Bilong Wanem Sampela Lotu i Mekim Wok Long Samting Bilong Ol Santu?

SAPOS yu bin i stap long bikpela haus lotu bilong taun Nepels long Itali, long yia 1714 samting, bai yu lukim wanpela saveman bilong kantri Aialan (George Berkeley) em i sanap lukluk long hap blut ol Katolik i tok em blut bilong “Santu” Januarius bilong Misin Katolik. Em i no bilip tumas olsem dispela blut i kamap olsem blut tru gen.

Samting olsem i kamap yet long taun Nepels. Sampela yia i go pinis, maski i gat ren, planti manmeri i go pulap long dispela haus lotu, na i olsem wanpela mirakel i bin kamap. Asbisop na sampela lain i kisim dispela blut na wokabaut i kam na ol manmeri i paitim han. Long dispela taim tu, olsem long planti taim bipo, i olsem dispela blut i kamap blut tru gen. Ol i tok kain mirakel olsem i bin kamap planti taim, kirap long yia 1300 samting.

Misin Katolik i save tingim sampela man na meri i dai pinis ol i “santu,” na ol samting bilong ol i holi. Wanpela buk (Dizionario Ecclesiastico) i tok, ol dispela samting bilong ol santu ol i ting em i holi i olsem: “Bodi o hap bodi bilong Santu, o sit bilong paia i kamap taim ol i bin kukim bodi bilong Santu, o wanpela samting i bin pas long bodi bilong santu na long dispela as i stret ol man i ken givim bel long en olsem samting i holi.”

Ol Pop i Orait Long Dispela

Ating planti manmeri i tingim ol dispela kain samting, olsem ol bun samting bilong ol santu, ol i samting holi, long wanem, i olsem i gat sampela mirakel i bin kamap long rot bilong ol dispela samting. Na narapela as na planti manmeri i save tingim tru ol bun samting bilong ol santu em olsem: Ol pop i orait long dispela pasin.

Insait long 70 yia i go pinis, inap olsem 4-pela pop i bin tingim tru ol bun samting bilong ol santu. Wanpela nius Katolik (30 giorni, Mas 1990, pes 50) i tok, Pop Pius Namba 12 i senisim Pop Pius Namba 11 na bihainim pasin bilong em​—⁠em tu “i save karim sampela samting bilong santu meri Lisiu long skin bilong em.” Pop Paul Namba 6 “i putim wanpela pinga bilong aposel [Tomas] long tebol bilong em,” na Pop John Paul Namba 2 “i putim long haus bilong em yet, sampela liklik . . . hap bilong skin” bilong “Santu Benedik” na “Santu Andru.”

Ol pop i orait long dispela pasin bilong mekim wok long samting bilong ol santu, olsem na yumi no ken kirap nogut long planti manmeri long nau i laik kisim ol bun samting bilong ol santu bilong putim long haus bilong ol yet o putim long haus lotu na ol i givim bel long ol dispela samting olsem em i samting holi. Tasol yu ting God i orait long pasin bilong givim bel long bun samting bilong ol santu olsem samting i holi?

[Piksa long pes 3]

Wanpela samting ol i save putim samting bilong santu long en

[Kredit Lain]

Courtesy of The British Museum