Ripot Long Wok Bilong Kingdom
Bipo Ol i Stap Birua—Nau Ol i Wanbel Long Lotuim Jehova
BRANKOa i tok: “Namba wan taim bilong mi long harim sampela tok long ol Witnes Bilong Jehova, em long taim mi wanpela soldia bilong ami long Bosnia.”
Branko i wok long was long wanpela haus sik, em ol i wok long stretim ol man i bin kisim bagarap long pait. Wanpela bilong ol dokta em i stadi long Baibel wantaim ol Witnes, na wanpela taim em i wok nait na em i tokim Branko long planti samting em i lainim pinis long Baibel.
Branko i pilim tru ol tok em i harim long dispela nait na dispela i kirapim em wantu long lusim ol gan samting bilong pait. Em i go painim ol Witnes bilong kisim sampela save moa. Bihain, Branko i go sindaun long narapela kantri bilong Yurop na em i painim Haus Kingdom bilong ol Witnes Bilong Jehova na em i go long miting bilong wanpela kongrigesen Yugoslavia. Long dispela kongrigesen Branko i bungim Slobodan.
Slobodan tu i bin kam long Bosnia, na em i bin wok volantia insait long wankain pait olsem Branko—tasol em i helpim narapela lain. Slobodan i bin helpim ol Serbia long pait long ol Kroesia. Tasol taim tupela i bung wantaim, Slobodan i baptais pinis olsem wanpela Witnes Bilong Jehova. Em i tokim Branko—dispela man bipo em birua bilong em—em i laik stadi Baibel wantaim em. Taim tupela i wok long stadi na Branko i wok long kisim sampela save moa long Jehova, em i wok long givim bel moa long God. Dispela i kirapim Branko long dediketim laip bilong em long Man bilong wokim yumi. Long Oktoba 1993 em i kisim baptais long wara bilong makim olsem em i dediket pinis.
Olsem wanem Slobodan i bin kamap wanpela Witnes Bilong Jehova? Liklik taim bipo em i bin lusim hap bilong pait long Bosnia. Em i bin kaunim sampela buk bilong ol Witnes, tasol laik bilong em long kisim save long Baibel i no i go bikpela inap long taim tupela Witnes i kam long haus bilong em kirap long 1992. Husat i bin go lukim Slobodan na askim em long stadi long Baibel? Em Mujo, em tu i kam long Bosnia, tasol em i go bikpela long lotu Muslim. Taim tupela i wok long stadi long Baibel, long olgeta de Mujo na Slobodan—em bipo tupela i stap birua birua—ol i bung wantaim bilong narapela i ken strongim bilip bilong narapela.
Dispela pait long kantri bipo ol i kolim Yugoslavia i bin bagarapim planti handet tausen manmeri. Tasol nau Branko, na Slobodan, na Mujo, ol i wok long autim gutnius long olgeta de long wanpela kongrigesen bilong ol Witnes Bilong Jehova. Ol i bin daunim pasin bilong birua long narapela lain na skin, na nau ol i painim bel isi taim ol i stap daun long Man bilong wokim yumi, em Jehova.
Tasol wanem samting i bin kamapim ol dispela senis? Em olsem: Ol i laikim tumas Jehova, ol i daun long tok bilong Baibel, ol i redi long bihainim tok i tru bilong Baibel na senisim pasin bilong ol. Olsem Baibel Holi i tok: “Tok bilong God em i gat laip, na em i wok strong i stap. . . . Olsem na em i save gut tru long olgeta tingting na laik bilong bel bilong yumi.”—Hibru 4:12.
[Futnot]
a Mipela i senisim ol nem.