Wanem Taim Ol i Kaunim na i Helpim Ol Olsem Wanem?

Long Moningtaim Tru:

Tupela marit i save wok mani i pasim tok long kirap hariap long moningtaim olsem 10-pela minit paslain long taim ol i save kirap, bambai tupela inap kaunim Baibel wantaim, na bihain ol i ken hariap lusim haus i go. Dispela i helpim tupela long toktok wantaim long ol gutpela tok taim ol i lusim pinis haus.

Wanpela elda long Naijiria i save bihainim sedyul bilong Skul Bilong Wok Autim Tok olsem sedyul bilong famili long kaunim Baibel. Long olgeta moningtaim, ol i save mekim teks bilong de na bihain ol i kaunim sampela tok bilong Baibel em sedyul i makim. Papa i makim narapela narapela pikinini bilong kaunim sampela tok, na bihain ol i ken mekim askim long ol dispela ves.

Wanpela meri marit long Japan em i bin kaunim Baibel olgeta long olgeta wan wan yia kirap long yia 1985. Sedyul bilong em i olsem: Em i save kirap long 5 klok long moningtaim na kaunim Baibel 20 i go inap 30 minit. Dispela i helpim em olsem wanem? Em i tok: “Bilip bilong mi i kamap strong. Mi lusim tingting long sik bilong mi na mi tingting strong long Paradais bai kamap.”

Wanpela sista, em man bilong em i no Witnes, em i bin mekim wok painia inap 30 yia na em i save kirap long 5 klok long moningtaim bilong kaunim Baibel. Sedyul bilong em i olsem: Em i save kaunim 4-pela pes bilong Olpela Testamen, na wanpela sapta long Nupela Testamen, na wanpela ves long Buk Sindaun. Em i bin kaunim Baibel olgeta long olgeta wan wan yia kirap long yia 1959. Em i tok: “Mi mekim olsem na mi pilim olsem Jehova i laikim mi. . . . Ol tok mi kaunim i strongim mi, na mekim isi bel bilong mi, na stretim mi.” Em i tok moa olsem: “Taim mi kaunim Baibel long olgeta de, i olsem Jehova i strongim mi long olgeta de.”

Wanpela sista i kisim save long tok i tru long wanpela kantri i tambuim wok bilong ol Witnes Bilong Jehova, na man bilong em i birua long bilip bilong em. Em i gat taim bilong kaunim Baibel namel long 6 klok na 7 klok long moningtaim, kirap long Mande i go Fraide. Dispela i bin strongim bel bilong em. Em i tok: “Yumi lain long laikim tumas Jehova na Jisas na long i stap amamas, maski yumi gat hevi na hatwok, long wanem, yumi save ol tok promis bilong Jehova i no inap lus nating.”

Wanpela sista i go long Skul Bilong Wok Painia na bihain em i strong long bihainim tok bilong Skul na kaunim Baibel long olgeta de. Pastaim em i save mekim namel long 5 klok na 6 klok long moningtaim. Tasol bihain em i kisim nupela wok mani, na em i stretim sedyul bilong em na kaunim Baibel namel long 9 klok na 10 klok long nait. Taim ol narapela senis i kamap na givim hatwok long em, em i tok, “Mi wok tasol long stretim sedyul.”

Long San:

Tupela sista wanblut i wok long Betel long Brasil na long olgeta de, taim ol i kaikai pinis long belo, tupela i save kaunim Baibel wantaim inap 20 minit. Ol i bin kaunim Baibel olgeta inap 25 taim, tasol tupela i tok: “Long olgeta taim mipela i kisim sampela nupela save, olsem na mipela i no les long kaunim.”

Wanpela sista singel long Japan i save, maski em i go bikpela long lain Witnes, em i no save gut long ol tok bilong Baibel. Taim em i kirap long mekim wok painia, em i strong long kaunim Baibel long olgeta taim. Nau long olgeta wik, long de em i go long haus sik bilong kisim marasin, em i kaunim hap bilong Baibel em sedyul bilong Skul Bilong Wok Autim Tok i makim. Bihain, long haus, em i wok long painim as bilong sampela tok. Na long pinis bilong wik, em i kaunim sampela tok moa bilong Baibel; em i kaunim ol buk ol i bin raitim pastaim i go long ol buk ol i raitim bihain.

Wanpela manki i gat 13 krismas em i kaunim Baibel olgeta 3-pela taim pinis, na nau em i wok long kaunim wanpela sapta long olgeta de long taim em i pinis skul long apinun na kam bek long haus. Em i tok, dispela i helpim em long “laikim Jehova moa yet.”

Wanpela Witnes i gat planti wok, long wanem, em i save wok mani, na em i wanpela elda, na em i marit na i gat pikinini, olsem na em i save harim ol kaset bilong Baibel taim em i raun long tren i go long wok. Taim em i kam bek long haus, em yet i kaunim gen ol dispela tok long Baibel.

Wanpela painia long Frans i save kaunim Baibel, na em i save harim tu ol kaset bilong Baibel taim em i redim kaikai, na taim em i raun long ka, na taim em i gat hevi, na bilong amamas tu.

Wanpela painia long Japan i gat 21 krismas na em i tingim mama bilong em i strong long em i mas kisim hap kaikai bilong spirit long olgeta de. Kirap long taim em i gat 3-pela krismas inap long nau em i save kaunim hap tok bilong Baibel long olgeta de, tasol i no long wankain taim. Taim em i kaunim pinis hap em i makim bilong de, em i save kaunim gen ol ves i kamapim bikpela tok, na inap sampela minit em i wok long tingim gut long bel.

Narapela painia i bin kaunim Baibel olgeta inap 10-pela taim insait long 12-pela yia i go pinis. Man bilong em i no Witnes, olsem na em i save kaunim long belo bek.

Long Nait:

Wanpela elda long Japan i mekim wok painia oltaim na em i save kaunim Baibel long olgeta nait paslain long em i go slip. Em i bin mekim olsem inap 8-pela yia pinis. Em i tok: “Mi save laikim ol ves i kamapim tingting bilong Jehova, na em i pilim olsem wanem, na pasin bilong em long stretim hevi. Taim mi tingim ol dispela tok bilong Baibel, dispela i helpim mi long kisim tingting wankain olsem bilong Em na mi inap helpim ol brata sista Kristen bilong mi na famili bilong mi.”

Wanpela elda long Frans i bin kaunim Baibel inap wanpela aua long olgeta nait kirap long yia 1979. Planti taim em i putim 5-pela o 6-pela Baibel i stap bambai em i ken skelim ol tok long narapela narapela Baibel. Em i tok, taim em i kaunim gut Baibel olsem, dispela i helpim em long pilim wanem tok bilong Baibel “inap stretim ol hevi i save kamap long olgeta de.” Na em inap mekim gut wok bilong kamapim tok bilong Baibel na stretim man.

Inap 28 yia pinis, wanpela brata long Naijiria i save kaunim long nait ves bilong teks bilong de bihain, em i stap long buk Skelim Sampela Tok Bilong Baibel Long Olgeta De, na em i kaunim sapta olgeta em dispela ves i stap long en. Taim em i marit, em i bihainim yet dispela pasin, tasol nau em i kaunim ves na sapta wantaim meri bilong em na toktok wantaim em long ol dispela tok.

Wanpela yangpela meri, em papamama bilong em i no Witnes, em i save kaunim Baibel 5-pela i go inap 10-pela minit long olgeta nait paslain long em i slip. Dispela hap taim i bikpela samting long em, na em i save beten pastaim na bihain long em i kaunim Baibel. Em i laik save long tok Jehova i givim long olgeta wan wan man bilong raitim Baibel.

Wanpela brata i mekim wok long Betel na em i marit, em i tok inap 8-pela yia pinis em i bin kaunim Baibel olgeta long olgeta wan wan yia. Em i save kaunim inap 20 i go inap 30 minit paslain long em i go slip long nait. Em i kisim save olsem, maski skin bilong em i les, sapos em i no kaunim Baibel pastaim, em i no inap slip. Em i mas kirap na mekim dispela samting bilong spirit pastaim.