Sampela Bilas Samting Inap Lukautim Yu?

WANPELA man bilong Brasil i karim wanpela kain ston long bak trasis bilong em. Wanpela man bilong pilai spot long Amerika i karim wanpela mani em i ting bai lukautim em. Wanpela famili bilong Aialan i hangamapim wanpela kruse bilong Santu Brigit long bet. Planti milion manmeri i save mekim wok long ol dispela kain samting na ol bilas olsem paspas.a Ol i ting ol dispela samting bai lukautim ol na bagarap i no ken painim ol​—⁠ol gutpela samting tasol bai painim ol.

Yumi ken tingim hap bilong Brasil. Wanpela nius (Veja) i tok, planti manmeri bilong Brasil i save karim ‘sampela hap ston na sampela naispela ston ol i save wokim bilas long en, na ol i ting dispela bai helpim ol na strongim skin na tingting bilong ol.’ Na sampela long Brasil i save pasim wanpela piksa o tok bilong lotu insait long banis bilong haus na ol spirit nogut i no ken mekim nogut long ol. Sampela i save putim Baibel long tebol na ol i opim long Song 91 na em i stap olsem long olgeta taim; ol i ting dispela bai lukautim ol.

Long hap bilong saut long Afrika ol i save mekim wok long marasin bilong ples ol i kolim muti bilong oraitim sik na lukautim ol na bai samting nogut i no ken painim ol. Ol i bilip olsem taim sik o dai i painim man, o bisnis bilong em i bagarap, o em i laikim wanpela meri na meri i no laikim em, as bilong dispela hevi em ol birua i wokim posin long em o em i no bin mekim gut bel bilong ol tumbuna i dai pinis bipo. Ol i kisim muti long man i save wokim ol marasin bilong ples long ol lip bilong diwai o rop o sampela hap bilong wanpela animal. Tasol ol i no mekim wok long muti long ples tasol​—⁠ol man i stap long ol biktaun tu long hap bilong saut long Afrika ol i mekim wok long en.

Long hap bilong Yurop tu planti man i save kisim olkain bilas samting bilong lukautim ol. Wanpela buk (Studies in Folklife Presented to Emyr Estyn Evans) i tok: ‘Long klostu olgeta ples na taun long Aialan ol man i save kisim su bilong hos na pasim antap long dua bilong haus.’ Na planti man long dispela hap ol i wokim kruse long gras i save kamap long tais na ol i hangamapim antap long bet o dua na bai ol gutpela samting tasol i painim ol. Sampela i tok, planti man long Aialan i laik bai yumi ting ol i no bilip tru olsem ol dispela samting i gat strong, tasol klostu olgeta man i mekim wok long ol dispela samting.

Painim Samting Bilong Lukautim Ol

Bilong wanem ol man i laik bilip long ol dispela samting? Ating ol i pret long kisim bagarap. Nau long dispela taim nogut ol man i no save stap bel isi long haus bilong ol o long taim ol i wokabaut long rot long nait​—⁠ol i tingim ol man nogut bai bagarapim ol. Na long nau planti man i hatwok long painim mani na lukautim ol pikinini. Tru tumas, yumi stap long taim bilong “planti hevi nogut tru” olsem Baibel i tok. (2 Timoti 3:⁠1) Olsem na ol man i laik painim wanpela samting bilong lukautim ol na sakim birua.

Dispela kain tingting i strong long ol lain i save mekim ol samting bilong ol spirit nogut, olsem posin samting. Ol man i save pret long tewel bilong ol man i dai pinis o ol i pret long posin bilong ol birua, olsem na ol i strong long kisim ol samting ol i ting em inap lukautim ol, olsem paspas samting. Wanpela buk (The World Book Encyclopedia) i tok, ‘Planti man i save pret long ol samting, na ol i bilip olsem sampela kain bilas o paspas samting inap lukautim ol, na dispela i mekim na bel bilong ol i stap isi, long wanem, ol i ting i no gat wanpela samting nogut bai painim ol.’

Tru Ol Paspas Samting i Gat Strong?

Olsem na long planti hap ol manmeri i save kisim kain kain bilas samting olsem paspas na tanget na salat samting na karim raun. Tasol yu ting ol dispela samting inap lukautim yu tru? Planti bilas olsem, em ol kampani i save wokim. Orait, olsem wanem bai ol i gat strong long lukautim man? Na ol marasin bilong ples tu, ol i wokim long ol rop na kawawar na ol lip nabaut​—⁠olsem wanem ol dispela samting bai i gat strong bilong lukautim man? Ol manmeri i mekim wok long ol dispela samting, yu ting ol i save stap planti yia moa o ol i stap amamas moa, winim ol narapela man? Ol man i wokim ol dispela samting, ol yet i save sik na ol i save dai, a?

Ol dispela samting i no save lukautim tru ol man o helpim ol long bosim wokabaut bilong ol, nogat. Em i save nogutim ol, long wanem, nau ol i no wokim tingting na painim rot bilong stretim ol hevi bilong ol​—⁠ol i ting ol dispela bilas samting bai stretim ol hevi. Na taim man i bilip long dispela samting, dispela inap giamanim em na em i ting samting nogut i no inap painim em. Taim man i dring planti, ating em bai ting olsem tingting na skin bilong em i wok gut yet, tasol sapos em i draivim ka, ating em inap bagarapim em yet o narapela man. Na i olsem tu long man i bilip olsem ol paspas o tanget samting inap lukautim em​—⁠dispela inap nogutim em, long wanem, em i ting em i no gat wok long was gut o tingting gut long olsem wanem em i ken abrusim hevi o bagarap.

Long nau planti milion manmeri i save bilip olsem ol dispela samting i gat strong bilong lukautim ol. Tasol ol i no save, dispela bilip inap nogutim ol. Orait, yumi laik save, em inap nogutim ol olsem wanem? I gat rot tru bilong abrusim bagarap samting? Stori i kam bihain long dispela bai bekim ol dispela askim.

[Ol Futnot]