‘Long Sampela Hap Bai i Gat Bikpela Sik’

JISAS i tok profet olsem ol bikpela bikpela sik bai kamap bilong makim olsem ‘em i kam bek pinis na pasin bilong dispela graun i laik pinis.’ (Matyu 24⁠:⁠3) Taim Matyu tupela Mak i stori long dispela tok profet bilong Jisas, ol i no kolim dispela hap bilong mak, tasol Luk i kolim. (Matyu, sapta 24 na 25; Mak, sapta 13) Em i tok, long taim bilong las de, “long sampela hap” bai i gat bikpela sik. (Luk 1⁠:3; 21⁠:11) Ol dispela bikpela sik inap kamap olsem wanem?

Wanpela nius (Science News) i tok: “Ol saveman bilong saiens i save, i gat planti samting bilong kamapim sik, olsem vairas, i stap long skin bilong ol animal o narapela samting i stap laip long ol ples hat, . . . na ol dispela vairas inap kamapim ol bikpela sik na bagarapim tru ol man, winim sik AIDS.” Nius i tok moa olsem, ol dispela vairas long ol ples hat i gat strong inap long kamapim bikpela sik na bagarapim planti man long planti hap bilong graun.

Ol kain bikpela sik olsem inap kamap long nau, long wanem, lain bilong graun i kamap planti tru na ol i sot long planti samting. Dispela nius i tok: “Bipo, taim ol man i go sindaun long ples ol i no bin i go long en bipo, o sindaun bilong ol long ples ol i stap long en i go nogut, orait long kain taim olsem ol bikpela sik i bin kamap.” Taim ol man i go long ol ples bipo ol i no inap i go long en na ol vairas i pulap long en, bihain bikpela sik i save kamap na bagarapim ol man. Long olgeta hap bilong graun i gat taim bilong ren na taim bilong san samting na sapos senis i kamap long dispela na ol binatang i lusim ples na i go longwe moa, ol i karim ol vairas i go nabaut na ol bikpela sik i save kamap. Na dispela nius i tok: “Sampela pasin ol dokta i kirap long bihainim, olsem putim blut o kidni samting bilong man long skin bilong narapela man, dispela tu i opim rot na ol dispela samting bilong kamapim sik i ken kalap long narapela narapela man. Na pasin bilong ol man long nau, dispela tu i opim rot long ol, olsem long nau ol maniman na man i gat nem i save raun long planti hap, na ol man bilong kisim drak long rot bilong sut, narapela i mekim wok long nil bilong narapela.”

Nius i tok moa: “Long dispela taim nau, sik bilong vairas i bin bagarapim sampela man long sampela hap, tasol nogut dispela i makim olsem bihain ol dispela kain sik bai bagarapim planti man long planti hap.” Olsem: Bipo ol man i no save long sik Mabek, em wanpela vairas i kamapim. Em wanpela sik bilong ples hat na em inap kilim man i dai. Dispela sik i bin painim planti saveman bilong saiens long Wes Jemani long yia 1968 samting; na long 1977 wanpela vairas i kamapim wanpela kain sik fiva (Rift Valley) long planti milion manmeri long Isip na planti tausen ol i dai; na long 1976, long kantri Saier na kantri Sudan, vairas Ebola bilong ples hat i givim sik long planti man, winim 1,000, na inap olsem 500 ol i dai, planti ol i dokta na nes i bin lukautim ol dispela sikman.

Wan wan taim tasol ol man inap save i gat wanpela sik bilong vairas i laik kamap. Dispela nius i tok: “Long 1918 wanpela strongpela vairas i kamapim kus na sik fiva na dispela sik i go nabaut long olgeta hap bilong graun na kilim i dai inap olsem 20 milion manmeri. Na long dispela taim nau, ol man i lukim wanpela vairas i kamap long skin bilong ol man, ating bipo i bin i stap long skin bilong ol monki tasol long Afrika. Em namba wan taim ol i lukim long skin bilong ol man na ol i no redi long bikpela sik em inap kamapim. Wol Helt Oganaisesen i tok, nau dispela vairas i kamapim sik AIDS em i stap pinis long skin bilong 5-10 milion manmeri long 149 kantri. Ol man i tingting planti long dispela bikpela sik nau tasol i kamap na i bagarapim ol man, tasol ol man i gat save long ol vairas i pret long ol narapela bikpela sik ol vairas inap kamapim na ol dispela sik bai i bagarapim yumi moa moa yet.”

Ol dispela bikpela sik i givim bikpela hevi long yumi, tasol ol yet wantaim ol bikpela pait na hangre na guria i hap bilong dispela mak em Jisas i tok i mas kamap pastaim na bai yumi ken save, em i stap king pinis long Kingdom. (Mak 13⁠:8; Luk 21⁠:​10, 11) Na taim yumi lukim ol dispela samting i kamap, yumi ken amamas, long wanem, taim Luk i stori long dispela tok profet bilong Jisas em i kolim sampela tok moa bilong Jisas, olsem: “Taim ol dispela samting i stat long kamap, orait yupela i mas sanap na litimapim het bilong yupela, long wanem, taim bilong God i kisim bek yupela em i kam klostu pinis.”​—⁠Luk 21⁠:28.