Olgeta Lain Bilong Graun i Kisim Bagarap!

Tingim ol samting bilong dispela graun, olsem ol taun bilong en, pasin bilong ol man, ol samting ol saveman i kamapim, na ol planti bilion manmeri. I no hatwok long ting olsem ol dispela samting bai i stap oltaim, a? Yu ting wanpela taim bai kamap na ol samting bilong dispela graun inap pinis olgeta? Ating yu no inap ting olsem, a? Tasol olsem wanem? Yu save olsem i gat wanpela buk em yumi inap bilip tru long en, na em i tokaut olsem paslain long taim bilong yumi i gat ol lain em God i bin bagarapim ol olgeta?

YUMI no toktok long sampela lain i no gat save liklik, nogat. Ol dispela lain i bin bagarap ol i gat gutpela sindaun, ol taun, ol i wokim ol gutpela samting, na ol i gat bikpela save long ol kain kain samting. Tasol Baibel i stori long yumi olsem wantu, long de namba 17 long namba 2 mun, inap 352 yia paslain long taim Abraham i kamap, wanpela bikpela tait i kamap na bagarapim olgeta lain bilong dispela graun.a

Olsem wanem? Dispela stori i stret? Kain samting olsem i bin kamap tru? Yu ting paslain long taim bilong yumi i gat ol lain manmeri em ol i gat bikpela save na gutpela sindaun na God i bagarapim ol? Sapos olsem, bilong wanem God i bagarapim ol? Wanem samting i kamap na God i mekim olsem? Dispela bagarap inap skulim yumi long wanem samting?

Tru God i Bagarapim Ol Lain Bilong Bipo?

Sapos tru wanpela bikpela bagarap olsem i bin kamap, ating ol man i no inap lusim tingting olgeta long en. Olsem na long planti lain i gat ol stori samting bilong helpim ol man long tingim dispela bagarap. Olsem: Baibel i kolim de stret bilong dispela bagarap. Long kalenda bilong bipo, namba tu mun i kirap long namel bilong Oktoba i go inap long namel bilong Novemba. Namba 17 de i olsem namba wan de bilong Novemba. Olsem na yumi save, i gat as na long dispela taim bilong yia planti kantri i save mekim bung bilong tingim ol man i dai pinis.

Ol stori tumbuna tu i kamapim olsem long bipo wanpela Bikpela Tait i bin kamap. Klostu olgeta lain bilong bipo tru ol i gat sampela stori tumbuna long sampela tumbuna i bin abrusim bagarap long wanpela bikpela tait i bin kamap long olgeta hap bilong graun. Ol lain Pigmi bilong Afrika, ol lain Kelt bilong Yurop, ol lain Inka bilong Saut Amerika​—⁠olgeta dispela lain i gat sampela stori tumbuna i wankain long ol stori tumbuna bilong ol manmeri bilong Alaska, Australia, India, Lituenia, Maikronisia, Meksiko, Nu Silan, Saina, sampela lain long hap bilong Not Amerika, na planti ol narapela lain.

Tru, bihain ol i bilasim ol dispela stori, tasol olgeta i kamapim sampela tok i soim olsem olgeta dispela stori i gat wanpela as tasol. Sampela tok i olsem: Ol pasin nogut bilong ol manmeri i mekim na God i kros. God i kamapim wanpela bikpela tait. Olgeta lain i bagarap. Tasol God i lukautim sampela stretpela manmeri na ol i no bagarap. Ol dispela manmeri i wokim wanpela sip samting, na sampela man na animal i abrusim bagarap. Bihain, ol i salim sampela pisin bilong painim hap graun i drai. Bihain moa, sip i sindaun long wanpela maunten. Taim ol i lusim sip, ol manmeri i abrusim bagarap ol i mekim ofa.

Dispela i kamapim klia wanem samting? Planti samting bilong dispela stori i wankain na dispela i no inap kamap nating. Sapos yumi bungim olgeta samting bilong ol dispela stori tumbuna, dispela i helpim tok bilong Baibel olsem olgeta lain i kamap long ol manmeri i abrusim bagarap long bikpela tait i bin bagarapim ol lain manmeri. Olsem na yumi no gat wok long bilip long ol stori tumbuna o stori nating bambai yumi ken save long ol samting i bin kamap bipo. Yumi gat ol stori bilong Ol Skripsa Hibru long Baibel, em God i lukautim ol dispela stori na ol i no senis liklik.​​—⁠Stat, sapta 6-8.

Baibel i kamapim ol tok bilong God long ol samting i bin kamap bipo, kirap long taim ol samting i gat laip i kamap long namba wan taim. Tasol ol samting i kamapim klia olsem ol dispela stori i no stori nating. Oltaim ol tok profet bilong Baibel i save kamap tru na em i kamapim ol gutpela save na tingting, na dispela i kamapim klia tru olsem Baibel em i tok bilong God​—⁠olsem rot bilong God long givim tok long ol manmeri. Baibel i kamapim ol nem na ol yia bilong ol samting, na tu, em i stori long ol lain tumbuna na i kolim ples ol samting i bin kamap long en​—⁠ol stori nating i no save mekim olsem. Baibel i stori long yumi long sindaun bilong ol man em ol i bin stap paslain long Bikpela Tait, na i kamapim as na olgeta lain manmeri i bagarap wantu tasol.

Ol manmeri i stap paslain long Bikpela Tait ol i bin mekim wanem na bagarap i painim ol? Stori i kamap bihain long dispela bai bekim dispela askim. Em i wanpela bikpela askim long ol man i tingting planti long ol lain bilong nau bai stap olsem wanem long bihain.

[Futnot]

[Sat long pes 4]

(Bilong save ol dispela rait i stap we long pes, lukim buk o magasin)

Stori Tumbuna Long Wanpela Bikpela Tait

Kantri Wankain Stori 1 2 3 4 5 6 7 8 9 10

Grik 7 ◆ ◆ ◆ ◆ ◆ ◆ ◆

Rom 6 ◆ ◆ ◆ ◆ ◆ ◆

Lituenia 6 ◆ ◆ ◆ ◆ ◆ ◆

Asiria 9 ◆ ◆ ◆ ◆ ◆ ◆ ◆ ◆ ◆

Tansania 7 ◆ ◆ ◆ ◆ ◆ ◆ ◆

India - Hindu 6 ◆ ◆ ◆ ◆ ◆ ◆

Nu Silan - Maori 5 ◆ ◆ ◆ ◆ ◆

Maikronisia 7 ◆ ◆ ◆ ◆ ◆ ◆ ◆

Washington Amerika - Yakima 7 ◆ ◆ ◆ ◆ ◆ ◆ ◆

Mississippi Amerika - Sokto 7 ◆ ◆ ◆ ◆ ◆ ◆ ◆

Meksiko - Misoakan 5 ◆ ◆ ◆ ◆ ◆

Saut Amerika - Kesua 4 ◆ ◆ ◆ ◆

Bolivia - Siriguano 5 ◆ ◆ ◆ ◆ ◆

Gaiana - Arawak 6 ◆ ◆ ◆ ◆ ◆ ◆

1: Ol pasin nogut i mekim na God i kros

2: Wanpela bikpela tait i bagarapim ol samting

3: God i kamapim

4: God i toksave pastaim

5: Sampela manmeri tasol i abrusim bagarap

6: Ol i stap insait long wanpela sip samting na abrusim bagarap

7: Sampela animal i abrusim bagarap

8: Ol i salim wanpela pisin o narapela animal i go

9: Bihain sip i sindaun long wanpela maunten

10: Taim ol i lusim sip ol i mekim of