God, Gavman, na Yu

“Misin na Gavman Long Aialan i Vot Long Pasin Bilong Katim Marit”

DISPELA het-tok long nius The New York Times i kamapim klia olsem, sampela taim ol man long nau i mas tingim wanem rot ol i laik bihainim​—⁠laik bilong gavman o tok bilong misin bilong ol.

Nius i stori olsem: “Klostu nau ol man bai vot long ol i laik gavman i holim yet lo i tambu long katim marit o nogat. Long ol hap bilong Aialan planti Katolik i sindaun long en, ol i lukim wanpela samting i no save kamap planti taim​—⁠tok kros namel long ol bikman bilong gavman na ol bikman bilong lotu.” Gavman i laik rausim tambu long ol man i no ken katim marit, tasol Misin Katolik i strong long ol man i no ken katim marit na marit gen. Olsem na ol Katolik long Aialan i mas kamapim tingting bilong ol long dispela samting​—⁠ol i laik bihainim tingting bilong Misin o bilong gavman. Gavman i winim vot, tasol em i no kisim planti vot antap long ol vot bilong Misin.

Inap planti yia nau ol manmeri long Noten Aialan i kros na pait long husat tru i gat namba long bosim ples. Planti man i bin dai. Ol Katolik na Talatala i no wanbel long wanem gavman i mas bosim ol: Larim Briten i bosim yet hap bilong Noten Aialan, o kamapim wanpela gavman bilong bosim Aialan olgeta.

Wankain long ol hap bipo ol i kolim Yugoslavia, ol bikman politik i strong long ol man i gat narapela narapela lotu, olsem ol Katolik na Otodoks, ol i mas pait bilong bosim graun. Olsem wanem long ol man nating? Namba wan samting ol i mas mekim em wanem samting? Ol i mas bihainim laik bilong ol man i tok ol i mausman bilong gavman, o ol i mas bihainim laik bilong God i tok: “Yupela i no ken kilim manmeri i dai. . . . ‘Yu mas laikim tru ol arapela man olsem yu laikim yu yet’ ”?​—⁠Rom 13:⁠9.

Yu inap ting dispela kain hevi i no inap painim yu. Tasol em inap. Ating em i wanpela samting yu mas tingim nau. Long buk bilong em (The State in the New Testament), Oscar Cullmann, em wanpela tisa bilong lotu, em i stori long “ol hevi hatpela gavman bai putim o inap putim long ol Kristen long nau, olsem na ol Kristen i mas ting ol bai mekim wanem bilong helpim ol long abrusim dai na bai ol i ken stap laip.” Tasol em i stori long narapela samting na em tu “i bikpela samting long olgeta Kristen​—⁠na ol Kristen i stap long taim nating i no gat ol bikpela samting nogut i save painim ol long olgeta de​—⁠em i wanpela Kristen, olsem na em i mas karim bikpela hevi i save painim em long dispela.”

Olsem wanem? Pasin pren i stap namel long lotu na gavman, em wanpela samting ol Kristen long nau i mas tingim? Yes, ol i mas tingim. Long bipo i kam inap nau ol Kristen i bin wok long kisim stretpela tingting long ol gavman. Gavman bilong Rom i bin kotim Gopas bilong ol, em Krais Jisas, na tok em i man nogut, na ol i kilim em i dai. Ol disaipel bilong em i mas skelim wok Kristen bilong ol wantaim wok ol i mas mekim long Gavman Rom. Sapos yumi tingim ol samting ol dispela Kristen bilong bipo i bin mekim long gavman, dispela bai givim save long yumi ol Kristen long nau.

[Piksa Kredit Lain long pes 3]

Tom Haley/Sipa Press