No Gat Pait Moa—Long Wanem Taim?

SATA bilong Yunaitet Nesen i bin kamap long Oktoba 24, 1945. Em i wanpela bikpela wok tru ol man i bin tingim bilong kamapim gutaim long graun. Pastaim i gat 51 kantri ol i memba long en, na bipo i no gat wanpela bikpela intenesenel oganaisesen olsem dispela long graun. Na dispela em i namba wan taim wanpela intenesenel oganaisesen inap mekim wok long wanpela ami bilong pasim pait na kamapim gutaim na bel isi long graun na bai i no gat pait moa.

Long nau i gat 185 kantri i memba long Yunaitet Nesen, olsem na nau em i strong moa. Orait, bilong wanem dispela nambawan strongpela oganaisesen bilong graun i no bin mekim tru dispela gutpela wok em i gat laik long mekim?

Lotu​—⁠Samting Bilong Pasim Rot

Wanpela bikpela samting i pasim rot, em wok ol lotu i save mekim insait long wok politik. Tru, kirap long taim Yunaitet Nesen i kamap nupela, ol bikpela lotu bilong dispela graun i tok promis long helpim wok bilong dispela oganaisesen. Pop John Paul Namba 2 i stori long namba 50 yia bilong Yunaitet Nesen na em i tok, Yunaitet Nesen em i “nambawan gutpela rot bilong kamapim gutaim na lukautim gut.” Na planti bikman bilong lotu long olgeta hap ol i gat wankain tingting olsem em. Tasol maski i olsem ol lotu na gavman i wok gut wantaim, wanpela samting i stap ples klia, olsem: Ol lotu i bin givim hatwok long Yunaitet Nesen long mekim gut wok bilong en.

Inap planti handet yia pinis ol lotu i go pas long kirapim o helpim pasin bilong litimapim kantri na birua long ol narapela lain, na kamapim ol pait, na kilim i dai sampela lain olgeta. Nau long dispela taim, ol man i kirap kilim i dai ol wanples bilong ol, na ol i giaman olsem ol i strong long lotu bilong ol na ol i mekim. Long pait bilong Bolkan ol i wok strong long pinisim lain bilong wanpela kantri. Tasol pasin bilong planti man bilong dispela hap, olsem narapela i bel nogut tru long narapela, as bilong en em ol samting bilong lotu, na i no olsem ol i bilong narapela narapela lain, nogat; klostu olgeta i bin kamap long wanpela lain tumbuna tasol. Tru tumas, ol lotu i gat bikpela asua tru long planti planti manmeri ol i dai long dispela pait i stap long hap bipo ol i kolim Yugoslavia, na Yunaitet Nesen i no inap pinisim dispela pait.

Olsem na wanpela profesa bilong lotu long bikpela skul em i tok, “long nau pasin birua namel long ol kantri em i pinis, tasol planti lain bilong lotu i wok long kisim pasin bilong pait, olsem na ating wanpela bikpela wok bilong yumi em bilong glasim gut wok ol lotu i mekim insait long ol pait bilong kilim i dai ol manmeri bilong narapela lain; maski hevi inap painim yumi long dispela wok, yumi mas mekim.” Long nau samting i kamap ples klia olsem: Ol man i pilim pinis olsem lotu i givim hatwok long Yunaitet Nesen long pinisim ol pait na kamapim gutaim long graun.

Wanpela tokaut bilong Yunaitet Nesen long 1981 i tok: “Mipela i Tingting Planti long pasin i kamap ples klia long sampela hap bilong graun, olsem pasin bilong bel nogut long ol narapela lain na daunim ol lain i gat narapela lotu o bilip; na maski mipela i mas mekim olsem wanem, mipela i Pasim Tok long pinisim kwik olgeta kain pasin bilong bel nogut long ol narapela lain, na pasim rot bilong ol man long daunim sampela lain, long wanem, ol i gat narapela lotu o bilip.”

Na Yunaitet Nesen i mekim samting i stret wantaim dispela tokaut: Em i makim 1995 olsem Yia Bilong Orait Tasol Long Ol Narapela Lain. Tasol yu ting ol inap kamapim tru gutaim na bel isi long dispela graun i bruk long planti kain lotu?

Ol Lotu Long Bihain

Wanpela tok profet long Buk Kamapim Tok Hait long Baibel i bekim dispela askim. Em i tok piksa long wanpela “pamukmeri” i stap olsem “kwin” na em i “bosim olgeta king bilong graun.” Dispela pamukmeri em i gat planti mani na ol gutpela gutpela samting, na em i save pamuk wantaim ol gavman bilong graun. Ol dispela gavman i olsem “wanpela retpela wel animal,” na pamukmeri i sindaun antap long en. (KTH 17:​1-5, 18; 18:⁠7) Nem bilong pamukmeri em “Bikpela taun Babilon”; ol i kisim dispela nem long taun Babilon bilong bipo, em i as bilong pasin bilong lotuim ol god giaman. Olsem na long nau dispela pamukmeri i makim olgeta lotu bilong graun, em ol i save insait long ol wok bilong gavman.

Na Kamapim Tok Hait i tok moa olsem: Bihain God bai putim tingting long bel bilong ol lain bilong wel animal ol i gat ami na bai ol i “birua long pamukmeri. Ol bai i bagarapim em tru na rausim olgeta klos samting bilong en. Na ol bai i kaikai mit bilong bodi bilong en, na kukim em olgeta long paia.” (KTH 17:16)a Olsem na God Jehova yet bai kirap na wokim rot bilong mekim dispela samting​—⁠em bai stiaim ol strongpela kantri long bung wantaim long rausim lotu giaman. Olgeta lotu giaman long graun wantaim olgeta bikpela haus lotu bilong ol i gat ol gutpela bilas na gol samting i gat bikpela pe, na ol ples ol i save putim piksa bilong ol santu samting na lotu long en, ol bai bagarapim olgeta. Em nau, ol lotu i no stap moa bilong pasim rot bilong ol gavman long kamapim gutaim na bel isi long graun. Tasol olsem wanem? Bai ol inap kamapim tru gutaim na bel isi long graun?

Pasin Bilong Ol Man i Gat Sin

Orait, yu ting yumi inap bilip tru olsem taim ol lotu bilong graun i pinis, nau ol inap stretim rot tru na bai i no gat pait moa long graun? Nogat. Wankain hevi tasol bai wok yet long painim Yunaitet Nesen, olsem: Ol man i laik bai gutaim na bel isi i ken kamap long graun, tasol ol man yet i nambawan samting bilong pasim rot long kamapim gutaim na bel isi. Pasin bilong ol man, olsem pasin birua, hambak, tingim ol yet i nambawan tru, tingim skin bilong ol yet tasol, no gat save long ol samting, ol dispela pasin i as bilong ol kros na pait long graun.​—⁠Jems 4:​1-4.

Baibel i tok profet olsem: Long taim bilong las de ol man bai i “laikim ol yet tasol, na ol bai i laikim tumas long kisim mani. Ol bai i litimapim nem bilong ol yet na hambak nabaut, na ol bai i tok kros na tok nogut long ol arapela. Ol bai i sakim tok bilong papamama, na ol bai i no tok tenkyu . . . Ol bai i no . . . stap pren bilong ol arapela, na taim ol i kros, bai i no gat rot bilong pinisim kros bilong ol. Ol bai i tok nogut long ol arapela. Ol bai i no bosim laik bilong bodi bilong ol, na ol bai i pait na bagarapim ol man nabaut. Ol bai i birua long olgeta gutpela pasin. Ol bai i mekim nogut long ol pren bilong ol yet . . . Ol bai i tingim ol yet i bikpela man tru.”​—⁠2 Timoti 3:​1-4.

Seketeri-Jeneral Boutros Boutros-Ghali i tokaut olsem, ‘long planti lain long nau, sindaun bilong ol man namel long ol narapela man, na pasin bilong ol, i go nogut olgeta.’ Maski ol lain politik i mekim wanem bilong stretim dispela hevi, ol i no inap daunim pasin nogut i stap long skin bilong ol sinman bilong graun.​—⁠Skelim wantaim Stat 8:21; Jeremaia 17:⁠9.

Krais Jisas​—⁠King Bilong Gutaim

Olsem na yumi save, Yunaitet Nesen i no inap kamapim gutaim long graun. Tru, ol memba na ol helpim bilong en i gat bikpela laik long mekim dispela gutpela wok, tasol olgeta i sinman bilong graun tasol. Baibel i tok, ‘ol man i no inap bosim wokabaut bilong ol yet na bihainim ol rot ol i laikim.’ (Jeremaia 10:23) Na tu, God i toksave long yumi olsem: “Ol king na ol man bilong graun i no inap kisim bek yu. Olsem na nogut yu bilip long ol.”​—⁠Song 146:⁠3.

Baibel i tok profet long ol samting Jehova bai kamapim long rot bilong Pikinini bilong em, em “King bilong kamapim gutpela sindaun na bel isi.” Aisaia 9:​6, 7 i tok: “Wanpela pikinini man i kamap pinis long yumi . . . Em bai i stap king bilong yumi, na em bai i gat ol dispela nem, ‘Man bilong givim gutpela tingting tru’ na ‘God i gat bikpela strong’ na ‘Papa bilong i stap oltaim oltaim’ na ‘King bilong kamapim gutpela sindaun na bel isi.’ . . . Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim.”

Ol gavman bilong graun i bin hatwok tru inap 50 yia long kamapim gutaim, tasol ol i no inap. Orait, klostu nau na ol bai kirap na bagarapim olgeta lotu bilong dispela graun ol i olsem pamukmeri. Bihain long en, Krais Jisas, em “King bilong olgeta king, na Bikpela bilong olgeta bikman,” wantaim ami bilong em long heven, ol bai pinisim olgeta gavman long graun na kilim i dai olgeta man i no laik bai em i stap Nambawan Bos bilong ol. (KTH 19:​11-21; skelim wantaim Daniel 2:44.) Long dispela rot God Jehova bai pinisim olgeta pait na bai i no gat pait moa long graun.

[Ol Futnot]

[Blok long pes 7]

TINGTING BILONG OL KRISTEN LONG YUNAITET NESEN

Planti tok profet bilong Baibel i tok piksa long ol wel animal bilong makim ol gavman bilong graun. (Daniel 7:​6, 12, 23; 8:​20-22) Olsem na inap planti yia pinis, nius Wastaua i kamapim klia olsem ol wel animal bilong Kamapim Tok Hait sapta 13 na sapta 17 i makim ol gavman bilong graun ol i stap long nau. Yunaitet Nesen tu i insait long ol, na Kamapim Tok Hait sapta 17 i tok piksa long en olsem wanpela retpela wel animal i gat 7-pela het na 10-pela kom.

Tasol dispela tok bilong Baibel i no makim olsem yumi ken orait long olkain pasin bilong tok bilas o bikhet long ol gavman o ol bikman insait long gavman, nogat tru. Baibel i tokaut klia olsem: “Olgeta man i mas i stap aninit long ol gavman. Yumi save, i no gat wanpela gavman i kamap nating. Nogat. Olgeta wok bilong gavman i kamap long han bilong God tasol. Na olgeta gavman i stap, God yet i putim ol na ol i stap. Olsem na ol man i sakim tok bilong gavman, ol i sakim tok bilong ol man God yet i bin putim long wok bilong ol. Na ol man i mekim olsem, ol bai i kisim pe nogut long pasin ol i mekim.”​—⁠Rom 13:​1, 2.

Olsem na ol Witnes Bilong Jehova em ol i no insait liklik long ol wok politik bilong dispela graun, ol i no save pasim rot bilong ol gavman long mekim wok bilong ol. Ol i no save kirapim ol man long pait o mekim pasin bikhet long gavman. Ol i save, i mas i gat gavman bilong bosim ol man na bai ol i bihainim lo na sindaun gut wantaim ol narapela man.​—⁠Rom 13:​1-7; Taitus 3:⁠1.

Tingting bilong ol Witnes Bilong Jehova long Yunaitet Nesen i wankain olsem tingting bilong ol long ol gavman bilong graun. Ol i save, Yunaitet Nesen i stap yet, long wanem, God yet i larim em i stap. Ol Witnes Bilong Jehova i bihainim tok bilong Baibel na ol i daun long olgeta gavman na bihainim tok bilong ol sapos dispela i no brukim lo bilong God.​—⁠Aposel 5:⁠29.