Stori Bilong Ol Tumbuna Long Bikpela Tait
BIKPELA Tait i bin kamap long taim bilong Noa i traipela tait na i bagarapim planti samting tru, olsem na ol man i no inap lusim tingting long en. Winim 2,400 yia bihain long dispela Tait, Jisas i stori long en na tok bilong Jisas i makim olsem dispela Tait i bin kamap tru long bipo. (Matyu 24:37-39) Ol man i no inap lusim tingting long dispela narapela kain samting i bin kamap, olsem na i gat stori bilong en long ol stori bilong ol tumbuna long olgeta hap bilong graun.
Wanpela man (Philip Freund, long buk Myths of Creation) em i tok, long planti lain, winim 250, long olgeta hap, i gat 500 samting stori bilong Bikpela Tait. Insait long planti handet yia, ol man i kolim kolim ol dispela stori na ol i skruim sampela tok nating long en na stori long sampela samting i no bin kamap tru na sampela man i no bin i stap tru long dispela taim bipo. As bilong ol stori i wankain, tasol ol stori i kamap narapela narapela kain.
Sampela Samting Bilong Ol Stori Em i Wankain Stret
Bihain long Tait, taim ol man i lusim hap bilong Mesopotemia, ol i kisim ol stori bilong dispela traipela tait i go nabaut long olgeta hap bilong graun. Long dispela rot ol lain i stap long Esia, na long ol ailan bilong Saut Pasifik, na long Not na Sentral na Saut Amerika, ol i gat stori bilong dispela bikpela samting i bin kamap bipo. Taim ol dispela lain i no save yet long Baibel, ol dispela planti stori bilong Tait i stap. Tasol sampela samting bilong ol stori i wankain stret long stori bilong Baibel.
Sampela stori bilong ol tumbuna i tok, paslain long Tait i gat ol traipela man bilong pait ol i stap. Baibel tu i makim olsem paslain long Tait sampela ensel i bikhet na ol i bin tanim i kamap man na slip wantaim ol meri, na ol pikinini ol i kamapim i traipela man.—Stat 6:1-4; 2 Pita 2:4, 5.
Planti stori olsem i stori long wanpela man i bin kisim toksave long wanpela bikpela tait wara i laik kamap, em God i as bilong en. Baibel i tok, God Jehova i bin toksave long Noa olsem em bai bagarapim ol man nogut na ol man bilong pait. God i tokim Noa: “Olgeta manmeri i wok long pait na bikhet tasol, olsem na mi laik bagarapim ol. Bai mi pinisim tru olgeta lain manmeri.”—Stat 6:13.
Ol dispela stori i save stori olsem dispela Tait i bin bagarapim ol samting long olgeta hap bilong graun. Na olsem tasol Baibel i tok: “Na wara i kam antap moa moa yet na i karamapim olgeta bikpela maunten. Olgeta samting i gat laip long graun i dai.”—Stat 7:19, 22.
Planti bilong ol dispela stori i tok, wanpela man i bin abrusim bagarap na wanpela moa o sampela moa ol i bin abrusim bagarap wantaim em. Planti stori i tok, dispela man i hait insait long wanpela sip em i bin wokim, na ol i stori olsem sip i bin sindaun long wanpela maunten. Baibel tu i stori olsem Noa i bin wokim wanpela sip. Na Baibel i tok: “Wanpela lain tasol i no bagarap long dispela tait, em Noa wantaim ol lain bilong en na ol pisin na ol animal i stap wantaim ol insait long sip.” (Stat 6:5-8; 7:23) Baibel i stori olsem taim Tait i pinis, “sip i pas long wanpela maunten long ples maunten bilong Ararat,” na long dispela ples Noa wantaim lain bilong em i lusim sip na i go daun. (Stat 8:4, 15-18) Ol stori bilong ol tumbuna i tok tu olsem ol man i bin abrusim bagarap long Tait ol i kamapim ol pikinini, olsem Baibel i tok lain bilong Noa i bin mekim.—Stat 9:1; 10:1.
Ol Stori Bilong Tait Bilong Bipo
Orait, yumi ken tingim ol dispela samting na nau yumi ken skelim sampela stori bilong ol tumbuna long Bikpela Tait i bin kamap long bipo. Pastaim yumi ken skelim stori bilong ol Sumeria, em wanpela lain i bin i stap long hap bilong Mesopotemia long bipo tru. Stori bilong ol long Tait i stap long wanpela hap ston ol man i painim pinis long olpela taun Nipur i bagarap pinis. Rait long dispela hap ston i stori long tupela god bilong ol Sumeria, em Anu na Enlil, em tupela i tingting pinis long bagarapim ol man long wanpela traipela tait. God Enki i toksave long Siusudra na em wantaim famili bilong em i abrusim bagarap long bikpela sip.
Stori bilong Gilgames, em wanpela bikman bilong Babilonia, i stori long planti samting bilong Tait. Dispela stori i tok, Gilgames i go lukim tumbuna bilong em Yutnapistim, em i bin abrusim bagarap long Tait na kisim laip i stap oltaim. Tupela i toktok wantaim na Yutnapistim i stori olsem em i bin kisim toksave long wokim wanpela sip na kisim ol bulmakau, na ol animal bilong bus, na meri pikinini bilong em i go insait. Em i wokim dispela sip olsem wanpela traipela bokis i skwea olgeta—em longpela inap 60 mita na braitpela inap 60 mita na i go antap inap 60 mita, na i gat 6-pela plua o dek bilong en. Em i tokim Gilgames, bikpela ren i bin kam daun inap 6-pela san na 6-pela nait, na bihain em i tok: “Long namba 7 de, bikpela strong bilong traipela win na Tait samting . . . i slek, . . . Solwara i stap isi, na strongpela win i dai, na Tait i pinis. Mi lukluk long solwara na mi no harim moa nek bilong ol man. Na olgeta man i bin tanim i kamap graun.”
Yutnapistim i stori moa olsem: Sip i go pas long Maunten Nisir na em i lusim wanpela pisin ol i kolim balus i go. Tasol pisin i no inap painim ples bilong sindaun na malolo, olsem na em i kam bek long sip. Bihain em i salim narapela pisin i go na em tu i kam bek long sip. Na bihain em i lusim wanpela kotkot i go na kotkot i no kam bek, olsem na em i save wara i go daun pinis. Nau em i lusim olgeta animal i go, na em i kilim wanpela na mekim ofa.
Dispela olpela stori tru i wankain liklik olsem stori bilong Baibel long Tait. Tasol dispela stori i no kolim klia olgeta samting i bin kamap olsem Baibel i mekim, na mak dispela stori i kolim bilong bokis i no stret, em bikpela tumas; na dispela stori i no kolim hamas mun o yia i bin lus olsem Baibel i makim. Stori bilong Gilgames i tok, ren i kam daun inap 6-pela san na 6-pela nait, tasol Baibel i tok, “bikpela ren moa i kam daun long san na long nait, inap long 40 de”—dispela bikpela ren moa i no pinis kwik, na isi isi wara i kam antap na i karamapim olgeta hap bilong graun.—Stat 7:12.
Baibel i stori long 8-pela man i bin abrusim bagarap long Tait, tasol long stori bilong ol Grik i gat tupela tasol i bin abrusim bagarap, em Diukalion wantaim meri bilong em Pira. (2 Pita 2:5) Dispela stori bilong ol tumbuna i tok, paslain long Tait ol man bilong pait i bin i stap long graun, na god Sus i tingting pinis long bagarapim ol long traipela tait, tasol em i tokim Diukalion long wokim wanpela traipela bokis na go insait long en. Taim wara i go daun pinis, bokis i sindaun long Maunten Panasus. Diukalion na Pira i lusim maunten i go daun na tupela i kamapim ol pikinini na ol manmeri i pulap gen long graun.
Ol Stori Bilong India na Saina
Stori bilong Tait long India i tok, wanpela man nem bilong em Manu em tasol i abrusim bagarap long Tait. Em i mekim gut long wanpela liklik pis, na pis i kamap traipela na i toksave long em olsem bikpela tait wara bai kamap na bagarapim ol samting. Manu i wokim wanpela sip, na pis i pulim i go sindaun long wanpela maunten long ples maunten Himalea. Taim Tait i pinis, Manu i go daun long maunten na mekim ofa na ofa i tanim i kamap wanpela meri, nem bilong em Ida, na tupela i kamapim ol pikinini na ol manmeri i pulap gen long graun.
Stori bilong ol Saina i tok, god bilong klaut i pairap i givim wanpela tit long tupela pikinini, em Nuwa na Fusi. Em i tokim tupela long planim dispela tit na bai wanpela bus rop i kamap i gat skin kambang long en na tupela i mas hait insait long dispela skin kambang. Tupela i planim dispela tit na wantu wanpela diwai i kamap i gat traipela skin kambang long en. Taim dispela god i mekim na bikpela ren tru i kam daun, tupela pikinini hia i go insait long dispela skin kambang. Bikpela tait i kamap na bagarapim olgeta narapela, tasol Nuwa na Fusi i no bagarap, na bihain tupela i kamapim ol pikinini na ol i go sindaun long olgeta hap bilong graun.
Long Not na Sentral na Saut Amerika
Ol retskin bilong Not Amerika i gat kain kain stori bilong ol tumbuna i stori long wanpela bikpela tait i bagarapim olgeta manmeri na liklik lain tasol ol i no bagarap. Ol retskin ol i kolim Arikara ol i tok, bipo i gat wanpela lain long graun ol i strongpela tru na ol i bin tok bilas long ol god. God Nesaru i bin bagarapim ol dispela traipela man long bikpela tait, tasol em i lukautim lain bilong em, na ol animal, na sampela kon, long wanpela hul ston long maunten na ol i no bagarap. Lain retskin ol i kolim ol Havasupai i tok, god Hokomata i bin kamapim wanpela bikpela tait na bagarapim ol manmeri. Tasol wanpela man, nem bilong em Tosopa, em i haitim pikinini meri bilong em Pukehe insait long wanpela diwai i gat hul insait. Em i pasim maus bilong hul na pikinini i no bagarap.
Sampela lain retskin bilong Sentral na Saut Amerika i gat stori long bikpela tait i wankain liklik long dispela stori. Ol Maya bilong Sentral Amerika i bilip olsem i gat wanpela bikpela snek bilong bosim ren na em i bagarapim graun long traipela tait. Long Meksiko, ol Semalpopoka i tok, i gat wanpela tait i bin karamapim ol maunten. Ol i tok, god Taskatlepoka i bin toksave long Nata, na Nata i wokim hul insait long diwai na em wantaim meri bilong em Nena i bin hait insait inap long taim wara i go daun.
Long Peru, ol Sensa i gat stori i tok, wanpela tait bilong 5-pela de i bin bagarapim olgeta man na wanpela tasol i bin abrusim bagarap. Wanpela animal ol i kolim lama na i save toktok em i bin kisim dispela man i go long wanpela maunten na em i stap gut. Ol Aymara bilong Peru na Bolivia i tok, god Verajosa i bin lusim Raunwara Titikaka na wokim dispela graun na ol traipela strongpela man. Ol dispela man i mekim na dispela god i belhat, olsem na em i bagarapim ol long wanpela tait.
Ol Tupinamba bilong Brasil i save stori long wanpela taim bipo i gat bikpela tait i bin bagarapim ol tumbuna bilong ol, tasol sampela i bin kalap long kanu o ol i go sindaun antap long diwai i longpela moa na ol i abrusim bagarap. Ol Kasenaua long Brasil, na ol Makuse bilong Guyana, na ol Karib bilong Sentral Amerika, na ol Ona na Yagen bilong Tiera del Fuego long Saut Amerika, ol dispela lain tu i gat stori bilong bikpela tait i bin kamap long bipo.
Saut Pasifik na Esia
Long olgeta hap bilong Saut Pasifik i gat ol stori bilong bikpela tait i bin kamap bipo tru na i bagarapim ol man, na wan wan tasol i no bagarap. Long Samoa i gat stori bilong wanpela bikpela tait bilong bipo yet i bin bagarapim olgeta manmeri, tasol Pili wantaim meri bilong em i no bagarap. Ol i hait antap long wanpela bikpela ston, na taim tait i pinis ol i kamapim ol pikinini na ol manmeri i pulap gen long graun. Long ol ailan bilong Hawaii, god Kane i kros long ol man na kamapim wanpela tait bilong bagarapim ol. Nu’u tasol i abrusim bagarap long wanpela bikpela sip i bin pas long wanpela maunten.
Long Mindanao, long Filipin, ol Ata i tok, long wanpela taim bipo wara i bin karamapim graun na bagarapim olgeta manmeri, tasol tupela man na wanpela meri i no bagarap. Ol Iban bilong Sarawak long Bonio i tok, liklik lain ol i bin ranawe i go antap long ol liklik maunten i antap winim ol narapela, na ol i abrusim bagarap long bikpela tait. Ol Igorot bilong kantri Filipin i tok, wanpela man wantaim susa bilong em, tupela i bin hait antap long Maunten Pokis na abrusim bagarap.
Ol Soyot bilong Saibiria long Rasia i tok, wanpela traipela rokrok, em graun i sindaun long baksait bilong en, em i surik na dispela i mekim na bikpela tait i bagarapim graun. Wanpela lapun man wantaim famili bilong em i abrusim bagarap long wanpela bet em i wokim. Taim wara i go daun, bet i sindaun long wanpela maunten i antap moa. Ol Yugri long hap bilong wes long Saibiria na Hangari ol tu i tok, sampela man i bin mekim wok long ol bet bilong helpim ol long abrusim bagarap long tait, na ol dispela bet i bin trip i go nabaut long olgeta hap bilong graun.
I Gat Wanpela As
Ol dispela planti stori bilong ol tumbuna long Bikpela Tait i givim wanem save long yumi? Ol i narapela narapela kain, tasol i gat sampela hap bilong stori i wankain. Dispela samting i makim olsem wanpela traipela tait wara i bin kamap long bipo na i bagarapim ol samting na ol man i no inap lusim tingting long en. Insait long planti handet yia ol dispela stori i kamap narapela narapela kain, tasol i gat wanpela as bilong en—em wanpela bikpela samting i bin kamap long bipo—em dispela Bikpela Tait em Baibel i stori klia na stret long en.
Ol dispela stori tumbuna i bilong ol lain em bipo ol i no bin save long tok bilong Baibel—nau tasol, inap sampela handet yia pinis, ol i save long en. Olsem na yumi no ken ting stori bilong Baibel long Tait i as bilong ol dispela stori. Nogat. Na wanpela buk (The International Standard Bible Encyclopedia) i tok: “Ol stori bilong bikpela tait i stap long olgeta hap bilong graun na planti man i ting dispela i makim olsem, tru tumas i gat wanpela bikpela tait i bin kamap long bipo na i bagarapim ol man long olgeta hap . . . Sampela man bilong raitim ol olpela stori olsem, ol i bin birua long stori bilong ol Hibru na ol Kristen.” (Volyum 2, pes 319) Olsem na yumi ken bilip tru olsem ol dispela stori bilong Bikpela Tait i makim stori bilong Baibel i tru.
Yumi stap namel long ol manmeri i save pait na bagarapim man na mekim kain kain pasin sem, olsem na gutpela sapos yumi kaunim stori bilong Baibel long Bikpela Tait, em i stap long Stat sapta 6 i go 8. Sapos yumi tingim gut as bilong dispela Bikpela Tait—olsem ol man i bin mekim pasin nogut tru long ai bilong God—orait, dispela bai givim tingting long yumi.
I no longtaim na bai strafe bilong God i painim ol manmeri bilong nau em ol i mekim pasin nogut. Tasol gutpela tru, i gat sampela manmeri bai ol i abrusim bagarap. Yu inap abrusim bagarap wantaim ol sapos yu bihainim tok bilong aposel Pita, em i tok: “Na bihain God i tok na . . . bikpela tait i karamapim dispela graun, na graun i bagarap olgeta. Na nau, long wankain tok bilong God tasol, skai na graun i stap na i wetim paia i kamap na i bagarapim ol. Skai na graun i wetim de bilong bikpela kot i kamap, na ol man i bin givim baksait long God, ol bai i bagarap olgeta. . . . Sapos dispela olgeta samting bai i pinis long dispela kain pasin, orait yupela i . . . mas givim laip bilong yupela long God na wokabaut long pasin holi na bihainim olgeta pasin bilong God. Long dispela pasin yupela i mas wetim De bilong God i kamap.”—2 Pita 3:6-12.
Bai yu tingim gut de bilong Jehova klostu nau bai kamap? Sapos yu tingim gut na yu mekim ol samting God i laik bai yu mekim, orait bai yu inap kisim ol bikpela blesing. Ol man i mekim pasin God Jehova i laikim ol i ken bilip na wetim nupela taim, em Pita i stori long en olsem: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.”—2 Pita 3:13.
[Piksa long pes 7]
Stori bilong ol Babilonia long bikpela tait, em wanpela stori ol tumbuna i bin givim long ol nupela lain i kamap, mekim mekim olsem
[Piksa long pes 8]
Yu bihainim toksave bilong Pita na tingim gut de bilong Jehova?