Ol Rabisman i Mas Wet i Go Inap Wanem Taim?
“Ol lain i stap fri, sapos ol i no inap helpim bikpela lain rabisman, orait liklik lain maniman tu bai bagarap.”—John F. Kennedy.
WANPELA manki long Sau Paulo, Brasil, em i gat 12-pela krismas em i tok: “Mi laik bai olgeta manmeri i stap gutpela long bihain long wanpela paradais—no gat rabisman o man i no gat ples slip!” Tasol yu ting hevi bilong ol rabisman inap pinis? Ol i mas wet i go inap wanem taim?
Sampela manmeri i ting ol i stap rabis, long wanem, ol i no inap baim olgeta samting ol i laikim. Tasol tingim ol taranguman i stap rabis tru. Yu inap pilim bikpela hatwok na hevi bilong ol? Sampela i stap hangre na ol i mas resis wantaim ol pisin kanai na rat taim ol i painim kaikai long ol ples pipia! Dispela hevi bai stap inap wanem taim? Nambawan bikman bilong lain UNESCO (United Nations Educational, Scientific, and Cultural Organization), nem bilong em Federico Mayor, em i tok stret olsem: “Yumi mas lusim pasin bilong larim tasol dispela hevi i nogut tru—em bikpela hevi bilong ol planti milion rabisman i stap nogut na i stap hangre.”
Yu ting bihain bai olgeta manmeri i stap gutpela? Yu ting dispela inap kamap tru? I gat wanem gutpela samting ol rabisman i ken wetim?
I Gat Wanem Rot Bilong Ol Rabisman?
Sampela bikman i laik helpim ol rabisman na ol i tok long helpim ol long kisim wok, na kisim gutpela pe, na kisim welfe, na kisim bek graun bilong ol. Ating ol i wanbel long tok bilong presiden bilong Amerika long bipo, em John F. Kennedy, em i tok: “Ol lain i stap fri, sapos ol i no inap helpim bikpela lain rabisman, orait liklik lain maniman tu bai bagarap.” Tasol gutpela laik long helpim ol rabisman, dispela tasol i no inap pinisim hevi bilong ol. Olsem: Sapos ol wok bisnis i kamap gutpela, yu ting dispela bai helpim ol rabisman? Ating nogat. Hetman bilong India long bipo, em Jawaharlal Nehru, em i tok: “Ol lain i gat ol wok bisnis, sapos yumi no pasim strong bilong ol bai ol maniman i kisim bikpela mani moa, na ol rabisman i go rabis moa yet.” Ol rabisman i stap nogut na ol i pilim nogut—ol i pilim olsem ol i samting nating na ol i no gat rot. Yu ting ol hetman bilong graun inap helpim ol na bai ol i no pilim nogut olsem?
Sampela man i stap rabis olgeta, tasol ol i painim pinis rot bilong karim dispela hevi na ol i no pilim nogut moa. Maski i gat ol bikpela hevi, olsem pe bilong ol samting i go antap tru na i no gat wok, ol i stap amamas. Na bihain bai i no gat wanpela man i stap hangre, o i no gat haus, o i pilim nogut tru. Ol dispela hevi bai pinis olgeta. Yu kirap nogut long dispela? Orait, mipela laik bai yu kaunim stori i kamap bihain long dispela, nem bilong en: “Klostu Nau Bai i No Gat Rabisman!”