Bilong Wanem Nau Yumi Mas Pret Long Trupela God?
“Namba wan samting long laip bilong yumi man i olsem. Yumi mas aninit long God tasol na bihainim ol lo bilong em.”—SAVEMAN 12:13.
1, 2. Bilong wanem i stret yumi pret long God, olsem aninit long em?
OL MAN i pret long God na daun long em, dispela i save helpim ol. Tru, planti samting yumi save pret long en, ol i save mekim na tingting wantaim bel bilong yumi i no stap isi, na dispela pret inap nogutim yumi. Tasol taim yumi pret long God Jehova, dispela i save helpim yumi.—Song 112:1; Saveman 8:12.
2 Man bilong wokim yumi em i save long dispela samting. Em i laikim tumas ol samting em i bin wokim na em i tok, olgeta i mas pret long em na lotu long em. Baibel i tok: “Mi lukim narapela ensel i flai i go namel long skai. Em i gat gutnius bilong i stap oltaim oltaim, na em i gat wok bilong autim dispela gutnius long ol manmeri i stap long graun. Em i autim long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin. Em i singaut strong olsem, ‘Taim i kamap pinis bilong God i skelim pasin bilong olgeta man long kot. Olsem na yupela i mas pret long em na litimapim nem bilong em. Yupela i mas lotu long God, em i bin wokim heven na graun na solwara na olgeta hul wara.’ ”—KTH 14:6, 7.
3. Man bilong wokim olgeta samting i mekim wanem gutpela samting long tupela tumbuna bilong yumi bilong pastaim tru?
3 Yumi no ken givim baksait long Man i bin wokim olgeta samting. Em i As bilong laip; yumi yet na dispela graun i bilong em. (Song 24:1) Long bikpela sori bilong em, em i givim laip long ol pikinini bilong em long graun na em i givim gutpela ples long ol bilong i stap long en—em gutpela ples paradais. Em i givim dispela long ol olsem presen, tasol i gat wok ol i mas mekim. Em i givim long ol bilong lukautim. Em i tokim tupela tumbuna bilong pastaim tru, ol i mas lukautim dispela gutpela ples na skruim i go; ol i mas kamap planti na i go sindaun long olgeta hap bilong graun na bosim olgeta samting i stap long en. I gat wok ol i mas mekim long ol animal na ol pisin na ol pis—olgeta dispela samting i gat laip bai stap wantaim ol na lain bilong ol long graun. Ol i gat bikpela wok, na God bai skelim wok ol i mekim.
4. Ol man i bin mekim wanem long ol samting God i wokim?
4 Pastaim tru ol samting i stap gutpela, tasol tingim ol samting ol man i bin mekim na ol i bagarapim dispela gutpela ples ol i stap long en! Dispela gutpela graun em i bilong God, tasol ol i givim baksait long em na ol i no tingim dispela samting na ol i bagarapim graun. Ol i tromoi pipia na marasin nogut na dispela i kilim i dai planti animal na pisin na pis, na lain bilong ol i laik pinis olgeta long graun. God bilong yumi em i gat stretpela pasin na em i laikim tru ol narapela, olsem na em i no ken larim dispela pasin nogut i stap oltaim oltaim. Ol man i bin bagarapim graun na i stret ol i mas kot long God. Planti man i pret long dispela samting. Tasol ol man i daun long God na bilip strong ol i amamas long save long ol samting bai kamap. Tru tumas Jehova bai mekim kot, na tru tumas em bai stretim bek dispela graun. Em gutpela tok bilong olgeta man i gat stretpela bel.
5, 6. Jehova bai mekim wanem bilong stretim wok nogut ol man i bin mekim long ol samting Em i bin wokim?
5 God bai givim strafe long ol man long wanem rot? Long rot bilong Krais Jisas, nau em i stap King long Kingdom bilong God long heven. Long rot bilong dispela Pikinini long heven, Jehova bai pinisim pasin nogut na pasin bikhet nau i stap long graun. (2 Tesalonaika 1:6-9; KTH 19:11) Long dispela rot God bai pinisim hevi bilong ol man i pret long em, na em bai stretim bek na lukautim dispela graun, em ples bilong yumi.
6 Dispela bai kamap olsem wanem? Baibel i tok bikpela hevi tru bai kamap na las tru bai i gat pait bilong Armagedon. (KTH 7:14; 16:16) Em strafe bilong God bilong pinisim pasin nogut long dispela graun na ol manmeri i mekim ol pasin nogut. Olsem wanem? Sampela manmeri bai abrusim bagarap? Tru tumas! Ol manmeri i abrusim bagarap em ol manmeri i pret long God—tasol i no wanpela kain pret i save bagarapim bel bilong ol, nogat; em gutpela pasin bilong pret na daun long God na harim tok bilong em.—Sindaun 2:21, 22.
Em i Kamapim Strong Bilong Em
7 Inap 1,500 yia paslain long Krais, God Jehova i mekim wanpela strongpela wok bilong helpim ol manmeri i lotu long em na dispela i makim bikpela wok em bai mekim long bihain. Strongpela kantri Isip wantaim ami bilong en i daunim ol Israel na kisim ol i go wok kalabus long Isip. King bilong Isip i wok long pinisim lain bilong ol; em i tok ol i mas kilim i dai olgeta nupela pikinini man ol meri Israel i karim. Taim God i winim pait na daunim ol Isip, ol Israel i kamap fri—ol i no aninit moa long dispela gavman i mekim hatpela pasin long ol, na ol i no aninit moa long dispela lain i lotuim planti god giaman.
8, 9. Taim God i helpim Moses na ol Israel, dispela i kirapim ol long mekim wanem?
8 Kisim Bek sapta 15 i stori long ol samting ol Israel i mekim taim ol i lusim Isip. Sapos yumi skelim dispela stori yumi ken save olsem wanem God bai i kisim bek ol Kristen long ol pasin bilong dispela graun i bagarap tru long ol samting bilong skin na bilong spirit. Orait, nau yumi ken skelim gut sampela ves bilong Kisim Bek sapta 15 bilong helpim yumi long save bilong wanem yumi mas tingting gut na pret long Jehova, em i God tru. Pastaim yumi ken skelim Kisim Bek 15 ves 1 na 2.
9 “Long dispela taim Moses wantaim ol Israel i singim wanpela song long Bikpela olsem, ‘Nau bai mi singim song long Bikpela, long wanem, em i winim bikpela pait tru. Em i tromoi ol hos wantaim ol man i sindaun long ol hos i go insait long solwara. Bikpela yet i save mekim mi strong, na mi singim song bilong litimapim nem bilong en. Em i save kisim bek mi.’ ”
10. Wanem samting i kamap na God i kirap bagarapim ami bilong ol Isip?
10 Ol manmeri bilong olgeta hap i save long stori bilong Jehova i kisim bek ol Israel long Isip. Em i salim ol hevi long dispela strongpela kantri inap long taim king i larim ol Israel i go. Tasol bihain ami bilong king i ranim ol i go long nambis bilong solwara Retsi na i olsem ol i no gat helpim na ol i no gat rot bilong ranawe. Nau tasol ol i kamap fri na i olsem wantu bai ol i kalabus gen. Tasol Jehova i gat narapela tingting. Em i wokim mirakel na brukim solwara na ol i gat rot bilong wokabaut i go na ol i abrusim bagarap. Taim ol Isip i bihainim ol, Jehova i pasim bek wara na king bilong Isip wantaim ol ami bilong em olgeta i dai pinis.—Kisim Bek 14:1-31.
11. Wanem samting i kamap long rot bilong ol samting God i mekim long ol Isip?
11 Jehova i bagarapim ami bilong Isip na dispela i givim biknem long em long ai bilong ol manmeri i lotu long em, na ol man long planti hap i save long Em. (Josua 2:9, 10; 4:23, 24) Em i kisim biknem tru, winim ol god giaman bilong Isip em ol i no gat strong na ol i no inap helpim ol man i lotu long ol. Ol Isip i bilip long ol god bilong ol na long ol man na long strong bilong ami bilong ol na ol i lus. (Song 146:3) Tasol Jehova i mekim strongpela wok na kisim bek lain bilong em! Dispela i kirapim ol Israel long mekim singsing bilong litimapim nem bilong God i gat laip, na singsing i kamapim klia olsem ol i aninit long em.
12, 13. God i winim pait long solwara Retsi na dispela i mas givim wanem save long yumi?
12 Olsem tasol yumi mas save, maski ol strongpela kantri i gat ol bom nuklia, i no gat wanpela bilong ol, o wanpela god giaman, ol i gat strong wankain olsem Jehova. Nogat tru. Jehova em inap tru long kisim bek lain bilong em na em bai mekim olsem. “Ol ensel long heven na ol man long graun i stap aninit long en, na em i bosim ol. Taim em i laik mekim wanpela samting, i no gat wanpela man inap long pasim em. Na i no gat wanpela man inap long askim em olsem, ‘Yu laik mekim wanem samting?’ ” (Daniel 4:35) Taim yumi pilim tru dispela tok, dispela i kirapim yumi tu long litimapim nem bilong em na yumi amamas long mekim.
13 Taim ol i mekim singsing long solwara Retsi, ol i tok moa olsem: “Bikpela em i strongpela soldia tru. Bikpela [Jehova] tasol, em i nem bilong en.” Dispela strongpela Soldia em i no olsem wanpela man i no gat nem na ol man i stori nating long em. Nogat. Em i gat nem! Em i Man bilong ‘mekim samting i kamap’; em i Bikpela Man bilong wokim olgeta samting, nem bilong em Jehova, em i “God Antap Tru” na em i “save bosim olgeta hap bilong graun.” (Kisim Bek 3:14; 15:3-5; Song 83:18) Sapos ol dispela Isip bilong bipo i gat gutpela tingting, ol i no ken bikhet long God i Gat Olgeta Strong, a? Bai ol i bihainim gutpela pasin bilong pret long em na bai ol i daun long em.
14. Wanem samting i kamap long solwara Retsi na i kamapim klia olsem pasin bilong pret long God inap helpim ol man?
14 Man bilong wokim graun, em i wokim solwara tu na em i bosim. (Kisim Bek 15:8) Bilong mekim kamap wanpela samting i olsem i no inap kamap, em i mekim wok long strong bilong em long bosim win. Em i brukim solwara long tupela hap, na long namel i gat rot na lain bilong em i wokabaut i go kamap long hapsait. Yu tingim: Planti milion ton wara i sanap olsem banis long hap na long hap na i gat rot long namel bilong ol Israel i ken ranawe na i stap gut. God i lukautim ol manmeri i pret long em. Orait, nau Jehova i larim wara i pas bek gen long ples bilong en na wara i kam bek olsem traipela si i ran strong tru na i karamapim ami bilong king bilong Isip wantaim olgeta hos na karis samting bilong ol. God Jehova i kamapim long ples klia strong bilong em! Em i daunim tru ol god giaman i no gat strong na ami bilong ol man! I stret yumi mas pret long Jehova, a?—Kisim Bek 14:21, 22, 28; 15:8.
Kamapim Klia Olsem Yumi Pret Long God
15 Sapos yumi bin abrusim bagarap na yumi sanap wantaim Moses, bai yumi tu i kirap mekim singsing olsem: “Bikpela, wanem arapela god i stap na i strongpela olsem yu? I no gat wanpela. Yu nambawan king na yu stap holi. Yu antap tru na gutpela olgeta. Na husat inap olsem yu? I no gat wanpela. Yu save wokim olkain mirakel na mekim ol bikpela wok, na ol manmeri i pret tumas long yu.” (Kisim Bek 15:11) Insait long ol planti handet yia i kam inap long nau, ol man i bin litimapim nem bilong God olsem. Long laspela buk bilong Baibel, aposel Jon i stori long ol gutpela wokboi bilong God em God i makim ol long spirit holi, na Jon i tok: “Ol i singim song bilong Moses, em wokman bilong God, na song bilong Pikinini Sipsip.” Wanem dispela bikpela song? I olsem: “Bikpela, yu God I Gat Olgeta Strong, yu save mekim ol narakain strongpela wok . . . King bilong olgeta lain manmeri, ol pasin bilong yu ol i stret na i tru olgeta. Bikpela, yu wanpela tasol yu stap holi. Olsem na olgeta manmeri ol i mas pret long yu na litimapim nem bilong yu.”—KTH 15:2-4.
16, 17. Yumi lukim wanem gutpela samting i kamap long nau?
16 Olsem na long nau tu i gat ol manmeri i save lotu long God, em ol i kamap fri na ol i save pilim tru ol gutpela samting God i bin wokim na ol lo bilong em. Sampela manmeri bilong olgeta lain ol i bin kamap fri long ol samting bilong spirit; ol i klia long ol pasin doti bilong dispela graun na bihainim ol stretpela lo bilong God. Long olgeta yia, ol handet tausen manmeri i ranawe lusim pasin nogut bilong dispela graun na nau ol i stap insait long stretpela klinpela lain i lotu long Jehova. Klostu nau, taim strafe bilong God i painim ol lotu giaman na ol narapela lain nogut bilong dispela graun olsem paia, ol manmeri i lotu long Jehova bai ol i stap oltaim long stretpela nupela taim.
17 Olsem Kamapim Tok Hait 14:6, 7 i tok, taim i kamap pinis bilong God i skelim pasin bilong olgeta man long kot, na ol Witnes Bilong Jehova i wok aninit long ol ensel na toksave long ol man long dispela samting. Long yia i go pinis, long 230 samting kantri, inap olsem 5 milion Witnes i bin autim gutpela tok bilong Kingdom bilong God na ol i tokaut olsem taim bilong Em i mekim kot i kamap pinis. Bilong helpim ol man long abrusim bagarap, ol Witnes i bin go oltaim long haus bilong ol, na ol i mekim ol Baibel-stadi, no gat pe. Long dispela rot, long olgeta yia, sampela handet tausen manmeri i skul inap long ol i save gut na ol i aninit long trupela God, na dediket long em, na kisim baptais. Gutpela tru ol dispela manmeri i kirap long pret long trupela God!—Luk 1:49-51; Aposel 9:31; skelim wantaim Hibru 11:7.
18. Wanem samting i makim olsem ol ensel i insait long wok bilong yumi bilong autim tok?
18 Yu ting tru ol ensel i insait long dispela wok bilong autim tok? Tru tumas, i olsem planti taim ol ensel i bin stiaim ol Witnes Bilong Jehova i go long haus bilong man i gat hevi na em i laik tru bai wanpela man i ken helpim em long save long God, na em i beten askim God long dispela! Olsem: Tupela Witnes Bilong Jehova wantaim wanpela liklik pikinini ol i autim tok bilong Kingdom long wanpela ailan bilong Karibian. Belo i klostu na tupela Witnes hia i laik pinis long wok na i go bek long haus, tasol pikinini i strong long ol i mas i go long wanpela haus moa. Taim em i lukim olsem tupela i no ken i go, em yet i go paitim dua bilong haus. Wanpela yangpela meri i opim dua. Taim tupela i lukim meri i opim dua, ol i go toktok wantaim em. Em i singautim ol i go insait long haus na em i tok, stret long taim pikinini i paitim dua, em i wok long beten askim God long salim ol Witnes i kam lainim em long Baibel. Ol i stretim tok long mekim Baibel-stadi wantaim em.
19. Wanem wanpela gutpela samting i kamap long pasin bilong pret long God?
19 Yumi wok strong long autim tok long kot bilong God, na yumi skulim ol man long ol stretpela lo bilong em tu. Taim ol i kirap bihainim ol dispela lo, dispela i helpim ol long skin na long spirit. Olsem: Baibel i tambuim pasin pamuk na olkain pasin sem. (Rom 1:26, 27, 32) Long nau planti manmeri bilong dispela graun i sakim ol dispela lo bilong God. Wanem samting i kamap? Marit bilong planti manmeri i bruk. Pasin bikhet i go bikpela. Ol sik nogut bilong pamuk i bagarapim bikpela lain moa yet nau long taim bilong yumi. Sik nogut AIDS i kalap long planti manmeri long rot bilong pamuk na pasin sem. Tasol ol manmeri i pret long God na aninit long em, dispela i bin lukautim ol gut tru, a?—2 Korin 7:1; Filipai 2:12; lukim tu Aposel 15:28, 29.
Blesing Bilong Pret Long God Long Nau
20 Ol manmeri i pret long God na bihainim ol lo bilong em, ol i kisim planti blesing. Wanpela samting i kamapim klia olsem planti manmeri long nau ol i save, ol Witnes Bilong Jehova i pas gut wantaim olsem bikpela lain brata Kristen na ol i save bihainim ol stretpela pasin. Sampela Witnes i go long wanpela kibung intenesenel long Saut Amerika na ol i slip long wanpela haus pasindia. Wanpela apinun narapela lain em ol i no Witnes, ol i kam bung long dispela haus pasindia na presiden bilong kantri bai kam mekim tok long ol. Ol sekyuriti i kisim presiden i go insait kwik long lift na wanpela Witnes em i no save presiden i stap em tu i go insait long lift. Ol sekyuriti i kirap nogut! Taim Witnes i luksave olsem presiden i stap, kwiktaim em i tok sori na em i soim kat bilong kibung em i pasim long klos bambai ol i ken save em i wanpela Witnes, na em i tokim ol, ol i no ken tingting planti, em i no ken bagarapim presiden. Wanpela sekyuriti i lap na i tok: “Sapos olgeta manmeri i wankain olsem ol Witnes Bilong Jehova bai i no gat dispela wok sekyuriti.”—Aisaia 2:2-4.
21. Wanem rot i op long ol man long nau?
21 Em dispela kain manmeri Jehova i wok long bungim na redim bambai ol inap abrusim bagarap long taim bilong bikpela hevi tru em bai pinisim pasin nogut bilong nau. (KTH 7:9, 10, 14) Ol i no inap abrusim nating bagarap. Bilong abrusim bagarap, ol i mas pret long Jehova, olsem ol i mas save em i Nambawan King na ol i mas dediket long em. Tasol planti manmeri bai ol i no pret na aninit long God na bai em i lukautim ol. (Song 2:1-6) Olgeta samting i kamapim klia olsem Krais Jisas, em Jehova i makim em bilong i stap King, em i bin kamap King long heven long bikpela yia 1914. Olsem na i no gat bikpela hap taim moa bilong ol man i kisim stretpela pasin bilong pret long Jehova na kamapim long ples klia olsem ol i aninit long em. Tasol Man bilong wokim yumi em i givim rot yet long ol bilong mekim, em sampela ol i man i gat bikpela namba: “Yupela ol king, yupela putim gut yau na stretim pasin bilong yupela. Yupela ol hetman bilong graun, yupela harim dispela tok na yupela lukaut. Yupela i mas pret long God na aninit long em. Yupela i mas guria long em na amamas wantaim. Yupela i mas aninit long pikinini bilong en na givim kis long em. Nogut em i kros long yupela na yupela i dai. Long wanem, em i save belhat hariap. Man i save bilip long God na pas tru long em, em i ken amamas.”—Song 2:7-12.
22. Ol manmeri i pret long God long nau, wanem gutpela samting bai painim ol long bihain?
22 Yumi mas i stap long lain bilong ol manmeri i litimapim nem bilong Man bilong wokim yumi, em Man i bin kisim bek yumi. Bilong mekim olsem, nau yumi mas pret long trupela God! (Skelim wantaim Song 2:11; Hibru 12:28; 1 Pita 1:17.) Yumi mas wok yet long kisim save long ol stretpela lo bilong em na yumi mas bihainim. Song bilong Moses na bilong Pikinini Sipsip, olsem i stap long Kamapim Tok Hait 15:3, 4, bai kamap strong long taim Jehova i pinisim olgeta pasin nogut i stap long graun na em i kirap long oraitim bek ol manmeri na dispela graun na pinisim ol samting nogut sin i bin kamapim. Long dispela taim, bai yumi givim bel olgeta long mekim singsing na tok olsem: “Bikpela, yu God I Gat Olgeta Strong, yu save mekim ol narakain strongpela wok . . . King bilong olgeta lain manmeri, ol pasin bilong yu ol i stret na i tru olgeta. Bikpela, yu wanpela tasol yu stap holi. Olsem na olgeta manmeri ol i mas pret long yu na litimapim nem bilong yu.”
Yu Inap Tingim?
◻ Bilong wanem i stret yumi pret, olsem aninit, long Jehova?
◻ Ol samting God i mekim long solwara Retsi i kamapim klia wanem samting?
◻ Taim yumi pret long Jehova na daun long em, dispela i helpim yumi olsem wanem?
◻ Ol man i pret long trupela God long nau, wanem gutpela samting bai painim ol long bihain?
7. Bilong wanem God i helpim ol Israel long taim bilong Moses?
15. Ol strongpela wok God i mekim bilong kisim bek ol man i mas kirapim yumi long mekim wanem?
20. Wanem samting i makim olsem ol man i save long gutnem bilong ol Witnes Bilong Jehova?