Bilip Strong Moa Long Tok Bilong Ol Profet
“Olsem na mipela i save bilip strong moa long tok Bilong ol profet, na sapos yupela tu i holim strong tok bilong ol, em i gutpela. Tok bilong ol profet em i olsem lam i lait i stap long ples tudak.”—2 PITA 1:19.
1. Jisas i mekim wanem narakain tok long Matyu 16:21-28?
WOK Bilong Jisas long graun i laik pinis. Dispela “Pikinini Bilong Man” em i stap long Sisaria Filipai na em i tokim ol disaipel bilong em, liklik taim bai ol man i kilim em i dai, tasol bihain bai em i kam wantaim bikpela lait na strong bilong Papa bilong em. Em i tokim ol: ‘Mi tok tru long yupela: I gat sampela man i stap hia, ol i no inap i dai yet. Nogat tru. Pastaim ol i mas lukim Pikinini Bilong Man i kam olsem king.” (Matyu 16:21-28) Wanem insait bilong dispela tok?
2. (a) Pita na Jems na Jon i lukim wanem samting na dispela i truim dispela tok bilong Jisas? (b) Dispela samting ol i lukim em i makim wanem samting i mas kamap bihain?
2 Inap olsem 6-pela de bihain na Jisas kisim Pita na Jems na Jon i go long wanpela maunten i antap moa, ating em maunten Hemon. Ol tasol i stap na narakain samting i kamap! Jisas i kamap narakain. Ol i lukim pes na laplap bilong em i lait olsem san. Na ol i lukim Moses wantaim Ilaija tupela i toktok wantaim Jisas. Ol i no lukim tru, ol i lukim olsem piksa o driman. Tasol bilong wanem ol lukim Moses na Ilaija? Jisas em i “dispela profet” Baibel i tok em bai stap profet olsem Moses. Na Ilaija i mekim wanpela wok i wankain olsem wanpela wok Bilong Kingdom bilong God, em Jisas i king bilong en. (Aposel 3:22, 23; Diuteronomi 18:15-19; Malakai 4:5) Olsem na i stret ol i lukim Moses tupela Ilaija i stap wantaim Jisas, long wanem dispela samting ol i lukim i makim ol samting bai kamap bihain taim Jisas i kam olsem king wantaim biknem bilong Kingdom.—Matyu 17:1-5.
3. Jehova i tok wanem na yumi save dispela samting ol i lukim em i bikpela samting?
3 Na i stret ol i harim maus bilong Jehova long heven i tok: “Dispela em i Pikinini bilong mi, mi laikim em tumas, na mi belgut long em.” Na God i tok moa, olsem: “Yupela harim tok bilong em.”
4. (a) Bilong wanem yumi mas tingim dispela samting long nau? (b) 2 Pita 1:19 i tok long wanem “tok bilong ol profet”?
4 Ol aposel i ting olsem wanem long dispela narakain samting ol i lukim? Yumi mas ting olsem wanem long en? Tripela ten yia i go pinis na Pita i tingim yet dispela samting em i bin lukim long maunten. Em i tok: “Olsem na mipela i save bilip strong moa long tok bilong ol profet.” Wanem dispela “tok bilong profet”? Em ol tok profet olsem i stap long Danyel 7:13, 14, ol tok profet long Pikinini Bilong Man bai kamap king na em bai kam wantaim bikpela lait na strong bilong Kingdom. Long wanem ol samting ol i lukim taim Jisas i kamap narakain i truim ol dispela tok profet.—2 Pita 1:16-19; lukim tu Aisaia 9:6, 7.
5. Bihain i gat wanem ol narapela bikpela tok profet i insait long dispela “tok bilong ol profet”?
5 Taim Pita i mekim dispela tok, ol tok profet Jisas yet i bin mekim i insait long dispela “tok bilong ol profet.” Jisas i tok profet long Kingdom na long pinis bilong ‘dispela taim nau,’ na em i tok, “Pikinini Bilong Man i stap antap long klaut bilong heven na i kam, na em i gat bikpela strong na bikpela lait.” Em i kam long taim i gat planti hevi nogut tru long graun. (Matyu 24:3-14, 30, 31) Na bihain ol tok profet long kingdom Jisas i givim long lapun aposel Jon long Revelesen 1:12-16; 5:5-10; 11:15-17 na 14:14, 15, dispela tu i insait long dispela “tok bilong ol profet.”
Bilip Strong!
6. Bilong wanem yumi mas bilip strong moa long tok bilong ol profet long nau?
6 Pita wantaim ol poroman bilong em, ol i pilim tru dispela samting ol i bin lukim. Olsem na yumi mas pilim moa yet! Long wanem nau Pikinini Bilong man i kam Pinis olsem king. Em i sindaun pinis long sia king bilong em long Kingdom bilong heven. Olsem na nau yumi mas harim tok bilong em” moa yet! yumi mas bilip strong moa long tok bilong ol profet, long wanem dispela tok i olsem “lam i lait i stap long ples tudak.” Dispela tok i mas mekim bel bilong yumi i lait.—2 Korin 4:6.
7. (a) Pol i tok wanem na yumi save, tok profet em i bikpela samting? (b) Bilong wanem yumi mas harim gut dispela tok long nau?
7 Aposel Pol tu i tok yumi mas tingim gut ol tok profet long bel bilong yumi. Em i raitim pas i go long ol Kristen Hibru na em i tok, “Bipo long planti taim na long planti pasin God i givim tok long ol tumbuna bilong yumi long maus bilong ol profet.” Tasol “long dispela taim nau,” em taim bilong pinis bilong pasin na lo bilong ol Juda, God i autim tok long ol long maus bilong Pikinini bilong Em. Dispela tok profet Jisas i autim em i bikpela samting tru. Sapos ol i harim, ol inap kisim laip. Olsem na Pol i tok: “Dispela tok yumi harim pinis, yumi mas holimpas long tingting na bihainim.” (Hibru 1:1-4; 2:1) Nau yumi stap long taim bilong pinis bilong ‘pasin bilong dispela graun,’ olsem na yumi mas putim gut yau long tok bilong Jisas.—Matyu 24:3, 35; lukim tu Aisaia 55:6-11.
8. Tok bilong ol profet i mas kirapim yumi long mekim wanem? Dispela bai helpim yumi olsem wanem?
8 Yumi no ken harim tok bilong Jisas bilong kisim save tasol. Nogat! Dispela tok i mas kirapim yumi long mekim wok, yumi mas bihainim laik bilong God, na yumi mas mekim moa yet nau long “taim bilong bihain tru.” (Aisaia 2:2, 3, NW) Man bilong raitim sam em i toktok long God Jehova na em i tok: “Tok bilong yu i olsem lam bilong helpim mi wokabaut stret, na i olsem lait bilong soim rot long mi.” Dispela tok i helpim yumi long wokabaut long lait bilong tok i tru na i stap pren bilong God. Dispela tok i was long yumi, bambai yumi no ken surik i go bek long pasin bilong dispela graun, em Seten i bosim. (Sam 119:105; Jop 29:3, 4) Yumi mas laikim tumas Baibel na putim olgeta tok bilong en i go daun long bel bilong yumi bambai tok bilong ol profet i ken helpim yumi long olgeta taim bihain. Sapos yumi mekim olsem, oltaim bai bel i kirapim yumi long bihainim laik bilong God na bai yumi holimpas sori bilong God.—Mak 12:29-31; 1 Jon 4:16; Jut 20, 21.
Tok Bilong Givim Tingting long Yumi
9. (a) Olsem wanem na Baibel i no stori nating tasol long ol samting i bin kamap long bipo? (b) Baibel i makim wanem de bilong bekim pe nogut em i mas kamap?
9 Baibel i stori long planti samting nogut ol Isrel bilong bipo i bin mekim, em ol i bikhet na lusim God. Bilong wanem Baibel i stori long dispela? “Dispela ol stori i stap long Baibel bilong givim tingting long yumi man i stap nau long taim i klostu i laik pinis.” Olsem na yumi mas pret long mekim pasin nogut, nogut yumi “lusim bilip na i givim baksait long God i gat laip.” (1 Korin 10:11; Hibru 3:12; Jop 28:28) Baibel i no stori nating tasol long ol samting i bin kamap long bipo. Nogat! Ol dispela tok profet na tok bilong Jehova i soim yumi, liklik taim na bai God Jehova i bekim pe nogut gen. Em i bin bekim pe nogut long ol Isrel i lusim em long bipo, tasol nau bai em i mekim moa yet. Strafe bilong God i painim lain Isrel long 607 B.C.E. na 70 C.E. i olsem piksa na i makim ol samting liklik taim bai painim Krisendom na ol narapela tu. Belhat bilong God bai painim Krisendom. Olsem na yumi mas holimpas long tingting ol dispela tok bilong ol profet!—Jeremaia 7:28, 32-34; Matyu 24:3-22.
10, 11. (a) Yumi ken skelim wanem samting na bai yumi save, yumi stap long “las taim”? (b) Olsem wanem na dispela tok i stret long ol misin bilong Krisendom?
10 Tru tumas, yumi stap long “las taim” bilong dispela pasin nogut bilong graun, em Seten i bosim. Sapos yu skelim ol samting i kamap long graun wantaim tok bilong aposel Pol long 2 Timoti 3:1-5, 13, bai yu save tru, yumi stap long “las taim.” Dispela tok i stret long lain bilong Krisendom, em ol i bruk bruk long ol narapela narapela misin. Ol i “bihainim pasin bilong God long skin tasol,” ol i “givim baksait long strong bilong pasin bilong God.” Ol i no autim tok tru bilong helpim ol man long kisim laip.—Lukim tu Matyu 7:21-23.
11 I gat planti misin long Krisendom dispela i stret wantaim tok bilong profet bilong Jehova, em i tok: “I gat tupela samting nogut lain bilong mi ol i bin mekim. Ol i bin lusim mi [God Jehova], mi as bilong wara i gat laip, na ol i bin wokim ol narapela hul wara i bruk na wara i no inap pulap long en.” (Jeremaia 2:13, NW) Tru tumas, ol misin bilong Krisendom i bin lusim Nambawan Bikpela King Jehova na ol stretpela lo bilong em i stap long Baibel! Ol i no laik kolim nem bilong Em. Na ol i bin i go long “hul wara i bruk”—ol i bihainim tingting bilong ol man bilong dispela graun na tok politik bilong ol. Olsem na long planti hap bilong graun ol manmeri i lusim pinis ol dispela misin. Long wanem ol i no gat gutpela wara bilong givim long ol. Ol i no lainim ol man long tok i tru. Tasol planti gutpela tok bilong strongim ol man long spirit i stap long ol manmeri i stap gut long Jehova na mekim wok bilong Em.—Aisaia 55:1, 2; 65:13, 14.
Ol Hetman Bilong Graun i Tok Wanem?
12. Bilong wanem yumi no ken bilip long ol hetman bilong dispela graun?
12 Baibel i toksave olsem dispela graun i laik bagarap. Tasol ol narapela tu i mekim wankain toksave. Sekreteri-janeral bilong Yunaitet Nesen em i tok, nau, long namba wan taim, ‘yumi inap bagarap olgeta.’ Na bipo, long 1958, presiden bilong Amerika long dispela taim, em Harry Truman, em i tok: “Bagarap i laik painim yumi na bai yumi bagarap olgeta. . . . Sapos ol hetman bilong graun i no mekim sampela samting, liklik taim tasol na bai yumi bagarap.” Tasol namel long 1958 na 1984 “ol hetman bilong graun” i mekim wanem? Yu ting ol i bin mekim sampela samting bilong helpim yumi bambai yumi no ken bagarap? Nogat tru! Ol i save tromoi bikpela mani tru long olgeta taim bilong wokim ol bom nogut ol inap bagarapim yumi olgeta man na meri na pikinini. Man bilong raitim sam i stori long “ol hetman bilong graun” na em i tok: “Ol king na ol man bilong graun i no inap kisim bek yu. Olsem na nogut yu bilip long ol.”—Sam 146:3.
13, 14. (a) Ol bikpela bos bilong lotu i kirapim ol man long bilip long wanem samting em i no inap helpim ol? (b) Yumi mas bilip long wanem samting, olsem Aisaia i tok?
13 Ol man bilong dispela graun ol i no gat strong bilong pinisim dispela hevi. Yunaitet Nesen tu i no inap mekim. Ol lain bilong Yunaitet Nesen ol i save kros na tok pait. Yunaitet Nesen i no inap kamapim pasin sekan na gutpela taim long graun. Pop Paul VI na Pop John Paul II i bin i go long Yunaitet Nesen wantaim ol bilaspasin bilong man i gat nem na tupela wantaim i tok, Yunaitet Nesen tasol i rot bilong kamapim pasin sekan na helpim ol man i stap wanbel. Tasol yu ting dispela tok i stret?
14 Jehova i kirapim ol profet bilong em long makim rot tru bilong kamapim pasin sekan na gutaim long graun. Em i kirapim profet Aisaia long tokaut long wanpela meri i karim pikinini na dispela pikinini bai kamap “King Bilong Gutaim.” Dispela King em Krais Jisas. King Devit bilong bipo i olsem piksa bilong em. Aisaia i tok profet long wok bilong dispela “King Bilong Gutaim” na em i tok: “Wok king bilong em bai go bikpela, na gutaim i no ken pinis long sia king bilong Devit na long kingdom bilong em; na long stretpela lo na long stretpela pasin em i ken strongim na helpim dispela kingdom, kirap long nau na inap long olgeta taim bihain bihain. Strong bilong Jehova bilong ol ami bai mekim dispela samting.” (Aisaia 9:6, 7, NW) Tasol olsem wanem strong bilong Jehova bai kamapim “gutaim i no ken pinis”?
“Kingdom Bilong God i Kam Klostu Pinis”
15. Jisas i tok wanem long Kingdom?
15 King i winim king Devit, em King Krais Jisas, em i tok profet long ol bikpela pait na ol hevi i mas kamap long taim bilong yumi. Em i tok, bai ol samting nogut tru i kamap na bai ol lain man i pret. Bai ol i tingting long ol samting i laik kamap long graun, na bai bel bilong ol i pret tru. Tasol bihain em i tok: “Ol dispela samting i stat long kamap, long dispela taim yupela i mas sanap na litimapim het bilong yupela. Taim bilong God i kisim bek yupela em i kam klostu nau. . . . Sapos yupela i lukim ol dispela samting i kamap, orait yupela i ken save, kingdom bilong God i kam klostu pinis.” (Luk 21:10, 11, 25-31) Kingdom bilong God! Em rot bilong stretim hevi bilong ol man. Longtaim pinis yumi beten askim God long kamapim dispela Kingdom, a? Jisas i lainim yumi long beten olsem, em i tok: “Yupela i mas beten olsem: Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i bihainim long heven.”—Matyu 6:9, 10.
16. Olsem wanem kingdom bilong God “i kam klostu pinis”?
16 Tok bilong ol profet i soim yumi, “kingdom bilong God i kam klostu pinis.” Olsem wanem kingdom bilong God i kam klostu pinis? Wanpela profet bilong God, em Danyel, em i helpim yumi long save long dispela samting. Danyel i stori long ol kingdom o gavman bilong ol man i stap long “taim bilong pinis,” na bihain em i tok: “Long taim bilong ol dispela king God bilong heven bai kamapim wanpela kingdom i no inap bagarap. Ol narapela lain man i no ken kisim dispela kingdom. Em bai bagarapim na pinisim ol dispela narapela kingdom, na em wanpela bai stap inap long taim bihain bihain.” (Danyel 12:4, NW; 2:44, NW) Olsem na graun i no ken bagarap long wanpela pait nuklia na bai olgeta manmeri i bagarap. Nogat. Kingdom bilong God bai pinisim ol man nogut na bai kingdom bilong God long han bilong “King Bilong Gutaim” i bosim dispela graun.—Aisaia 9:6, NW.
God i Bekim Pe Nogut
17. Taim ol man i tok, “Em i gutaim nau, yumi stap gut,” wanem samting bai kamap?
17 Planti tok profet bilong Baibel i makim taim bilong yumi, na yumi inap save long ol samting liklik taim bai kamap. “Olgeta tok ol i bin raitim bipo, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na bilip na wetim God i kisim yumi.” (Rom 15:4) Ol man i tok, Yunaitet Nesen tasol inap kamapim gutaim long graun. Tasol ol profet bilong Baibel i tok, dispela lain ol i olsem wanpela retpela wel abus. Ol bai mekim sampela samting na bai ol i tok, “Em i gutaim nau, yumi stap gut.” Long 1 Tesalonaika 5:3 Baibel i tok ol bai mekim olsem. Tasol dispela ‘gutaim’ bilong ol em i bilong liklik taim tasol. Jehova bai kirapim ol ami bilong ol “kom” bilong Yunaitet Nesen na bai ol i bagarapim olgeta lotu giaman, em “bikpela taun Babilon.” Ol misin bilong Krisendom tu bai bagarap, long wanem ol i gat bikpela asua. Bihain ol dispela “kom” bai kirapim pait long Pikinini Sipsip, em Krais Jisas. Ol bai mekim olsem wanem? Ol bai kirapim pait long ol witnes bilong Jehova, em ol i laikim tumas pasin sekan. Taim ol i mekim olsem, bainat bilong God Jehova bai painim ol dispela lain wantaim ami bilong ol. Bai God i bekim pe nogut long ol na “ol i no inap abrusim dispela samting.”—Revelesen 17:3-6, 12-17.
18. (a) Wanem samting bai painim ol lain man i kirapim pait long lain bilong God, olsem ol profet i tok? (b) Bihain bai God i mekim wanem?
18 Ol bom nuklia i no inap helpim ol lain man long pait bilong Amagedon, em “dispela bikpela de bilong God I Gat Olgeta Strong.” (Revelesen 16:14, 16) Sapos ol i mekim wok long ol dispela bom nogut nogut, em bilong bagarapim ol yet tasol. Long taim bilong gutpela King Jehosafat bilong Juda, ol birua i kam kirapim pait long lain bilong God. Tasol long maus bilong profet bilong em, God Jehova i tokim ol: “Yupela i no ken pret o guria long dispela bikpela lain; long wanem dispela pait em i no bilong yupela, em i pait bilong God.” Jehova i putim sampela man i hait na ol birua i longlong nabaut na “katim ol poroman bilong ol long bainat” na olgeta i bagarap. (2 Kronikel 20:15-23, NW. lukim tu Ol Hetman 7:22; Esikiel 38:21-23; Sekaraia 14:13.) Dispela “King bilong olgeta king,” em God i bin makim em, em wantaim ol ami bilong em long heven bai pinisim olgeta birua. Seten wantaim ol ensel nogut tu. Bai ol i kalabus long hul i no gat as.—Revelesen 19:11-16, 21; 20:1-3.
19. (a) Tok bilong Jenesis 18:23-33 i lainim yumi olsem wanem? (b) Husat tasol ol i no ken lus long taim bilong “bikpela hevi tru”?
19 Tasol olsem wanem? Sapos Jehova i pinisim pasin bilong dispela graun olgeta na i no ken kamap gen, ating em i samting nogut? Ating sampela man i ting olsem. Ating ol i gat tingting wankain olsem Ebraham long Sodom na Gomora, olsem sapos i gat 50, o 45, o 30, o 20, o 10-pela gutpela man tasol, orait, “Jas bilong olgeta graun em i mas bihainim stretpela pasin” na em i no ken bagarapim dispela pasin olgeta. (Jenesis 18:23-33) Tasol tok bilong ol profet i makim dispela pasin Seten i bosim i nogut olgeta. Olgeta liklik hap bilong en i nogut na i mas pinis olgeta! (Jeremaia 25:31-33; Sefanaia 3:8) Ol manmeri i no ken lus long taim bilong “bikpela hevi tru,” em ol manmeri ol i dediket long God. Ol manmeri God “i makim ol pinis,” olsem Jisas i tok, wantaim ol poroman bilong ol, ol “arapela sipsip.” Long ai bilong Jehova ol narapela man i no gutpela man.—Matyu 24:21, 22; 25:31-33, 46; Jon 10:16; Habakak 3:1, 2, 12, 13.
20. Yumi ol Witnes Bilong Jehova, yumi mas mekim wanem nau long las taim?
20 Tok bilong ol profet bilong Jehova i ‘hariap’ long kamap tru olgeta. Olsem na yumi mas “tingim na wetim i stap.” (Habakak 2:3, NW) Yumi ol witnes bilong Jehova yumi mas tokaut strong long “de bilong God bilong yumi bilong bekim pe nogut.” Olsem ol aposel bilong Jisas, yumi ‘no ken pret’ long autim gutpela tok long ol manmeri i bel hevi. (Aisaia 61:1, 2; Aposel 4:8-13, 18-20). Oltaim yumi mas was gut. Yumi mas bihainim tok bilong Jisas, em i tok: “Tasol yupela lukaut gut. Nogut yupela i dring nabaut oltaim na yupela i spak. Nogut yupela i wari long samting bilong bodi. Sapos pasin olsem em i karamapim yupela, orait bai dispela de bilong Bikpela em i painim yupela wantu tasol, olsem spia i save painim abus. Dispela de bai i kamap long olgeta man i stap long olgeta hap bilong graun. Oltaim oltaim yupela i mas was i stap. Na yupela i mas beten oltaim long God i givim strong long yupela. Olsem na bai yupela i abrusim olgeta dispela samting i laik kamap, na bai yupela i sanap long ai bilong Pikinini Bilong Man.”—Luk 21:34-36.
Bai yu bekim wanem tok?
□ 2 Pita 1:16-19 na ol narapela skripsa olsem i lainim yumi long wanem samting?
□ Sapos yumi “bilip strong moa long tok bilong ol profet,” dispela bai helpim yumi olsem wanem?
□ Ol profet i tok wanem samting i klostu? Bilong wanem yumi no ken pret?
□ ‘De bilong God bilong bekim pe nogut’ i klostu pinis, olsem na yumi mas mekim wanem?