Namba 101 Klas Bilong Gileat—Ol i Wok Strong Long Mekim Olgeta Kain Gutpela Pasin
MAN bilong wokim yumi, God Jehova, na Pikinini bilong em, Krais Jisas, ol i save wok strong long mekim olgeta kain gutpela pasin. Olsem Man i stap gutpela piksa bilong yumi ken bihainim, Jisas i wok strong long inapim olgeta wok God i givim em long mekim, na wanpela wok em bilong lusim “laip bilong em yet, . . . bai yumi stap klin tru na yumi stap lain manmeri bilong em yet, na yumi wok strong long mekim olgeta kain gutpela pasin.” (Taitus 2:14) Ol 48 sumatin bilong namba 101 klas bilong Wastaua Baibel Skul Bilong Gileat, ol i bin kamapim long ples klia ol gutpela pasin bilong ol. Bung bilong makim olsem ol sumatin i winim skul i bin kamap long Septemba 7, 1996, long Wastaua Edukesen Senta long Patesen, Nu Yok.
Gutpela Tok Bilong Helpim Ol Long Wok Strong Yet
Siaman bilong dispela bung em Carey Barber, em bilong Lain Bilong Bosim Ol Witnes, na winim 70 yia em i bin mekim wok bilong God long olgeta de. Bilong kirapim bung, Brata Barber i stori long wok Jisas i bin mekim long autim tok na skulim ol man, na em i stap olsem “lait bilong graun.” (Jon 8:12) Em i tok, Jisas i no laik bai em wanpela tasol i stap olsem lait, nogat; em i tokim ol disaipel bilong em long kamapim lait bilong ol tu long ol man. (Matyu 5:14-16) Dispela gutpela wok i mekim na i stap bilong ol Kristen i gat as bilong en, na bikpela wok i stap long olgeta wan wan long mekim, em ol i “wokabaut olsem ol manmeri bilong lait.”—Efesus 5:8.
Bihain, ol i singautim Don Adams i wok long ol bikpela ofis long hetkota long Bruklin. Em i mekim wanpela tok, nem bilong en “Wok i Go, No Ken Slek.” Brata Adams i stori long Skul Gileat na wok bilong en—em bilong helpim wok bilong autim gutnius long i go long ol narapela kantri. Em i stori long oganaisesen bilong God i wok long i go bikpela, na ol i bin wokim ol buk na nius samting long winim 300 tok ples long olgeta hap. Long 1995 ol i wokim buk Save i Bringim Man Long Laip Oltaim, na ol i tanim pinis long 111 tok ples na ol bai wokim long sampela tok ples moa. Dispela buk i helpim pinis ol nupela disaipel bilong Jisas long kamap long mak bilong dediket na baptais insait long sampela mun tasol. Olsem na ol nupela misineri inap mekim wok long ol nupela buk samting taim ol i mekim ol Baibel-stadi.
Bihain, Lyman Swingle, wanpela bilong Lain Bilong Bosim Ol Witnes, em i mekim wanpela tok long Kamapim Tok Hait 7:15, na nem bilong tok em “Wok Yet Long Mekim Wok Bilong Jehova.” God Jehova yet em i save stap amamas, olsem na taim yumi mekim wok bilong em oltaim dispela i save mekim yumi i amamas. (1 Timoti 1:11) Dispela wok bilong amamas i bin kamapim gutpela samting olsem: Bikpela lain manmeri long olgeta hap bilong graun ol i kam na lotuim em. Insait long ol yia i go pinis, ol misineri bilong Skul Gileat i bin helpim planti bilong dispela lain long kisim stretpela save long tok i tru. Olsem na i gat as tru na yumi ken bilip olsem Jehova bai wok yet long blesim ol misineri nau ol i salim ol i go bilong helpim sampela moa long kam insait long dispela bikpela lain i wok yet long i go bikpela.
“Kamapim Pasin Amamas Bilong Jehova” em nem bilong tok bilong Daniel Sydlik, em tu i wanpela bilong Lain Bilong Bosim Ol Witnes. Em i tok, olgeta wokman bilong God, na ol nupela misineri tu, ol i kisim gutpela wok tru bilong lainim ol man long rot bilong kisim laip oltaim na rot bilong i stap amamas tru long nau. Brata Sydlik i tok, “Wok bilong skulim man em wanpela wok i gat amamas bilong en yet. Yu ken lukim dispela amamas long pes bilong tisa na tu long pes bilong man i skul.” (Song 16:8-11) Em i kolim tok bilong wanpela misineri long Estonia, em i tok, “Yumi gat nambawan tok bilong autim long dispela graun, na pes bilong yumi i save kamapim dispela samting.” Pes bilong yumi inap kirapim planti man long harim tok bilong yumi. Ol man i laik save, wanem samting i mekim na ol wokman bilong Jehova i stap amamas. Brata Sydlik i tok, “Olsem na yu mas tingim pes bilong yu. Ol man i save amamas long lukim man em pes bilong em i lait.”
Ulysses Glass, em i bin lainim ol sumatin bilong Gileat kirap long namba 12 klas long 1949, em i mekim wanpela tok, “Was Gut Long Yu Yet Long Pasin Bilong i Stap Isi na Wet.” Wanem dispela pasin? Insait bilong en i olsem man i stap isi na wetim samting, o karim hevi na i no les kwik. Man i gat pasin bilong i stap isi, em i save bosim gut bel; man i no gat dispela pasin em i save les kwik na kros hariap. Brata Glass i tok, “Planti man i ting, man i stap isi na wet em i no gat bun o em i gat tupela tingting, tasol long Jehova dispela i makim olsem man i gat strong na em i tingting long winim wanpela mak.” (Sindaun 16:32) Wanem ol gutpela samting i kamap long dispela pasin? Wanpela savetok bilong ol Saina i olsem: “Sapos yu stap isi long taim bilong kros, bai yu abrusim hevi bilong wan handet de.” Na Brata Glass i tok: “Pasin bilong i stap isi na wet i strongim ol narapela gutpela pasin bilong yu. Em i strongim bilip bilong yu, na helpim yu long i stap bel isi oltaim, na holim strong pasin bilong laikim tru ol narapela.”
“Taim yumi kisim wanpela wok long God Jehova long rot bilong oganaisesen bilong em, em wanpela gutpela samting tru.” Em tok bilong Mark Noumair, em i bin mekim wok misineri long Kenya inap elevenpela yia na long nau em i wanpela tisa bilong Skul Gileat. Brata Noumair i mekim wanpela tok, “Sapos Yu No Gat Bilip, Bai Yu No Inap Stap Longpela Taim,” na em i stori long pasin King Ahas bilong Juda i bin mekim. Aisaia i tokim king olsem Jehova bai helpim em long mekim wok bilong em, tasol maski olsem, Ahas i no bilip tru long Em. (Aisaia 7:2-9) Bihain Brata Noumair i tok, ol misineri—na yumi olgeta—i mas bilip long Jehova na bai ol inap stap longpela taim long mekim wok God i givim long ol. Bilong winim ol hevi i save painim ol misineri long ples wok bilong ol, ol i mas i gat strongpela bilip. Brata Noumair i tok, “Oltaim yu mas tingim, long dispela pasin bilong nau bai yumi gat sampela hevi—yumi no inap stap amamas olgeta.”
Ol Ekspiriens i Kirapim Ol Long Wok Strong
Long taim ol i stap long Skul Gileat, ol sumatin i save autim tok long olgeta Sarere Sande, em dispela wok bai stap olsem nambawan wok long taim ol i stap long ples misineri bilong ol. Wallace Liverance, em wanpela tisa bilong Skul Gileat, em i toktok wantaim 15 sumatin na ol i kamapim sampela ekspiriens bilong ol. Leon Weaver bilong Komiti Bilong Dipatmen Bilong Mekim Wok na Lon Schilling bilong Komiti Bilong Lukautim Ol Wok Long Betel, ol i toktok wantaim sampela brata bilong ol Komiti Bilong Brens bilong Afrika na Latin-Amerika, na ol i kamapim sampela ekspiriens bilong ol misineri long kantri bilong ol na givim sampela gutpela tok long ol nupela misineri. Ol i tok, long Siera Leon inap 90 pesen bilong ol manmeri i kisim baptais long yia bilong wok bilong 1995, em ol misineri i bin helpim ol. Tru tumas, ol dispela misineri i bin wok strong tru!
Bihain, Milton Henschel, em presiden bilong Sosaiti, em i mekim wanpela tok, nem bilong en “Oganaisesen Bilong Jehova Long Graun Em i Narapela Kain,” na inap 2,734 ol i harim dispela tok. Wanem samting i mekim na oganaisesen bilong God i winim ol narapela? I no bikpela bilong en o strong bilong en, nogat; tasol oganaisesen bilong God i narapela kain, long wanem, ol stretpela lo bilong God i stiaim olgeta samting bilong en. Long bipo Jehova i bin givim ol tok bilong em long lain Israel bilong lukautim, na dispela i mekim ol i stap narapela kain. (Rom 3:1, 2) Long nau, oganaisesen bilong Jehova i wanbel long mekim wok aninit long wok bos bilong Krais Jisas, em i soim rot long ol. (Matyu 28:19, 20) Lain bilong em i kamap strong na i go bikpela. Olsem wanem? I gat narapela oganaisesen long graun em Lain Bilong Bosim ol i save lukim Tok Bilong God, em Baibel, paslain long ol i pasim tok long sampela bikpela samting? Nogat, a? Long ol dispela rot—na sampela narapela rot tu—oganaisesen bilong Jehova long graun i narapela kain tru.
Bilong pinisim dispela gutpela program, ol i givim pepa setifiket bilong skul long ol sumatin na kaunim wanpela pas em klas i raitim bilong tok tenkyu long gutpela skul ol i bin kisim.
[Blok long pes 22]
Ol Samting Bilong Ol Sumatin:
Hamas kantri ol i kam long en: 9
Hamas kantri ol bai go long en: 12
Hamas sumatin: 48
Krismas bilong ol, averes: 31.7
Hamas yia long tok i tru, averes: 13.8
Hamas yia long wok painia, averes: 9.8
[Piksa long pes 23]
Namba 101 Klas Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 6 lain i sanap baksait tru. Taim yu kaunim nem bilong ol na lukim pes bilong ol, kirap long han kais na i go long han sut.
(1) Swint, H.; Zezenski, A.; Highfield, L.; Mercado, S.; Diehl, A.; Chavez, V.; Smith, J.; Selenius, S. (2) Kurtz, D.; Clark, C.; Leisborn, J.; Mortensen, W.; Bromiley, A.; Toikka, L.; Marten, A.; Smith, D. (3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R. (4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D. (5) Minguez, L.; Leisborn, M.; Mercado, M.; Kurtz, M.; Diehl, H.; Toikka, J.; Clark, S.; Khan, A. (6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.