Bikpela De Tru Bilong Tingim

DISPELA de i senisim tru i stap bilong ol man long bihain na bai ol i ken kisim gutpela samting bilong oltaim. I no gat narapela de i mekim bikpela samting moa long ol man long bihain. Long dispela de Jisas i pinisim olgeta wok em i kam long graun bilong mekim. Jisas i hangamap long diwai, na taim em i laik dai em i singaut strong: “Em i pinis nau”! (Jon 19:30) I gat wanem as na Jisas i kam long graun?

Baibel i tok: “Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri.” (Matyu 20:28) Jisas i bin givim laip bilong em bilong kisim bek ol manmeri long sin na indai. Tru tumas, “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Man! Ofa bilong Jisas em i gutpela samting tru, a?

Tasol i gat narapela as moa na yumi mas tingim dispela bikpela de em Jisas i dai. Long dispela de Pikinini bilong God i bin skulim ol aposel long sampela gutpela samting na dispela bai helpim ol long i stap gut long God. Ol laspela tok bilong em i bin sutim tru bel bilong ol dispela disaipel! Em i skulim ol long wanem tok? Ol tok Jisas i bin skulim ol long en inap helpim yumi olsem wanem? Stori i kamap bihain long dispela bai bekim ol dispela askim.