Gutpela Taim​—⁠Em Inap Kamap Tru?

PROFET Soroasta bilong Iran i autim tingting bilong wanpela man, nem bilong em Masda. Sapos yu bin bihainim dispela tingting bai yu wetim graun i kamap gutpela ples gen olsem long pastaim. Sapos yu stap long kantri Grik long bipo, ating yu laik painim gutpela ples ol i kolim ol ailan Fotunet, o yu wetim Gutpela Taim i kamap gen, olsem saveman Hesiot i stori long en long yia 750 paslain long Krais. Sapos yu bilong lain Guarani long Saut Amerika, ating bai yu wok yet long painim Graun i No Gat Pasin Nogut. Tasol yu stap long nau na ating yu wetim gutpela taim i kamap long rot bilong wanpela tingting politik o wok bilong stretim bek graun.

Wetim Gutpela Taim, laik stap long ol ailan Fotunet, painim Graun i No Gat Pasin Nogut​—⁠ol dispela samting i makim olsem ol man i laik tru long gutpela taim i mas kamap.

Long nau i no gat gutpela taim. Planti hevi nogut tru i kamap​—⁠ol raskol i bagarapim ol man nabaut, ol wanlain yet i pait, ol i laik bagarapim na pinisim sampela lain olgeta, ol man i no gat sori moa, planti man i stap rabis na hangre, ol i no gat wok, ol i no pas wantaim, graun na win na wara i laik bagarap, sampela bikpela sik i no gat rot bilong stretim na ol i bagarapim planti milion man. Wanpela niusman bilong Itali i tingim ol pait bilong nau na em i tok: “I olsem pasin bilong birua na bel nogut i bosim tingting bilong olgeta man.” Olsem na yu ting i stret yumi ken ting gutpela taim inap kamap? O yu ting dispela i olsem yumi driman tasol na gutpela taim i no inap kamap tru? O yu ting dispela taim nau i gutpela na yumi no ken wetim gutpela taim moa i kamap?

Inap planti handet handet yia pinis ol man i laik tru bai gutpela taim i kamap, na bai i gat pasin wanbel na stretpela pasin na gutpela sindaun na pasin sori. Planti saveman i bin stori gut long tingting bilong ol long gutpela ples na gutpela taim. Tasol sori tru, ol i no save long rot bilong kamapim.

Ol dispela tingting bilong ol man bilong bipo long gutpela ples na gutpela taim, yu ting em inap givim sampela save long yumi?

[Piksa long pes 3]

Yu ting nau em i gutpela taim?