Tingting Bilong Ol Saveman Long Fopela Gutnius
“OL MANMERI i save tok, mi husat tru?” (Luk 9:18) Jisas i bin givim dispela askim long ol disaipel bilong em klostu olsem tu tausen yia i go pinis. Long dispela taim bipo i gat planti tok pait i bin kamap long dispela askim. Tasol long nau i olsem ol man i mekim planti tok pait moa long dispela samting, na ol i mekim moa yet long taim bilong Krismas, em ol man i save tok em de bilong tingim Jisas. Planti ol i bilip olsem God i bin salim Jisas i kam long graun bilong baim bek ol man. Olsem wanem long yu? Yu save ting olsem tu?
Sampela saveman i tok, Jisas tru tru em i no dispela man yumi save kaunim stori bilong em long Baibel—em i narapela man. Sampela i ting, ol i bin raitim olgeta Gutnius long Baibel inap olsem 40 yia samting bihain long taim Jisas i dai, na long dispela taim ol i bilasim gut stori bilong ol samting em i bin mekim na i olsem em i dispela man tru God i bin salim i kam. Na ol dispela saveman i tok, i no olsem ol man bilong raitim 4-pela Gutnius i lusim tingting long ol samting tru em i bin mekim, nogat; tingting bilong ol long Jisas i stiaim ol na ol i raitim stori i helpim dispela tingting bilong ol. Na ol dispela saveman i tok, bihain long taim Jisas i dai, ol disaipel bilong em i gat narapela kain tingting long em—ol i tingim em i Pikinini bilong God, em Man bilong kisim bek ol man, na em i Mesaia. Na sampela i tok, Jisas em i wanpela tripman tasol i gat gutpela tingting na save, o em i wanpela man bilong kirapim ol man long pait bilong kisim gutpela sindaun. Ol saveman i tok, dispela tok i tru.
Tingting Bilong Ol Saveman Long Jisas
Bilong helpim tingting bilong ol em ol i ting i gat save long en, ol kain man olsem ol i save sakim olgeta samting bilong Jisas i olsem ol man bilong graun i no inap mekim. Olsem: Sampela i save tok, mama bilong Jisas i kamapim em nating long wanpela man, na bilong haitim dispela samting ol i tok, em i nupela meri na em i no bin slip wantaim wanpela man. Na sampela ol i sakim ol tok profet bilong Jisas i toktok long Jerusalem bai bagarap—ol i tok, ol man i bin skruim ol dispela tok long ol Gutnius taim ol dispela samting i kamap pinis, olsem “truim” bilong en. Na sampela i tok tu olsem Jisas i no bin oraitim tru sik bilong ol man—em i tanim tingting bilong ol na ol i ting ol i orait pinis. Olsem wanem long yu? Yu ting ol dispela tok bilong ol i tru, o i kranki stret?
Na sampela saveman i tok, ol disaipel bilong Jisas i kamapim nating stori bilong Jisas i kirap bek long matmat, na bai wok Kristen bilong ol i no ken bagarap. Ol dispela saveman i tok, taim Jisas i no stap moa wantaim lain bilong em, dispela lain i no gat strong, olsem na ol i skruim sampela stori nating bilong Bikman bilong ol long Gutnius bilong mekim olsem em i stap yet.
Ol dispela tok i daunim Jisas inap long mak em planti saveman i putim bilong ol i ken bilip long em: Ol i bilip olsem em i wanpela man i gat gutpela tingting na save, o em i wanpela Juda i stap olsem arereman tasol, o em i wanpela man i wok strong long helpim sindaun bilong ol man—ol inap bilip long olgeta samting bilong Jisas, tasol ol i no laik bilip olsem em i Pikinini bilong God na em i bin kam “bilong givim laip bilong em bilong baim bek planti manmeri.”—Matyu 20:28.
Ating long dispela taim bilong yia yu bin kaunim sampela hap bilong Gutnius, olsem dispela hap i stori long taim mama bilong Jisas i karim em na slipim em long bokis kaikai bilong ol bulmakau, o ating yu bin harim dispela stori long haus lotu bilong yu. Orait olsem wanem? Yu bin kisim ol dispela stori bilong Gutnius long Baibel olsem samting inap helpim yu na yu inap bilip long en? Sapos olsem, orait tingim wanpela samting nogut tru i bin kamap. Kirap long 1985, wanpela lain saveman i bin bung inap tupela taim long olgeta yia bilong skelim ol tok bilong Jisas, i tru o nogat. Tru Jisas yet i bin mekim ol tok em Baibel i tok em i bin mekim? Ol wan wan long dispela bung ol i vot long ol wan wan tok bilong Jisas, na ol i mekim long ol bis i gat kala kala. Retpela bis i makim olsem tru tumas Jisas i bin mekim dispela tok; bis i ret liklik i makim olsem ating Jisas i bin mekim dispela tok; bis i blak liklik i makim olsem ol i no klia gut olsem Jisas i bin mekim dispela tok o nogat; na blakpela bis i makim olsem ol man bilong raitim dispela stori ol i giaman na mekim olsem ol dispela tok em tok bilong Jisas yet.
Ating bai yu tingting planti taim yu harim olsem ol man long dispela bung i tokaut olsem, ol tok bilong Gutnius em ol i tok Jisas yet i bin mekim, inap 82 pesen bilong ol dispela tok i no tok bilong Jisas. Dispela lain i tok, i gat wanpela hap tok tasol long Gutnius Mak i raitim em yumi inap bilip long en. Na ol i tok, Gutnius Luk i raitim i gat planti planti tok long en bilong pulim tingting bilong ol man na bai ol i ken bilip long en, olsem na “i no inap tru long stretim ol dispela tok.” Klostu olgeta tok bilong Gutnius Jon i raitim, ol i bin vot long en long blakpela bis, i makim olsem ol man bilong raitim dispela stori ol i giaman na mekim olsem ol dispela tok em tok bilong Jisas yet. Inap 3-pela lain tasol bilong dispela rait, ol i vot long en long bis i blak liklik, i makim olsem ol i no klia gut olsem Jisas i bin mekim dispela tok o nogat.
No Ken Skelim Long Save Bilong Ol Man
Yu wanbel long tok bilong ol dispela saveman? Yu ting ol dispela tok ol i mekim long Jisas i stret, winim ol tok Baibel i mekim long em? Ol dispela askim i no samting bilong ol saveman i skelim long save bilong ol na ol i tok pait long en i go i kam, nogat. Long dispela taim bilong yia, ating yu tingim wanpela tok bilong Baibel i tok, God i bin salim Jisas i kam “bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”—Jon 3:16.
Sapos tru Jisas em i wanpela tripman i gat gutpela tingting na save na yumi save liklik tasol long em, orait i no gat wok long yumi mas “bilip” long em. Tasol sapos ol tok Baibel i mekim long Jisas i tru, orait dispela em i bikpela samting bilong yumi—olsem yumi bai kisim laip i stap oltaim o nogat. Olsem na yumi mas save—Baibel i kamapim stori tru bilong Jisas o nogat?