Jehova i Olsem Ples Hait Bilong Mi
EM STORI BILONG PENELOPE MAKRIS
Mama bilong mi i krai strong long mi olsem: “Lusim man bilong yu; ol brata bilong yu bai painim narapela man bilong yu i winim em.” Bilong wanem gutpela mama bilong mi i laik bai mi pinisim marit bilong mi? Wanem samting i bin kamap na em i mekim kain tok olsem?
MAMA i bin karim mi long 1897 long liklik ples Ambilos long ailan Samos bilong kantri Grik. Famili bilong mipela i strong tru long bihainim Misin Grik Otodoks. Paslain liklik long taim mama i karim mi, papa i dai, olsem na mi wantaim mama na 3-pela brata bilong mi, mipela i mas wok strong tru long painim liklik kaikai samting bilong i stap laip. Long dispela taim bipo ol man bilong dispela hap ol i stap rabis nogut tru.
Long 1914, Namba Wan Pait Bilong Olgeta Hap i kamap, na i no longtaim na 3-pela brata bilong mi i kisim tok long gavman long ol i mas go insait long ami. Bilong abrusim dispela samting, ol i go long Amerika, na mi wantaim narapela brata bilong mi, mitupela tasol i stap wantaim mama. Sampela yia bihain, long 1920, mi maritim Dimitris, em wanpela yangpela tisa long ples bilong mi.
Wanpela i Kam Lukim Mipela
Mi marit pinis, orait i no longtaim na brata bilong mama i lusim Amerika na i kam lukim mipela. Em i karim wanpela bilong ol buk Studies in the Scriptures, em Charles Taze Russell i bin raitim. Em wanpela buk bilong ol Sumatin Bilong Baibel, nau ol i kolim ol Witnes Bilong Jehova.
Taim Dimitris i opim dispela buk, em i lukim tok bilong wanpela samting em i laik save long en kirap long taim em i pikinini yet, olsem: “Wanem samting i save painim man taim em i dai?” Taim em i stap long haiskul, em i bin askim wanpela tisa bilong Misin Grik Otodoks long dispela samting, tasol em i no kisim wanpela gutpela bekim bilong dispela askim. Dispela buk i kamapim klia tru dispela samting, na Dimitris i amamas tru long dispela tok, olsem na em i go stret long liklik haus kopi bilong ples; ol man bilong kantri Grik ol i save bung long kain ples olsem. Em nau, Dimitris i stori long ol tok bilong Baibel em i bin lainim.
Mipela i Sambai Long Tok i Tru
Long dispela taim, olsem long 1921 samting, i gat narapela pait long kantri Grik. Gavman i singaut long Dimitris i mas go insait long ami, na ol i salim em i go long bikples Turki, long Esia Maina. Em i kisim hap bagarap na ol i salim em i kam bek long ples. Taim em i kamap orait gen, mi go wantaim em long Smerna, long Esia Maina (nau em Ismir, long Turki). Long 1922, pait i pinis wantu na mipela i mas ranawe. Klostu bagarap i painim mipela, tasol mipela i kalap long wanpela bot nogut na mipela i kamap long Samos. Taim mipela i kamap pinis long ples, mipela i brukim skru na tok tenkyu long God—em dispela God mipela i save liklik tasol long em.
I no longtaim na ol i makim Dimitris long mekim wok tisa long Veti, em nambawan biktaun bilong dispela ailan. Em i wok long kaunim ol buk samting bilong ol Sumatin Bilong Baibel, na wanpela nait long taim i gat ren, tupela bilong dispela lain em ol i bilong ailan Kios ol i kam lukim mipela. Ol i bin lusim Amerika na kam bek bilong mekim wok kolpota (olsem wok bilong autim tok bilong God long olgeta de). Mipela i givim ples slip long ol bilong dispela nait, na ol i toktok wantaim mipela long planti samting God i laik mekim.
Bihain Dimitris i tokim mi: “Penelope, nau mi save pinis dispela em tok i tru, na mi mas bihainim. Olsem na mi no ken mekim singsing moa long Misin Grik Otodoks, na mi no inap i go lotu moa wantaim ol skulmanki.” Tru, mipela i gat liklik hap save tasol long Jehova, tasol mipela i gat strongpela laik long mekim wok bilong em. Olsem na mi tokim em: “Mi no ken pasim yu. Wok yet long kisim save long Jehova.”
Em i tok moa olsem: “Yes, tasol sapos ol i save yumi laik bihainim tok i tru, ol bai rausim mi long wok bilong mi.”
Tasol mi tokim em: “Maski. I no olgeta man i save mekim wok tisa bilong kisim mani, a? Yumi yangpela yet na skin bilong yumi i strong, na God bai helpim yumi na yumi inap painim narapela wok.”
Long dispela taim mipela i kisim save olsem i gat narapela Sumatin Bilong Baibel i kam long Samos, na em tu i save autim tok long olgeta de. Taim mipela i harim olsem ol polis i no laik givim tok orait long em i ken mekim wanpela pablik-tok bilong Baibel, mipela i kirap long painim em. Mipela i painim em long wanpela stua, na em i toktok wantaim tupela tisa bilong lotu em ol i bilong Misin Grik Otodoks. Tupela i sem long ol i no inap kamapim ol tok bilong Baibel bilong helpim ol bilip bilong ol, olsem na i no longtaim na ol i lusim em na i go. Man bilong mi i kirap nogut long save bilong dispela man bilong autim tok, na em i askim man olsem: “Olsem wanem na yu no hatwok liklik long mekim wok long Baibel?”
Dispela man i tok: “Mipela i save bihainim wanpela pasin bilong stadi long Baibel.” Em i opim paus bilong em na em i kamautim buk The Harp of God na soim mipela long pasin bilong mekim stadi wantaim dispela buk. Bel bilong mipela i kirap tru long kisim save, olsem na mi wantaim man bilong mi, na dispela man bilong autim tok, na tupela man moa, wantu mipela i go wantaim papa bilong stua long haus bilong em. Dispela man bilong autim tok i givim wanpela buk The Harp of God long mipela olgeta wan wan, na mipela i kirap stadi long en long dispela taim stret. Mipela stadi i go lusim biknait, na taim tulait i laik bruk, mipela i kirap lainim ol singsing em ol Sumatin Bilong Baibel i save mekim.
Kirap long dispela taim, mi kirap stadi long Baibel inap sampela aua long olgeta de. Ol Sumatin Bilong Baibel i stap long ol narapela kantri, ol i save salim ol buk samting long mipela bilong mekim stadi long Baibel. Long Janueri 1926, mi dediket long God long rot bilong beten, na mi mekim tok promis olsem mi bai mekim olgeta laik bilong em. Sampela mun bihain, mi wantaim man bilong mi i kisim baptais bilong kamapim klia olsem mipela i dediket pinis. Mipela i gat strongpela laik long tokim ol narapela man long ol samting mipela i lainim, olsem na mipela i kirap i go long haus bilong ol man na tilim liklik nius Message of Hope.
Ol i Birua Long Mipela
Wanpela taim wanpela yangpela meri i singautim mi i go bilong mekim sampela pasin bilong lotu long wanpela liklik haus lotu bilong Misin Grik Otodoks. Mi tokim em: “Mi lusim pinis dispela kain pasin bilong lotuim God. Nau mi save lotuim em long spirit na long pasin i tru, olsem Baibel i tokim yumi long mekim.” (Jon 4:23, 24) Man! Em i kirap nogut tru long dispela tok bilong mi, na em i go nabaut na tokim olgeta man long dispela samting i bin kamap, na em i pulim nem bilong man bilong mi i go insait long dispela tok.
Em nau, klostu olgeta man i kirap birua long mipela. Mipela i no inap painim ples bilong i stap bel isi, maski mipela i stap long haus bilong mipela o long ol miting mipela i mekim wantaim ol wan wan man i laik harim tok bilong Baibel long dispela ailan. Ol pris Otodoks i kirapim ol man, na bikpela lain i kam bung ausait long haus mipela i miting long en na ol i wok long tromoi ston na singaut bikmaus na tok bilas long mipela.
Taim mipela i tilim liklik nius Message of Hope, ol pikinini i banisim mipela na ol i singaut, “Yupela ol lain bilong Wan Tausen Yia,” na ol i mekim ol narapela kain tok bilas olsem. Na ol wanwok bilong man bilong mi, ol tu i kirap na givim hevi long em. Klostu long pinis bilong 1926 em i mas i go sanap long kot. Ol i tok, em i no gutpela man bilong i stap tisa long skul, na ol i makim strafe bilong em olsem 15 de long kalabus.
Taim mama i harim dispela samting, em i tokim mi long lusim man bilong mi. Tasol mi tokim em: “Mama, yu harim. Yu save mi laikim yu tru na mi save daun long yu. Tasol mi no inap tru long larim yu i pasim rot bilong mipela long lotuim God tru, Jehova.” Mama i bel hevi stret na em i lusim mi na go bek long ples.
Long 1927 i gat wanpela kibung bilong ol Sumatin Bilong Baibel long Atens, na Jehova i opim rot long mipela i ken go. Mipela i amamas nogut tru long bung wantaim planti wanbilip, na dispela i strongim mipela long ol samting bilong spirit. Taim mipela i go bek long Samos, mipela i tilim 5,000 liklik nius, A Testimony to the Rulers of the World, long ol taun na liklik ples long ailan bilong mipela.
Long dispela taim ol i rausim Dimitris long wok tisa bilong em, na tu, planti man i bel nogut long mipela, olsem na i hatwok tru long painim wanpela wok mani. Tasol mi gat save long samapim klos, na Dimitris i gat save tru long penim haus, olsem na mipela inap kisim liklik mani long dispela wok inap long lukautim mipela. Long 1928, man bilong mi wantaim 4-pela narapela brata Kristen ol i kalabus inap 2-pela mun, long wanem, ol i autim gutnius. Mi wanpela tasol mi no kalabus, olsem na mi inap kisim kaikai i go long ol long haus kalabus.
Ol Bikpela Sik i Painim Mi
Bihain wanpela bikpela sik i kisim mi, em sik TB long bun bilong baksait. Bipo ol i no gat save long dispela sik nogut. Mi no gat laik long kaikai, na oltaim mi gat bikpela fiva. Dokta i putim simen long skin bilong mi, kirap long nek i go daun long sangana bilong lek. Bilong kisim liklik mani, man bilong mi i mas baim hap graun bilong em i go long ol man na bai mi inap wok yet long kisim helpim long dokta. Mi bel hevi stret, na long olgeta de mi beten long Jehova long strongim mi.
Taim ol wanblut i kam lukim mi, oltaim ol i wok long kamapim pasin birua. Mama i tok, mipela i bin senisim lotu bilong mipela, na dispela i as na ol dispela hevi i painim mipela. Mi no inap meknaisim skin liklik, na mi krai long Papa bilong mipela long heven long helpim mi na mi no ken les, na strongim bel bilong mi na bai mi inap sanap strong na karim dispela hevi. Taim mi beten olsem, mi wok long krai na aiwara bilong mi i kapsait na wasim pilo.
Long liklik tebol klostu long bet bilong mi, mi save putim Baibel bilong mi na sampela buklet na liklik nius bilong ol manmeri i save kam lukim mi. Ol miting bilong liklik kongrigesen bilong mipela i save kamap long haus bilong mipela, na dispela em i wanpela gutpela blesing tru; oltaim mi inap kisim ol tok bilong strongim bel bilong mi. Mi mas lukim wanpela dokta long Atens, olsem na mipela i mas baim narapela hap graun i go long ol man bambai mipela i ken kisim mani bilong baim em.
Bihain liklik wanpela wasman bilong raun em i kam lukim mipela. Em i sori tru long lukim mi i stap nogut na Dimitris i no gat wok mani. Long pasin sori em i stretim rot bambai mipela i ken i go sindaun long Mitilini, long ailan Lesbos. Mipela i go sindaun long dispela ples long 1934, na Dimitris inap painim wanpela wok mani. Na mipela i painim tu ol gutpela gutpela brata sista Kristen em ol i lukautim mi long dispela taim mi gat sik yet. Ol dokta i wok long stretim sik bilong mi, na isi isi—inap 5-pela yia bihain—sik bilong mi i pinis.
Tasol long 1946, bihain liklik long taim Namba 2 Pait i pinis, bikpela sik i painim mi gen, em wanpela kain sik TB i kamap long hap bilong bel. Mi slip long bet inap 5-pela mun, na mi gat bikpela fiva na mi kisim bikpela pen tru long skin. Tasol taim ol manmeri i kam lukim mi, oltaim mi save tokim ol long Jehova, olsem bipo mi bin mekim taim mi gat sik. Bihain dispela sik i pinis.
Mi Mekim Wok Painia, Maski Birua
Bihain long pait, oltaim ol man i save birua long ol Witnes Bilong Jehova long kantri Grik. Planti taim ol polis i holim mipela taim mipela i go long ol haus na autim tok. Sapos yumi bungim olgeta wik na mun em man bilong mi i bin kalabus, em inap olsem wanpela yia. Taim mipela i lusim haus bilong go autim tok, mipela i redi long slip long rum gat long dispela nait, long wanem, mipela i save ol polis bai holim mipela. Tasol Jehova i no lusim mipela. Oltaim em i givim strong long mipela na bai mipela inap sanap strong na karim hevi na no ken pret.
Long 1948 samting, mi kaunim wanpela tok long Wok Kingdom i toktok long wok painia haptaim. Mi tingting long traim dispela kain wok bilong autim tok inap 75 aua long mun. Mi mekim dispela wok, olsem na mi gat planti gobek na Baibel-stadi, winim bilong bipo—mi mekim 17 stadi long olgeta wik. Na long hap bilong ol bisnis long Mitilini, oltaim mi save tilim ol nupela Wastaua na Kirap!, olsem 300 samting, long ol man bilong stua na ol ofis na haus beng, em ol i laik kisim long olgeta taim.
Taim wanpela wasman bilong raun i kam lukim kongrigesen bilong mipela long 1964, em i tok: “Sista Penelope, mi lukim Kat Ripot bilong yu na mi lukim ol gutpela wok yu mekim long wok autim tok. Olsem wanem? Yu laik wokim pepa bilong kamap painia oltaim?” Long olgeta taim bai mi tenkyu long em i bin kirapim mi long mekim olsem; mi mekim dispela wok bilong autim tok long olgeta de inap 30 yia pinis, na mi kisim bikpela amamas long en.
Gutpela Samting i Painim Mi
Long Mitilini i gat wanpela hap ol i kolim Langada, i gat planti planti man long en, na ol refyuji Grik i sindaun long dispela hap. Mipela i no save go long ol haus na autim tok long dispela hap, long wanem, ol i bin birua moa yet long mipela. Tasol taim man bilong mi i stap long kalabus, mi mas brukim dispela hap bilong go lukim em. Wanpela taim ren i kam daun, na wanpela meri i singautim mi i go insait long haus—em i laik save, bilong wanem man bilong mi i stap long kalabus. Mi tokim em, man bilong mi i bin autim gutnius bilong Kingdom bilong God na long dispela as em i kalabus, na em i karim pen na hevi olsem Krais i bin karim.
Bihain, narapela meri i tokim mi long go long haus bilong em taim mi laik go lukim man bilong mi. Orait taim mi kamap long haus bilong em, mi lukim olsem em i bin singautim 12-pela meri i kam. Mi ting sampela bai birua long mi, olsem na mi beten askim Jehova long givim gutpela tingting long mi na strongim bel bilong mi na bai mi inap sanap strong, maski wanem samting i kamap. Ol meri i gat planti askim, na sampela i no wanbel long ol tok mi mekim, tasol mi inap kamapim ol tok bilong Baibel na bekim ol askim bilong ol. Taim mi kirap sanap bilong lusim ol, meri bilong haus i tok em i laik bai mi kam bek long de antap. Gutpela tru mi mekim olsem, long wanem, taim mi wantaim wanpela poroman i kamap long de antap, mipela i lukim ol meri i kam pinis na i wetim mipela.
Kirap long dispela taim, mi go long olgeta wik na toktok wantaim ol long ol tok bilong Baibel, na mi kirapim planti Baibel-stadi. Sampela meri i wok long kisim stretpela save bilong Baibel na kamap strong, na famili bilong ol wantaim. Dispela lain i olsem as bilong wanpela nupela kongrigesen bilong ol Witnes Bilong Jehova i kamap long Mitilini.
Jehova i Bin Mekim Gut Long Mi
Long ol yia mi wantaim man bilong mi i bin mekim wok bilong Jehova, Em i bin givim gutpela pe long mitupela. Long 1920 samting i gat liklik lain Witnes tasol long Samos, tasol nau i gat tupela kongrigesen i stap na wanpela grup, na i gat olsem 130 pablisa. Na long ailan Lesbos, i gat 4-pela kongrigesen na 5-pela grup, na ol i gat olsem 430 manmeri bilong autim tok bilong Kingdom. Man bilong mi i bin mekim wok bilong autim tok bilong Kingdom bilong God i go inap long taim em i dai long 1977. Em i gutpela samting tru long lukim ol manmeri mitupela i bin helpim ol, em ol i wok strong yet long autim tok! Ol dispela manmeri, wantaim ol pikinini na bubu pikinini, na pikinini bilong ol dispela bubu tu, ol i wanpela bikpela lain tru i stap wanbel long lotuim Jehova!
Rot mi bin bihainim long mekim wok Kristen winim 70 yia pinis, sampela taim i gat hatwok long en. Tasol Jehova i bin stap olsem strongpela haus bilong mi ken hait long en. Nau mi lapun pinis na skin bilong mi i no strong moa, olsem na mi mas slip long bet oltaim, na mi no inap mekim bikpela wok tumas long autim tok. Tasol olsem man bilong raitim Song i bin mekim, mi inap tokim Jehova olsem: “Yu save banisim mi na yu was gut long mi. Yu God bilong mi. Mi save bilip long yu.”—Song 91:2.
(Sista Makris i dai taim ol i wok yet long redim dispela stori. Em i bin tingting long kisim laip long heven.)
[Piksa long pes 26]
Em wantaim man bilong em long 1955
[Piksa long pes 26]
Sapos Sista Makris i stap yet, em bai kisim 100 krismas long Janueri 1997