Jehova i Lukautim Mi Taim Mi Stap Kalabus
EM STORI BILONG ISAIAH MNWE
Mi no bin mekim rong, tasol ol i kalabusim mi na givim strongpela wok long mi long ples wesan nating long Sahara, em i ples hat nogut tru insait long Afrika. Ol pren i no save mi stap we. Dispela samting i bin kamap long 1984. Nau mi laik stori long ol samting i bin painim mi.
LONG 1958, taim mi gat 12-pela krismas, bikbrata bilong mi i kamap wanpela Witnes Bilong Jehova, tasol papamama i lotuim ol god bilong ples long provins Abia long kantri Naijiria, em mipela bin sindaun long dispela hap.
Long yia 1968 mi go insait long ami bilong Biafra, na taim mipela i pait mi tingim pasin bilong ol Witnes Bilong Jehova, ol i no save pait, na mi beten long God i ken helpim mi. Mi tok promis long em, sapos em i helpim mi na mi no bagarap long dispela pait, bihain bai mi kamap wanpela Witnes bilong em.
Pait i pinis na kwiktaim mi kirap mekim ol samting bilong truim tok promis bilong mi. Long Julai 1970 mi kisim baptais, na kwiktaim mi kirap mekim wok painia, olsem autim tok bilong Baibel long olgeta taim. Bihain mi kamap wanpela elda long kongrigesen Kristen. Bihain liklik mi kisim pas bilong brens-ofis long Naijiria, ol i laik bai mi mekim wok misineri long narapela kantri i stap klostu na i tambuim wok bilong ol Witnes Bilong Jehova. Mi orait long dispela, olsem na mi kisim paspot, na long Janueri 1975 mi go.
Ol i Pasim Mipela
Long 1978 ol i makim mi long raun lukim ol Witnes i stap long dispela kantri. I no gat planti i stap, na mi mas raun i go long ol longwe longwe hap. Mi go long ol taun i gat kongrigesen na mi go lukim ol wan wan man i laik harim tok i tru em ol i stap nabaut. Planti taim polis i pasim mi na givim planti askim long mi long wok bilong yumi, na tupela taim ol i pasim mi inap 4-pela de.
Long Sande long Jun 1984 mipela redi long i go autim tok bilong Baibel, na wanpela gutpela man i kam toksave long mipela olsem ol polis i laik holim ol Witnes Bilong Jehova. Long wik antap ol i holim mi wantaim Jagli Kofivi, em wanpela Witnes bilong Togo. Ol i kisim mipela i go long polis-tesin na ol i laik bai mipela i kamapim nem bilong ol Witnes bilong dispela taun. Ol i tok: “Sapos yu no tokim mipela, orait, mipela i no inap lusim yu i go.”
Mi tokim ol: “Yupela i polis. Em wok bilong yupela long painim ol man. Mi no wokman bilong yupela.” Mipela toktok inap 30 minit, na ol i tok ol bai paitim mipela. Tasol mipela i no kamapim nem bilong ol brata. Ol i tok mi mas givim olgeta buk na Baibel bilong mi long ol.
Long Polis-Tesin
Mitupela Jagli i go kisim ol buk na karim i kam putim i stap. Hap pepa i bin i stap insait long Baibel em i pundaun, em program bilong kibung distrik i gat nem bilong olgeta elda Kristen bilong dispela kantri. Kwiktaim mi kisim dispela pepa na mi putim long poket. Tasol wanpela plisman i lukim, na em i tok mi mas putim pepa i stap wantaim ol buk. Bel bilong mi i bagarap stret!
Orait, mi mekim olsem, na mitupela Jagli i go kisim sampela buk moa i kam. Taim mi kam bek mi kisim dispela pepa na putim long poket bilong mi, na mi tokim plisman mi laik go long toilet. Em i bringim mi i go long toilet, na mi go insait na pasim dua, na mi brukbrukim pepa na tromoi i go daun long toilet na wara i karim i go pinis.
Bihain ol polis i save long dispela samting mi bin mekim, na ol i kros nogut tru. Ol i laik paitim mipela, tasol ol i pret, nogut bos bilong ol i harim na em i save long mipela i bin bagarapim dispela pepa na nau em bai kros long ol polis i no bin was gut long mipela. Mipela i stap kalabus inap 17 de, na nau polis-inspekta i tokim mipela long bungim ol kago samting bilong mipela, long wanem, ol bai salim mipela i go long narapela hap. Mi pulimapim ol klos bilong mi long bek plastik, na mi putim wanpela Baibel i go insait long bek, aninit long ol dispela klos. Wanpela pren i bin bringim hait dispela Baibel i kam long taim em i kam lukim mi.
Mipela i toksave long ol narapela Witnes long ol polis i laik kisim mipela i go long narapela hap, tasol wanem hap tru, em mipela i no save. Long de bihain long en long moningtaim, long Julai 4, 1984, inspekta i tokim mi long kamautim ol klos long bek. Mi wok long mekim olsem, na taim wanpela siot wantaim Baibel i stap yet em i tokim mi long bekim gen ol klos i go insait long bek, olsem na em i no lukim Baibel i stap insait.
Kalabus Long Ples Wesan Nating
Polis i kisim mipela i go long ples balus na putim mipela long balus bilong ol ami, na ol i bringim mipela i go long wanpela longwe taun i gat 2,000 manmeri long en, na ples kalabus i stap klostu. Narapela taun i stap longwe inap 650 kilomita. Ol i kisim mipela na bringim mipela long bos bilong ples kalabus. Ol pren na famili bilong mipela i no save mipela i go we.
Taun hia i stap long ples wesan long Sahara. Sampela diwai i stap, na ol i bin wokim ol haus long graun malumalum. Bilong kisim wara, ol i save wokim hul long graun i go daun inap wanpela o tupela mita samting. Wanpela man bilong dispela hap em i gat 31 krismas em i tok, em i bin lukim ren wanpela taim tasol long dispela hap! Ples i hat nogut tru. Wanpela kalabusman i tok, em i bin lukim glas bilong makim hat bilong san, na em inap olsem 60° C. Strongpela win i stap long olgeta taim, no gat malolo, na em i tromoi wesan i sutim skin na ai bilong mipela na i pen.
Dispela ples i stap long wanpela hap i nogut tru. Bikpela banis i raunim ples kalabus, na man inap hait liklik long win na san. Banis i bilong kalabusim ol man na bai ol i no ken ranawe. Tasol sapos ol i kalapim banis na ranawe, ol bai go we? Ol bai lus, long wanem, ples wesan nating tasol i stap, no gat diwai o wanpela samting i stap na bai man i ken hait long en.
Bos bilong kalabus i tokim mipela long rausim olgeta samting i stap long bek bilong mipela. Mi rausim ol wan wan samting i go inap wanpela siot tasol i stap na i karamapim Baibel. Mi opim bek na soim long em, na em i lukim tasol siot i stap, na mi tok: “Ol i no larim mipela i kisim planti samting i kam.” Em i no gat sampela tok moa long dispela, na em i tokim mipela long go sanap ausait. Mipela i gat dispela wanpela Baibel tasol.
Hevi Bilong Kalabus
I gat 34 kalabusman i stap. Ol i man nogut bilong kilim man i dai. Mipela olgeta i slip long tupela bikpela rum, na ples waswas na toilet i stap namel. Toilet em wanpela dram i no gat ai bilong karamapim. Long olgeta moningtaim ol kalabus i mas rausim pekpek i stap long en. Planti lang moa yet i pulap long en long olgeta taim.
Mipela i gat wanpela kaikai tasol, em sogum, em wanpela kain kon. Wanpela kalabus i mas wilwilim na boilim, na skelim i go long ol plet, na putim plet long mat bilong ol wan wan man, na em i save larim i stap long ples klia. Taim mipela i wok pinis na em i taim bilong kaikai, planti handet handet lang i pulap long ol dispela plet kaikai. Mipela kisim plet, na ol lang i pairap na ranawe. Inap tupela de mipela i no laik kaikai, tasol long namba 3 de mipela rausim ol lang, na rausim skin antap long kaikai, na nau mipela i kaikai. Mipela beten askim Jehova long lukautim mipela na bai sik i no ken painim mipela.
Mipela mas rausim banis bilong olpela banis kalabus na wokim nupela banis. Em bikpela wok tru, na mipela mas wok strong. San i kukim mipela nogut tru. Wok i kirap long 6 klok moningtaim. Long belo mipela i kaikai na kirap gen long wok, i go inap 6 klok apinun. Mipela i mas wok long olgeta de, no gat malolo. Hat i kilim mipela long taim bilong san, na kol i kilim mipela long taim bilong kol. Na ol bos bilong kalabus i mekim nogut long mipela na givim planti pen long mipela.
Stap Strong Long Spirit
Mitupela Jagli i save hait na kaunim Baibel, na mitupela i toktok wantaim long ol samting mipela i kaunim na lainim pinis. Sapos mipela kaunim Baibel long ples klia, ol bai rausim Baibel long mipela na givim strafe long mipela. Wanpela man i gat lam kerasin, na em i larim mi i mekim wok long lait bilong en, na planti taim mi kirap long 1 klok o 2 klok moningtaim na mi kaunim Baibel i go inap 5 klok, na mi kaunim olgeta tok bilong Baibel.
Mipela i save autim tok bilong Baibel long ol narapela kalabus, na wanpela i kamapim dispela long nambawan wasman. Tasol wasman i givim wanpela nius Kirap! long dispela man, na man i givim long mipela. Mipela kaunim kaunim planti taim. Dispela wok bilong kaunim na bilong autim tok em i helpim mipela long i stap strong.
Bilong Toktok Wantaim Ol Pren
I tambu long mipela i raitim pas o salim pas, tasol wanpela man i mekim gut long mipela na em i tok em i ken helpim mipela. Sikspela wik i go pinis, na long Ogas 20 mi hait na raitim pas long gavman bilong Naijiria na long ol pren Witnes, na mi planim tupela pas insait long graun na mi putim ston bilong makim ples ol dispela pas i stap long en. Em nau, pren bilong mi i kam bihain na em i kamautim.
Planti wik i go pinis, na mi ting ol pas i lus. Tasol nogat. Ol Witnes i kirap long mekim ol samting bilong helpim mipela. Na gavman bilong Naijiria i askim gavman bilong kantri mi stap kalabus long en, bilong wanem ol i kalabusim mipela.
Long Novemba 15, 1984, ol wasman i tokim mi long klinim wanpela toilet i pas. Ol man i bin mekim wok long en inap planti wik, maski em i pas, na pekpek i pulap long en. Ol i tok mi mas rausim pekpek, na mi mas mekim long han tasol, no gat savol samting. Mi tingting planti i stap. Tasol nambawan wasman i kam na i tok, bikman bilong provins i laik toktok wantaim mi.
Mi go lukim dispela bikman, na em i tok, presiden i harim tok long mi stap kalabus, na sapos mi tokim ol long nem bilong ol Witnes Bilong Jehova long dispela kantri, orait kwiktaim mi ken lusim kalabus. Mi tokim dispela bikman, sapos ol i laik save long husat ol Witnes i stap, orait, ol polis yet i ken painim dispela samting, em wok bilong ol. Bikman i tok, mi mas tingim gut dispela samting, na no ken sakim, na 4-pela o 5-pela de bihain em bai askim mi gen. Nau ol wasman i kisim mi i go bek gen long haus kalabus, tasol gutpela tru ol i no tok moa long mi mas klinim toilet!
Faipela de bihain dispela bikman i singautim mi gen. Em i laik save, wanem tingting bilong mi. Mi tokim em, mi stap kalabus, long wanem, mi bin kamapim tok witnes bilong trupela God, em tasol, na mi no bin mekim wanpela rong; mi bin kisim paspot, na gavman i bin tok orait long mi long i stap long dispela kantri, na olgeta pepa bilong raun bilong mi i stret, na mi bin toksave long polis long ol samting mi laik mekim. Na mi askim em: “Wanem as na ol i kalabusim mi olsem? Sapos ol i no laik bai mi stap long dispela kantri, bilong wanem ol i no bin rausim mi?”
Mi toktok inap 15 minit, na taim mi pinis em i tokim mi long raitim ol dispela tok long pepa na em bai salim long presiden. Ol i givim pepa long mi, na mi raitim planti tok inap 4-pela pes.
Ol i Lusim Mi i Go!
Mi no harim sampela tok moa i go inap Janueri 1985, na mi bin stap kalabus inap 7-pela mun. Nau nambawan wasman i kam askim mi: “Yu bin raitim pas i go long gavman bilong Naijiria, o nogat?” Mi tok: “Mi bin mekim.”
Em i tok: “Bilong wanem yu bin mekim olsem? Bilong wanem yu no bin toksave long mi?”
Mi tokim em, dispela samting i no samting bilong em. Na mi tok, mi no bin raitim sampela tok bilong mekim nogut long em long dispela pas, long wanem, i no asua bilong em na ol i bin kalabusim mi. Mi tokim em: “Mama bilong mi i no save mi stap we nau long dispela taim.” Em i laik save, olsem wanem mi bin salim pas i go, tasol mi no tokim em long dispela samting.
Long de bihain ol wasman i redim wanpela ka, na ol i tokim mi, ol i laik bringim mitupela Jagli i go long narapela hap. Ol i kisim mipela i go ausait long banis kalabus, na mipela i mas rausim olgeta klos bilong mipela, na ol i lukim gut olgeta samting bilong mipela. Mi bin givim Baibel bilong mi i go long narapela kalabus mi bin stadi wantaim em, long wanem, mi save ol wasman bilong haus kalabus bai kisim long taim ol i wok long painim ol samting mi save holim. Dispela kalabusman i bin tokim mi, taim em i lusim kalabus em bai kamap wanpela Witnes Bilong Jehova. Mi beten long em bai i mekim olsem.
Bihain ol i rausim mi i go long Naijiria, na long Februeri 1985 mi kirap gen long mekim wok bilong autim tok bilong Baibel, na mi mekim wok wasman bilong raun long Naijiria. Long 1990 mi kirap long mekim wok wasman distrik long Naijiria. Jagli i stap strongpela Witnes long hap bilong Kot-Diwa.
Ol dispela samting i bin painim mi i lainim mi olsem God Jehova i save lukautim yumi long olgeta taim, maski hevi na traim i bikpela moa. Planti taim mipela i lukim olsem em i helpim mipela long taim mipela i stap kalabus. Pastaim mi stap kalabus, na bihain mi lusim, na nau mi save, Jehova i save long ol wan wan bilong lain bilong em ol i stap we we na ol i stap olsem wanem, ol i gat hevi o nogat, na em i save helpim ol long karim na winim ol dispela hevi.—2 Pita 2:9.