Olsem Wanem Long Ol Buk na Nius Bilong Baibel?
WANPELA Sande long moningtaim, wanpela man long Konektikat long Amerika, em i harim wanpela man i paitim dua bilong em. Em i opim dua na lukim wanpela Witnes Bilong Jehova i sanap i stap. Dispela Witnes i kamapim sampela tok bilong Baibel na bihain em i tokim dispela man long kisim sampela buk bilong helpim em long kisim save long sampela bikpela tok bilong Baibel. Tasol dispela man i tok em i no laik kisim. Em i makim wanpela Baibel i stap long ka bilong em, na i tok: “Mi gat Baibel, na em inap.”
Yu wanbel long dispela tok? Sapos dispela man i laik tok i no gat wanpela buk inap senisim Baibel, long wanem Baibel em i as bilong tok i tru, orait, olgeta Kristen i mas wanbel long tok bilong dispela man. Tasol ol buk Witnes i holim i no olsem senis bilong Baibel. Nogat. Ol dispela buk i bilong helpim man long kisim save long as bilong ol tok bilong Baibel, na kamapim sampela tok bilong helpim sindaun bilong man na kirapim em long pilim tru ol tok i stap long Baibel. Olsem wanem? Ating i no gat wok long ol kain buk olsem? O sapos yumi kaunim dispela kain buk bilong helpim yumi long kisim save long Baibel, yumi gat rong?
Baibel—Em Tasol Inap?
Yumi mas kaunim Baibel, em bikpela samting. Tasol sapos yumi kaunim Baibel, ating dispela samting tasol inap helpim yumi long kisim save long tok i tru? Nogat. Disaipel Jems i stori long ol Juda na em i tok: “Yumi save, long bipo yet na i kam inap long nau, long olgeta taun i gat man bilong telimautim tok bilong Moses. Na ol i save ritim tok bilong em insait long ol haus lotu long olgeta sabat.” (Aposel 15:21) Ol Juda i save kaunim Baibel, tasol planti ol i no bilip olsem Jisas em i Mesaia o Krais.
Aposel sapta 8 i stori long wanpela man bilong Itiopia, em i man bilong kaunim Baibel. Taim dispela man i sindaun long karis bilong em na i go bek long ples bilong em, em i kaunim buk bilong Aisaia. Disaipel Filip i harim em i kaunim dispela tok. Em i wok long kaunim tok bilong Aisaia, tasol dispela samting tasol inap helpim em long kisim save long tok i tru? Filip i askim em: “Ating yu save as bilong dispela tok yu ritim, o nogat?” Dispela man i tok: “Sapos man i no soim rot long mi, bai mi inap save olsem wanem?” (Aposel 8:30, 31) Dispela man i gat pasin daun na em i save i mas i gat wanpela man bilong helpim em long kisim save long as bilong ol tok bilong Baibel.
Tingim dispela tok Jisas i givim long ol disaipel bilong em taim em i laik lusim ol na i go bek long heven. Em i tok: “Yupela i go mekim olgeta lain manmeri i kamap disaipel bilong mi. Na yupela i baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela. (Matyu 28:19, 20) Olsem na ol i no ken singautim tasol ol nupela man i kam harim man i kaunim Baibel na ol i no ken givim tasol wanpela Baibel long ol na tokim ol long kaunim. Nogat. Ol i mas lainim ol nupela man.
Aposel Pol tu i save em i mas kirapim ol man long kaunim Baibel na em I mas skulim ol long ol dispela tok. Em i Timoti: “Long dispela taim yu wet long mi, yu mas wok strong long ritim tok bilong God long ol man, na ol long pasin ol i mas mekim, na skulim ol gut.” (1 Timoti 4:13) Pol i save pasin bilong kaunim Baibel em i bikpela samting, olsem na taim em i raitim pas long Timoti, em i stori pastaim long kaunim Baibel. Tasol Timoti i mas helpim ol man bambai ol inap kisim save long as bilong ol tok bilong Baibel; em i mas lainim ol na kirapim ol long bihainim ol dispela tok long olgeta wokabaut bilong ol.
Hap bilong Wok bilong Ol Aposel long Baibel i helpim yumi long save, ol disaipel na ol aposel i bin kaunim Baibel long ol manmeri na ol i bin mekim sampela samting moa. Ol i bin helpim ol dispela manmeri long save long as bilong ol dispela tok ol i kaunim. “Judas wantaim Sailas tupela yet i profet. Olsem na tupela i givim planti gutpela tok long ol Kristen, na tupela i strongim ol. Na Pol wantaim Banabas tupela i stap long Antiok. Tupela i wok wantaim planti arapela man skulim ol manmeri long tok bilong God na telimautim gutnius bilong Bikpela.”—Aposel 15:32, 35.
Ol Buk na Nius
Tasol ating bai yu tok, ‘Ol i no lukim ol buk na nius samting bilong helpim ol long kisim save.’ Yu tok stret. Tasol yu ting tok man i autim long maus bilong em i narapela kain long tok em i raitim long buk? Long bipo ol i no gat masin samting bilong wokim planti buk na nius, tasol ol aposel na Kristen bilong pastaim i bin raitim sampela tok bilong helpim ol long autim dispela gutpela tok. Ol i bin raitim planti pas long ol kongrigesen na taim ol i stap longwe long kongrigesen, kongrigesen i ken save ol i tingim ol. Sampela pas ol i bin raitim i stap long Baibel, tasol planti, nogat.
Namba wan pas Pol i raitim long ol Korin em i stap long Baibel. Long dispela pas em i tok: “Long narapela pas mi bin raitim long yupela, mi tok olsem: ‘Yupela i no ken pren wantaim ol man bilong bagarapim marit. . . . Tasol as bilong tok mi bin raitim em i olsem: Sapos wanpela man yupela i save kolim brata em i bagarapim marit, . . . orait yupela i no ken pren wantaim em.” (1 Korin 5:9-11) Olsem na yumi save, Pol i bin raitim narapela pas long ol na dispela pas i no i stap long Baibel. Olsem wanem? Ol Kristen bilong pastaim i pilim olsem i no gat wok long dispela pas, long wanem em i no hap bilong Baibel? Nogat. Ol i pilim tru ol dispela tok Pol i bin raitim bilong helpim ol long kisim save long tok i tru bilong Baibel. Ol i save ol dispela tok inap helpim ol long kisim save long bihainim ol lo bilong Baibel long olgeta wokabaut bilong ol.
Taim Pol i raitim pas i go long kongrigesen long Kolosi, em i stori long narapela pas em i bin salim i go long ol Kristen long Leodisia, tasol dispela pas i no hap bilong Baibel. Pol i tok: “Sapos yupela i ritim pinis dispela pas, orait yupela i mas salim i go long sios long Leodisia, bai ol tu i ken ritim. Na pas mi salim long Leodisia, em yupela tu i mas ritim.” (Kolosi 4:16) Olsem na ol i bin salim pas i go long narapela narapela kongrigesen, na ol kongrigesen i salim ol dispela pas i go long ol narapela kongrigesen bambai ol i ken kaunim. Sapos ol aposel i gat ol masin bilong wokim ol buk na nuis olsem bilong nau, bai ol i mekim bikpela wok long ol dispela masin, a? Bai ol i wokim planti buk nuis bilong autim tok bilong Jisas long ol manmeri i stap long taim bilong ol.
Long nau i gat ol masin bilong wokim ol buk na nuis, na ol Witnes Bilong Jehova i save mekim bikpela wok long ol dispela masin. Ol i save wokim planti Baibel na buk na nuis bilong Baibel. I no gat wanpela tok long Baibel i tambuim dispela samting. Olsem ol Kristen Timoti i bin wok long helpim ol, yumi tu yumi mas kaunim Baibel. Tasol i mas i gat man bilong lainim yumi tu bambai yumi inap kisim save long as bilong ol tok bilong Baibel na yumi ken save long ol samting yumi mas mekim bambai yumi inap bihainim dispela tok.
Ol buk na nuis bilong Baibel inap helpim yumi sapos ol i no paulim Tok bilong God na ol i litimapim nem bilong God, na soim rot long man i kaunim bambai em inap bihainim lotu tru. Na ol i mas helpim man long sakim pasin bilong dispela graun na go klostu moa long God na bihainim lek bilong Krais Jisas. Mipela save, sapos yu kaunim ol buk na nuis bilong ol Witnes Bilong Jehova, ol dispela buk na nuis bai helpim yu olsem.