Kam Long “Ol Man Bilong Laikim Pasin Bilong i Stap Fri” Kibung Distrik!
BAI i gat 3-pela de bilong yu ken kisim gutpela save long ol tok bilong Baibel. Yu mas kam hariap long Fraide long moningtaim, na bai yu i stap na harim gutpela musik i kirapim program. Bai yu amamas long harim namba wan tok, nem bilong en: “Bilong Wanem Yumi Mas Glasim Gut Dispela Nambawan Lo i Helpim Man long i Stap Fri?” Na laspela tok bilong moningtaim, em as tok bilong kibung, em “Wok Bilong Pasin Bilong i Stap Fri Em God i Givim long Yumi.”
Long belo bek long Fraide bai yu harim ol tok bilong helpim yumi ol Kristen long mekim wok bilong God. Tupela tok bilong belo bek em “Yu Save Mekim Wanem Kain Wok—Wok i No Gat Laip long En, o Wok Bilong Jehova?” na “Wanpela Lain i Stap Fri, Tasol Ol i Gat Wok.” Na bai i gat wanpela pilai bilong strongim ol Kristen bai ol i mekim wok long pasin bilong i stap fri bilong mekim wok bilong Jehova. Dispela pilai bai kamapim stori bilong Esra na ol poroman bilong em, em ol i bin lusim Babilon long yia 468 paslain long Krais na i go bek long Jerusalem bilong mekim gut haus lotu bilong God.
Long Sarere long moningtaim bai yu harim wanpela tok i gat 3-pela hap bilong en, nem bilong en: “Yumi Stap Fri, Tasol Yumi Gat Wok Insait long Famili.” Bihain bai i gat wanpela tok em bai kirapim yu long skelim gut bel bilong yu, nem bilong en: “Stap Fri na Bai Yu Ken Mekim Wok Bilong Jehova.” Na bihain long en bai i gat tok long dediket na baptais Kristen. Long belo bek bai planti i wet long harim wanpela tok, nem bilong en: “Yu Ting Marit Em Rot Bilong i Stap Amamas?” Long pinis bilong dispela hap bilong program bai yu inap kisim wanpela samting em olgeta man i laikim pasin bilong i stap fri bai amamas tru long en.
Yu mas i kam long Sande long moningtaim bambai yu inap harim wanpela tok i gat 3-pela hap bilong en, em “Wok Bilong Kisim Ol Man.” Dispela tok bai stori long tok piksa bilong Jisas long umben na ol kain kain pis ol i kisim long umben. Dispela tok bai helpim yumi long skelim ol wok bilong yumi insait long truim bilong dispela tok piksa. Bai i gat tupela bikpela tok bilong pinisim program long moningtaim, em “Was i Stap Nau ‘long Taim Bilong Las De’ ” na “Husat Bai Abrusim Bagarap long Taim Bilong ‘Bikpela Hevi Tru’?” Na long belo bek yu mas i stap na harim pablik-tok, nem bilong en: “Yumi Amamas long Nupela Taim God Bai Kamapim na Yumi Stap Fri!” Paslain long laspela gutpela tok bilong kibung, bai wanpela brata i stori long ol tok bilong Wastaua bilong dispela wik, olsem na gutpela sapos yu kisim dispela Wastaua i kam.
Kirap long Septemba, 1991, na i go inap long Janueri, 1992, winim 47 kibung bai kamap long Ostrelia na Nu Silan na Papua Niugini. Askim ol Witnes Bilong Jehova long hap bilong yu long taim na ples bilong kibung i kamap long hap yu stap long en o klostu long dispela hap.