Ripot Long Wok Bilong Kingdom
Tingim Gut Laip, Em i Holi
BAIBEL i makim olsem blut em i bikpela samting long ai bilong God, na yumi no ken mekim nabaut long en. (Wok Pris 17:14; Aposel 15:19, 20, 28, 29) Ol Witnes Bilong Jehova i tingim ol dispela tok bilong Baibel na ol i no save kisim blut long haus sik.
Bilong tokim ol dokta na nes long bilip bilong ol Witnes long blut, na bilong helpim ol long save ol Witnes inap kisim ol narapela samting bilong stretim sik bilong ol, long planti kantri Sosaiti Was Taua i bin kamapim ol Komiti Olsem Lain Namelman Bilong Ol Sikman Witnes na Dokta. Ol brata long ol dispela komiti i save go toktok wantaim ol dokta long ol haus sik. Long dispela taim, ol komiti long Polan i bin mekim 200 miting long 12-pela biktaun wantaim 500 samting dokta, em ol i nambawan dokta bilong sampela klinik o wot long haus sik. Long wanpela miting, samting i kamap olsem:
“Long wanpela miting long taun Sabres long klinik bilong katim ol man i gat sik long klok, gutpela samting i kamap. Kirap long 1986, ol dokta bilong dispela klinik i bin katim ol brata na ol i no givim blut long ol. Ol i bin katim 40 brata olsem. Klinik i orait long helpim ol sikman bilong olgeta hap bilong Polan na bilong ol narapela kantri tu. Inap 50 minit ol brata i toktok wantaim ol man i kam long miting na nau namba tu dokta bilong wanpela wot i soim sampela sikman long ol brata bilong Komiti na em i tok: ‘Ol dispela sikman i Witnes Bilong Jehova. Ol i wok gut wantaim klinik na helpim mipela. Samting ol i mekim i helpim ol wanlotu bilong ol na ol narapela sikman tu. Long rot bilong ol Witnes Bilong Jehova, nau mipela i save, mipela inap katim man na stretim klok bilong em na mipela i no ken mekim wok long blut.
“ ‘Olsem: Mipela i katim dispela meri [em i makim wanpela long han] na mipela i no givim blut long em, na long Mande bai em i lusim haus sik. Mi laik tokim yupela, nau mipela i no mekim wok long blut planti taim olsem bipo, long wanem, em inap bagarapim man. Mipela mas tingim sik HIV na sik hepataitas em inap i stap long blut, na man i kisim blut i no save orait bek kwik.
“ ‘Mi yet mi Katolik, tasol mipela famili i save tingim bilip bilong ol narapela man. Wanpela taim mi raun wantaim ol pikinini long hap bilong Stediam Slaski. Bipo dispela stediam i stap nogut, tasol nau mipela i lukim em i senis olgeta. Mi askim wanpela wokman long dispela na em i tok, lain bilong bosim stediam i bin ting bai ol i no inap stretim, tasol ol Witnes Bilong Jehova i rentim na ol i stretim.
“ ‘Olsem na dispela lain inap skulim mipela long planti samting. Mi ting long dispela wot mipela i mas tingim bilip bilong ol man.’ Em i makim wanpela Witnes ol bai katim em sampela de bihain, na em i tok: ‘Dispela meri em i wanpela Witnes Bilong Jehova. Mipela bai katim em na mipela no ken givim blut long em.’ ”
Ol Witnes Bilong Jehova i no save subim ol narapela long bihainim bilip bilong ol, tasol ol yet i save bihainim pasin bilong ol aposel na ol i “bihainim tok bilong God tasol.” (Aposel 5:29) Ol i mekim olsem long blut. Ol i save amamas taim ol narapela man i tingim gut bilip bilong ol long blut.