Mi No Ken Lain Moa Long Pait
HAP bilong Saut Dakota long Amerika em i gutpela ples. Ol bikpela gaden o fam i stap long dispela hap. Yu inap lukim ol bulmakau i kaikai i stap long gutpela ples stret. Ol man i planim bikpela gaden wit na bali na kon samting. Mama i karim mi long dispela hap long Julai 10, 1921, long biktaun Abadin. Mi go bikpela na narapela narapela kain samting i painim mi—pasin pait na pasin sekan; pasin sori na pasin bilong bel nogut.
Papamama bilong mi i Jeman. Tupela i save givim bel long mekim wok. Ol i ting lotu na skul i bikpela samting. Olsem na ol i givim baptais long mi long misin Luteran na ol i lainim mi long dispela lotu. Long 1939 mi pinis long skul. Papamama i bin katim marit na papa i dai pinis. Nau mi mas tingting: Bai mi bihainim wanem rot?
Mi laikim tumas ol tok bilong Baibel na God, olsem na mi tingting long kamap wanpela pasto. Mi salim pas long wanpela skul bilong misin Luteran. Tasol Namba Tu Pait Bilong Olgeta Hap i kirap long Yurop na dispela skul i no bekim pas bilong mi. Olsem na long Julai 1940 mi insait long nevi. Mi bihainim rot i go long pait, i no rot bilong pasin sekan.
Mi skul na mi insait long wanpela lain bilong nevi ol i save wok long balus. Ol i salim mi i go long narapela kantri, long Olongapo, klostu long Manila, klostu long Filapin. Amerika i no insait yet long pait, olsem na wok bilong mipela em bilong skelim tasol hamas sip bilong Japan i stap long Solwara Pasifik.
Ol Japan i Kirapim Pait
Long Desemba 7, 1941 ol i makim mi bilong wok long Sarere na Sande. Mi mas was na harim tasol ol tok i kam long redio. I no hatwok. Tasol wantu narapela kain tok i kamap long redio. Mi harim tok olsem: ‘Ol Japan i kirapim pait long Amerika’! Mi kirap nogut tru—mi lusim sia na ran spid i go toksave long ol man. Mi save, kwiktaim bai ol Japan i kam kirapim pait long mipela tu long Filapin.
Tru tumas, tulait i bruk na ol balus bilong Japan i kam. Ol i tromoi bom long mipela. Ol i bagarapim planti balus bilong mipela taim ol balus i stap yet long graun. Tasol sampela balus i go antap na ol i go tromoi bom long ol sip bilong Japan. Wanpela lain i kisim balus i go antap na taim ol i kam bek, narapela lain i senisim ol na i go. Mi insait long dispela wok.
Tasol mipela lus long pait. Ol balus bilong Japan i kam long mipela olsem taragau i flai i kam kisim liklik pikinini kakaruk. Tupela tripela de tasol na ol i bagarapim pinis olgeta balus bilong mipela. Pastaim mipela inap olsem 500 man, tasol nau 50 tasol i stap laip yet. Mipela mas ranawe. Olsem na mipela i go kisim wanpela liklik sip bilong karim pasendia, em bilong Frans, na mipela hait hait abrusim ol sip bilong Japan, na i go longwe inap 2,000 mail long hap bilong Dats Is Indis.
Mipela sua long Surabaya long dispela hap nau ol i kolim Indonesia. Tasol ol Japan i bihainim mipela i kam, na mipela mas lusim Indonesia i go long Dawin long Australia. Mipela i ting bai mipela inap stap gut long dispela hap Tasol nogat. Wantu sampela balus bilong Japan i kam tromoi bom long pasis bilong Dawin na olgeta sip long pasis i paia. Inap 20 sip i bagarap na lus long wara. Sip bilong mipela, nem bilong en Willie B. Preston, klostu i bagarap. Em sip bilong pait ol i bin redim bilong karim balus long en. Ol Japan i tromoi bom long en na sutim sutim long masin-gan na i paia. Tasol mipela i mekim i dai ol paia na long taim bilong tudak, hait hait mipela lusim Dawin i go long Frimantel.
Ol man i dai pinis mipela karamapim sel long ol na long tudak mipela mekim liklik toktok na tromoi skin bilong ol i go daun long solwara. Planti ol i gutpela poroman bilong mi. Dispela pait i bin lainim mi long pasin bilong bel nogut long ol birua. Nau mi bel nogut moa yet.
Nupela Ples Pait
Mipela kisim lip inap 30 de na bihain ol i salim mipela i go long ol ailan Alusian, klostu long Alaska. Oltaim mipela i go i kam long balus. Mipela wok long painim na bagarapim ol sip bilong Japan.
Long Ogas 8, 1942, long pait bilong Atu, ol i sutim balus bilong bagarapim dispela samting ol i kolim reda, em bilong makim rot bilong balus. Mipela tanim i go bek long bes, tasol mipela go insait long bikpela smok na mipela i lusim rot. Mi harim kepten i singaut strong, olsem: ‘Bai yumi bam,’ na bihain mi no save long wanpela samting moa. Mi i dai.
Taim mi kisim bek tingting na opim ai, mi lukim balus i bin bamim wanpela maunten na i bagarap. Mi stap longwe liklik long balus. Ating taim balus i bam, dispela i tromoi skin bilong mi i go ausait. Mi lukim balus i paia yet, tasol tel bilong en i bruk i stap. Mi save, sapos sampela long balus ol i stap laip yet, ol i stap long dispela hap bilong balus. Olgeta hap skin bilong mi i pen, tasol isi isi mi wokabaut long skru i go long tel bilong balus. Mi lukim nambawan gutpela pren bilong mi em i stap. Em i kisim bikpela bagarap, tasol em i stap laip yet. Mi pulim em i kam longwe liklik long balus. Na nau mi dai gen.
Long tumora sampela balus i kam painim mipela. Ating mi harim krai bilong ensin bilong ol dispela balus na mi kirap. Wanpela balus i kam klostu na mi holim saket long han na tromoi i go i kam. Bihain mi dai gen.
Taim mi kirap opim ai mi slip long bet long wanpela haus sik bilong Nevi. Dispela gutpela pren bilong mi em i slip long bet klostu. Tasol tripela fopela de bihain em i dai pinis. Mi wanpela tasol mi stap laip. Ol narapela 8-pela boskru bilong balus i dai pinis. Mi bin lukim planti man i dai, tasol nau mi askim skin bilong mi, olsem: ‘Olsem wanem na mi stap laip yet? Bilong wanem mi no bagarap?’ Long dispela taim mi lusim Baibel, mi no kaunim moa; mi no strong long spirit.
Wanpela Buk i Senisim Tingting Bilong Mi
Mi stap long hap bilong ol ailan Alusian, tasol bihain ol i putim mi long wanpela sip bilong nevi i olsem haus sik, na ol i kisim mi i go long wanpela haus sik bilong Nevi long Wosington long Amerika. Wasket bilong mi i bruk bruk na ol dokta i no bin stretim gut. Olsem na ol i mas brukim gen ol dispela bun na stretim. Mi kisim bikpela bagarap na mi stap 6-pela mun long haus sik.
Taim mi lusim haus sik, mi go lukim bikpela susa bilong mi long Kalifonia. Wanpela taim mi lukim wanpela man long wanpela haus klostu, em i tromoi sampela buk ol i olsem nupela buk. Nem bilong wanpela em Prophecy (Tok Profet). Mi askim em: ‘Dispela buk i stori long tok bilong Baibel?’ Em i tok: ‘Yes, na ol narapela tu i buk bilong Baibel. Yu ken kisim olgeta.’ Olsem na mi kisim wanpela buk, nem bilong en The Harp of God, na sampela buk moa bilong Sosaiti Was Taua.
Mi pilim olsem mi laik kirap gen kisim save long ol samting bilong spirit. Mi laik save gut long ol tok bilong Baibel. Mi kisim dispela buk Prophecy na mi kaunim olgeta tok bilong en, tasol mi no save long as bilong ol dispela tok. Olsem na mi tromoi ol dispela buk, tasol wanpela mi holim, em The Harp of God. Mi putim dispela buk long paus mi save karim long balus.
Inap sampela mun mi raun long balus wantaim wanpela ofisa bilong Nevi. Em i gat bikpela namba na em i raun skelim ol kem bilong Nevi long wes-kos bilong Amerika. Dispela wok i no bikpela wok na mi gat bikpela hap taim bilong raun nating na painim amamas. Tasol ol samting mi mekim bilong painim amamas, mi pilim olsem i no gat as bilong en na mi no i stap amamas. Mi les na mi tokim ol bos bilong mi, mi laik i go bek gen long pait. Ol i salim mi i go long Saipan na Tinian long Solwara Pasifik. Ol i makim mi bilong i stap long namba wan balus na bosim reda i tromoi ol bom. Olgeta tupela tupela de mipela save i go tromoi ol bom na i kam bek. Olsem na mipela i gat bikpela hap taim bilong sindaun nating long kem.
Wanpela taim mi painim painim ol kat insait long paus na mi lukim dispela buk (The Harp of God) i stap. Mi kirap long kaunim. Mi kirap nogut, long wanem dispela buk i tok “hel” em i matmat tasol, na yumi no gat tewel, na Baibel i no tok God em i God Triwan. Mi kirap nogut tru long ol dispela tok mi kaunim.
Kwiktaim mi kisim Baibel na mi lukim ol skripsa dispela buk i kolim. Ol tok bilong dispela buk i stret wantaim tok bilong Baibel. I no hatwok long save long ol tok bilong dispela buk. Mi amamas tru long ol dispela tok mi kisim save long en. Mi tingting long i go lukim pasto Talatala na pris Katolik na tokim tupela long opim Baibel na soim mi “hel” em i no makim matmat.
Tok Bilong Pasto
Tasol tupela i no inap mekim. Wanpela i givim sampela tok long mi na mi no lusim tingting long en inap long nau. Em i tok: “Miller, yu kisim gutpela nem long nevi. Olgeta man i save litimapim nem bilong yu. Sapos yu stap long Nevi bai yu stap gutpela. Yu yangpela man, tasol ol i bin givim bikpela namba long yu. Nogut yu popaia na bihainim ol Witnes Bilong Jehova. Ol Witnes Bilong Jehova i no save salut long plak na ol i no save pait bilong helpim kantri bilong ol.” Mi givim planti askim bilong Baibel long dispela pasto na pris, tasol tupela i no laik bekim tok. Ol i toknogutim tasol sampela Witnes planti man i save long ol na ol i dai pinis.
Tok bilong ol i givim tingting nogut long mi na mi no laikim ol Witnes Bilong Jehova. Tasol tupela i no inap opim Baibel na bekim ol askim bilong mi, olsem na mi tingting olsem: Mi painim pinis tok i tru. Nau mi mas autim dispela tok long ol narapela man. Olsem na mi kirap autim tok long ol wanwok bilong mi. Olgeta ol i kirap nogut na ol i tok, ‘Yu senisim tru tingting bilong yu.’
Namba wan bilong mipela i harim tok olsem mi autim tok na em i singautim mi i go long ofis bilong em. Em i tok: “Miller, yumi tupela i bin wok gut wantaim. Sampela de moa na yumi mas insait gen long pait, tasol dispela pait long Aiwo Jima em i bikpela pait moa. Mi no save long dispela wok autim tok yu mekim. Em i no samting bilong mi! Tasol mi laik tokim yu, lusim dispela wok pastaim, long wanem yumi gat bikpela wok long dispela pait.” Mi orait long tok bilong em.
Pait Bilong Aiwo Jima
Taim mipela laik insait long pait, pastaim ol i save tokim mipela long ol samting mipela i mas mekim. Paslain long pait bilong Aiwo Jima ol i tokim mipela hamas man bai ol i dai. Mi pilim nogut tru. Ol i kolim bikpela namba tru. Dispela namba i no namba nating—em i makim ol man, em ol bai i dai.
Ol Japan i wok strong long holimpas dispela ailan Aiwo Jima. Ol i hait namel long ol bikpela ston koronas long nambis na i hatwok long pait wantaim ol. I gat wanpela rot tasol—mipela mas goap long balus na i go klostu tru long ol na tromoi planti paia-bom (napalm) long ol. Taim bom i pundaun, samting i stap insait long bom i paia na dispela paia i go insait long olgeta liklik hul long ol ston na ples olgeta i paia.
Sampela de bihain mipela i kisim dispela ailan na mipela inap pundaun long ples balus. Mi lusim balus i go daun na mi lukim ol man i bagarap na i dai pinis. Mi wokabaut i go long nambis. Mi laik lukim ol samting ol dispela bom bilong mipela i bin mekim. Mi no inap stori, em samting nogut tru. Ol dispela bom i kukim nogut ol Japan long nambis. Skin bilong ol i paia na ol i dai. Ol i bagarap olgeta. Mi lukim na mi laik traut. Mi bel hevi tru.
Long pait bilong Aiwo Jima 8,000 Amerika ol i dai na 26,000 ol i kisim bagarap. Na 22,000 Japan ol i dai. Dispela samting i kamap long wanpela liklik ailan em inap olsem 20 skwe-kilomita tasol!
Long Ogas 1945 ol i tromoi tupela bom atomik long Japan na pait i pinis.
Mi Bungim Ol Witnes long Namba Wan Taim
Mi go bek long Amerika, long Potlan, long Origen. Mi go lukim famili bilong mi. Ol i no laikim nupela tingting na bilip bilong mi. Ol i birua tru long mi. Tasol ol i save long wanpela Witnes i stap klostu, em Howard Meier, na kwiktaim mi go lukim em. Mi tokim em long ol dispela tok nogut pris na pasto i bin sutim long ol Witnes na em i stretim dispela tok. Mi kirap long i go long ol miting bilong ol Witnes long Haus Kingdom. Na mi autim tok.
Mi lainim ol tok bilong Baibel long pasin bilong pait na pasin sekan na mi save, sapos mi laik i stap Kristen tru; mi no ken insait moa long ol wok bilong ami na long pait. (Aisaia 2:4; Matyu 22:37-40) Mi mas tingting gut na tingim ol samting mi bai mekim, long wanem liklik taim bai lip bilong mi i pinis na mi mas i go bek long kem.
Long dispela taim Howard Meir i givim gutpela tok long mi na mi tenkyu long em. Em i tok: ‘Yu stap pikinini yet long ol samting bilong spirit. Yu no ken kirap kwik na tingim ol samting yu mas mekim. Gutpela sapos yu go bek long kem na yu go long ol miting bilong ol Witnes long Haus Kingdom i stap klostu long kem. Olsem bai yu inap kamap strong na yu ken beten askim Jehova long stiaim tingting bilong yu na soim rot long yu.’
Mi go bek long kem bilong ami i stap long Witbe Ailan long Wosington. Mi kirap long bung wantaim wanpela kongrigesen i stap klostu, em Kongrigesen Anakotes. Kwiktaim mi kirap long i go long ol haus na autim tok. Na mi save autim tok long ol man long rot na givim tanget long ol na singautim ol i kam harim pablik-tok. Liklik taim tasol na mi kirapim 8-pela o 10-pela Baibel-stadi long kem.
Tasol sampela man long dispela taun i kros na ol i telefon na toksave long kepten bilong kem olsem i gat wanpela ofisa bilong kem em i save autim tok long rot na singautim ol man i go harim tok bilong Baibel. Pasto bilong kem i singautim mi i go long ofis bilong em na em i tok: ‘Nau tasol yu LUSIM dispela wok!’ Mi tokim em, mi no inap lusim.
Ol i Holim Mi na Putim Mi long Kot
Mi autim tok long rot na polis bilong Nevi i kam holim mi. Ol i kotim mi long wanem samting? Ol i tok mi pasim yunifom bilong Nevi na mekim pasin nogut. Ol i putim mi long kot na kot inap givim kalabus long mi long wanpela kalabus bilong nevi, o rausim mi long nevi na dispela bai bagarapim nem bilong mi. Mi no laik bai wanpela loya bilong Nevi i helpim mi long kot. Mi pilim olsem mi yet mi inap kamapim ol tok bilong Baibel na tokaut klia long kot long ol nupela tingting na bilip bilong mi.
Mi kot long ai bilong ol bikpela man bilong Nevi. Ol i kolim ol samting ol i laik kotim mi long en na bihain mipela toktok wantaim. Bikpela toktok i kamap na ol i sutim planti askim long mi long ol tingting na bilip bilong mi. Bihain ol i tok, ‘Yu laik mekim laspela tok?’
Mi tok, ‘Yes, mi laik mekim liklik tok.’ Mi makim plak bilong Amerika long han bilong mi na mi tok, ‘Yu ting ol samting dispela plak i makim em i giaman tasol?’
Wanpela bikpela man bilong Nevi i lusim sia na kirap sanap na em i tok strong, olsem: “Miller, wanem . . . as bilong dispela tok bilong yu?”
Mi bekim tok olsem: “Yupela i save long ol wok mi bin mekim long nevi. Yupela i save, long laik bilong mi yet mi insait long nevi na mi bin mekim pait bilong helpim olgeta samting dispela plak i makim. Mi mekim moa yet. Mi ting dispela plak i makim olsem ol man inap bihainim wanem wanem lotu ol i laik bihainim, no gat tambu, na mekim wanem wanem tok ol i laik mekim. Long ai bilong mi yet mi lukim ol pren bilong mi i dai long pait. Ol i pait bambai ol man i ken i stap fri olsem. Mi bin lukim planti tausen tausen ol i dai long Filapin, long Australia, long Niugini, long Saipan, long Tinian, long ol ailan Alusian, long Aiwo Jima. Mi bin goap long balus planti handet taim i go long pait. Planti taim mi inap bagarap. Mi bin kisim planti medal na ol man i litimapim nem bilong mi, winim planti man long dispela kem na i gat 10,000 samting ol i stap long dispela kem. Olsem na mi laik save: Ol dispela samting mi bin pait long kisim na ol samting dispela plak i makim, em mi no inap kisim? Mi no inap bihainim wanem wanem lotu mi laik bihainim na mekim wanem wanem tok mi laik mekim?”
Mi sindaun na i no gat wanpela i toktok. Olgeta i pasim maus i stap. Ol jas i go ausait, tasol kwiktaim ol i kam bek na ol i tok, ol i no inap stretim tok long ol samting ol i mas mekim long mi, olsem na ol bai salim tok i go long Wosington. Ol bikpela man long Wosington i bekim tok olsem: Mi ken inapim kontrak bilong mi long nevi, em inap 3-pela mun moa, na long dispela tripela mun ol i mas givim wok long mi em bel bilong mi i no gat tok long en. Olsem na mi holim yet gutnem na long Julai 14, 1946 mi pinis long nevi. Nau bai mi mekim wanem?
Mi Lusim Pait na Bihainim Pasin Sekan
Gavman i save helpim ol man i bin insait long pait, olsem na mi inap i go long bikpela skul, olsem koles o yunivesiti, na lain long mekim wanpela wok. Tasol mi no laik. Mi save pinis long tok i tru na ol gutpela samting Baibel i tok liklik taim bai kamap. Mi laik helpim ol narapela man bambai ol i ken save long dispela gutaim em bai stap oltaim. Mi laik helpim ol long kisim laip. Mi laik lusim pait na kilim man i dai na mekim wok em inap givim laip long man.—Sam 46:8, 9; Aisaia 9:6, 7.
Mi kisim baptais long Ogas 1946 long wanpela kibung long Klivlan, long Ohaio. Mi go bek long kongrigesen Anakotes na mi kirap mekim wok painia. Long 1947, mi putim aplikesen bilong wok long Betel long namba wan ofis bilong Sosaiti long Bruklin. Ol i orait long mi na mi go long Betel long Mas 29, 1948. Mi wok long ol narapela narapela dipatmen na bihain ol i makim mi bilong wok long Sevis-Dipatmen (Dipatmen bilong Wok Autim Tok). Long dispela Dipatmen mi kisim wok olsem sekreteri bilong Brata T. J. Sullivan. Bihain em i kamap wanpela bilong Lain Bilong Bosim Ol Witnes.
Em i givim planti gutpela tok long mi na em i makim gutpela pasin bilong mekim gut long ol narapela man. Wanpela taim em i mas skelim pasin bilong wanpela brata i bin mekim rong na em i tok: ‘Taim yumi skelim man, gutpela sapos yumi mekim pasin marimari maski yumi popaia, long wanem em pasin bilong Jehova. God Jehova i save marimari long ol man.’ Mi ting olsem: ‘Em gutpela tok!’—Sam 116:5.
Long 1953 N. H. Knorr i stap presiden bilong Sosaiti Was Taua na em i makim mi i stap wasman bilong dispela dipatmen. Mi lukautim wok bilong autim olgeta hap bilong Amerika. Jehova i helpim mi na inap 22 yia mi holim dispela wok. Long 1975 wanpela komiti i kirap lukautim dispela wok.
Long 1952 wanpela gutpela yangpela sista i kam long Betel. Em i bin mekim wok painia kirap long yia 1947. Nem bilong em Brook Thornton. Mi laikim em na em i laikim mi, olsem na long Me 1957 mitupela i marit. Brook i helpim mi long i stap amamas tru. Mitupela i amamas long wok wantaim long Betel.
Pasin Sekan i Kamapim Senis
Long 1969 wanpela samting i kamap na i senisim tru tingting bilong mi. Mi wantaim meri bilong mi, mitupela i go long “Pasin Sekan long Graun” kibung intenesenel long Tokyo, Japan. Mi tingting planti long i go long Japan, long wanem bipo mi birua tru long ol Japan. I hatwok long lusim tingting long ol samting i bin kamap bipo, long taim bilong pait. Mi bilipim tok bilong Baibel, tasol mi tingting olsem: Bai mi ting olsem wanem long ol Japan?
Mipela i stap liklik taim tasol long Japan, tasol mi senisim tru tingting bilong mi! Mi lukim ol i gutpela man bilong pasin daun na pasin isi. Nau ol i no laik tru long pait wankain olsem mi. Tingting bilong ol tu i senis bihain long yia 1945. Mi pilim tru.
Sik i Kisim Mi
Long 1979 wanpela sik i painim mi na ai bilong mi i go tudak na klok bilong bel i no wok gut. Na long 1981 wanpela bun long baksait i bagarap na nau mi no inap wokabaut. Tasol ol dispela hevi i lainim mi moa yet long wanpela bikpela samting, em olsem: Yumi mas pilim hevi bilong ol narapela man na sori long ol.
Nau mi no inap mekim wok olsem bipo mi mekim. Mi save mekim wok inap sampela aua tasol long olgeta de. Tasol mi amamas, long wanem mi stap yet long Komiti bilong Sevis-Dipatmen. Mi bin lukim lain bilong autim tok long Amerika i go bikpela. Long 1946 i gat 66,000 manmeri ol i save autim tok long Amerika, tasol long 1983 winim 640,000 ol i autim tok. Olgeta dispela manmeri, olsem mi, olgeta i stap sekan na wanbel aninit long Kingdom bilong God. Na mi amamas tru, long wanem long 1975, mama bilong mi i kisim baptais. Nau em i winim pinis 86 krismas, tasol em i wok yet long autim tok.
Mi tingting nau long Nupela Taim liklik taim bai Jehova i kamapim, na bai i no gat pait moa o pen, na ol man i no ken i dai moa. Baibel i tok: “God i promis pinis long wokim nupela skai na nupela graun, na bai stretpela pasin tasol i stap long en. Yumi wet long dispela samting tasol.” (2 Pita 3:13) Mi laik i stap long dispela “nupela graun” na lusim tingting olgeta long ol samting nogut bilong dispela pait bipo mi insait long en.
[Mep long pes 14]
(for fully formatted text, lukim Wastaua)
KANADA
ALASKA
Ol AILAN ALUSIAN
Atú
SOLWARA BERING
SAIBIRIA
[Piksa long pes 13]
Em piksa bilong Harley Miller taim em i stap long nevi bilong Amerika long 1945