Ol Gutnius—Ol i Tok Pait Yet Long Ol
Olsem wanem? Ol stori bilong ol Gutnius long taim mama i bin karim Krais Jisas ol i trupela stori?
Tru em i bin mekim bikpela tok antap long maunten?
Jisas i bin kirap bek tru?
Tru em i bin tok: “Mi yet mi rot, na mi as bilong tok tru, na mi as bilong laip”?—Jon 14:6.
INAP 80 saveman i bin skelim ol kain askim olsem long wanpela bung (Jesus Seminar) ol i save mekim inap tupela taim long olgeta yia kirap long 1985 na i kam inap nau. Dispela lain saveman i bin bekim ol dispela askim long narapela kain rot. Ol i bin putim hap pepa na vot long olgeta wan wan tok bilong Jisas olsem ol Gutnius i kamapim. Retpela pepa i makim olsem ol i ting Jisas i bin mekim tru dispela tok. Pepa i retpela liklik i makim olsem dispela tok i wankain liklik long tok Jisas i bin mekim. Pepa i blakpela liklik i kamapim olsem dispela tok i wankain liklik long tok bilong Jisas, tasol em yet i no as bilong dispela tok. Blakpela pepa i makim olsem dispela i no tok bilong Jisas, na ol i bin kisim dispela tok long stori bilong ol tumbuna i bin kamap bihain.
Lain saveman bilong dispela bung ol i vot olsem, na ol i ting dispela 4-pela askim mipela i kolim long kirap bilong dispela stori, ol i no samting bilong tingting tumas long en. Ol i bin putim blakpela pepa long 82 pesen bilong ol tok bilong Jisas olsem ol Gutnius i kamapim. Ol i tok, inap 16 pesen tasol bilong ol stori bilong Jisas olsem ol Gutnius na ol narapela rait i kamapim ol i tru.
Dispela pasin bilong daunim tok bilong ol Gutnius em i no kamap long nau tasol, nogat. Dispela pasin i bin kamap long yia 1774, taim ol i wokim wanpela buk i gat 1,400 pes long en. Herman Raimarus i bin raitim dispela buk, em i wanpela profesa bilong ol tok ples bilong Esia, em i bin stap long Hambek, Jemani, na ol i bin wokim dispela buk bihain long em i dai. Long dispela buk Raimarus i tok, em i gat tupela tingting long ol stori bilong ol Gutnius, ol i tok tru long ol samting i bin kamap long bipo o nogat. As bilong tok bilong em i olsem: Em i skelim ol samting bilong tok ples, na tu, em i painim sampela tok long 4-pela Gutnius i stori long i stap bilong Jisas na i olsem ol dispela tok i pait wantaim. Kirap long dispela taim, planti saveman i save sutim tok long Baibel, ol i tok ol stori bilong ol Gutnius i no tru, na dispela i mekim na sampela man nating ol i no bilip tumas long ol Gutnius.
Planti saveman olsem i save tok, ol i ting ol stori bilong Gutnius ol i stori nating bilong lotu, em sampela man i bin stori long en long ol narapela man na ol dispela man tu i stori long ol narapela, i go i go olsem. Ol askim planti saveman i save kamapim i olsem: Olsem wanem? Bilip bilong 4-pela man bilong raitim Gutnius i mekim na ol i bin senisim stori bilong samting i bin kamap tru? O ating lain Kristen i laik kisim strong na biknem na long dispela as ol i senisim o skruim sampela tok moa long stori bilong Jisas? Wanem hap bilong ol Gutnius i trupela stori na ol i no stori nating bilong ol man?
Ol manmeri i kamap bikpela namel long ol manmeri i no bilip long God o ol i save tingim ol samting bilong graun tasol, ol i ting Baibel—na ol Gutnius tu—em i wanpela buk em ol stori bilong ol tumbuna na ol stori nating i pulap long en. Na sampela narapela ol i bel nogut tru long pasin bilong ol lotu i gat nem Kristen long kapsaitim blut bilong planti man, na daunim ol man, na ol i no stap wanbel, na ol i mekim ol pasin i no stret long ai bilong God. Kain man olsem i ting i no gat as na ol i mas tingting long buk em ol lotu i gat nem Kristen ol i ting em i buk holi. Ol i ting wanpela buk em i bin kamapim lotu i gat tupela maus, em i no inap kamapim wanpela gutpela samting, em inap kamapim tasol ol stori nating i no gat as bilong en.
Yu yet i ting olsem wanem long dispela samting? I stret yu larim sampela saveman em ol i no ting ol samting ol Gutnius i stori long en em i bin kamap tru na dispela i stiaim tingting bilong yu, na yu tu i kisim tupela tingting? Taim yu harim ol i tok olsem ol man bilong raitim Gutnius ol i bin raitim ol stori nating, i stret yu larim dispela kain tok i daunim bilip bilong yu long tok ol dispela man i bin raitim? I stret pasin nogut bilong ol lotu i gat nem Kristen i mekim na yu ting tok bilong ol Gutnius i no tru? Mipela i laik kirapim yu long skelim sampela tok bilong dispela samting.
[Piksa long pes 4]
Ol Gutnius i kamapim ol stori tru o ol stori nating?
[Kredit Lain]
Jesus Walking on the Sea/The Doré Bible Illustrations/Dover Publications
[Piksa Kredit Lain long pes 3]
Background, pages 3-5 and 8: Courtesy of the Freer Gallery of Art, Smithsonian Institution, Washington, D.C.