Ol i Bung Wantaim Olsem Man i Amamas Long Litimapim Nem Bilong God
TAIM lain bilong God long bipo i bin bung wantaim bilong lotu, God i tokim ol, ol i “mas amamas tru.” (Lo 16:15) “Amamas Long Litimapim Nem Bilong God” Kibung Distrik bilong 1995/1996 i mekim na ol Witnes Bilong Jehova i gat as na ol i amamas.
Kirap long taim ol dispela kibung i kamap, ol i wok long strongim bilip bilong ol. Ol dispela kibung i bin helpim ol tu long stap amamas namel long ol man i no amamas. Gutpela yumi tingim program bilong kibung bilong wan wan de.
‘Litimapim Nem Bilong Bikpela! Yupela Ol Manmeri . . . i Mas Amamas’
Dispela as tok bilong namba wan de bilong kibung ol i kisim long Song 149:1, 2. Wanpela tok, “I Gat As na Yumi Ken Amamas na Singaut” i bin skelim truim bilong tok profet bilong Aisaia sapta 35. Truim bilong en i kamap long lain Israel long bipo na i kamap tu long taim bilong yumi, taim ol manmeri i lotuim Jehova i kamap strong gen, na long dispela rot ol i kisim planti samting bilong spirit na ol i stap gutpela long paradais bilong spirit. Olsem na i gat as na ol manmeri long kibung i singaut amamas long ol samting God i laik mekim bilong helpim lain bilong em long paradais bilong spirit na long Paradais tru klostu bai kamap.
As tok bilong kibung, “Ol Man i Amamas Long Litimapim Nem Bilong God i Stap Narapela Kain,” i bekim askim olsem: Wanem samting i mekim na yumi stap narapela kain long ol man bilong dispela graun? Yumi wanbel long lotuim Jehova. Maski ol Witnes Bilong Jehova i sindaun long wanem wanem hap, ol i autim wankain tok na ol i skulim ol man long wankain tok. Ol i amamas tu, long wanem, long rot bilong Kingdom Jehova i laik mekim gut nem holi bilong em na kamapim klia olsem em i King bilong heven na graun. Tasol olsem wanem Jehova i helpim yumi long wok wantaim em long kamapim dispela laik bilong em? Em i givim tok i tru bilong Baibel long yumi bilong mekim wok long en. Na God i givim spirit holi long yumi. Em i givim bikpela lain brata long yumi, ol i stap long olgeta hap, na em i stretim rot bambai yumi ken bung wantaim na lotu tru long em. Bikpela lain brata i helpim yumi long amamas long mekim wok bilong Jehova.
Wanpela tok, em “Klia Long Pasin Bilong Graun na No Ken Kamap Doti Liklik,” i kamapim long ples klia, sapos yumi no mekim wankain pasin long olgeta man, maski bilong wanem lain o ol i maniman o rabisman, yumi kamap doti long ai bilong God; yumi mas abrusim dispela pasin. (Jems 2:5-9) Ating sampela i poromanim tasol ol brata wanples o ol brata i gat wankain sindaun olsem ol, na ol i givim baksait long ol brata Kristen i stap rabis o tarangu. Na sampela i laikim tasol ol brata i holim wok insait long kongrigesen. Ol i lusim tingting olsem, sapos wanpela man i Witnes Bilong Jehova, dispela i nambawan gutpela samting em inap kisim. Olsem na yumi no ken larim tingting o pasin bilong graun i bagarapim pasin bilong yumi na bagarapim pasin wanbel bilong kongrigesen.—2 Pita 3:14.
Narapela tok, “Mi Redi Long Marit o Nogat?,” i kamapim klia olsem planti ol i marit hariap na ol i no tingting gut pastaim. Sampela i marit, long wanem, ol i gat hevi long famili na ol i laik lusim, o ol i lukim ol narapela yangpela i marit. Tasol i gat sampela gutpela as bilong marit, olsem tupela i laik wok wantaim long mekim wok bilong God, o narapela i laikim tru narapela, o man o meri i laik bai em i gat poroman bilong helpim em, o ol i laik kamapim pikinini. Bilong helpim yu long redi long marit, yu mas kisim skul long samting bilong spirit. Yu mas wok long kisim ol gutpela pasin ol inap helpim yu long kamap nupela man. Na sapos yu tingim pinis poroman yu laik marit long em, bihainim savepasin na painimaut em i kamapim long ples klia olsem em i pas gut wantaim Jehova na em i tingim gut ol narapela o nogat. Na yu bihainim savepasin sapos yu kisim tingting long wanpela strongpela Kristen long dispela samting.—Sindaun 11:14.
Bihain long dispela gutpela tok, i gat tok “Ol Papamama i Amamas Long Pikinini Bilong Ol.” Taim nupela pikinini i kamap, papamama i save amamas tru. Tasol taim yumi kamapim pikinini, nau yumi gat bikpela wok. (Song 127:3) Olsem na em i bikpela samting papamama i mas lainim ol pikinini long laikim tumas Jehova. Ol papamama i ken mekim olsem, sapos oltaim ol i save toktok wantaim ol pikinini long Jehova, na taim ol i bihainim ol lo bilong Baibel insait long famili.
Long pinis bilong namba wan de ol man i kirap nogut long brata i tokaut long wanpela nupela buklet, nem bilong en Jehovah’s Witnesses and Education. Em i kamapim klia olsem ol Witnes “i strong long kirapim ol yangpela long wok strong na long tingim gut wok em tisa i givim ol long skul.” Dispela buklet i stori tu long gutpela wok i kamap long ol skul ol Witnes Bilong Jehova i bin putim long ol kongrigesen long Naijiria, na Meksiko, na sampela kantri moa, bilong lainim ol manmeri long rit rait. Dispela buklet bai helpim ol tisa long save, yumi tingim skul em i bikpela samting.
‘Oltaim Yumi Mas Givim Biknem Long God Olsem Ofa’
Dispela as tok bilong namba 2 de ol i kisim long Hibru 13:15. Long moningtaim ol i kamapim wanpela tok i gat 3-pela hap bilong en, nem bilong en “Bihainim Tok Bilong Kirapim Yu Long Litimapim Nem Bilong Jehova.” Maski yu yangpela o yu lapun, yu inap mekim. Song 148:12, 13 i singautim ol yangpela man, na ol yangpela meri, na ol lapun, na ol manki long litimapim nem bilong Jehova. Planti gutpela wokboi bilong Jehova i bin stretim rot bilong ol i ken litimapim moa yet nem bilong Jehova. Long olgeta hap, winim 600,000 brata sista i autim tok long olgeta de, olsem mekim wok painia. Winim 15,000 i mekim wok olsem painia salim, na winim 15,000 i mekim wok long Betel.
Wanpela tok, em “Wok Gut Wantaim Oganaisesen Bilong Jehova,” i kamapim klia olsem ol wokboi bilong God i mas i stap gut long God. Bilong i stap gut long Jehova, yumi mas pas strong tru long em, olsem ol samting glu i save pasim strong wantaim. Bilong i stap gut long God, yumi no ken bikhet na kalapim ol lo bilong Baibel, maski ol narapela i lukim yumi o nogat. Na yumi mas holim strong ol tok bilong Baibel i stap long Wastaua na Kirap!, na ol narapela kaikai bilong spirit yumi kisim long rot bilong Sosaiti Was Taua. Bihain long dispela tok ol i mekim tok bilong baptais. I gat bikpela amamas taim ol man i kisim baptais i kamapim ples klia olsem ol i dediket long Jehova!
Ol tok bilong Hosea 4:1-3 i as bilong tok i kamap long belo bek, nem bilong en “Yu Bihainim Gutpela Pasin o Pasin Nogut?” Tingting bilong ol man bilong graun long gutpela pasin em i go paul olgeta, tasol ol Kristen i mas “wok strong tru” long bihainim gutpela pasin. (2 Pita 1:5) Gutpela tingting i kirapim man long bihainim gutpela pasin. Sapos em i gat gutpela tingting, bai gutpela toktok tasol i kamap long maus bilong em, olsem ol tok i klinpela na i tru na ol tok i strongim man i harim, na oltaim em i mas wok strong long mekim stretpela pasin long ol narapela. Na sapos brata o sista Kristen i bel hevi na tingting i no stap isi, taim yumi bihainim gutpela pasin bai yumi pilim bel hevi bilong em na sori long em.—1 Tesalonaika 5:14.
Narapela tok, “Was Gut Long Umben Bilong Satan,” i givim tok lukaut long ol Kristen olsem ol i no ken givim rot long ol spirit nogut long paulim ol. Long pasin bilong stretim sik, Kristen i mas was gut long sampela narapela kain pasin bilong stretim sik, olsem man i mekim yu i olsem yu slip; dispela pasin em bilong ol man i mekim wok long strong bilong ol spirit nogut. Tasol ol narapela samting ol man i mekim bilong lukautim skin bilong ol, em samting bilong ol yet.
Long pinis bilong namba 2 de ol man i kirap nogut—ol i kisim wanpela nupela liklik buk em bilong helpim ol man i gat gutpela bel long kwiktaim ol i ken kamap strong na ol i ken dediket na kisim baptais. Nem bilong dispela nupela buk i gat 192 pes em Save i Bringim Man Long Laip Oltaim. Buk Save i kamapim tok i tru long gutpela rot i strongim man. Em i no stori tumas long ol bilip giaman. Ol tok bilong buk i klia na i no hatwok long kisim as bilong en, olsem na em bai helpim yumi tru long skulim gut ol man na helpim ol long kisim gutpela save bilong God.
“Yupela i Ken Bel Gut na Amamas Oltaim”
Dispela tok bilong Aisaia 65:18 em i as tok bilong namba 3 de bilong kibung. Truim bilong tok profet bilong Baibel i makim 1914 olsem yia em las de bilong dispela pasin nogut bilong graun i kirap. Olsem na ol man i putim gut yau long tok i gat 2-pela hap bilong en, nem bilong en “Amamas Long Litimapim Nem Bilong God Long Taim Bilong Pinis.” Ol brata i mekim tok i kamapim klia olsem planti bilion man i larim pasin mangal na pasin nogut bilong dispela graun i pulim ol. Bihain ol bai kisim strafe bilong ol man i insait long pasin bilong dispela graun em Satan i bosim. Olsem na nau em i taim bilong olgeta manmeri i mas tingting gut: Bai yumi lotu long husat? Yumi laik lotu long Jehova na aninit long wok king bilong em, o yumi laik bihainim ol pasin Satan i laikim na yumi larim Satan i stap bos bilong yumi? Yumi olgeta i mas lotu long Jehova na stap aninit long em.
Pablik-tok bilong dispela kibung, “Litimapim Nem Bilong King Bilong Oltaim!” i bin kirapim tru tingting bilong ol man long kibung. Tru, yumi ol man nating bilong graun yumi no inap save olgeta long samting bilong oltaim oltaim, olsem samting i no gat kirap o pinis bilong en, tasol Jehova i save tru long dispela. Man bilong raitim Song i tok, Jehova i “stap King inap oltaim oltaim.” (Song 10:16) Dispela King bilong oltaim i bin opim rot bilong ol manmeri i ken kisim laip oltaim long rot bilong Pikinini bilong em, Krais Jisas. (Jon 17:3) Man bilong mekim tok em i tok: “Tru tumas, yumi ol sinman bilong graun inap kisim laip i stap oltaim oltaim sapos yumi larim God i skulim yumi, na yumi bilip long ofa Jisas i mekim bilong baim bek yumi.”
Kibung i laik pinis, na laspela tok i strongim bilip bilong ol man long kibung, nem bilong en “Amamas Long Litimapim Nem Bilong Jehova Long Olgeta De.” Ol i bin amamas long harim sampela ripot long wok bilong kamapim ol disaipel i go bikpela long olgeta hap. Na ol manmeri i kam long kibung, bel bilong ol i kirap tru long ‘litimapim nem bilong Jehova long olgeta de inap oltaim oltaim.’—Song 145:2.
Ol man i save mekim nogut tru long ol man na dispela i mekim na ol manmeri i no amamas. Tasol man i bilip tru long Jehova em inap amamas. Olsem wanpela lain brata i stap long olgeta hap, ol Witnes Bilong Jehova inap mekim wankain tok olsem i stap long Song 35:27, 28: “Tasol ol man i laik bai yu kolim mi stretpela man, ol i ken singaut amamas na i stap belgut. Oltaim ol i ken tok olsem, ‘Bikpela em i nambawan tru, em i save laikim tumas bai wokman bilong en i ken i stap gut.’ Olsem na bai mi tokaut long stretpela pasin bilong yu, na litimapim nem bilong yu oltaim, long san na long nait.”
[Ol Piksa long pes 7]
Buklet “Jehovah’s Witnesses and Education” bai helpim ol famili
[Ol Piksa long pes 8, 9]
Nupela buk, “Save i Bringim Man Long Laip Oltaim,” i kamapim tok i tru long gutpela rot i strongim man
[Piksa long pes 9]
Planti man i kisim baptais bilong makim olsem ol i dediket long Jehova
[Piksa long pes 9]
Ol man i kam long kibung, bel bilong ol i pilim tru dispela pilai “Mekim Gut Long Ol Lapun i Bin Mekim Gutpela Wok”