim mak olsem: *** o olsem:---. Tasol nau ol i save raitim.

Tingting bilong ol man long pasin bilong mekim tok swea i senis. Na dispela senis i kamap insait long ol piksa wokabaut tu long nau. Long planti piksa wokabaut long nau ol manmeri i save mekim tok swea na tok doti. Sampela man bilong wokim ol piksa ol i laik bai i gat ol dispela kain tok insait long piksa na bai ol man i no ken tingim piksa i bilong ol pikinini tasol, na bai planti ol i go lukim. Nau tasol ol i wokim wanpela piksa wokabaut, nem bilong em Annie. Ol man bilong skelim ol piksa wokabaut i no lukim samting nogut long en, olsem na ol i tok em gutpela piksa bilong ol pikinini tu i ken lukim. Tasol man bilong wokim dispela piksa em i tingting planti, nogut ol manmeri i bikpela pinis i no laik i go lukim. Olsem na em i kirap putim sampela tok swea insait long dispela piksa.

Dispela Pasin i Kamap Bikpela

Long bipo na long nau tu ol man i save mekim sampela tok swea. Tok swea em i olsem olgeta tok nogut i tok bilas long God na long ol samting i holi. Man i mekim tok swea, planti taim em i singaut long wanpela god i ken mekim nogut long wanpela man. O em i tok bilas long God o long pasin bilong God. Sampela man i kolim nating nem bilong God na mekim tok swea. O ol i mekim tok nogut long ol manmeri o ol samting God i save tingim ol i holi. Tasol Baibel i tok: “Yupela i no ken kolim nating nem bilong mi God, Bikpela bilong yupela. Long wanem bai mi mekim save long ol manmeri i kolim nating nem bilong mi.”—Eksodas 20:7.

Tasol long nau ol man i no save mekim tok swea tasol; ol i save mekim tok doti. Ol i save mekim tok doti long sem bilong man na meri na long ol samting bilong maritpasin. Wanpela nius (U.S. News & World Report) i tok: ‘Long nau senis i kamap na long resis ol man bilong ure ol i save singaut na kolim kain kain tok doti long ol man em ol i laik bai ol i lus long resis.’

Dispela ol tok doti em tok i gat sem, na nau i pulap long maus. bilong ol man. Wanpela nius (Time) i stori long besbal-menesa Tommy Lasorda. Em i laik kirapim tim bilong em long pilai strong na win. Em i mekim liklik tok tasol, tasol insait long dispela tok em i “kolim 144 tok doti.” Planti man bilong politik tu ol i save mekim tok swea na tok doti. Planti tok swea bilong presiden na bilong ol narapela bikpela man i pulap long ol tep bilong gavman bilong Richard Nixon na ol i rausim. Na Jimmy Carter, bipo em i presiden bilong Amerika, na ol i tok em i man bilong lotu, tasol em i kolim wanpela tok doti na ol man bilong nius The New York Times i no laik raitim long nius. Ol i raitim tasol tok olsem: “Em i kolim wanpela ‘tok doti.’”

Bipo ol man i save kolim sampela strongpela tok. Tasol nau ol i save mekim kain kain tok swea na tok doti. Ol dispela kain tok i pulap long ol buk na nius tu. Sampela yia bipo wanpela man bilong stori long ol tok swea, em i makim 14 rot bilong kolim tok “hel” olsem wanpela tok swea. Tasol nau ol man i save kolim ol tok swea i doti nogut tru. Ol i save kolim tok doti bilong ol samting bilong maritpasin na ol i kolim long kain kain samting. Ol i kolim nating tasol. Ol i no belhat o pilim pen samting na ol i kolim. Nogat. Ol i tok swea nating tasol na kolim ol tok doti.

Ol i raitim tok doti long kat bilong salim long ol man long betde samting bilong em. Ol raskol i raitim tok doti nabaut long banis bilong ol haus stua samting. I gat tok doti ol i raitim long singlis bilong ol man, na long sampela piksa bilong toksave long ol man, na long ol ka. Planti manmeri i pilim olsem ol i mas mekim dispela kain tok long wanem nau olgeta manmeri i save mekim. Wanpela nius (U.S. News & World Report) i tok: ‘Ol manmeri i no gat tok moa long pasin bilong mekim tok swea na tok doti. Na ating nau ol i no inap lusim dispela pasin.’ Tru tumas, long nau planti manmeri i save mekim tok doti!

Ol man i lusim pinis ol lo na tambu bilong bipo na dispela samting i kirapim ol long mekim ol tok doti. Wanpela man bilong lotu i tok: “Dispela pasin i wanpela mak bilong dispela taim nau.” Long nau ol famili i bruk bruk na ol man i no bihainim moa tok bilong ol man i gat wok long bosim ol. Ol i bihainim ‘nupela lo’ na ol i orait long kain kain pasin doti. Olsem na ol i kirap mekim kain kain tok doti. Tok ol i mekim i kamapim pasin ol i save bihainim.

Wanpela profesa, em Thomas Cottle, em i tok: ‘Ol man i no i stap belgut na amamas; ol i pilim olsem ol i stap bilong mekim nating tasol, na ol i les na i save bel kros . . . dispela samting i kirapim ol long mekim pasin pait.’ Sampela man i tok, sapos man i kros na belhat, gutpela sapos em i mekim tok swea samting. Ol i tok dispela samting inap helpim bel bilong em i stap isi gen. Wanpela dokta, em Chaytor Mason, em i tok: ‘Sapos mi holim stia bilong ka na draiva bilong narapela ka i katim rot bilong mi, mi save tok swea long em. Dispela samting i save mekim gut bel bilong mi.’

Tru tumas, dispela pasin bilong tok swea long narapela man na tok doti em i olsem wanpela mak. Baibel i tok dispela samting i makim pinis bilong dispela taim nau i klostu. Baibel i tok: “Long las taim bai planti hevi nogut tru i kamap. Bai ol man i laikim ol yet tasol, . . . na tok bilas long God. . . . Bai ol i tok baksait nabaut. Bai ol i no save bosim laik bilong bodi bilong ol.”—2 Timoti 3:1-5.