Yumi Mas Bilip Long Ol Tok Profet Bilong God!
“Mipela i save bilip strong moa long tok bilong ol profet.”—2 PITA 1:19.
1, 2. Wanem namba wan tok profet ol i bin raitim long Baibel? Wanem wanpela askim i kamap long dispela tok profet?
JEHOVA yet i As bilong namba wan tok profet ol i raitim long Baibel. Taim Adam na Iv i mekim sin pinis, God i tokim snek: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [olsem pikinini] bilong meri. Bai [em] i krungutim het bilong yu, na bai yu kaikaim lek bilong [em].” (Stat 3: 1-7, 14, 15) Ol man i no inap kisim gut as bilong dispela tok profet i go inap long planti handet yia bihain.
2 Dispela namba wan tok profet i mekim na ol sinman bilong graun ol inap wetim gutpela samting bai kamap bihain. Bihain Baibel i kamapim klia olsem Satan em dispela “snek bilong bipo yet.” (KTH 12:9) Tasol husat dispela Pikinini em God i tok promis long kamapim?
Ol i Laik Save Husat Dispela Pikinini
3. Olsem wanem Abel i kamapim bilip bilong em long dispela namba wan tok profet?
3 Abel i no olsem papa bilong em. Abel em i man bilong God na em i bilip long dispela namba wan tok profet. Ating em i save olsem blut i mas kapsait bilong karamapim sin bilong man. Olsem na bilip i kirapim em long kilim wanpela animal na mekim ofa long God, na God i orait long dispela ofa. (Stat 4:2-4) Tasol i no gat man i save husat dispela Pikinini em God i tok promis long kamapim—dispela samting i stap hait.
4. God i mekim wanem tok promis long Abraham? Dispela tok i makim wanem samting bilong dispela Pikinini God i bin tok promis long kamapim?
4 Inap olsem 2,000 yia bihain long taim bilong Abel, Jehova i mekim tok promis long Abraham i olsem wanpela tok profet, em i tok: “Tru tumas bai mi mekim gut long yu na bai mi mekim ol pikinini bilong yu i kamap planti olsem ol sta long skai . . . Na long rot bilong pikinini bilong yu olgeta lain bilong graun bai kisim blesing, long wanem, yu bin bihainim tok bilong mi.” (Stat 22:17, 18, NW ) Ol dispela tok i kamapim klia olsem Abraham i insait long truim bilong namba wan tok profet. Ol i makim olsem dispela Pikinini em God bai mekim wok long rot bilong em bilong pinisim olgeta wok bilong Satan, em bai kamap long lain bilong Abraham. (1 Jon 3:8) “God i bin promis long mekim ol dispela samting, na Abraham i ting long dispela promis na em i no tubel na em i no lusim bilip,” na ol narapela witnes bilong Jehova i bin stap paslain long taim bilong ol Kristen, ol tu i no surik na lusim bilip, maski ol i “no kisim gutpela samting God i bin promis long givim ol.” (Rom 4:20, 21; Hibru 11:39) Ol i bilip strong long tok profet bilong God.
5. Husat i truim dispela tok promis bilong God long wanpela Pikinini bai kamap? I gat wanem as na yu bekim tok olsem?
5 Aposel Pol i kamapim klia husat dispela Pikinini God i bin promis long kamapim taim em i tok: “Bipo God i bin tok long gutpela samting bai i kamap bihain. Dispela promis God i givim long Abraham wantaim pikinini bilong en. Buk bilong God i no tok olsem, ‘Long ol pikinini bilong yu.’ Em i no tok long planti pikinini. Nogat. Em i tok long wanpela tasol, na i tok olsem, ‘Long pikinini bilong yu.’ Dispela pikinini em Krais.” (Galesia 3:16) Dispela Pikinini em olgeta lain bai kisim blesing long rot bilong en, i no olgeta tumbuna pikinini bilong Abraham, nogat. Ol lain i bin kamap long pikinini bilong em Ismael na long ol pikinini bilong em Ketura i bin karim, Jehova i no mekim wok long rot bilong ol long mekim gut long olgeta lain bilong graun, nogat. Dispela Pikinini em olgeta lain bai kisim blesing long en, em i kamap long rot bilong pikinini bilong em Aisak na tumbuna pikinini bilong em Jekop. (Stat 21:12; 25:23, 31-34; 27:18-29, 37; 28:14) Jekop i soim olsem “olgeta lain manmeri” bai stap aninit long Silo bilong lain Juda, tasol bihain God i makim olsem dispela Pikinini bai kamap long lain bilong Devit stret. (Stat 49:10; 2 Samuel 7:12-16) Ol Juda long taim bilong ol aposel ol i wetim wanpela man tasol i kam olsem Mesaia, o Krais. (Jon 7:41, 42) Na Pikinini bilong God, em Jisas Krais, em i truim dispela tok profet bilong God long wanpela Pikinini bai kamap.
Mesaia i Kamap!
6. (a) Yumi ken ting olsem wanem long tok profet bilong 70 wik? (b) Wanem taim Jisas i bin “lusim olgeta sin”? Em i mekim olsem wanem?
6 Profet Daniel i bin raitim wanpela bikpela tok profet long Baibel i toktok long Mesaia. Long namba wan yia bilong Darius bilong kantri Midia i stap king, Daniel i kisim save olsem dispela 70 yia em Jerusalem i mas bagarap na i stap nating, klostu em bai pinis. (Jeremaia 29:10; Daniel 9:1-4) Taim Daniel i beten i stap, ensel Gebriel i kam long em na i kamapim klia olsem ‘God i makim pinis 70 taims 7-pela yia [olsem 70 wik] long em bai i lusim olgeta sin bilong ol manmeri.’ Ol bai i kilim i dai Mesaia long namel bilong namba 70 wik. Dispela “70 taims 7-pela yia,” o 70 wik, i kirap long yia 455 B.C.E., taim King Artaserksis Namba Wan bilong Persia i putim ‘tok bilong wokim gen Jerusalem.’ (Daniel 9:20-27, na lukim sta daunbilo; Nehemia 2:1-8) Mesaia bai kamap bihain long 7-pela wik na 62 wik. Dispela 483 yia i kirap long yia 455 B.C.E. na i go inap long yia 29 C.E., taim Jisas i kisim baptais na God i makim em long spirit holi olsem Mesaia, o Krais. (Luk 3:21, 22) Long yia 33 C.E. Jisas i “lusim olgeta sin” taim em i givim laip bilong em olsem pe bilong baim bek ol man. (Mak 10:45) Em nau, i gat as tru na yumi ken bilip long ol tok profet bilong God!a
7. Mekim wok long Baibel na stori long olsem wanem Jisas i bin truim ol tok profet i toktok long Mesaia?
7 Sapos yumi bilip long ol tok profet bilong God, bai yumi inap save olsem Mesaia em i husat. Na Ol Skripsa Hibru i gat planti tok profet i tok long Mesaia, na i gat sampela tok profet em ol man bilong raitim Ol Skripsa Grik i tokaut klia olsem ol i makim Jisas. Olsem: Wanpela nupela meri i bin karim Jisas long Betlehem. (Aisaia 7:14; Maika 5:2; Matyu 1:18-23; Luk 2:4-11) God i singautim em long lusim Isip, na taim mama i karim em pinis, ol i kilim i dai ol liklik pikinini. (Jeremaia 31:15; Hosea 11:1; Matyu 2:13-18) Jisas i karim ol sik bilong yumi. (Aisaia 53:4; Matyu 8:16, 17) Olsem Baibel i tok profet long en, em i sindaun long yangpela donki na em i go insait long Jerusalem. (Sekaraia 9:9; Jon 12:12-15) Tok bilong man bilong raitim Song i kamap tru taim ol i nilim pinis Jisas long pos na ol soldia i tilim ol klos bilong em na ol i kisim, na ol i pilai satu bilong makim husat bai kisim siot bilong em. (Song 22:18; Jon 19:23, 24) Ol i no bin brukim wanpela bun bilong Jisas, na ol i sutim skin bilong em long spia, na dispela i truim tok profet. (Song 34:20; Sekaraia 12:10; Jon 19:33-37) Em sampela tok profet long Mesaia ol man bilong raitim Baibel i tokaut olsem ol i makim Jisas—na spirit bilong God yet i bin kirapim ol long raitim ol dispela tok.b
Litimapim Nem Bilong King Mesaia!
8. Dispela Man bilong bipo bipo yet em i husat? Tok profet i stap long Daniel 7:9-14, truim bilong en i bin kamap olsem wanem?
8 Long namba wan yia bilong Belsasar i stap king long Babilon, Jehova i givim wanpela driman na sampela piksa olsem driman long profet Daniel. Pastaim Daniel i lukim 4-pela traipela animal. Ensel bilong God i tokaut olsem ol dispela animal em “4-pela strongpela kantri,” olsem 4-pela king, na dispela i makim olsem ol i piksa bilong ol bikpela gavman bilong bosim graun, em narapela bai kamap bihain long narapela. (Daniel 7:1-8, 17) Orait nau Daniel i lukim Jehova, em “Man bilong bipo bipo yet,” i sindaun long sia king bilong em. Em i skelim ol dispela animal long kot na i makim ol olsem animal nogut, na em i rausim ol long wok king na em i bagarapim namba 4 animal. Orait nau Jehova i givim wok king long “wanpela man i kain olsem yumi man bilong graun,” na em bai stap king oltaim na bosim “olgeta manmeri bilong olgeta kantri na olgeta lain na olgeta tok ples.” (Daniel 7:9-14) Em gutpela tok profet tru bilong taim “Pikinini Bilong Man,” Jisas Krais, i kamap King long heven long 1914!—Matyu 16:13.
9, 10. (a) Ol narapela narapela hap bilong dispela imis long driman ol i makim wanem samting? (b) Bai yu stori olsem wanem long truim bilong Daniel 2:44?
9 Daniel i save pinis olsem God i save ‘mekim ol man i kamap king na em i save rausim ol king long wok bilong ol.’ (Daniel 2:21) Daniel i bilip long Jehova, “em i save kamapim as bilong ol samting i hait,” olsem na Daniel i kamapim as bilong driman bilong King Nebukatnesar bilong Babilon, em i bin driman long wanpela traipela imis. Ol narapela narapela hap bilong imis i makim ol bikpela gavman bilong graun i kamap na bihain ol i pundaun, olsem Babilon, Midia wantaim Persia, Grik, na Rom. Na God i givim wok long Daniel long raitim stori bilong ol bikpela samting bai kamap, i kam inap long taim bilong yumi na bihain long en tu.—Daniel 2:24-30.
10 Tok profet i tok olsem: “Taim ol dispela king i stap yet God bai i kirapim wanpela kingdom. . . Em bai i daunim ol na bagarapim ol arapela king na kingdom bilong en bai i stap oltaim.” (Daniel 2:44) “Taim God i bin makim bilong ol arapela lain,” em i pinis long 1914, na long dispela taim God i kamapim Kingdom bilong heven, em Krais i bosim. (Luk 21:24; KTH 12:1-5) Long strong bilong God ol i katim wanpela “ston,” em Kingdom bilong Mesaia, long “maunten,” em wok king bilong God, em i nambawan Bos bilong heven na graun. Long Armagedon dispela ston bai kam paitim dispela imis na brukim na wilwilim olgeta na i kamap olsem pipia. Kingdom bilong Mesaia bai stap strong oltaim oltaim, olsem wanpela bikpela maunten, o gavman, em strong bilong en i go long “olgeta hap bilong graun.”—Daniel 2:35, 45; KTH 16:14, 16.c
11. Taim bodi bilong Jisas i kamap narapela kain, dispela i olsem piksa bilong wanem samting bilong bihain? Dispela samting olsem driman em i mekim wanem long Pita?
11 Jisas i tingim taim em bai stap King long Kingdom, olsem na em i tokim ol disaipel: “Mi tok tru long yupela, sampela man i sanap hia bai ol i no i dai yet, na bai ol i lukim Pikinini Bilong Man i kam olsem king.” (Matyu 16:28) Inap 6-pela de bihain, Jisas i kisim Pita, Jems na Jon i go antap long wanpela maunten, na long ai bilong ol, bodi bilong em i kamap narapela kain. Wanpela klaut i lait tumas i karamapim ol aposel, na God i tokaut olsem: “Dispela em i Pikinini bilong mi, mi laikim em tumas, na mi amamas long em. Yupela harim tok bilong em.” (Matyu 17:1-9; Mak 9:1-9) Man! Ol i lukim piksa bilong taim Krais bai kamap King long Kingdom! Olsem na bihain Pita i stori long dispela samting em i bin lukim olsem piksa na em i tok: “Olsem na mipela i save bilip strong moa long tok bilong ol profet.”—2 Pita 1:16-19.d
12. Bilong wanem nau em i taim stret bilong kamapim klia olsem yumi bilip long ol tok profet bilong God?
12 Dispela “tok bilong ol profet” i no makim ol tok profet i stap long Ol Skripsa Hibru tasol na i toktok long Mesaia, nogat; em i makim tu tok bilong Jisas olsem em bai kam “wantaim bikpela strong na bikpela lait bilong en.” (Matyu 24:30) Taim bodi bilong Jisas i kamap narapela kain, dispela i strongim tok profet long Krais bai kam wantaim bikpela strong na lait bilong Kingdom. Liklik taim nau na em bai kamap ples klia wantaim bikpela lait, na ol man i no bilip ol bai bagarap, na ol man i bilip ol bai kisim blesing. (2 Tesalonaika 1:6-10) Ol tok profet i kamap tru na dispela i kamapim klia olsem yumi stap long “taim bilong las de.” (2 Timoti 3:1-5, 16, 17; Matyu 24:3-14) Maikel, olsem Jisas Krais, em Man God i bin makim bilong givim strafe long ol man, na em i sanap na i redi i stap bilong pinisim dispela pasin nogut bilong graun long taim bilong “bikpela hevi tru.” (Matyu 24:21; Daniel 12:1) Olsem na nau em i taim stret bilong kamapim klia olsem yumi bilip long ol tok profet bilong God.
Bilip Strong Long Tok Profet Bilong God
13. Wanem samting inap helpim yumi long holimpas pasin bilong laikim tru God na bilip strong long tok bilong em?
13 Taim yumi bin kisim save nupela yet long truim bilong ol tok profet bilong God, yumi amamas tru, a? Tasol nau long dispela taim, nogut bilip bilong yumi i wok long go liklik na pasin bilong yumi long laikim tru Jehova em i laik pinis. Yumi no ken kamap wankain olsem ol Kristen long Efesus, em ‘taim ol i bilip nupela, ol i bin laikim tru Jisas, tasol nau nogat.’ (KTH 2:1-4) Maski yumi bin mekim wok bilong Jehova inap sotpela taim o longpela taim, yumi olgeta inap surik sapos yumi no “wok pastaim long painim kingdom bilong God wantaim stretpela pasin bilong em” na bungim ol gutpela samting bilong yumi long heven. (Matyu 6:19-21, 31-33, Nupela Testamen na Ol Sam) Sapos yumi wok strong long stadi long Baibel, na bekim tok oltaim long ol miting Kristen, na givim bel long autim tok bilong Kingdom, dispela bai helpim yumi long holimpas pasin bilong laikim tru Jehova, na Pikinini bilong em, na Baibel. (Song 119:105; Mak 13:10; Hibru 10:24, 25) Em nau, dispela bai mekim na yumi bai bilip strong yet long Tok Bilong God.—Song 106:12.
14. Ol Kristen God i bin makim, ol i bilip long ol tok profet bilong Jehova na ol i kisim wanem prais?
14 Planti tok profet bilong God i bin kamap tru long bipo, na olsem tasol yumi ken bilip long ol tok profet bilong ol samting i mas kamap bihain. Olsem: Krais i kam i stap pinis olsem King long Kingdom, na ol Kristen God i bin makim long spirit holi na ol i stap gut long em i go inap long taim ol i dai, wanpela tok promis i kamap tru pinis long ol, em i tok: “Sapos man i winim pait, bai mi larim em i kisim kaikai long diwai bilong givim laip. Dispela diwai i stap long heven, long gaden bilong God.” (KTH 2:7, 10; 1 Tesalonaika 4:14-17) Ol man i winim pait, Jisas i larim ol i “kisim kaikai long diwai bilong givim laip” long “gaden bilong God” i stap long heven. Taim ol i kirap bek, na long rot bilong Jisas Krais, ol i kisim laip i stap oltaim oltaim na ol i no inap i dai, na ol i kisim laip i no inap bagarap, em Jehova yet i givim long ol, em i “King bilong olgeta taim. Em i no save dai, na yumi manmeri yumi no inap lukim em. Em wanpela tasol em i God tru.” (1 Timoti 1:17; 1 Korin 15:50-54; 2 Timoti 1:10) Em gutpela prais tru ol i kisim long holimpas pasin bilong laikim tru God na bilip strong long ol tok profet bilong em!
15. Long rot bilong wanem lain God i wokim as bilong “nupela graun”? Husat ol i poroman bilong ol?
15 Ol man God i bin makim long spirit holi na ol i dai pinis, taim ol i kirap bek na i go antap long “gaden bilong God” long heven, i no longtaim na liklik hap lain bilong Israel bilong spirit i stap yet long graun ol i lusim kalabus bilong ‘Bikpela Babilon,’ em olgeta lotu giaman bilong graun. (KTH 14:8; Galesia 6:16) Long rot bilong dispela lain yet God i wokim as bilong “nupela graun.” (KTH 21:1) Olsem na “wanpela kantri” i kamap nupela, olsem paradais bilong spirit nau i stap long olgeta hap. (Aisaia 66:8) Planti tausen poroman bilong lain Israel bilong spirit, em ol i gat pasin olsem sipsip, ol i wok long kam insait long dispela kantri nau long taim bilong yumi, em dispela “taim bai i kamap bihain.”—Aisaia 2:2-4; Sekaraia 8:23; Jon 10:16; KTH 7:9.
I Stap Bilong Ol Man Long Bihain
16. Ol gutpela poroman bilong lain God i bin makim, olsem wanem long i stap bilong ol long bihain?
16 Ol gutpela poroman bilong lain God i bin makim, olsem wanem long i stap bilong ol long bihain? Ol tu i bilip long ol tok profet bilong God, na ol i wet long go insait long Paradais bai kamap long graun. (Luk 23:39-43, NW ) Long dispela Paradais ol bai dring long wanpela “wara bilong givim laip,” na “ol lip bilong diwai” i kamap long arere bilong en bai oraitim ol. (KTH 22:1, 2) Sapos yu wet long kisim gutpela sindaun tru olsem, yu mas wok yet long kamapim klia olsem yu laikim tru Jehova na yu bilip long ol tok profet bilong em. I gutpela tru long yu ken insait long dispela lain ol bai i stap oltaim oltaim long dispela Paradais bilong graun.
17. Ol lain i stap long Paradais bilong graun ol bai kisim wanem ol gutpela blesing?
17 Yumi ol man bilong graun i hatwok long stori gut long i stap bilong yumi long dispela Paradais bai kamap long graun, tasol ol tok profet bilong God i givim gutpela tingting na save long yumi long ol blesing ol man i bihainim tok bilong God ol bai kisim. Taim Kingdom bilong God tasol i bosim graun na ol man bai mekim laik bilong em long graun olsem ol i mekim long heven, i no gat wanpela man nogut—o wanpela animal—bai “mekim nogut long narapela.” (Aisaia 11:9; Matyu 6:9, 10) Ol man i gat pasin daun bai ol i stap long graun, na “bai ol i sindaun gutpela tumas na amamas i stap.” (Song 37:11) Bai i no gat hangre, long wanem, ‘planti rais na wit samting bai i kamap long ol gaden bilong ol manmeri.’ (Song 72:16) Ol man i no ken bel hevi na krai moa. Ol sik bai pinis, na dai tu bai pinis. (Aisaia 33:24; KTH 21:4) Bai i no gat ol dokta, o marasin, o haus sik, o haus sik bilong ol man i gat sik bilong tingting, na i no gat ol bung bilong planim ol man i dai pinis. Em gutpela samting tru bai kamap, a?
18. (a) Ensel bilong God i tok wanem long Daniel? (b) God bai “makim” wanem samting bilong Daniel?
18 Ol matmat tu bai i no gat man moa i stap insait long en, long wanem, ol man i dai pinis bai kirap bek. Stretpela man Jop i bilip na wet long dispela samting. (Jop 14:14, 15) Profet Daniel tu i mekim olsem, long wanem, ensel bilong Jehova i mekim gut bel bilong em na i tok: “Nau yu mas i stap strong i go inap long [pinis]. Bai yu dai, tasol bihain bai yu kirap bek na long las de bai yu kisim ol samting God i bin makim bilong yu.” (Daniel 12:13) Daniel i bin stap gut long wok bilong God i go inap long taim em i dai. Nau em i malolo, tasol bihain bai em i “kirap bek” long taim “ol stretpela man i kirap bek long matmat” insait long Wan Tausen Yia Bilong Krais i Stap King. (Luk 14:14) Orait God bai “makim” wanem samting bilong Daniel? Truim bilong tok profet bilong Esekiel long Paradais i makim olsem olgeta manmeri bilong Jehova bai i gat ples bilong ol, na Jehova bai tilim hap graun i go long ol na mekim long pasin i stret tasol. (Esekiel 47:13–48:35) Olsem na Daniel bai i gat ples bilong em long Paradais, tasol God i no makim wanpela hap graun tasol bilong em, nogat. Em bai insait tu long sampela samting Jehova bai mekim bilong kamapim laik bilong em.
19. Bilong i stap long Paradais bilong graun, yumi mas mekim wanem?
19 Orait olsem wanem long yu? Sapos yu bilip long Tok Bilong God, yu gat bikpela laik tru long i stap long Paradais bilong graun, a? Ating yu save tingim olsem yu stap pinis long dispela ples, na yu kisim ol gutpela blesing bilong en, olsem yu gat wok long lukautim gut graun, na amamas long sekanim ol man i kirap bek long matmat. Na i stret yu gat dispela tingting, long wanem, Paradais em ples tru bilong yumi ol manmeri. God i bin wokim namba wan man na meri bilong i stap long kain ples olsem. (Stat 2:7-9) Na ol manmeri i bihainim tok bilong em, em i laik bai ol i ken i stap oltaim oltaim long Paradais. Orait olsem wanem long yu? Bai yu mekim ol samting i stret wantaim tok bilong Baibel bambai yu ken stap namel long ol dispela planti milion milion manmeri bihain bai ol i stap long Paradais bilong graun? Yu inap i stap long dispela ples sapos yu laikim tru Papa bilong yumi Jehova na yu bilip strong long ol tok profet bilong God.
[Ol Futnot]
a Lukim sapta 11 bilong buk Pay Attention to Daniel’s Prophecy! na “Seventy Weeks” long buk Insight on the Scriptures, Sosaiti Wastaua Bilong Nu Yok i wokim.
b Lukim buk “All Scripture Is Inspired of God and Beneficial,” pes 343, 344, Sosaiti Wastaua Bilong Nu Yok i wokim.
c Lukim sapta 4 na 9 bilong buk Pay Attention to Daniel’s Prophecy!
d Lukim stori, “Putim Yau Long Ol Tok Profet Bilong God,” i stap long Wastaua bilong Epril 1, 2000.
Bai Yu Bekim Olsem Wanem?
• Wanem namba wan tok profet i bin kamap? Husat dispela Pikinini God i bin tok promis long kamapim?
• Wanem sampela tok profet long Mesaia em Jisas i bin truim?
• Truim bilong Daniel 2:44, 45 bai kamap olsem wanem?
• Ol man i bihainim tok bilong God, olsem wanem long i stap bilong ol long bihain, olsem tok profet bilong God i makim?
[Piksa long pes 18]
Yu laik i stap long Paradais long graun?