Yu Tingim?

Yu bin tingim gut ol tok i bin kamap long sampela Wastaua bilong ol mun i go pinis? Sapos olsem, bai yu amamas long tingim gen ol dispela tok:

◻ Ol papamama i mas redi long mekim wanem na bai ol i gat taim bilong toktok gut wantaim pikinini bilong ol?

Ol i mas lusim bikpela hap taim long i stap wantaim pikinini bilong ol. Na ol i mas redi long lusim sampela samting bilong ol yet bambai ol inap helpim ol pikinini long i stap gutpela long skin na long tingting na long samting bilong spirit.​—⁠9/1, pes 22.

◻ Bodi bilong Krais i kamap narapela kain, dispela samting i mekim wanem long yumi ol man bilong nau? (Mak 9⁠:​2-4)

Dispela samting inap helpim yumi long bilip strong long ol tok profet bilong Jehova, na strongim bilip bilong yumi na bai yumi bilip tru olsem Krais Jisas em i Pikinini bilong God, na em i dispela man God i bin tok promis long salim i kam bilong baim bek ol manmeri. Na em i helpim yumi long bilip tru olsem Jisas i kirap bek pinis na kamap wanpela spirit, na i helpim yumi long bilip tru long gavman bilong God.​—⁠9/15, pes 23.

◻ Wanem insait bilong dispela tok “inap liklik taim,” olsem i stap long Aisaia 11⁠:​6, NW?

Dispela tok i no makim olsem ol kain animal olsem weldok na sipsip bai poroman wantaim long olgeta taim long nupela taim. Nogat. Ating ol dispela kain animal bai i stap yet long narapela narapela kain ples. Sampela ol i bilong i stap long bus, na sampela ol i bilong i stap long ples, olsem ol i bin mekim long ples Paradais long pastaim. (Stat 1⁠:24) Long nupela taim ol animal bai stap gut wantaim, na narapela i no ken bagarapim narapela.​—⁠9/15, pes 31.

◻ Wanem pasin i as bilong lotu Kristen tru?

Pasin bilong laikim tru ol narapela em i as bilong lotu Kristen tru. Kristen tru em i mas i gat bilip, na em i mas mekim ol gutpela pasin na gutpela wok, na em i mas bung wantaim ol gutpela poroman. Em bikpela samting tru. Tasol sapos em i no laikim tru ol narapela, ol dispela narapela pasin i samting nating. Dispela samting i stret, long wanem, Nambawan pasin tru bilong Jehova em pasin bilong laikim tru ol arapela. (1 Korin 13⁠:​1-3; 1 Jon 4⁠:⁠8)​—⁠10/1, pes 20.

◻ Long Saveman 3⁠:​2, Baibel i tok i gat “taim bilong yumi man i kamap long graun na taim bilong yumi i dai.” Yu ting dispela i makim olsem God i makim pinis taim bilong i dai i mas painim yumi?

Nogat. Solomon i stori tasol long ol samting i save painim yumi long olgeta taim, olsem yumi save kamap long graun na yumi save dai. Saveman 7⁠:17 i tok: “Yumi no ken strong tumas long bihainim olkain pasin nogut na ol longlong pasin. Nogut yumi hariapim dai bilong yumi.” Sapos God i makim pinis taim bilong yumi mas i dai, bai i no gat as bilong dispela tok bilong Solomon, a?​—⁠10/15, pes 5.

◻ Olsem wanem yumi save Pita em i no namba wan bisop bilong Rom?

I no gat wanpela samting i makim olsem Pita i bin i go long Rom; na Pita i tok em i wanpela aposel bilong Jisas​—⁠em i no tok em i gat bikpela namba samting. (2 Pita 1⁠:⁠1)​—⁠10/15, pes 8.

◻ Yu ting i stret ol Kristen i givim plaua long famili bilong man i dai pinis?

Sapos ol man i save, lotu giaman i as bilong wanpela pasin (o wanpela mak, olsem mak bilong kruse), orait ol Kristen i mas klia long en. Olsem na Kristen i no save baim o wokim ol plaua olsem mak bilong kruse samting, na sapos i gat sampela pasin bilong mekim wok long plaua long taim bilong planim man, na em i pasin bilong lotu, ol Kristen i no save bihainim dispela pasin. Tasol long planti kantri, ol Kristen i save givim plaua long famili bilong man i dai pinis na dispela i save mekim gut bel bilong ol.​—⁠10/15, pes 31.

◻ Tok bilong ol misin long insait bilong dispela bilip long God Triwan, i kamapim klia wanem samting?

Em i kamapim klia olsem dispela bilip i no klia na i hatwok long kamapim insait bilong en. Dispela bilip i bin kamap isi isi long rot bilong planti man, em ol i bin i stap long ol narapela narapela taim; ol hap tok na tingting ol i bin kamapim long dispela, em misin i bin bungim na kamapim olsem wanpela strongpela bilip bilong en. Planti tisa bilong lotu, na sampela man moa em ol i bilip long God Triwan, ol i tokaut olsem dispela bilip long God Triwan i no stap long Baibel.​—⁠11/1, pes 21, 22.

◻ Bilong wanem yumi tok yia 29 C.E. em i bikpela yia bilong helpim yumi long save long ol yia ol samting i kamap olsem Baibel i kolim?

Ol man i stadi long Baibel, sapos ol i skelim tok bilong Baibel wantaim ol buk i kolim yia bilong Taiberius i stap king, ol inap kisim save olsem: Jon Bilong Baptais i bin kirap mekim wok bilong em long mun Epril samting long yia 29 C.E., na 6-pela mun bihain, olsem long mun Oktoba samting long yia 29 C.E., Jon i bin givim baptais long Jisas.​—⁠11/15, pes 31.

◻ Ol manmeri i save mekim tok Hibru ol i ting olsem wanem long pasin bilong lotuim God? Olsem wanem dispela i stret long ol Witnes Bilong Jehova long nau?

Hap tok Hibru ol i tanim olsem “lotu,” dispela i makim pasin bilong “mekim wok bilong wanpela man.” Long tingting bilong ol Hibru, pasin bilong lotu long God em pasin bilong mekim wok bilong God. Na ol Witnes Bilong Jehova ol i gat wankain tingting. Olsem na ol man i lotu tru long God, ol i save mekim wok autim tok, em wok bilong God.​—⁠12/1, pes 19.