Abrusim Bagarap Long Taim Bilong Planti Hevi

Abrusim Bagarap Long Taim Bilong Planti Hevi

LONG Seul, Korea, wanpela stua i gat 5-pela plua wantu em i pundaun na i kalabusim planti handet manmeri insait long en! Ol man i kam helpim ol, ol i wok strong long san na long nait bilong helpim planti manmeri bambai ol i no ken bagarap. Taim sampela de i kamap i go pinis, i luk olsem ol i no inap painim sampela manmeri moa i stap laip aninit long traipela hip pipia simen na ain i karamapim ol.

Tasol nau wanpela samting i kamap na ol i kirap nogut long en. Ol i harim wanpela liklik krai i kam long hap bilong ol dispela pipia. Long han nating tasol ol i wok hariap hariap long rausim ol pipia i karamapim wanpela meri i gat 19 krismas, em i bin stap aninit long ol dispela pipia inap 16 de. Wanpela eleveta i pundaun pinis i bin kamap olsem wanpela karamap na i bin lukautim em taim planti ton simen i wok long pundaun. Maski planti wara i pinis long skin bilong em na planti samting i bin katim skin bilong em, em i bin abrusim i dai!

Long nau, klostu long olgeta mun i gat sampela kain bagarap i kamap, olsem guria, bikpela win na ren, maunten i pairap, birua i painim man, o bikpela hangre. Stori i kamap long redio televisen samting long ol man i kam helpim ol narapela na ol i abrusim bagarap, ol dispela kain stori i save pulim tru tingting bilong planti milion manmeri. Tasol klostu olgeta manmeri i bin givim baksait long wanpela strongpela tok lukaut olsem wanpela bikpela bagarap bai kamap, winim ol bagarap i bin kamap bipo. (Matyu 24:21) Baibel i stori long dispela bagarap olsem: “Harim. Olgeta kantri bai i bagarap. Dispela bai i stat long wanpela kantri na bai i go i go na inapim olgeta kantri. Dispela bagarap i olsem traipela win na ren i kirap long ol longwe ples na i raun long olgeta hap bilong graun. Na long dispela taim Bikpela bai i kilim i dai planti manmeri moa na bai bodi bilong ol i stap nabaut long olgeta hap bilong graun. Na bai i no gat man i stap bilong krai sori long ol na bilong bungim ol bodi bilong ol na planim ol. Nogat. Ol bodi bai i stap nabaut long graun olsem pekpek bilong dok.”—⁠Jeremaia 25:32, 33.

Ol dispela tok i samting bilong kirap nogut long en! Tasol dispela bagarap i no wankain olsem ol guria samting i save kilim i dai gutpela man na man nogut wantaim, nogat. Ol man—⁠na yu yet—⁠i gat rot bilong abrusim dispela bagarap!

Taim i Sot Pinis

Bilong save gut long olsem wanem yu inap abrusim dispela bagarap em bai kamap long olgeta hap bilong graun, yu mas save i gat wanem as na dispela bagarap bai kamap. As tru bilong dispela i olsem: Em tasol i rot bilong stretim tru ol hevi bilong ol man. Planti man long nau i no save sindaun isi—⁠ol i pret tasol. Na maski ol man bilong saiens i wok strong long pinisim ol sik i save kalap long planti man, ol dispela sik i wok yet long bagarapim planti manmeri long olgeta hap. Kros i stap namel long ol lotu, na ol lain politik, na ol man bilong narapela narapela skin, na ol dispela kros i mekim na planti pait i kirap na i kilim i dai planti tausen manmeri. Na bikpela hangre tu i save givim bikpela pen na hevi long ol man meri pikinini i no gat asua. Ol man i wok long lusim stretpela pasin na mekim pasin nogut, na dispela i painim ol pikinini tu.

Winim 1900 yia i go pinis, Baibel i kamapim wanpela tok profet i stori stret long taim bilong yumi olsem: “Yu mas save olsem, long taim bilong las de planti hevi nogut tru bai i kamap.”—⁠2 Timoti 3:1; skelim wantaim Matyu 24:3-22.

Yu ting i stret olsem gutpela God bilong pasin sori i no tingim ol hevi bilong yumi ol man? Baibel i tok: “[God] i no wokim graun bilong i stap nating. Nogat. Em i bin wokim bilong olgeta samting i ken i stap long en.” (Aisaia 45:18) Yes, God i no laik bai dispela naispela graun i ken bagarap na olgeta manmeri i stap long en ol i lus, olsem na em bai kirap na helpim ol man. Tasol bikpela askim i olsem, Em bai mekim olsem wanem?

Makim Rot Bilong i Stap Laip!

Long Song 92:7, Baibel i bekim dispela askim olsem: “Ol man nogut i ken kamap gutpela olsem gras, na ol man i save mekim pasin nogut, ol i ken kisim planti samting, na ol i ken stap gut, tasol bai yu bagarapim ol olgeta.” Rot bilong God long stretim ol hevi bilong dispela graun i olsem: Em bai pinisim ol man nogut. Tasol i no olsem olgeta man i mas pinis, nogat. Song 37:34 i tok: “Yu mas bilip long Bikpela na prea long em na bihainim pasin bilong em. Sapos yu mekim olsem, bai em i givim biknem long yu, na yu ken holim dispela graun em i givim yu. Na bai yu lukim em i bagarapim ol man nogut.”

Dispela tok hia i makim olsem i gat rot bilong abrusim bikpela bagarap tru em kain bagarap olsem i no bin kamap bipo. God i save larim yumi long tingim wanem rot yumi laik bihainim. Tok Moses i givim long ol Israel taim ol i laik go insait long Graun Bilong Promis em i stret tu long yumi ol man long nau: “I gat rot bilong i stap gut na rot bilong i dai. . . . Yupela i mas makim wanem rot yupela i laik bihainim. . . . Tasol mi laikim yupela i mas bihainim rot bilong i stap gut.” (Lo 30:19) Yumi mas mekim wanem bilong “bihainim rot bilong i stap gut” na abrusim bagarap? Olsem wanem long dispela tok, kisim bek ol man?

[Piksa Kredit Lain long pes 2]

[Piksa Kredit Lain long pes 3]

Yunhap News Agency/Sipa Press