Yu Mas Mekim Wanem na Bai Yu Winim Kot?
“Taim Pikinini Bilong Man i kam [long bikpela lait] wantaim olgeta ensel, orait em bai i sindaun long sia king bilong en.”—MATYU 25:31.
‘EM I GAT ASUA O NOGAT?’ Planti man i save askim olsem taim ol i harim tok long man i gat kot. Ol jas na ol man bilong harim kot i wok strong long mekim stretpela pasin, tasol planti taim wanem samting i kamap? I no gat stretpela kot, a? Dispela i no nupela samting, olsem tok piksa bilong Jisas long Luk 18:1-8 i makim.
2 Maski yu lukim ol kot bilong graun i mekim wanem kain pasin, tingim tok bilong Jisas, em i tok: “Ol manmeri God i bin makim bilong em yet, na ol i wok long krai long em long olgeta de na long olgeta nait, ating God bai i no helpim ol, a? . . . Mi tokim yupela, em bai i helpim ol kwiktaim. Tasol taim Pikinini Bilong Man i kam, em bai i lukim ol manmeri i stap long graun ol i bilip, o nogat?”
3 Tru tumas, Jehova bai mekim stretpela kot na helpim ol wokboi bilong em. Jisas tu i insait long dispela wok long nau, long wanem, nau em i “taim bilong las de” bilong pasin nogut bilong dispela graun. Klostu nau bai Jehova i givim wok long strongpela Pikinini bilong em bilong pinisim pasin nogut olgeta long graun. (2 Timoti 3:1; 2 Tesalonaika 1:7, 8; KTH 19:11-16) Bilong helpim yumi long save long wok bilong Jisas, yumi ken skelim wanpela tok piksa em i mekim klostu long taim em i dai, em tok piksa bilong ol sipsip na meme.
4 Longtaim pinis yumi ting olsem dispela tok piksa i makim Jisas i kamap King na sindaun long sia king bilong em long yia 1914, na yumi ting olsem kirap long yia 1914 na i kam inap long nau em i bin wok long skelim ol manmeri na makim ol manmeri i kain olsem sipsip bilong kisim laip oltaim, na ol manmeri i kain olsem meme bilong lus olgeta. Tasol sapos yumi skelim gen dispela tok piksa bai yumi save, yumi mas stretim tingting bilong yumi long taim bilong truim bilong en na long ol samting em i makim. Na dispela save yumi kisim bai kamapim klia olsem wok autim tok bilong yumi em i bikpela samting, na ol manmeri i mekim wanem long en, dispela tu i bikpela samting. Bilong kisim gut as bilong nupela save long dispela tok piksa, yumi ken skelim ol tok bilong Baibel long wok king na wok jas bilong Jehova tupela Jisas.
Jehova Em i Nambawan Bikpela Jas
5 Jehova i bosim olgeta samting em i bin wokim long graun na long antap. Em i no bin kamap nupela long wanpela taim na em i no save dai, olsem na em i “King bilong olgeta taim.” (1 Timoti 1:17; Song 90:2, 4; KTH 15:3) Em i gat strong bilong putim ol lo na bosim ol man long rot bilong ol dispela lo. Na em i gat bikpela strong olsem Jas tu. Aisaia 33:22 i tok: “Bikpela yet bai i stap king bilong yumi na em yet bai i givim ol lo long yumi na bosim yumi. Na em bai i was gut long yumi na yumi no painim taim nogut.”
6 Longtaim pinis ol wokboi bilong Jehova i save em i stap Jas na em i skelim ol rong na ol bikpela tok i kamap. “Jas bilong olgeta graun” i skelim pasin nogut bilong ol manmeri bilong Sodom na Gomora na em i save, i stret ol i mas bagarap, olsem na em i bekim dispela pe long ol i stret long pasin ol i bin mekim. (Stat 18:20-33; Jop 34:10-12) Taim yumi save Jehova em i stretpela Jas na oltaim em inap mekim ol samting em i stretim tok long mekim, dispela i strongim bel bilong yumi!
7 Long Israel bipo, sampela taim Jehova yet i mekim kot. Sapos yu stap long dispela taim bipo na yu save, wanpela Jas i gutpela olgeta em i skelim ol samting, bel bilong yu bai i stap gutpela, a? (Wok Pris 24:10-16; Namba 15:32-36; 27:1-11) Na God i putim ol “lo” i gutpela olgeta bilong helpim ol man long skelim wanem pasin i stret na wanem pasin i no stret. (Wok Pris 25:18, 19; Nehemia 9:13; Song 19:9, 10; 119:7, 75, 164; 147:19, 20) Em i “Jas bilong olgeta graun,” olsem na em i skelim pasin bilong yumi olgeta.—Hibru 12:23.
8 I gat wanpela man i “lukim” samting em inap helpim yumi long save long dispela samting. God i givim driman long profet Daniel na em i lukim sampela animal nogut i makim ol bikpela gavman o strongpela kantri. (Daniel 7:1-8, 17) Daniel i stori moa olsem: “Mi lukim ol i kisim ol sia king i kam na putim i stap. Na wanpela Man bilong bipo bipo yet i kam sindaun long wanpela sia king. Ol klos bilong en i waitpela tru olsem ais.” (Daniel 7:9) Daniel i lukim ol sia king i stap na “Man bilong bipo bipo yet [Jehova] i kam sindaun.” Yu ting Daniel i lukim God i kamap King?
9 Taim yumi kaunim tok olsem wanpela man i “sindaun” long sia king, yumi inap ting dispela i makim olsem em i kamap king, long wanem, sampela taim Baibel i mekim dispela kain tok. Olsem: “Taim [Simri] i kamap king pinis na em i sindaun long sia king bilong em, em . . . ” (1 King 16:11, NW; 1 King 1:17, 24, 35; Jeremaia 36:30) Wanpela tok profet long Mesaia i tok: “Em i mas sindaun long sia king bilong em na bosim ol manmeri.” Olsem na dispela tok ‘sindaun long sia king’ inap makim olsem man i kamap king. (Sekaraia 6:12, 13, NW) Baibel i tok, Jehova em i wanpela King na em i sindaun long sia king. (1 King 22:19; Aisaia 6:1; KTH 4:1-3) Em i “King bilong olgeta taim.” Tasol taim em i mekim nupela wok olsem king, yumi inap tok em i kamap King, i olsem em i kam sindaun gen long sia king bilong em bilong mekim dispela wok.—Aisaia 52:7; 1 Timoti 1:17; KTH 11:15-17; 19:1, 2, 6.
10 Tasol bikpela samting yumi mas tingim em olsem: Wanpela bikpela wok bilong ol king bilong bipo em bilong harim kot na stretim tok. (Sindaun 20:8; 29:14) Tingim gutpela wok Solomon i mekim olsem jas taim em i stretim tok bilong tupela meri i tok pait long wanpela pikinini. (1 King 3:16-28; 2 Stori 9:8) Wanpela haus gavman bilong em ol i kolim “Haus bilong Sia King, narapela nem bilong en Haus bilong Harim Kot. Em i haus Solomon i save harim kot bilong ol manmeri long en.” (1 King 7:7) Ol i stori long Jerusalem na ol i tok, “long dispela ples haus kot i stap na king i save harim kot na stretim tok.” (Song 122:5) Olsem na dispela tok ‘sindaun long sia king’ inap makim tu wok bilong mekim kot.—Kisim Bek 18:13; Sindaun 20:8.
11 Orait, nau yumi ken tingim gen stori bilong Daniel, em i lukim “Man bilong bipo bipo yet i kam sindaun.” Long sapta 7 ves 10, Daniel i stori moa olsem: “Na sampela i opim ol buk, bilong kirapim kot.” Em nau, Man bilong bipo bipo yet i kam sindaun bilong mekim kot na stretim tok long husat i ken bosim graun, na em i givim dispela wok long Pikinini Bilong Man, em inap tru long mekim. (Daniel 7:13, 14) Na Baibel i tok moa olsem: “Man bilong bipo bipo yet em i kamap, na i mekim kot” na “ol manmeri bilong God Antap Tru” ol i win—em i skelim ol na ol inap tru long kamap king wantaim Pikinini Bilong Man. (Daniel 7:22) Na bihain God “i kirapim kot” long laspela bikpela gavman bilong graun na God i tok, dispela “king” i mas bagarap.—Daniel 7:26.a
12 Olsem na taim Daniel i lukim God “i kam sindaun long wanpela sia king,” dispela i makim olsem God i kam sindaun bilong mekim kot. Pastaim Devit i bin mekim singsing na tok olsem: “Yu sindaun long sia olsem jas na yu mekim stretpela kot. Yu skelim pasin bilong mi na mi winim kot.” (Song 9:4, 7) Na Joel i tok: “Ol lain manmeri i mas redi na i kam long dispela ples daun, ol i kolim God Em I Jas. Mi Bikpela [Jehova], bai mi sindaun long dispela ples na kotim olgeta lain pipel.” (Joel 3:12; skelim wantaim Aisaia 16:5.) Jisas na Pol i bin kisim kot na wanpela man i sindaun harim kot na stretim tok.b—Jon 19:12-16; Aposel 23:3; 25:6.
Wok Bilong Jisas
13 Jehova i stap King na Jas tu. Orait, olsem wanem long Jisas? Taim ensel i tokaut olsem mama i karim em, ensel i tok: “God bai i putim em i stap king olsem tumbuna bilong en Devit. . . . Na wok king bilong en bai i no inap pinis.” (Luk 1:32, 33) Jisas em i man bilong lain bilong Devit em i bilong i stap king oltaim oltaim. (2 Samuel 7:12-16) Em bai stap long heven na bosim graun, long wanem, Devit i tok: “Bikpela [Jehova] i tokim Bikpela bilong mi [Jisas] olsem, ‘Yu sindaun long han sut bilong mi inap mi putim ol birua bilong yu i stap aninit long yu.’ Bikpela i stap long Saion, na bai em i mekim yu i bosim planti ples, na em i tok, ‘Yu bosim ol birua bilong yu.’ ”—Song 110:1-4.
14 Dispela i mas kamap long wanem taim? Jisas i no bin kamap King long taim em i stap man long graun. (Jon 18:33-37) Long yia 33, em i dai na kirap bek na go antap long heven. Hibru 10:12 i tok: “Krais em i mekim wanpela ofa tasol bilong tekewe sin, na dispela ofa em inap long i stap olgeta taim. Em i mekim olsem pinis, orait em i sindaun long han sut bilong God.” Long dispela taim Jisas i kisim wanem wok bos? “God i kirapim em na i bringim em i go sindaun long han sut bilong em long heven. Olsem na Krais i stap antap tru long olgeta kain strongpela spirit, na long olgeta hetman na long olgeta gavman, na long olgeta samting i gat strong. . . . [God] i mekim em i stap het tru bilong olgeta samting, na long dispela pasin em i stap het bilong sios.” (Efesus 1:20-22) Jisas i kisim wok bilong bosim ol Kristen olsem king bilong ol. Olsem na Pol inap tok: “Yumi bin i stap aninit long long strong bilong tudak, na [Jehova] i bin kisim bek yumi na putim yumi insait long lain [olsem kingdom] bilong Pikinini bilong en, em dispela Pikinini em i save laikim tru.”—Kolosi 1:13; 3:1.
15 Tasol long yia 33 Jisas i no kisim wok bilong i stap King na Jas bilong olgeta lain manmeri. Nogat. Em i sindaun klostu long God, na wetim taim bilong mekim wok olsem King bilong Kingdom bilong God. Pol i stori long em na i tok: “Bipo God i tokim Pikinini olsem, ‘Yu sindaun long han sut bilong mi inap mi putim ol birua bilong yu i stap aninit long yu.’ Tasol wanem taim God i mekim dispela kain tok long wanpela ensel? Nogat tru.”—Hibru 1:13.
16 Ol Witnes Bilong Jehova i bin wokim ol buk na nius i kolim planti samting i makim olsem Jisas i wet i go inap long yia 1914 na long dispela yia em i kamap King bilong Kingdom bilong God long heven, em ples yumi no inap lukim. Kamapim Tok Hait 11:15, 18 i tok: “Bikpela bilong yumi wantaim dispela man em i makim bilong kisim bek ol manmeri bilong en, tupela i kamap king bilong olgeta hap bilong graun. Na Bikpela bai i stap king oltaim oltaim.” “Ol haiden [olsem ol lain man] i belhat tru, tasol taim bilong yu long belhat em i kamap pinis.” Long taim bilong Namba Wan Pait, ol lain man i belhat na ol i pait. (Luk 21:24) Kirap long yia 1914 na i kam inap long nau yumi bin lukim ol bikpela pait i kamap, na ol bikpela guria, na sik, na hangre, na olkain samting olsem, na dispela i makim tru olsem nau Jisas i stap King long Kingdom bilong God, na las de bilong pasin bilong dispela graun i klostu.—Matyu 24:3-14.
17 Orait, nau yumi ken kolim gen ol bikpela tok yumi save pinis long en: Yumi save God i stap King na em i sindaun long sia king bilong em, na em inap sindaun long sia king bilong mekim kot tu. Long yia 33, Jisas i sindaun long han sut bilong God, na nau em i stap King bilong Kingdom. Em i stap King, tasol yu ting em i mekim wok olsem Jas tu? Bilong wanem yumi mas tingim dispela samting moa yet long nau?
18 I stret Jehova i ken makim ol jas, na em i makim Jisas i stap Jas, long wanem, Jisas i bihainim ol lo na stretpela pasin bilong Em. Jisas i kamapim klia dispela samting taim em i stori long ol man i kamap laip long ol samting bilong spirit na em i tok: “Papa i no save skelim wanpela man long kot. Olgeta wok bilong harim kot, em i givim pinis long Pikinini.” (Jon 5:22) Na Jisas i kisim bikpela wok moa bilong mekim kot, long wanem, em bai skelim pasin bilong ol man i stap laip na bilong ol man i dai pinis tu. (Aposel 10:42; 2 Timoti 4:1) Pol i tok: “[God] i makim pinis wanpela de bilong em bai i kotim ol manmeri. Na long stretpela pasin bilong en, em bai i skelim pasin bilong olgeta manmeri bilong graun. Na em i bin makim wanpela man [Jisas] bilong bosim dispela kot. Dispela man i bin dai na God i kirapim em bek long matmat. Olsem na yumi ken bilip tru long God i bin givim dispela wok long em.”—Aposel 17:31; Song 72:2-7.
19 Olsem wanem? I stret yumi ken ting Jisas i sindaun long sia king bilong mekim wok olsem Jas? I stret yumi ting olsem. Jisas i tokim ol aposel: “Long taim olgeta samting i kamap nupela, na Pikinini Bilong Man bai i gat biknem na i sindaun long sia king bilong en, long dispela taim yupela ol man i bin bihainim mi yupela tu bai i sindaun long 12-pela gutpela sia na yupela bai i bosim [olsem skelim] ol 12-pela lain bilong Israel.” (Matyu 19:28) Tru, nau Jisas i stap King bilong Kingdom, tasol em bai mekim narapela wok tu em Matyu 19:28 i tok long en, olsem em bai sindaun long sia king bilong em na mekim kot; em bai mekim olsem long Taim Bilong Wan Tausen Yia. Long dispela taim bai em i skelim pasin bilong olgeta manmeri, em ol stretpela man na ol man nogut wantaim. (Aposel 24:15) Yumi mas tingim dispela samting taim yumi skelim tok piksa bilong Jisas i makim taim bilong yumi na ol samting yumi mekim.
Tok Piksa i Tok Wanem?
20 Klostu long taim Jisas i dai, ol aposel i askim em: “Wanem taim ol dispela samting bai i kamap? Wanem mak bai i kamap na mipela i ken save, yu kam i stap na pasin bilong dispela graun i laik pinis?” (Matyu 24:3, NW) Jisas i kolim sampela bikpela samting i mas kamap long graun na bihain bai “las de i kamap.” Paslain liklik long taim las de i kamap, ol lain manmeri bai “i lukim Pikinini Bilong Man i stap antap long ol klaut bilong heven na i kam wantaim bikpela strong na bikpela lait bilong en.”—Matyu 24:14, 29, 30.
21 Tasol taim Pikinini Bilong Man i kam wantaim bikpela lait bilong em, wanem samting bai painim ol dispela lain manmeri? Bilong kisim save long dispela yumi ken lukim tok piksa bilong ol sipsip na meme, em namba wan tok bilong en i olsem: “Taim Pikinini Bilong Man i kam [long bikpela lait, NW] wantaim olgeta ensel, orait em bai i sindaun long sia king bilong en. Na olgeta lain manmeri bai ol i kam bung long pes bilong em.”—Matyu 25:31, 32.
22 Yu ting dispela tok piksa i makim taim bilong Jisas i kamap king long yia 1914 na em i sindaun long sia king bilong em olsem yumi bin ting inap longtaim pinis? Tru, Matyu 25:34 i kolim em olsem King, olsem na truim bilong dispela tok piksa i mas kamap bihain long taim em i kamap King long yia 1914. Tasol bihain liklik long yia 1914 em i mekim wanem wok bilong skelim ol manmeri? Em i no skelim “olgeta lain manmeri” long dispela taim. Nogat. Em i kirapim kot long ol manmeri i tok ol i ‘lain bilong God yet.’ (1 Pita 4:17) Olsem Malakai 3:1-3 i tok, Jisas em i wokman bilong Jehova na pastaim em i skelim ol Kristen em Jehova i bin makim long spirit holi na ol i stap yet long graun. Na em i skelim tu na makim pe bilong ol misin i gat nem Kristen, em ol i giaman na tok ol i ‘lain bilong God yet.’c (KTH 17:1, 2; 18:4-8) Tasol i no gat wanpela samting i makim olsem long yia 1914, o bihain long dispela taim, Jisas i bin sindaun na skelim ol manmeri bilong olgeta lain na tilim ol olsem sipsip na meme.
23 Sapos yumi skelim wok bilong Jisas long dispela tok piksa yumi lukim em i mekim wok jas na skelim olgeta lain manmeri. Tok piksa i no makim olsem dispela wok i mas kisim bikpela hap taim i go inap planti yia, olsem em i mas skelim long kot olgeta wan wan man na meri ol i dai insait long taim bilong yumi na em i makim ol bilong lus olgeta o bilong kisim laip oltaim. Nogat. Yumi ken ting olsem bikpela hap lain i bin i dai insait long taim bilong yumi ol i go long ples bilong ol man i dai pinis, em matmat. (KTH 6:8; 20:13) Tasol dispela tok piksa i makim taim bilong Jisas i skelim ol manmeri bilong “olgeta lain,” em ol i stap laip long dispela taim, na em i givim pe long ol long pasin ol i bin mekim.
24 Yumi ken save, dispela tok piksa i makim taim bihain, em taim Pikinini Bilong Man i kam wantaim bikpela lait. Em bai sindaun bilong mekim kot na skelim ol manmeri i stap laip long dispela taim. Em bai skelim pasin ol i bin mekim na i kamapim klia ol i wanem kain man. Long dispela taim tupela lain bai i stap ples klia tru, em “ol stretpela manmeri” na “ol man nogut.” (Malakai 3:18) Wok bilong makim na givim strafe long ol man em bai kisim liklik hap taim tasol. Jisas bai mekim stretpela kot na givim pe long olgeta wan wan i stret long pasin ol i bin mekim.—Lukim tu 2 Korin 5:10.
25 Olsem na taim Jisas “i sindaun long sia king bilong en” bilong mekim kot olsem Matyu 25:31 i tok, dispela i makim taim bihain, em taim dispela strongpela King bai sindaun bilong makim na givim strafe long ol lain bilong dispela graun. Dispela tok piksa long kot bilong Jisas long Matyu 25:31-33, 46 i kain olsem stori bilong Daniel sapta 7 long Man i stap King, em i Man bilong bipo bipo yet, na em i kam sindaun bilong mekim kot.
26 Dispela save yumi kisim long dispela tok piksa i makim olsem wok bilong skelim ol manmeri ol i sipsip o meme em bilong bihain. Dispela wok kot bai kamap taim “bikpela hevi” em Matyu 24:29, 30 i stori long en i kirap pinis na Pikinini Bilong Man ‘i kam wantaim bikpela lait.’ (Skelim wantaim Mak 13:24-26.) Long dispela taim, long las de bilong pasin nogut bilong nau, Jisas bai mekim kot na em bai makim na givim strafe long ol lain bilong dispela graun.—Jon 5:30; 2 Tesalonaika 1:7-10.
27 Dispela i helpim yumi long save klia long taim bilong truim bilong dispela tok piksa bilong Jisas, em i makim taim bilong skelim ol sipsip na meme. Tasol dispela i mekim wanem long yumi ol manmeri i wok strong long autim gutpela tok bilong Kingdom? (Matyu 24:14) Yu ting dispela i makim olsem dispela wok bilong yumi i no bikpela samting, o em i makim olsem yumi gat bikpela wok moa? Orait, tok i kamap bihain long dispela bai stori long dispela samting.
[Ol Futnot]
a Hap tok ol i tanim olsem “kot” long Daniel 7:10, 26 i stap tu long Esra 7:26 na Daniel 4:37; 7:22.
b Pol i stori long Kristen i kisim narapela Kristen i go long kot na Pol i tok: “Bilong wanem yupela i save givim wok [olsem, ‘mekim ol i sindaun’] bilong skelim dispela tok long man i no gat nem long sios?”—1 Korin 6:4.
c Lukim buk Kamapim Tok Hait—Bikpela Samting Bilong En i Laik Kamap!, pes 56, 73, 235-245, 260, em Sosaiti Wastaua bilong Nu Yok i wokim.
Yu Inap Tingim?
◻ Olsem wanem Jehova i mekim wok olsem King na Jas tu?
◻ Dispela tok ‘sindaun long sia king’ inap makim wanem tupela samting?
◻ Bipo yumi tok wanem long taim bilong truim bilong Matyu 25:31? Tasol i gat wanem as na yumi mas stretim tingting bilong yumi long dispela samting?
◻ Wanem taim Pikinini Bilong Man i sindaun long sia king bilong em, olsem Matyu 25:31 i makim?
[Askim Bilong Stadi]
1-3. I gat wanem as na yumi ken ting olsem bai i gat stretpela kot?
4. Yumi save ting tok piksa bilong ol sipsip na meme i kamap tru long wanem taim? Bilong wanem yumi laik skelim gen dispela tok piksa long nau? (Sindaun 4:18)
5, 6. Olsem wanem i stret yumi ken ting Jehova i stap King na Jas tu?
7. Olsem wanem Jehova i stap Jas bilong ol Israel?
8. Daniel i lukim wanem samting olsem driman na i helpim yumi long save long samting yumi stori long en?
9. Dispela tok ‘sindaun’ long sia king inap makim wanem samting? Stori long sampela taim em i makim olsem.
10. Wanem wanpela bikpela wok bilong ol king bilong Israel? Stori long wanpela king i mekim dispela wok.
11, 12. (a) Taim Daniel sapta 7 i stori long Jehova i kam sindaun, dispela i makim wanem samting? (b) Wanem sampela tok moa bilong Baibel i makim olsem Jehova i sindaun bilong mekim kot?
13, 14. (a) God i mekim wanem tok promis na lain bilong em i ken save, Jisas bai kamap King? (b) Wanem taim Jisas i sindaun long sia king bilong em? Olsem wanem em i stap king bilong sampela manmeri kirap long yia 33?
15, 16. (a) I gat wanem as na yumi tok Jisas i no bin kamap King bilong Kingdom bilong God long yia 33? (b) Wanem taim Jisas i kamap King bilong Kingdom bilong God?
17. Nau yumi save pinis long wanem ol bikpela tok?
18. Wanem samting i makim olsem Jisas tu bai i stap Jas?
19. Bilong wanem i stret yumi tok Jisas i sindaun olsem Jas?
20, 21. Ol aposel bilong Jisas i mekim wanem askim i samting bilong taim bilong yumi? Na i gat wanem askim i kamap?
22, 23. Wanem samting i makim olsem truim bilong tok piksa bilong ol sipsip na meme i no kirap long yia 1914?
24. Truim bilong tok piksa bilong ol sipsip na meme bai kamap long wanem taim?
25. Tok bilong Matyu 25:31 olsem Pikinini Bilong Man i sindaun long sia king bilong em, dispela i makim wanem samting?
26. Wanem nupela save long dispela tok piksa i kamap ples klia?
27. Yumi mas laik long kisim wanem save long laspela tok piksa bilong Jisas?