Yu Tingim Yet?
Olsem wanem? Yu bin amamas long kaunim tok bilong ol nupela Wastaua? Sapos olsem, orait traim bekim ol dispela askim hia:
▫ Long nau, yumi ken mekim wanem bilong helpim tru ol sikman na lapun insait long kongrigesen?
Long bipo, ol kongrigesen Kristen i gat lista bilong ol meri em man bilong ol i dai pinis na kongrigesen i mas helpim ol long ol samting bilong skin. (1 Timoti 5:9, 10) Na long nau tu, sapos ol elda i laik, ol i ken wokim lista bilong sampela sikman o lapun yumi mas helpim ol. Tasol i no ol elda tasol i mas tingting long mekim gut long ol. Yumi olgeta i mas save long ol hevi bilong ol na olsem wanem yumi ken helpim ol. (1 Timoti 5:4-8)—8/15, pes 28-29.
▫ Yumi inap bilip tru long stori bilong Baibel i tok wanpela pis i bin daunim Jona?
Yumi ken bilip, long wanem spem weil, o waitpela sak, o weil sak, ol inap daunim man. Na Jisas yet i tok, stori bilong pis i daunim Jona i tru. (Matyu 12:39, 40)—8/15, pes 32.
▫ Ol man i mekim wok long sampela bilas samting bilong lukautim ol, olsem wanem dispela inap nogutim ol?
Ol i no wokim tingting na painim rot bilong stretim ol hevi bilong ol—ol i ting ol dispela bilas samting bai stretim ol hevi. Na taim man i bilip long dispela samting, dispela inap giamanim em na em i ting samting nogut i no inap painim em. Na bikpela samting moa, em i olsem: Man i bilip long strong bilong ol paspas o kain samting olsem em ol man i bin mekim singsing long en, em inap givim rot long ol spirit nogut i bosim em.—9/1, pes 4.
▫ Wanem 4-pela samting inap helpim marit long wok gut?
Narapela i mas harim tok bilong narapela, na tok sori long samting nogut em i mekim, na helpim na strongim em, na mekim pasin sori long em. (1 Korin 13:4-8; Efesus 5:33; Jems 1:19)—9/1, pes 20.
▫ Taim hevi i painim ol man, Jehova i mekim wanem bilong helpim ol long sanap strong?
Baibel i gat stori bilong ol man i bin sanap strong, na Jehova i bin putim long Baibel bilong helpim yumi long mekim olsem. (Rom 15:4) Sapos yumi tingim ol dispela stori, em bai kirapim yumi na strongim yumi bambai yumi no ken les, na em bai lainim yumi long pasin bilong sanap strong.—9/15, pes 11-12.
▫ Wanem insait bilong dispela tok, wokabaut long pasin bilong God?
I olsem yumi givim bel long Jehova na mekim ol samting em i save laikim. Maski ol hevi na traim i painim yumi, yumi mekim olsem, long wanem, yumi save laikim tumas Jehova.—9/15, pes 15.
▫ Yumi mas ting olsem wanem long marimari bilong God?
Yumi no ken mekim nabaut long marimari bilong God. Yumi mas bihainim pasin bilong Pol na kamapim bel bilong yumi, yumi pilim tru marimari bilong God na yumi wok strong long daunim laik bilong skin. (1 Korin 9:27) Sapos yumi mekim olsem, dispela bai kamapim klia yumi gat laik long mekim pasin i stret, maski hevi i painim yumi.—10/1, pes 23.
▫ Bilong wanem i stret Pol i putim dispela pasin, no save kros kwik, i go pas long lista bilong ol wok bilong agape?
Ol Kristen i no inap bung gut wantaim na stap wanbel sapos narapela i kros o les kwik long narapela. Long wanem, yumi olgeta i save popaia na yumi no gutpela olgeta, na sampela taim yumi skrapim bel bilong narapela. Olsem na sapos ol brata i laik bai pasin agape i stap namel long ol, orait narapela i no ken kros kwik long narapela.—10/15, pes 21.
▫ Ol Kristen bilong bipo i bin kamapim nem bilong God?
Yumi ken ting ol i bin mekim. Jisas i bin lainim ol disaipel long beten long God olsem: “Nem bilong yu i mas i stap holi.” (Matyu 6:9) Na Jisas i beten long Papa olsem: “Mi autim pinis nem bilong yu long ol man yu bin givim mi long dispela graun.” (Jon 17:6) Na Baibel Septuagint i bin kamapim nem bilong God long rait Hibru (11/1—.)יהוה, pes 30.
▫ Baibel i kamapim wanem ol stori na yumi save, pasin yumi mekim long taim yumi mekim popaia, dispela inap helpim yumi o nogutim yumi?
King Sol i sakim ol tok bilong stretim em, na bihain em i mekim planti popaia moa, na taim em i dai, God i no orait long em. (1 Samuel 15:17-29) Tasol maski Devit i bin mekim planti popaia na rong, em i tanim bel na em i kisim ol tok bilong stretim em na em i stap gut long Jehova. Ol dispela stori i soim yumi, sapos yumi kamapim ol popaia bilong yumi, Jehova bai amamas long yumi na yumi inap tingting long kisim laip oltaim. (Song 32:1-5)—11/15, pes 29-30.
▫ Olsem wanem Jehova i save helpim lain bilong em taim hevi i painim ol, olsem long taim bilong bikpela bagarap samting?
Em i no save wokim mirakel na pasim guria o win samting olsem planti man i ting em i mas mekim. Em i helpim ol long narapela rot ol man i no pilim gut—em pasin sori. Jehova i save laikim tru lain bilong em, na em i bin kamapim pasin namel long ol olsem narapela i laikim tru narapela, olsem na em inap mekim ol samting bilong helpim ol na i olsem mirakel. (1 Jon 4:10-12, 21)—12/1, pes 10.