De Bilong God Bilong Bekim Rong
YUMI stori pinis long sampela as na bai yumi no ken bekim rong long man i mekim nogut long yumi. Em i no stret, long wanem, dispela pasin i no stretim dispela hevi, na i mekim kros i go bikpela, na i no helpim yumi long kamap pren bilong dispela man, na dispela pasin inap mekim nogut long skin na tingting bilong yumi.
Tasol tok Moses i givim long ol Israel i kamapim wanpela bikpela as tru na yumi save i no stret sapos ol man i laik bekim rong long narapela man. Moses i tokim ol, God bilong ol, em Jehova, “em i God bilong marimari.” (Lo 4:31) God em i Man bilong bihainim pasin marimari, olsem na yumi tu i mas bihainim dispela pasin bilong em. Jisas i tokim lain bilong em: “Yupela i mas sori long ol man, olsem Papa bilong yupela em i save sori long ol.”—Luk 6:36.
Tasol Baibel i tok tu long Jehova, olsem: “Bikpela, yu God na yu mekim save long ol.” (Buk Song 94:1) Na profet Aisaia i “tokaut olsem, taim i kamap pinis bilong God, Bikpela bilong yumi, i laik mekim gut long ol manmeri bilong en na mekim save long ol birua bilong ol.” (Aisaia 61:2) Olsem wanem na God em i Man bilong mekim pasin marimari long ol man, tasol em i Man bilong bekim rong long ol man tu? Na sapos yumi mas bihainim pasin marimari bilong em, olsem wanem yumi no inap bihainim pasin bilong em long bekim rong?
Bekim bilong namba wan askim i olsem: God i marimari long ol man, long wanem, em i sori long ol na em i lusim rong bilong ol inap longtaim na bai ol i ken tanim bel na bihainim pasin i stret. Olsem na aposel Pol, na planti moa tu, ol i bin tanim bel. Tasol God bai bekim rong long ol man tu, long wanem, sapos ol i no tanim bel, em i no ken marimari moa long ol. Sapos ol i strong long bihainim pasin bikhet na ol i no laik senis, God bai strafim ol long taim em i makim bilong bekim rong.
Bekim bilong namba 2 askim i olsem: Maski God i bekim rong, yumi no ken mekim, long wanem, taim God i mekim, em i bihainim stretpela lo, tasol yumi ol man, nogat. God i save long olgeta samting, na em i skelim stret ol samting na em i bihainim pasin i stret, tasol yumi no inap mekim olsem, long wanem, yumi save popaia. Olsem na Pol i tok: “Ol pren tru bilong mi, yupela yet i no ken bekim rong ol i mekim long yupela. Yupela i mas larim God i belhat long ol. Yupela i save, buk bilong God i gat tok olsem: ‘Bekim rong, em i wok bilong mi. Mi yet bai mi bekim rong bilong ol na mekim save long ol.’ ” (Rom 12:19) Olsem na yumi mas larim Jehova tasol i bekim ol rong.
Bilong Wanem i Gat De Bilong Bekim Rong?
Planti taim Baibel i tok, ol bikhetman i mas kisim strafe. Aposel Pol i tok, long rot bilong Jisas em God “bai i mekim save long ol man i no laik save long God na i no bihainim gutnius bilong Jisas, Bikpela bilong yumi.” (2 Tesalonaika 1:8) Yumi mas tingim gut dispela tok. Bilong wanem?
Long wanem, long nau planti man i bikhet long wok king bilong God, na ol i sakim ol stretpela lo bilong em. Maski ol i tok ol i bilip long God, pasin bilong ol i makim olsem ol i givim baksait long God. Baibel i tok: “Man nogut i givim baksait long yu na long bel bilong en em i save tingting olsem, ‘Em i no inap bekim ol rong bilong mi.’ ” (Buk Song 10:13) Jehova i no inap larim ol man i tok bilas long em olsem inap long olgeta taim, nogat. Em i Man bilong mekim pasin sori long ol man, tasol em i Man bilong bihainim pasin i stret tu. Em bai harim krai bilong ol man i les long pasin nogut, ol i tok: “Bikpela, yu kam. God, mekim save long dispela man. Yu no ken lusim tingting long ol man i karim hevi.”—Buk Song 10:12.
Na ol dispela man bilong brukim lo ol i bagarapim dispela graun yumi stap long en, na ol i bagarapim win na wara tu, na ol i mekim planti pasin nogut. Ol i wokim ol samting nogut bilong pait, na inap long pinisim olgeta man long graun. Olsem na God i mas kirap mekim sampela samting na bai ol man bilong bihainim tok ol i ken stap gut long bihain. (Kamapim Tok Hait 11:18) Taim God i mekim olsem, Aisaia i kolim dispela taim olsem ‘taim bilong God i mekim save long ol birua,’ olsem taim bilong bekim rong.
God Bai Mekim Wanem Long Dispela Taim Bilong Bekim Rong?
Long Baibel tok Grik, taim em i toktok long God i ‘bekim rong’ o ‘mekim save,’ God i mekim olsem na bai stretpela pasin i ken stap; tasol taim ol man i bekim rong, planti taim ol i kros samting na ol i mekim. Taim God i bekim rong long ol birua bilong em, em i no ken kilim nating ol man nabaut na kapsaitim nating planti blut olsem ol man i save mekim, nogat. Baibel i tok: “Sapos traim i kamap long ol man i bihainim God, orait Bikpela i save long rot bilong kisim bek ol long dispela traim. Na Bikpela i save pinis long pasin bilong ol man nogut, na em i save long rot bilong bekim pe nogut long ol, i go inap long De bilong bikpela kot bilong God.”—2 Pita 2:9.
Ol wokman bilong God i amamas long dispela taim bai kamap na bai God i bekim rong. Long dispela taim stretpela pasin bai win, na ol man nogut i no ken putim hevi moa long ol stretpela man. Tasol i no olsem ol dispela wokman i amamas long ol man i kisim pen, nogat. Baibel i tok: “Sapos man i amamas long lukim ol arapela man i kisim bagarap, bai em yet i kisim pe nogut.” (Sindaun 17:5) Ol wokman bilong God i laik mekim pasin marimari na pasin sori tasol long ol man, na ol i larim God yet i ken mekim dispela wok bilong bekim rong.
Tru, sapos yumi belhat long man i rongim yumi, i hatwok long mekim pasin sori long em, tasol planti i bin mekim olsem. Taim Pedro i pikinini, planti taim bikbrata bilong em i bin paitim em na em i bel hevi, olsem na taim em i go bikpela em i kamap man bilong kros na pait, na planti taim polis i holim em. Em i bel nogut yet long brata bilong em, olsem na em i tingim yet dispela na em i bekim nogut long meri na ol pikinini bilong em. Bihain em i harim tok bilong wanpela Witnes Bilong Jehova, na bihain moa em i kirap long stadi long Baibel. Em i tok: “Jehova i helpim mi long senisim pasin bilong mi, na nau mi no save paitim man, nogat; nau mi helpim ol, long wanem, nau mi elda Kristen.” Baibel na spirit holi i helpim planti ol narapela tu long senisim pasin birua na kros bilong ol, na nau ol i mekim pasin sori na pasin isi long ol narapela man.
Bai Yu Mekim Wanem?
Sapos yumi tingim taim bihain em taim God bai bekim ol rong, dispela bai helpim yumi long stretim pasin bilong yumi nau long dispela hap taim Jehova i pasim belhat bilong em. Tasol liklik taim bihain em i no ken pasim moa kros bilong em, nogat. Klostu nau de bilong em bai kamap. Olsem wanem na dispela de i no bin kamap bipo na inap nau? Aposel Pita yet i toktok long dispela samting, em i tok: “Bikpela i no save wok isi isi long kamapim samting em i bin promis long mekim, olsem sampela man i save tok. Nogat. Tasol em i no laik bai wanpela man i lus. Em i laik bai olgeta man i mas tanim bel, olsem na em i isi long yupela na em i wet i stap yet.”—2 Pita 3:9.
Olsem na nau yumi mas hariap na kirap givim bel long lainim ol tok bilong Baibel, na bihainim tu, na bai yumi redi long de bilong God i kamap, na sapos yumi mekim olsem, dispela bai helpim yumi long bihainim tok bilong Devit, em i tok: “Yu no ken kros, na yu mas lusim pasin bilong belhat. Yu no ken wari long ol samting na kirap nogut. Dispela pasin em inap pulim yu long mekim pasin nogut. Ol man nogut bai i bagarap olgeta. Tasol ol manmeri i bilip na wetim Bikpela i helpim ol, bai ol i stap gut long graun bilong ol.”—Buk Song 37:8, 9.
[Piksa long pes 7]
Taim Jehova i bekim pinis rong, ‘ol manmeri i wetim Jehova i helpim ol, bai ol i stap gut long graun’