Helpim Ol Narapela Long Lain Long Ol Samting God i Laik Yumi Mas Mekim

“Autim gutnius em wok Bikpela i givim mi na mi mas mekim. . . . Sapos mi no autim gutnius, bai mi stap nogut tru.”​—⁠1 KORIN 9:​16.

JEHOVA i gat wanpela gutnius bilong olgeta manmeri. Em i gat wanpela Kingdom, na em i laik ol man long olgeta hap i mas save long en! Taim yumi kisim save pinis long dispela gutnius, God i laik yumi mas tokim ol narapela man long en. Dispela wok i gat tupela hap bilong en. Namba wan: Yumi mas autim gutnius bilong Kingdom bilong God. Long tok profet bilong Jisas long pasin bilong dispela graun i laik pinis, em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”​—⁠Matyu 24:​3, 14.

² Namba tu hap bilong dispela wok i olsem: Yumi mas skulim ol man i amamas long harim tok bilong Kingdom. Taim Jisas i kirap bek pinis, em i tokim bikpela lain disaipel bilong em olsem: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela. Harim. Mi save stap wantaim yupela olgeta de, i go inap long dispela taim i pinis.” (Matyu 28:​19, 20) Ol tok ‘Krais i bin givim long ol’ em i no ol tok bilong em yet, nogat. Em i bin skulim ol man long bihainim ol lo bilong God, o ol samting God i laik ol i mas mekim. (Jon 14:​23, 24; 15:10) Bilong lainim ol man long ‘bihainim ol tok Jisas i givim,’ yumi mas helpim ol long lain long ol samting God i laik yumi mas mekim. Ol man i gat gutpela bel i mas bihainim ol lo bilong God bambai ol i ken stap aninit long Kingdom bilong em.

³ Kingdom bilong God em i wanem samting? Em bai kamapim wanem samting na yumi ken tok em i wanpela “gutnius”? Kingdom bilong God em i wanpela gavman bilong heven. Em i bikpela samting long Jehova, long wanem, long rot bilong en em bai mekim nem bilong em i stap holi, na rausim olgeta samting i bin nogutim nem bilong em. Long rot bilong Kingdom Jehova bai kamapim laik bilong em long graun olsem i kamap long heven. Olsem na Jisas i bin lainim yumi long beten askim God long Kingdom bilong em i mas i kam na yumi mas tingim Kingdom i olsem namba wan samting. (Matyu 6:​9, 10, 33) Ating nau yu save bilong wanem em i bikpela samting long Jehova long yumi mas tokim ol narapela long Kingdom bilong em, a?

Em Hatwok​—⁠Tasol Em i No Wanpela Hevi

⁴ Wok bilong autim gutnius i givim hevi long yumi? Nogat tru! Yumi ken tok piksa olsem: Papa i gat wok long lukautim famili bilong em long ol samting bilong skin. Sapos em i no mekim dispela i olsem em i lusim bilip Kristen. Aposel Pol i bin tok: “Sapos wanpela man i no lukautim ol wanblut tru bilong em yet na ol arapela wanlain tu, orait dispela man i lusim pinis bilip bilong em, na em i man nogut tru. Ol haiden yet i no save mekim dispela kain pasin nogut.” (1 Timoti 5:⁠8) Tasol yu ting dispela wok i givim hevi long man Kristen? Nogat, a? Sapos em i laikim tru famili bilong em, bai em i gat laik long lukautim ol.

⁵ Olsem tasol, wok bilong autim tok na kamapim ol disaipel em i wanpela wok yumi mas mekim bilong i stap laip long bihain. Pol i tok: “Autim gutnius em wok Bikpela i givim mi na mi mas mekim. . . . Sapos mi no autim gutnius, bai mi stap nogut tru.” (1 Korin 9:​16; skelim wantaim Esekiel 33:​7-9.) Tasol yumi no mekim tasol, long wanem, yumi mas mekim. Nogat. Pasin sori i kirapim yumi long autim gutnius. Yumi laikim tumas God, tasol yumi laikim tu ol narapela, na yumi save em i bikpela samting long ol i mas harim gutnius. (Matyu 22:​37-​39) Em bai helpim ol long wetim gutpela samting long bihain. Kingdom bilong God bai pinisim ol pasin i no stret, na pasin bilong daunim ol narapela, na kamapim gen pasin wanbel na bel isi​—⁠em blesing ol man i daun long dispela stretpela gavman bai kisim i go inap oltaim oltaim. Yumi amamas tru, yes amamas moa yet, long autim dispela gutnius long ol narapela, a?​—⁠Song 110:⁠3.

⁶ Tasol dispela wok bilong autim tok na kamapim ol disaipel i gat hatwok tu. I gat kain kain man. Ol i gat narapela narapela laik na save. Sampela i kisim bikpela skul na sampela i no bin skul gut. Bipo ol man i amamas long kaunim ol buk, tasol nau planti i les long mekim. Maski ol man i save long rit, planti man i no gat laik long mekim na dispela hevi i kamap bikpela tu long ol kantri em planti man i save long rit. Olsem na yumi ken mekim wanem bilong helpim ol man i gat kain kain laik na sindaun long lain long ol samting God i laik ol i mas mekim?​—⁠Skelim wantaim 1 Korin 9:​20-​23.

Yumi Gat Ol Samting Bilong Helpim Ol Narapela

⁷ Wanpela wok i hatwok long mekim, em i no hatwok tumas sapos yu gat ol tul stret bilong mekim dispela wok. Wanpela tul i gutpela bilong mekim wanpela wok long nau, ating bihain ol bai senisim o wokim nupela tul, long wanem, sampela senis i kamap. I wankain long wok bilong yumi long autim tok bilong Kingdom. Long ol yia i go pinis, “wokboi i gat gutpela tingting” i bin givim ol stretpela tul long yumi, em ol buk ol i wokim bilong mekim ol Baibel-stadi long haus bilong ol man. (Matyu 24:45) Olsem na yumi bin kisim ol samting bilong helpim ol manmeri bilong “olgeta lain man na bilong olgeta kantri na . . . olgeta tok ples” long lain long ol samting God i laik yumi mas mekim. (KTH 7:⁠9) Inap sampela taim yumi bin kisim ol nupela buk i stret long ol senis i bin kamap long olgeta hap bilong graun. Nau yumi ken skelim sampela.

⁸ Kirap long 1946 i go inap long 1968, ol i bin mekim bikpela wok long buk “Let God Be True” bilong skulim ol man long Baibel, na ol i bin wokim 19,250,000 long 54 tok ples. Long 1968 ol i kamapim buk Tok i Tru i Bringim Man Long Laip Oltaim, na inap planti yia ol i bin mekim gutpela wok long en bilong stadi wantaim ol nupela man. Bipo planti man i bin stadi inap planti yia wantaim ol Witnes Bilong Jehova tasol ol i no kisim baptais. Tasol ol i bin wokim dispela buk bilong kirapim ol sumatin long bihainim ol tok ol i lain long en. Wanem samting i bin kamap? Buk Jehovah’s Witnesses​​—⁠Proclaimers of God’s Kingdom i tok: “Long tripela yia bilong wok i bin kirap long Septemba 1, 1968, na i pinis long Ogas 31, 1971, inap 434,906 manmeri i bin kisim baptais​—⁠dispela i winim tupela taim namba bilong ol manmeri i bin kisim baptais insait long tripela yia bilong wok paslain long dispela taim!” Kirap long taim ol i kamapim buk Tok i Tru, ol i bin tilim planti moa moa yet​—⁠winim 107,000,000 long 117 tok ples.

⁹ Long 1982 buk Yu Inap i Stap Oltaim Long Paradais Long Graun i bin kamap nambawan buk bilong mekim ol Baibel-stadi. Dispela tul i gat 150 samting piksa, na olgeta wan wan piksa i gat liklik tok klostu long en bilong kamapim klia ol samting piksa i skulim yumi long en. Wok Kingdom Bilong Yumi (tok Inglis) bilong Oktoba 1982 i bin tok: “Inap 20 yia buk ‘Let God Be True’ i stap olsem nambawan buk bilong yumi long mekim stadi (kirap long 1946 i go inap 1968) na inap 1,000,000 nupela pablisa bilong Kingdom i kam insait long lain bilong yumi. Na inap 1,000,000 pablisa i kam insait gen taim buk Tok i Tru i Bringim Man Long Laip Oltaim i kamap olsem nambawan buk bilong stadi bihain long 1968. Taim yumi mekim wok long nupela buk bilong stadi, em buk Yu Inap i Stap Oltaim Long Paradais Long Graun, bai yumi lukim namba bilong ol pablisa bilong Kingdom i go antap long wankain pasin? Yes, sapos em laik bilong Jehova!” Na i luk olsem em i laik bilong Jehova, long wanem, kirap long 1982 i go inap long 1995 winim 2,700,000 i kam insait long lain pablisa!

¹⁰ Jisas i bin tok: “Planti kaikai tumas i mau pinis long gaden, tasol i no gat planti wokman.” (Matyu 9:​37) Tru tumas, planti kaikai tru i mau pinis. I gat bikpela wok i stap yet. Long sampela kantri ol manmeri i mas putim nem bilong ol long lista na wet long stadi. Planti man moa i mas kisim hariap save long God, olsem na long 1995 “wokboi i gat gutpela tingting” i givim wanpela nupela tul long yumi, em buk i gat 192 pes, nem bilong en Save i Bringim Man Long Laip Oltaim. Dispela gutpela buk i no stori long ol bilip giaman. Long gutpela rot buk i kamapim ol tok i tru bilong Baibel. Ol i ting buk hia bai helpim ol man i stadi long Baibel long kamap strong hariap long ol samting bilong spirit. Yumi lukim pinis olsem buk Save i bin helpim wok bilong autim tok long olgeta hap, long wanem, ol i bin wokim inap 45,000,000 long 125 tok ples na nau ol i wok long tanim long 21 narapela tok ples.

¹¹ Inap sampela taim ‘gutpela wokboi’ i bin wokim sampela tul bilong helpim sampela kain man, maski ol i no planti. Olsem: Olsem wanem long ol manmeri i mas kisim helpim, long wanem, ol i go bikpela insait long wanpela lain o lotu i narapela kain? Olsem wanem yumi ken helpim ol long lain long ol samting God i laik ol i mas mekim? Long 1982 yumi bin kisim wanpela samting yumi bin sot long en​—⁠em buklet Stap Amamas Oltaim Long Graun!, em i gat 32 pes. Dispela buklet i gat planti piksa na em i bin mekim gutpela wok olsem tul bilong skulim planti manmeri i no save rit o i save liklik tasol. Em i kamapim ol bikpela tok bilong Baibel long ol tok i no hatwok long kisim save long en. Kirap long taim ol i wokim buklet Stap Amamas long namba wan taim, buklet hia i bin skulim planti man tru long olgeta hap bilong graun. Ol i bin wokim 105,100,000 samting long 239 tok ples. Sosaiti Was Taua i bin tanim dispela buklet long planti tok ples moa, winim ol narapela buk ol i tanim inap long nau!

¹² ‘Gutpela wokboi’ i save wokim ol buk na magasin, tasol kirap long 1990 ol i kamapim nupela samting bilong skulim planti man tru​—⁠em ol video. Long Oktoba 1990, long namba wan taim yumi bin kisim wanpela video Sosaiti Was Taua i bin wokim, em video Jehovah’s Witnesses​—⁠The Organization Behind the Name, longpela bilong en inap 55 minit. Dispela naispela video i givim gutpela save long ol man na ol i bin wokim long 35 tok ples. Em i soim oganaisesen bilong Jehova i stap long olgeta hap, na ol man i insait long en ol i truim tok bilong Jisas long autim gutnius long olgeta hap. Ol i wokim dispela video bilong helpim yumi long mekim wok bilong kamapim ol disaipel. Ol pablisa i no lusim taim bilong mekim wok long dispela nupela tul long taim ol i autim tok. Sampela i bin putim long paus bilong ol na ol i redi long soim o givim inap liklik taim long ol man i laik lukim. Bihain liklik long taim yumi bin kisim dispela video, wanpela wasman bilong raun i tok: “Long nau ol video i rot bilong putim tok long tingting na bel bilong planti milion manmeri, olsem na mipela i laik dispela video em i namba wan video bilong planti narapela video Sosaiti i ken kamapim long bihain bilong helpim wok bilong Kingdom long olgeta hap.” Na tru tumas, Sosaiti i bin wokim sampela moa, olsem wanpela stori i gat tripela hap, em video The Bible​—⁠A Book of Fact and Prophecy na Jehovah’s Witnesses Stand Firm Against Nazi Assault. Sapos Sosaiti i bin wokim ol video long tok ples bilong yu, yu bin mekim wok long ol taim yu autim tok?a

¹³ Nau yumi bin kisim wanpela nupela tul bilong helpim yumi long mekim wok bilong kamapim ol disaipel, em buklet God i Laik Yumi Mas Mekim Wanem? Bilong wanem ol i bin wokim? Olsem wanem yu ken mekim wok long en?

Skelim Nupela Tul

¹⁴ Ol i wokim nupela buklet God i Laik Yumi Mas Mekim Wanem? bilong helpim ol man i bilip long God na long Baibel. Ol wasman bilong raun na ol misineri i bin skul long Gileat na ol i bin mekim wok inap planti yia long ol kantri i stap rabis liklik ol i bin helpim Sosaiti long wokim dispela buklet. Em wanpela gutpela stadi kos i kamapim ol bikpela as tok bilong Baibel. Tok bilong en i gutpela na stret, na i no hatwok long kisim save long en. Tasol tok i no olsem bilong ol liklik pikinini. Buklet i no olsem “susu,” nogat; em “strongpela kaikai” i kam long Baibel, tasol ol i raitim na bai planti man inap save long en.​—⁠Hibru 5:​12-​14.

¹⁵ Inap sampela yia ol pablisa bilong Kingdom long sampela kantri ol i bin singaut long wanpela buklet olsem dispela. Olsem: Brens-ofis bilong Sosaiti Was Taua long Papua Niugini i bin raitim pas olsem: “Ol manmeri i paul long ol narapela narapela bilip bilong ol lotu. Ol i mas harim ol sotpela tok i kamapim tok i tru, na i mas i gat sampela ves bilong Baibel ol i ken lukim long Baibel bilong ol yet. Ol i mas kisim ol tok i makim klia ol samting God i laik ol Kristen tru i mas mekim na wanem ol pasin bilong ol tumbuna na ol narapela pasin i no stret long ai bilong God.” Buklet God i Laik Yumi Mas Mekim Wanem? i stret olgeta long helpim ol dispela kain man.

¹⁶ Olsem wanem yu ken mekim wok long dispela nupela tul? Wanpela rot i olsem: Yu ken mekim wok long en bilong stadi wantaim ol man i no save gut long rit o ol i no gat laik long kaunim buk.b Ol tok bilong dispela buklet i no hatwok long kisim save long en em i ken helpim ol. Taim ol i no pinisim yet wok long dispela buklet, sampela brens-ofis bilong Sosaiti Was Taua i bin kisim wanpela kopi bilong en na ol i bin tok: “Dispela buklet bai helpim gut ol man long planti hap bilong kantri we ol man i no save kaunim tumas ol buk.” (Brasil) “I gat planti man bilong ol narapela kantri em ol i no inap kaunim tok ples bilong ol yet na ol i hatwok yet long kaunim tok Frans. Mipela ken mekim wok long dispela buklet bilong stadi wantaim ol.” (Frans) Yu inap tingim ol manmeri long teritori bilong yu em buklet God i Laik Yumi Mas Mekim Wanem? inap helpim ol?

¹⁷ Narapela rot i olsem: Long planti kantri yumi ken mekim wok long dispela buklet bilong kirapim ol Baibel-stadi wantaim ol man i laik i stap aninit long God maski ol i gat bikpela skul o nogat. Tru, yumi mas wok strong long kirapim stadi long buk Save i Bringim Man Long Laip Oltaim, tasol sampela taim i isi moa long kirapim stadi long wanpela buklet. Bihain long wanpela taim i stret, yumi ken senisim stadi i go long buk Save, em nambawan buk yumi laik mekim stadi long en. Long dispela pasin bilong mekim wok long dispela buklet ol brens-ofis i bin tok: “I hatwok long kirapim ol Baibel-stadi, na sapos ol pablisa i kirapim stadi long buklet, i luk olsem ol inap kirapim planti moa.” (Jemani) “Dispela kain buklet bai gutpela tru long kirapim ol nupela Baibel-stadi na bihain yumi ken skruim stadi i go long buk Save.” (Itali) “Maski ol Japan i save kisim bikpela skul, planti i gat liklik save tasol long Baibel na ol bikpela tok bilong en. Dispela buklet em i gutpela rot bilong kirapim wanpela stadi long buk Save.”​—⁠Japan.

¹⁸ Ol brens-ofis bilong Sosaiti long olgeta hap bilong graun i bin tok ol i laik kisim dispela buklet, na ol i bin kisim tok orait long tanim long 221 tok ples. Yumi laik dispela nupela buklet i ken helpim gut yumi long helpim ol narapela long lain long ol samting God i laik ol i mas mekim. Na yumi mas tingim dispela: Taim yumi inapim ol samting God i laik yumi mas mekim​—⁠wok autim tok na wok bilong kamapim ol disaipel i insait long dispela​—⁠yumi soim Jehova olsem yumi laikim em tumas. Tru tumas, ol samting God i laik yumi mas mekim em i no givim hevi long yumi. Em i nambawan gutpela samting long i stap bilong yumi!​—⁠Song 19:​7-​11.

[Ol Futnot]

Yu Inap Stori Long Dispela?

◻ Jehova i laik yumi mas mekim wanem wok i gat tupela hap bilong en?

◻ Bilong wanem em i no wanpela hevi long mekim wok autim tok na kamapim ol disaipel em wok yumi mas mekim?

◻ “Wokboi i gat gutpela tingting” i bin givim wanem ol tul long yumi bilong mekim wok bilong autim tok na kamapim ol disaipel?

◻ Ol i wokim buklet God i Laik Yumi Mas Mekim Wanem? bilong helpim husat, na olsem wanem yumi ken mekim wok long en taim yumi autim tok?

[Askim Bilong Stadi]

1, 2. (a) Jehova i laik yumi mas mekim wanem wok i gat tupela hap bilong en? (b) Ol man i gat gutpela bel i mas lain long wanem samting bambai ol i ken i stap aninit long Kingdom bilong God?

3. Kingdom bilong God em i wanem samting? Na em bai mekim wanem samting na yumi ken tok, tok bilong Kingdom em i wanpela gutnius?

4. Yumi mas autim tok, tasol wanem tok piksa i makim olsem dispela i no wanpela hevi?

5. Maski yumi mas mekim wok autim tok na kamapim ol disaipel, bilong wanem yumi ken amamas long mekim dispela wok?

6. Bilong wanem wok autim tok na wok bilong kamapim ol disaipel i gat hatwok long en?

7. Olsem wanem “wokboi i gat gutpela tingting” i bin helpim yumi long helpim ol narapela long lain long ol samting God i laik ol i mas mekim?

8. (a) Olsem wanem buk “Let God Be True” i bin helpim ol man long kisim save long Baibel? (b) Long 1968 yumi bin kisim wanem tul bilong mekim ol Baibel-stadi, na ol i bin wokim bilong mekim wanem? (c) Olsem wanem buk Tok i Tru i bin helpim wok bilong kamapim ol disaipel?

9. Buk Stap Oltaim i gat wanem samting long en i narapela kain, na buk hia i bin mekim wanem long namba bilong ol man i autim tok bilong Kingdom?

10. Long 1995 yumi kisim wanem nupela tul, na bilong wanem em inap helpim ol man i stadi long Baibel long kamap strong hariap long ol samting bilong spirit?

11. Yumi bin kisim wanem gutpela tul bilong helpim yumi long skulim ol man i no save rit o i save liklik tasol? Olsem wanem em i bin skulim planti man long olgeta hap?

12, 13. (a) Kirap long 1990, ‘gutpela wokboi’ i bin wokim wanem nupela samting bilong helpim planti man? (b) Olsem wanem yumi ken mekim wok long ol video bilong Sosaiti long taim yumi autim tok? (c) Nau yumi bin kisim wanem nupela tul bilong helpim yumi long mekim wok bilong kamapim ol disaipel?

14, 15. Ol i wokim buklet God i Laik Yumi Mas Mekim Wanem? bilong helpim husat, na wanem ol tok i stap long en?

16. (a) Ol tok bilong nupela buklet i no hatwok long kisim save long en, olsem na em inap helpim husat? (b) Olsem wanem dispela buklet i ken helpim ol man i stap long teritori bilong yu?

17. Long planti kantri yumi ken mekim wanem wok long dispela nupela buklet? Bilong wanem yumi ken tok olsem?

18. Sapos yumi laik mekim ol samting God i laik yumi mas mekim, yumi no ken lusim tingting long wanem samting?

[Piksa long pes 24]

Wok autim tok na wok bilong kamapim ol disaipel i no wanpela hevi

[Ol Piksa long pes 26]

“Let God Be True” (1946, wokim gen long 1952): 19,250,000 long 54 tok ples

“Tok i Tru i Bringim Man Long Laip Oltaim” (1968): 107,000,000 long 117 tok ples (Buk hia, tok Frans)

“Yu Inap i Stap Oltaim Long Paradais Long Graun” (1982): 80,900,000 long 130 tok ples (Buk hia, tok Rasia)

“Save i Bringim Man Long Laip Oltaim” (1995): 45,500,000 long 125 tok ples (Buk hia, tok Jeman)