‘God i Save Tingim Mi?’

‘GOD i Save Tingim Mi?’ Em het-tok bilong wanpela stori i bin kamap long wanpela nius (Christianity Today). Man bilong raitim dispela stori, em Philip Yancey, em i tok: “Long wok bilong mi, planti stori mi bin raitim i stori long pen i save painim man. Planti taim mi wok long kamapim ol wankain askim long tingting bilong mi, olsem pinga bilong mi i wok long holim holim wanpela olpela sua long skin i no save orait gut. Ol man i kaunim ol buk bilong mi, ol i save raitim pas long mi na kamapim ol bikpela hevi na pen bilong ol, olsem na mi pilim olsem pasin bilong mi long tingting planti olsem God i save tingim yumi o nogat, em i gat as bilong en.”

Ating sampela taim yu tu yu bin tingting olsem God i save tingim yu o nogat. Tru, ating yu save pinis long tok bilong Baibel long Jon 3:​16, i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol.” O ating yu bin kaunim tok bilong Matyu 20:​28, i tok Jisas i bin kam “bilong givim laip bilong em bilong baim bek planti manmeri.” Tasol ating yu gat askim yet olsem, ‘God i save lukim mi? Em i save tingim mi?’ I gat as na yu ken bilip olsem God i save tingim yu, na nau bai yumi stori long dispela samting.