“Yu Mas Laikim Ol Arapela Man”​—⁠Wanem Gutpela Rot Bilong Mekim?

TAIM yu lukim ol arapela man i sot tru long sampela samting, yu pilim olsem wanem? Taim yu lukim piksa bilong ol pikinini ol i bagarap long hangre, yu laik mekim wanem? Ating bai yu tok, “Mi sori tru long ol na mi laik helpim ol.” Ating planti manmeri i gat wankain tingting, long wanem long olgeta yia ol man i givim bikpela mani tru long ol lain na oganaisesen i mekim wok sori bilong helpim ol man.

Sapos yumi mekim kain gutpela wok olsem bilong helpim ol manmeri i sot long samting, em gutpela, long wanem Jisas i tok yumi mas laikim ol arapela man olsem yumi laikim yumi yet. (Matyu 19:19) Planti man i bilip tru olsem gutpela rot bilong laikim ol arapela man, em olsem: Ol i wokim na helpim ol haus sik na skul, o ol i givim mani bilong helpim sampela gutpela wok sori, o ol i mekim sampela wok bilong helpim ol man, olsem wok welfe samting. Ating ol i save tok, ‘Em wok tru Bilong ol Kristen.’ Na sapos ol i toktok wantaim ol Witnes Bilong Jehova, ating bai ol i tok, ‘Yupela i lusim bikpela hap taim na strong long mekim wok bilong i go long haus bilong ol manmeri na autim tok, tasol dispela wok i no helpim tru ol man.’

Tasol olsem wanem? Tru wok bilong givim mani o mekim wok sori em i helpim tru ol man, winim wok bilong autim tok? Wanem gutpela rot tru Bilong helpim ol arapela man inap oltaim?

Mani Bilong Yu i Helpim Ol Olsem Wanem?

Ol man i laik givim sampela mani bilong helpim ol man, i stret ol i mas skelim pastaim hamas bilong dispela mani bai i go stret bilong helpim ol man ol i laik helpim ol. Long 1978 ol i skelim 15 oganaisesen long Federal Ripablik bilong Jemani ol i mekim wok sori bilong helpim ol man, na ol i kisim save olsem: Bikpela hap bilong ol mani ol man i givim long ol dispela oganaisesen (inap 42 pesen) i go bilong baim ol man i bosim wok bilong ol dispela oganaisesen na bilong baim rot bilong tilim dispela mani i go long ol man.

Sampela manmeri long Federal Ripablik bilong Jemani i kamap olsem papamama bilong sampela pikinini long Bolivia, em ol i stap rabis; ol i save salim mani i go bilong lukautim ol dispela pikinini. Sampela bikpela man bilong televisen ol i skelim beng bilong ol dispela pikinini na ol i lukim olsem liklik hap tasol (inap 6 pesen-15 pesen) bilong ol mani dispela ol “papamama” i bin salim em i go long beng bilong ol pikinini. Wanpela meri, em i maus bilong oganaisesen i lukautim wok Bilong givim ol dispela mani long ol pikinini, em i tok, ol i no paulim dispela mani. Tasol em i tok, ol i toksave pinis long ol dispela “papamama” olsem liklik hap tasol bilong mani ol i salim bai i go long ol pikinini, na bikpela hap bai go bilong baim ol man i bosim wok bilong dispela oganaisesen, na bilong baim skul o dokta o haus sik samting.

Tru, sampela taim ol man i no mekim wok i stret long mani ol man i givim bilong helpim ol man. Dispela samting i bin kamap long nau taim ol i givim mani bilong helpim ol Afrika em hangre i bagarapim ol. Ol man i salim planti kaikai samting bilong helpim ol Itiopia, tasol sampela hevi bilong politik i pasim dispela kaikai na i no kamap long ol man i sot tru long kaikai. Na sampela taim ol dispela kaikai ol i kisim nating, no gat pe, ol i baim i go long ol man long bikpela pe tumas na ol i no givim nating long ol.

Wanpela buk (Charity U.S.A. bilong Carl Bakal) i toksave olsem: ‘Taim ol man i givim mani bilong helpim wanpela gutpela wok, ol i no save askim bambai ol i ken save long ol wok ol man i mekim long dispela mani. Mi no laik pasim ol man na bai ol i lusim wok bilong givim mani bilong helpim ol man i sot, tasol mi ting ol i mas askim pastaim na skelim gut wanem wok tru ol man bai mekim long dispela mani.’ Tru, sapos yumi givim nating na yumi no skelim gut pastaim, yumi no bihainim gutpela tingting, na ating mani yumi givim em i no ken helpim tru ol man.

Bihainim Pasin Bilong Jisas

Tru, ol dispela hevi i save kamap long pasin bilong helpim ol man em i nogut, tasol yu ting long dispela as yumi no ken helpim ol man? Jisas yet em i bin mekim ol gutpela wok bilong helpim ol man, a? Em i oraitim ol sikman na wokim mirakel bilong givim kaikai long ol man i hangre. Ating em i makim pasin ol Kristen long nau ol i mas bihainim?

Tru, taim Jisas i lukim ol man i sot long samting, em i save sori long ol. Etpela ves long Baibel i stori long dispela samting. Tupela ves olsem i stori long em i sori long ol man i sot long kaikai (Matyu 15:32; Mak 8:⁠2), tripela ves i stori long Jisas i sori long ol man i gat sik na em i oraitim ol (Matyu 14:14; 20:34; Mak 1:41), na wanpela i stori long Jisas i sori long wanpela meri i hevi long man i dai pinis na em i mekim isi bel bilong em (Luk 7:13). Tasol narapela tupela ves i stori long Jisas i sori long ol man i sot long bikpela samting moa. Matyu 9:36 i tok: “Em i lukim bikpela lain manmeri, na bel bilong en i sori long ol. Long wanem tingting bilong ol i paul nabaut, na ol i stap nogut tru, olsem sipsip i no gat wasman.” Na Mak 6:34 i tok: “Jisas i go sua, na em i lukim planti tumas manmeri. Na em i sori long ol. Ol i olsem sipsip i no gat wasman. Na em i stat na i givim planti tok long ol.”

Tru, Jisas i sori long ol man na dispela i kirapim em long helpim ol long ol samting bilong skin, tasol em i gat bikpela laik moa long helpim ol long ol samting bilong spirit. Ol i sot long dispela samting, long wanem ol bikman bilong lotu bilong ol i no bin helpim ol long ol samting bilong spirit. (Lukim Matyu, sapta 23.) Jisas em i “gutpela wasman bilong sipsip,” em i redi long “lusim laip bilong em yet bilong helpim ol sipsip.” (Jon 10:11) Em i givim bel long dispela wok bilong autim tok; em i no mekim wok welfe o wokim haus sik o bosim sampela lain bilong helpim ol man. Nogat. Wok bilong autim tok i nambawan bikpela wok bilong em, olsem na bihain em inap tokim Pailat: “Mama bilong mi i karim mi na mi kam long graun bilong dispela tasol: Mi gat wok long autim tok tru.”−Jon 18:⁠37.

Jisas i givim strong long ol aposel na ol inap wokim mirakel na mekim ol gutpela wok bilong oraitim sik bilong sampela man, tasol taim em i laik lusim ol na i go bek long heven, em i no mekim tok liklik long dispela wok. Nogat. Em i tokim ol: “Yupela i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” Olsem na yumi save, wok i bikpela moa na ol i mas mekim, em olsem: Ol i mas ‘kamapim ol disaipel, . . . na baptaisim ol, . . . na lainim ol.’−Matyu 28:​19, 20.

Olsem Wanem Wok Bilong Autim Tok i Helpim Tru Ol Man?

Wok bilong autim tok i helpim tru ol man, long wanem dispela wok i helpim ol long bihainim ol tok na lo bilong Baibel. Na dispela samting i helpim ol long abrusim ol hevi em inap bagarapim sindaun bilong ol na bai ol i sot long samting. Olsem: Sapos yumi bihainim ol lo bilong Baibel i bilong bosim wok yumi mekim na tingting bilong yumi long ol samting bilong skin, orait dispela bai helpim yumi na bai yumi no kamap rabis. (Provep 10:4; Efesas 4:28; 1 Timoti 6:​6-8) Na sapos yumi bihainim gutpela tok Baibel i givim long yumi long kisim drak, na yumi bihainim ol lo bilong Baibel i tambuim pasin pamuk samting, orait dispela inap helpim yumi na bai skin bilong yumi i stap gutpela na famili bilong yumi i pas gut wantaim na i stap amamas.

Tingim wanpela man bilong Yugoslavia em i gat 35 krismas na em i stap long Federal Ripablik bilong Jemani, em i tok: “Taim mi gat 18, 19 krismas dring i kalabusim mi pinis. Taim mi gat 20 krismas mi save daunim wanpela katon bia [20 botol] na wanpela bikpela botol jin (schnapps) long olgeta de. Tripela taim ol i putim mi long haus sik taim ol i wok long helpim mi long lusim pasin bilong dring, tasol ol dokta i no inap helpim mi. Mi save kisim pe long mun inap olsem K630, tasol mi kisim liklik hap tasol i go long haus bilong helpim famili bilong mi.” Ol Witnes Bilong Jehova i autim tok long dispela man na tok bilong ol i kirapim laik long bel bilong em bilong i stap gut wantaim Man bilong wokim em. Em i tok: “Long rot bilong beten mi inap mekim dispela samting ol dokta i no inap helpim mi long mekim.” Em i lusim pasin bilong dring na dispela samting i helpim tru em yet wantaim famili bilong em.

Tru, wok bilong autim tok i no inap stretim olgeta hevi. Tasol dispela wok i helpim tru ol man, long wanem em i helpim ol long wetim gutpela samting i kamap long bihain. Na taim Kingdom bilong God i bosim dispela graun, dispela bai stretim tru olgeta hevi. Long dispela taim bai Jisas i wokim ol mirakel bilong helpim olgeta manmeri long ol samting bilong skin. Dispela i no ken helpim ol inap liklik taim tasol; nogat; em bai helpim ol inap long olgeta taim bihain. (Lukim Jon 17:⁠3.) Olsem na wok bilong lainim ol man bambai ol i bilip long ofa bilong Jisas na ol gutpela wok dispela ofa i mekim, dispela samting inap helpim tru ol man, long wanem em i helpim ol inap oltaim.

Planti misin i gat nem Kristen ol i save hambak long ol “gutpela wok” ol i mekim bilong lukautim ol sikman, na helpim ol man i sot long samting, na helpim ol taranguman. Tasol gutpela sapos ol i mekim bikpela wok moa bilong helpim ol man long ol samting bilong spirit, olsem Jisas i bin mekim. Ol i wankain olsem ol bikpela man bilong lotu long taim bilong ol aposel, ol i no mekim dispela wok em i bikpela wok moa na Jisas i tok yumi mas mekim. Ating ol i bin givim kaikai bilong skin long sampela man i stap rabis na bel bilong ol i pulap, tasol ol i no bin givim kaikai bilong spirit long ol na ol dispela man i hangre long harim tok i tru. (Lukim Emos 8:11.) Ating ol dispela misin i bin givim planti mani bilong helpim ol arapela lain i sot long samting, tasol ol i no bin “autim gutnius long ol arapela lain. Em i gutnius bilong olgeta gutpela samting bilong Krais,” na bilong Kingdom bilong God. (Efesas 3:⁠8) Ol misineri bilong ol dispela misin i bin helpim ol lain i no gat planti wok bisnis, na nau ol inap mekim gutpela wok moa long samting bilong wokim gaden, tasol ol i no bin kirapim ol long “wokim ol bainat bilong ol i kamap samting bilong wokim gaden,” o “wokim ol spia bilong ol i kamap sisis bilong katim han bilong diwai.”−Aisaia 2:​4, NW.

Tingting Stret long Pasin Bilong Laikim Ol Arapela Man

I stret yumi mas tingting pastaim long helpim ol narapela man long ol samting bilong spirit, tasol i no olsem yumi no ken helpim ol−ol yet o wanpela lain−long ol samting bilong skin sapos tru ol i gat hevi na yumi inap helpim ol. Yumi mas i gat laik long bihainim pasin olsem bilong ol Kristen bilong pastaim. (Lukim Aposel 11:​27-30.) Sapos tru ol man i sot long samting o wanpela bagarap, olsem tait wara o guria samting, i bin painim ol, orait kwiktaim yumi mas bihainim tok bilong Pol na “mekim gutpela pasin long olgeta man. Tasol yumi mas strong tru long mekim gutpela pasin long ol brata i bilip long Bikpela.” (Galesia 6:10) Bilong helpim tru ol man, ol Witnes Bilong Jehova yet wan wan ol i save mekim ol samting bilong helpim ol. Na ol dispela Witnes i no save kisim pe, olsem na i no gat bikpela hap mani i lus nating long baim sampela man bilong bosim wok.

Ol Kristen i save helpim ol narapela man long ol samting bilong skin, tasol ol i mas tingting stret. Ol i mas save, nambawan bikpela wok bilong ol em bilong autim dispela gutpela tok bilong Kingdom bilong God. Liklik taim na bai dispela Kingdom i helpim olgeta man i gat sik o ol i stap rabis o ol i sot long samting. Em bai pinisim olgeta hevi i save painim ol man. Gutpela tru yumi inap helpim ol man long kisim laip long dispela gutpela taim bihain. Long dispela taim bai i no gat wanpela man i gat hevi na yumi mas sori long em. Sapos yumi tokim ol man long dispela gutpela taim bilong bihain, em gutpela rot tru bilong laikim ol arapela man, a?