Ol Witnes Bilong Jehova Long Olgeta Hap—Pueto Riko
NAMEL long solwara Karibian na solwara Atlantik i gat wanpela naispela ailan, em Pueto Riko. Long yia 1493 Kristofa Kalambas i bin kisim dispela ailan na kolim San Juan Bautista, bilong tingim Jon Bilong Baptais, na Spen i kirap bosim. Nambawan bikpela biktaun bilong en ol i bin kolim Pueto Riko, olsem ‘Taun i Gat Planti Samting.’ Tasol bihain ol i putim dispela nem long ailan olgeta, na biktaun ol i kolim San Juan.
Na tru tumas, Pueto Riko i gat planti samting. Taim Spen i bosim ailan long pastaim, ol i bin kisim planti gol. Nau dispela ailan i save salim suga, kopi, banana, swit muli, i go long ol narapela kantri, na ol i gat planti faktori tu bilong wokim ol samting, na gavman i kisim bikpela hap mani long dispela rot. Tasol i gat narapela gutpela samting long Pueto Riko na i bikpela samting moa.
Ol i bin kirap autim gutnius bilong Kingdom long 1932 samting. Nau i gat olsem 25,000 manmeri ol i autim gutnius long Pueto Riko. Pastaim brens-ofis bilong Sosaiti Was Taua long Pueto Riko i gat 23 manmeri i wok long en. Tasol long 1993 i gat 100 samting. Ol i mas kisim ol dispela nupela wokman bambai brens-ofis i ken lukautim wok bilong tanim ol buk samting bilong Baibel i go long tok Spen, na bai 350 milion manmeri bilong olgeta hap i save mekim tok ples Spen ol inap kaunim.
Nupela Rot Bilong Autim Tok
Na ripot bilong brens-ofis i tok: “Nupela rot i op bilong autim tok long Pueto Riko—mipela i wok strong long kisim tok bilong Kingdom i go long ol yaupas. Wanpela sista i stori olsem: ‘Mi autim tok long ol yaupas na mi go lukim wanpela meri i gat tupela liklik pikinini. Taim em i save mi wanpela Witnes, wantu em i sakim tok bilong mi, long wanem, man bilong em, em tu i yaupas, em i no laikim ol Witnes Bilong Jehova.
“ ‘Sampela mun bihain dispela meri i go lukim wanpela pren bilong em i save stadi wantaim ol Witnes. Em i sindaun harim dispela tok na em i laikim tru. Bihain mi go lukim em gen na em i tok gen olsem man bilong em i no laikim ol Witnes. Tasol em i laik kisim save long Baibel na em i les long lotu bilong em, long wanem, ol i no skulim em long Baibel. Mi kirapim stadi long em long wanpela liklik nius. Wanpela taim em i tokim mi long kam long Sarere, long wanem, man bilong em bai stap long dispela taim. Mi tokim em: “Tasol em i no laikim yumi, a?” Em i tok: “Em i laik save long ol dispela tok.”
“ ‘Orait, long de bihain, tupela i kam paitim dua long haus bilong mi! Man bilong em i gat planti askim, olsem na mi tokim ol long kam long ol miting mipela i wokim bilong helpim ol yaupas. Em i kamap long miting paslain long mi, na em i no lusim wanpela miting i kam inap nau. Em i save autim tok long ol narapela yaupas, na em i bin go long wanpela kibung, na em i tingting long kisim baptais.’ ”
Na ripot i tok moa: “Long kibung distrik long dispela yia, ol i wokim wanpela program olgeta bilong helpim ol yaupas, na ol brata i mekim tok ol i mekim long han. Olsem na planti yaupas wantaim famili bilong ol, ol i kam. Long laspela tok long dispela program, brata i stori long wok ol i mekim bilong helpim ol yaupas, na inap 70 ol i kam bung. Olgeta manmeri long kibung i mekim save paitim han, tasol olsem brata i tok, ol yaupas i no inap harim. Olsem na em i tokim ol yaupas long lukluk i go long ol manmeri i sindaun, na em i askim gen, ‘Yupela i amamas long ol brata yaupas i stap wantaim yupela long kibung?’ Nau em i tokim ol long tromoi tupela han wantaim. I gutpela tru long lukim 11,000 brata sista i tromoi han. Ol brata sista yaupas i amamas tru na ol i pilim olsem ol i insait tru long wanpela bikpela lain brata. Planti ol i krai.”
Ol Witnes Bilong Jehova bai wok yet long ‘kisim kaikai bilong gaden’ long Pueto Riko, na ating ol bai kisim planti moa. Ol “sipsip” bilong God, em i kolim ol olsem ‘ol gutpela gutpela samting,’ ol bai wok long kam insait na bai ol i pulap tru long haus bilong Jehova.—Jon 10:16; Hagai 2:7.
[Blok long pes 9]
OL SAMTING BILONG KANTRI
Yia Bilong Wok Bilong 1994
HAMAS OL I AUTIM TOK: 25,428
SKELIM OLSEM: 1 Witnes insait long 139 man
HAMAS I BUNG LONG MEMORIAL: 60,252
HAMAS PAINIA, AVERES: 2,329
HAMAS BAIBEL-STADI, AVERES: 19,012
HAMAS I BAPTAIS: 919
HAMAS KONGRIGESEN: 312
BRENS-OFIS: GUAINABO