Yupela Ol Wasman, Singaut Strong!
“Harim! Ol wasman bilong yupela yet, ol i singaut.”—AISAIA 52:8, NW.
1, 2. (a) Yumi gat wanem askim long tok bilong Aisaia 52:8? (b) Wanpela pasto i tok wanem long dispela samting?
HUSAT ol dispela wasman? Ating em ol pris pasto bilong ol misin bilong Krisendom? Orait, ol pris pasto bilong Krisendom i autim wanem tok long nau long Kingdom bilong God? Lukim tok bilong dispela pasto:
2 Wanpela pasto long Yuneveseti bilong Abadin, long Skotlan, em i tok:
“Insait long 16 yia i go pinis [1963-1978] mi inap tingim tupela taim tasol mi bin harim pasto i autim tok long Kingdom bilong God long haus lotu. . . . Mi kirap nogut long dispela samting. Bilong wanem ol i pasim maus? Tok bilong Kingdom bilong God em i nambawan tok Jisas i autim . . . Bilong wanem ol manmeri i no autim tok long Kingdom bilong God? Ating bai ol i bekim tok olsem: ‘Mipela i no bin lain long mekim.’”
3. Tok bilong Aisaia 56:10,11 i stret long husat long nau?
3 Ol pris pasto i no autim tok long Kingdom bilong God ol i no save long as bilong gutnius. Ol i no bihainim tok bilong Aisaia. Ol i no kirap. Ol i no inap autim tok long wanpela samting i moa gutpela, long wanem ol i save tasol long ol bilip na tok bilong dispela graun. Ol i olsem ‘ol wasman i aipas,’ olsem Aisaia 56:10, 11 i stori long ol.
4. (a) Olsem wanem ol wasman bilong Aisaia 52:8 i narapela kain long ol pris pasto long nau? (b) Bilong wanem yumi mas tenkyu long Bikpela Tisa bilong yumi?
4 Dispela pasto i tok, ol i no save autim tok long Kingdom bilong God, long wanem “Mipela i no bin lain long mekim.” Tasol gutpela tru i gat sampela wasman em ol i save autim tok long Kingdom bilong God long nau. Ol inap mekim wok, long wanem ol i bin lain na ol i lain yet long mekim. Profet bilong God i tok long ol dispela man taim em i tok: Jehova em i God bilong mekim kot. Olgeta man i wet long Em, ol i ken amamas . . . Bikpela Tisa bilong yupela long ai bilong yupela yet. Na bai yupela i harim tok, olsem: ‘Em rot hia. Yupela i mas bihainim dispela rot’ Yupela i no ken lusim rot i go long han sut o long han kais.”—Aisaia 30:18, 20, 21, NW.
5. (a) Jehova i mekim wanem long rot bilong oganaisesen bilong em bilong helpim lain bilong em? (b) Taim yumi skelim ol samting bilong Kingdom long nau , olsem wanem ol Witnes Bilong Jehova i wankain olsem Jisas na ol aposel bilong em?
5 Ol Witnes Bilong Jehova i lain long Kingdom bilong God. Ol i no i go long bikpela skul seminari bilong ol misin bilong Krisendom. Nogat. Ol i go long Skul Bilong Wok Autim Tok long Haus Kingdom long olgeta wik. Long dispela skul ol i lain long autim gut tok long ol haus, na mekim Baibel-stadi na lainim ol man i laik save long tok bilong Kingdom. Jehova yet i givim dispela skul long ol long rot bilong oganaisesen bilong em, em i tok: “Jehova i bin skulim olgeta pikinini bilong yu, na ol dispela pikinini bilong yu bai stap bel isi.” Ol Witnes Bilong Jehova i save tru long Kingdom bilong God, na ol i save dispela Kingdom bai kamapim planti gutpela samting hia long graun na helpim tru ol manmeri. Olsem Jisas na ol aposel, ol tu i save beten long God na tok, ‘Kingdom bilong yu i mas i kam.’ Ol i wok strong long autim tok long dispela Kingdom.—Aisaia 54:13, NW; Matyu 4:17; 6:10; 10:7; 12:21; 24:14.
Ol Wasman, Yupela Mas Singaut!
6. (a) Husat ol i olsem ‘ol wasman’ long nau? Ol i mekim wanem wok? (b) Dispela “wasman” i autim wanem tok? Ol i mekim wok long wanem samting bilong helpim ol long autim dispela tok?
6 Long Baibel, planti taim ol profet bilong God i tok long ol wasman. Ol wasman bilong bipo, ol i save was i stap na taim ol i lukim ol birua i kam, ol i toksave long ol man. Long Aisaia 21:8 (NW) wanpela wasman i tok: “O Jehova, long olgeta de mi sanap i stap long wastaua, na long olgeta nait tu mi sanap na was i stap.” Long nau i gat wanpela lain ol i mekim wok olsem wanpela wasman. Em lain remnan, dispela ‘gutpela wokboi,’ ol i mekim wok bilong Krais hia long graun. Dispela “wasman” i lukim ol samting i kamap long graun olsem Baibel i bin tok profet long en, na em i toksave long ol man long taim bilong “bikpela hevi tru” i laik kamap, na em i autim tok long “wanpela samting i moa gutpela.” Dispela “wasman” i mekim wok long nius Wastaua bilong autim dispela tok. Long nau ol i save wokim 10,200,000 Wastaua long olgeta taim.—Matyu 24:14, 21, 45-47; Aisaia 52:7, NW.
7. Husat ol i helpim dispela lain “wasman”? Bilong wanem ol i mas helpim ol?
7 Dispela lain, ol i olsem “wasman” na ‘gutpela wokboi,’ ol i autim. dispela gutpela tok na bikpela lain manmeri i helpim ol. Olsem yumi stori pinis, i gat 9,000 samting bilong dispela lain ol i stap yet long graun. Ripot bilong Memorial long 1983 i makim olsem. Ol i liklik lain na ol yet i no inap autim gut dispela tok. Tasol bikpela lain manmeri i kam bung wantaim ol na helpim ol long mekim. Ol tu i mekim wok olsem “wasman,” olsem Aisaia 52:8 i tok. Ol i wok strong long “singaut” na tokim ol manmeri long dispela gutpela tok.
8. (a) Sat i stap long pes 16 na 17, olsem wanem em i soim yumi wok bilong Kingdom i go bikpela? (b) Olsem wanem long ol kantri i gat tambu long wok bilong Kingdom?
8 Opim dispela nius long pes 16 na 17 na bai yu lukim bikpela wok dispela lain “wasman” na ol poroman bilong ol i mekim, em Jehova i blesim wok bilong ol. Ol i bin ‘singaut strong’ na planti man i harim, olsem na lain bilong autim tok i go bikpela long olgeta hap. Dispela samting i mas kamap nau, long wanem Krais Jisas i kamap king long Kingdom bilong Papa bilong em, na Aisaia 9:6, 7, (NW) i tok long dispela “King bilong Gutaim,” olsem: Wok king bilong em bai go bikpela, na gutaim i no ken pinis.” Olsem dispela sat i makim, long sampela hap bilong graun i gat bikpela tambu long wok bilong autim tok bilong Kingdom. Tasol spirit bilong Jehova i helpim ol Witnes i stap long ol dispela hap na ol i mekim wanem wanem wok ol inap mekim. (Sekaraia 4:6) Ol gavman i birua long wok bilong Kingdom na ol lain manmeri i helpim dispela pasin birua, bai ol i gat bikpela asua long blut bilong ol man i lus long taim bilong “bikpela hevi tru.”—Lukim Esikiel 3:1-17-19.
Ol Painia i Autim Gutpela Tok
9. (a) Taim yu lukim dispela sat yu ting olsem wanem long wok painia i go bikpela? (b) Sampela brens-ofis i salim wanem ol gutpela ripot i kam?
9 Dispela sat i soim yumi lain painia tu i go bikpela long olgeta hap long 1983. Mipela kirap nogut tru! Planti brens-ofis bilong Sosaiti ol i amamas, long wanem planti pablisa i kirap mekim wok painia helpim na wok painia regyula na long sampela hap ol i mekim wok painia spesel. Lukim ol dispela ripot:
Babedos: Long 1981 i gat 292 painia helpim long Epril; tasol long 1982 i gat 529 na long 1983 i gat 740.
Belsam: Lain i putim aplikesen bilong mekim wok painia regyula i go bikpela inap 30 pesen long 1983.
Sili: Averes bilong ol painia helpim i olsem 987; dispela lain i go bikpela inap 40 pesen.
Aivori Kos: Long yia i go pinis lain bilong painia regyula i go bikpela inap 15 pesen.
Potyugal: Mipela kirap nogut, long wan long Epril i gat 3,064 painia helpim; dispela i winim yia bipo inap 140 pesen.
Swiden: Long namba wan taim mipela i gat 796 painia regyula.
Tailan: Mipela i gat 821 pablisa na long Epril inap 23 pesen ol i mekim wok painia.
Veneswela: Winim 200 ol i kirap mekim wok painia regyula long 1983.
10. 1 gat wanem samting na yumi save, maski ol man i mekim nogut long ol dispela “wasman,” tasol ol i no inap pasim maus bilong ol?
10 Na long ol kantri i gat tambu long wok bilong yumi, lain pablisa na 1ain painia i go bikpela. Long wanpela kantri long Afrika, ol man i bin mekim nogut tru long ol brata inap 15 yia pinis, tasol long 1983 lain painia i go bikpela na i gat 616 painia regyula long namba wan taim na 207 painia helpim. Na long narapela hap bilong Afrika 75 brata ol i stap kalabus, tasol lain pablisa long dispela hap i go bikpela inap 35 pesen, na long Epril i gat planti painia helpim, winim bilong bipo inap 151 pesen. Tru tumas ‘ol dispela wasman’ wantaim ol poroman bilong ol, ol i singaut strong!
11. Wok painia i save helpim kongrigesen olsem wanem? Na olsem wanem em i helpim wok long olgeta hap bilong graun?
11 Ol dispela brata sista i wok strong long mekim wok painia na wok bilong Kingdom i go bikpela! Ol i autim gut tok bilong olgeta hap teritori bilong ol na lusim planti aua moa long autim dispela tok. Long 1983 yumi bin lusim 436,720,991 aua long autim tok bilong Kingdom; i go bikpela inap 13.5 pesen! Na yumi kirapim planti nupela stadi—ol painia helpim i kirapim planti nupela stadi. Na yumi helpim planti man moa, em ol i laik harim tok, long i kam bung wantaim lain bilong God.
12. Wok painia i helpim ol painia yet olsem wanem?
12 Wok painia i helpim tu brata o sista i mekim dispela wok. Taim wanpela pablisa i mekim wok painia helpim, long dispela mun em i lain long autim gut tok bilong Kingdom long ol narapela man! Na em i kisim bikpela amamas, long wanem em i wok wantaim ol narapela brata sista na tilim planti magasin moa na planti go-bek moa na kirapim ol nupela stadi. Sampela i amamas tru long wok painia helpim na dispela i kirapim ol long stretim ol wok bilong ol bai ol inap mekim wok painia regyula. Na sampela ol i mekim wok painia helpim long olgeta mun.
13. Tupela ekspiriens i kam long Pakistan i helpim yumi olsem wanem?
13 Long hap bilong Pakistan ol i hatwok long autim tok long ol Muslim. Tasol dispela kantri i salim ripot i kam, olsem:
Wanpela brata em i bin mekim wok painia helpim long olgeta mun inap 30 mun pinis, em i tok: ‘Nau mi pas tru long dispela wok, na ating mi bai hatwok long lusim. Mi laik tru long mekim dispela wok na i kamap olsem wok tru bilong mi. Long olgeta de mi mas autim tok inap tupela aua samting.’
Yes, sapos yu autim tok inap ‘tupela aua samting’ yu inap mekim wok painia helpim. Olsem wanem? Yu inap autim tok inap tupela aua long olgeta de? Sapos yu mekim olsem, ating dispela bai helpim skin bilong yu long i stap strong na bai yu stap amamas. Lukim dispela narapela ekspiriens i kam long Pakistan:
Wanpela brata i gat 58 krismas em i pinis long mekim wok mani, olsem ritaia, na em i kirap mekim wok painia helpim. Em i tok: ‘Mi stap Witnes inap 28 yia pinis, tasol bipo mi no amamas olsem nau. Mi mekim wok painia helpim long olgeta mun inap 8-pela mun pinis, na nau mi pilim tru gutpela wok mi inap mekim olsem wanpela Witnes, na mi amamas tru long mekim dispela wok. Ol man bipo mi wok wantaim ol, ol i save tokim mi: ‘ olsem wanem na yu sihat-mand (skin bilong yu i stap moa gutpela, tok Urdu) na yu khush (moa amamas, tok Urdu)’ Na mi save tokim ol: ‘Nau mi mekim bikpela wok moa long wok bilong God tru, em Jehova, olsem na mi stap moa amamas. Dispela samting i mekim na mi sihatmand na khush’
Yu laik i stap sihatmand na khush? Orait, mekim wok painia helpim!
Kisim Ol Blesing Bilong Wok Painia
14. Lukim sat i stap long pes 20-23 na yu lukim lain pablisa na lain painia i kamap bikpela long wanem wanem hap?
14 Orait, nau yumi ken lukim Ripot Bilong Wok Bilong Ol Witnes Bilong Jehova Bilong 1983, em i stap long pes 20-23 long dispela nius. Ol dispela namba long dispela 4-pela pes i no namba nating. Ol i soim yumi long bikpela wok bilong Kingdom ol pablisa i bin mekim long 205 kantri. Lukim hap bilong ol painia (Av. Pio. Pubs.) na bai yu lukim planti kantri i gat planti painia na ol i bin mekim gutpela wok. Ol pablisa tu i bin wok strong, maski ol i no inap mekim bikpela wok olsem ol painia.—Mak 12:41-44.
15. Ol famili i helpim wok painia, olsem wanem ol inap kisim blesing?
15 Ol famili i givim bel long wok painia ol i kisim blesing. Sampela famili i wok long stretim ol samting bambai famili olgeta i ken mekim wok painia. Olgeta ol i mekim liklik wok mani long sampela de bilong wik bilong lukautim ol long kaikai samting na ol i mekim wok painia. Na sampela famili i wok wantaim bilong helpim wanpela bilong ol long mekim wok painia. Dispela samting i save helpim famili olgeta.
16. (a) Ol papamama i ken mekim wanem na bai ol i helpim ol pikinini long kamap strong long spirit? (b) Sapos yumi tingim ol samting Jisas i mekim taim em i yangpela yet, dispela i makim wanem gutpela pasin ol yangpela i ken bihainim?
16 Ol brata sista i bin i go long “Stap Wanbel long Kingdom” Kibung Distrik, ol i bin harim wanpela tok i stori long yumi mas tingim sampela gutpela wok yumi laik mekim na yumi mas wok long mekim. Ol papamama i laik bai pikinini bilong ol kamap strong long spirit, ol bai lainim ol pikinini long mekim gutpela wok long bihain. (Provep 22:6) Ol i ken kirapim ol long mekim wok painia. Taim Jisas i liklik yet em i lain gut long ol tok bilong Baibel, olsem na taim em i gat 12-pela krismas em inap toktok wantaim ol tisa long tempel. (Luk 2:46, 47) Em i no wok long kisim bikpela skul na bikpela wok mani. Em i no laik kamap loya o dokta samting. Em i lain long mekim wok long han bilong em yet. Em i lain long mekim wok kamda. Na oltaim em i mekim ol samting bambai em i kamap strong long spirit na em inap mekim dispela wok bihain em i mas mekim. (Mak 6:3; Jon 7:46) Ol pikinini Witnes long nau, taim ol i stap yet long skul, ol i ken tingting long mekim gutpela wok olsem long bihain. Na ol i ken redi bambai ol inap long mekim. Papamama i ken kirapim ol long mekim olsem.
17. Ol yangpela painia i no tingim skin bilong ol yet, ol i narapela kain long ol yangpela bilong dispela graun na ol i ken bilip olsem wanem?
17 Ol i tok planti man i bin winim bikpela skul ol i no gat wok. Tasol ol yangpela Kristen, em ol i skul gut na taim ol i pinis long hai-skul ol i kirap mekim wok painia, ol i kisim gutpela wok long tupela o tripela de bilong wik. Jehova em inap blesim na lukautim ol man i wetim em helpim ol na ol i ‘painim Kingdom pastaim’ na ol i redi long sakim sampela laik bilong skin.—Matyu 6:19-21, 31-33; Provep 3:5, 6; Malakai 3:10.
18. Toktok long wok painia, olsem wanem em i helpim wanpela kongrigesen long Filapin?
18 Tasol ating sampela long kongrigesen i tok, ‘Bilong wanem ol i mekim bikpela tok olsem long wok painia. Mipela planti mipela i no inap mekim dispela wok.’ Tasol ol gutpela painia i amamas long mekim wok, ol inap helpim tru kongrigesen. Bai kongrigesen tu i amamas long mekim wok na bai wok bilong Kingdom i go bikpela long hap bilong ol! Wastaua bilong Julai 1, 1983 i stori long “Givim Bel Tru long Wok Kristen.” Askim long paragraph 7 i tok: “I gat wanem askim olgeta wokman Kristen i mas givim long skin bilong ol yet?”Dispela askim i kirapim yumi long tingim wanpela askim i stap long paragraph 7, olsem: “I gat sampela samting tru bilong pasim mi na long ai bilong Jehova i stret mi no mekim wok painia?”Long wanpela kongrigesen long Filapin taim ol i mekim stadi long dispela Wastaua tripela long kongrigesen, em ol i gat narapela narapela krismas, ol i tok, ol i tingim gut dispela askim na dispela i kirapim ol long mekim wok painia. Kongrigesen i amamas tru long harim dispela tok na ol i paitim han.
19. Ol brata sista i no inap mekim wok painia, ol inap helpim kongrigesen olsem wanem?
19 Tru, i gat sampela Witnes ol i dediket na long ai bilong Jehova i stret ol i mekim wok painia. Ol i no inap mekim dispela wok. Ating planti long ol kongrigesen bilong yumi i olsem. Tasol ol dispela brata sista tu inap helpim kongrigesen long tingim gut wok painia. Ol elda na ol papa ol i ken kirapim ol yangpela long mekim wok painia. Kongrigesen olgeta i ken wok long helpim ol brata sista ol i kirap pinis long mekim wok painia. I gat sampela taim, olsem long taim bilong Memorial, o taim wasman sekit i kam lukim kongrigesen, o taim skul i gat holide, na planti ol inap mekim wok painia helpim. Yu mas bilip tru olsem Jehova bai strongim yu long mekim dispela wok sapos yu kirap long mekim. ‘Long bilip bilong yu ol samting i ken kamap long yu.’ (Matyu 9:29) Tasol sapos yu gat sik, o sampela wok o narapela samting i pasim yu na yu no inap mekim wok painia o wok painia helpim, tasol yu mas tingim gut wok painia. Olgeta hap taim yu inap givim bilong mekim wok bilong ‘autim dispela gutpela tok,’ yu mas givim bilong mekim dispela wok. Na yu mas helpim na strongim ol brata sista i mekim wok painia.
20. (a) Yumi stap long wanem taim na oltaim yumi mas tingim dispela samting? (b) Olsem na yumi mas ting olsem wanem long wok bilong kisim bek ol man?
20 Yumi stap long taim nogut bilong pait na pamuk samting. Liklik taim bai Jehova i bekim pe nogut long ol man nogut olsem em i bin mekim long bipo. (Jenesis 6:11; 18:20; Luk 17:26-30) Tru tumas, yumi stap long “las taim.” (2 Timoti 3:1-5, 13) Olsem na yumi mas wok strong long autim tok long God i laik kisim bek ol man, bambai ol manmeri i laik lusim olpela pasin na i stap aninit long Kingdom bilong God, ol i ken mekim. Yumi tenkyu tru long Jehova, long wanem em i blesim tru ol wok yumi bin mekim long 1983. Nau, long 1984, yumi mas wok wantaim ol wasman bilong Kingdom na singaut strong wantaim ol na litimapim nem bilong Jehova.—Aisaia 62:6.
Sampela askim yu ken tingim:
□ Ol pris pasto i no autim wanem gutpela tok? Bilong wanem ol i no autim?
□ Sat long pes 16 na 17 i soim yumi olsem wanem long wok bilong ol wasman bilong Saion?
□ Wok painia i helpim painia yet olsem wanem? na i helpim kongrigesen olsem wanem?
□ Olsem wanem olgeta long kongrigesen inap helpim ol brata sista long tingim gut wok painia?
[Blok long pes 24]
Planti brata sista i kirap mekim wok painia regyula, dispela samting i bin helpim ol tru. Wanpela painia regyula long Naijiria i tok:
“Mi mekim wok painia regyula na mi kisim planti blesing. Nau mi laik kolim sampela: (1) Nau mi inap kaunim gut tok, long wanem oltaim mi autim tok. (2) Mi no bin skul, tasol i no hatwok long mi mekim ol Baibel-stadi. (3) Mi wanpela elda na nau mi inap lukautim Stadi “Wastaua,” na lukautim gut Skul Bilong Wok Autim Tok. (4) Taim mi go long Skul bilong Ol Elda, maski ol i mekim ol tok long tok Inglis, tasol mi inap kisim gut ol tok. (5) Sapos wanpela man i laik kolim ol bikpela bikpela savetok bilong pasim mi long autim tok long em, mi inap bekim tok long em. Dispela olgeta blesing mi kisim i kirapim tingting bilong mi na nau mi save, wok painia i wanpela gutpela presen Jehova i givim long mi.”
[Sat long 16, 17]
Wok Bilong Kingdom i Go Bikpela Sevis-Yia Bilong 1983
“Nek bilong ol i go pinis long olgeta graun.”—Rom 10:18; Aposel 1:8.
Dispela sat i makim lain pablisa na lain painia i go bikpela inap hamas (averes)
Not Amerika
Ol Pablisa: 690,979; i go bikpela inap 6%
Ol Painia: 58,381; i go bikpela inap 16%
Yurop
Ol Pablisa: 601,918; i go bikpela inap 5%
Ol painia: 38,978; i go bikpela inap 17%
Latin America
(na Ol Ailan Bilong Karibian)
Ol Pablisa: 472,816; i go bikpela inap 11%
Ol Painia: 35,450; i go bikpela inap 23%
Esia
Ol Pablisa: 122,726; i go bikpela inap 12%
Ol Painia: 34,586, i go bikpela inap 24%
Ol Ailan Bilong Pasifik
Ol Pablisa: 117,816; i go bikpela inap 8%
Ol Painia: 11,386; i go bikpela inap 24%
Afrika
Ol Pablisa: 266,375; i go bikpela inap 6%
Ol Painia: 21,690; i go bikpela inap 17%
Ol Kantri i gat Tambu
Ol Pablisa: 229,092; i go bikpela inap 4%
Ol Painia: 5,627; i go bikpela inap 20%
[Sat long pes 20-23]
RIPOT BILONG WOK BILONG OL WITNES BILONG JEHOVA BILONG 1983
(Lukim Wastaua 1984)