Ol i Tanim Baibel Long Ol Tok Ples Bilong Afrika
Namba wan taim ol i bin tanim Baibel olgeta long wanpela tok ples bilong Afrika, em ol i bin mekim long Isip. Ol i kolim Baibel Koptik, na ol i ting ol man i bin tanim olsem 2 handet o 3 handet yia bihain long Krais. Inap 3 handet yia samting bihain, ol i tanim Baibel long tok ples Itiopia.
Long hap saut bilong Itiopia na Sahara i gat sampela handet tok ples ol i no bin raitim, na wok bilong tanim Baibel i mas wetim ol misineri i kamap. Long 1857 Robet Mofat i tanim Baibel long tok ples Swana. Em i prinim ol hap bilong en long wanpela masin. Em namba wan Baibel long Afrika ol i bin tanim olgeta tok bilong en na prinim long masin, na em i namba wan Baibel ol i bin tanim long wanpela tok ples bipo ol i no save raitim. Mofat i bin putim nem bilong God, olsem Yehova, long dispela Baibel. Long wanpela Baibel em wanpela lain (British and Foreign Bible Society) i bin tanim long yia 1872, ol i raitim nem Yehova long sampela bikpela tok Jisas i mekim long Matyu 4:10 na Mak 12:29, 30.
I kam inap long yia 1990 ol i bin tanim Baibel olgeta long 119 tok ples bilong Afrika, na ol i tanim sampela hap bilong en long 434 tok ples moa bilong Afrika.