Mi Amamas Tru Long Mekim Wok Bilong Jehova Inap Planti Yia
EM STORI BILONG OTTILIE MYDLAND
Klostu long yia 1900, ol sip i gat sel ol i sua klostu klostu long pasis bilong Kopervik long hap wes bilong Nowe. Long dispela taim ol man na ol hos i save pulim ol wilka long ol rot. Ol manmeri i bin mekim wok long ol lam kerasin bilong kisim lait, na ol haus ol i wokim long diwai na penim waitpela, ol i bin hatim long paiawut samting. Mama i karim mi long dispela hap long Jun 1898, olsem namba tu bilong 5-pela pikinini.
LONG 1905, Papa i no gat wok mani, olsem na em i go long Yunaitet Stets. Tripela yia bihain em i kam bek wantaim wanpela switkes em i bin pulapim ol gutpela gutpela presen long en bilong mipela ol pikinini na ol laplap slika na sampela narapela samting bilong Mama. Tasol nambawan gutpela samting em i bin kisim i kam em ol buk bilong Charles Taze Russell, nem bilong ol Studies in the Scriptures.
Papa i bin kirap na stori long ol pren na famili long ol samting em i bin lain long en long ol dispela buk. Long ol bung bilong lotu, em i bin mekim wok long Baibel bilong soim ol man olsem i no gat bikpaia. (Saveman 9:5, 10) Long 1909, em wanpela yia bihain long Papa i kam bek long Yunaitet Stets, Brata Russell i kam long Nowe na em i bin mekim sampela tok long Bergen na long Kristiania, nau ol i kolim Oslo. Papa i go long Bergen bilong harim tok bilong em.
Klostu olgeta man i bin sutim tok long Papa olsem em i wok long kamapim ol bilip giaman. Mi sori long em na mi helpim em long tilim ol liklik nius bilong Baibel i go long ol man i sindaun klostu. Long 1912, mi tilim wanpela liklik nius i stori long hel long pikinini meri bilong wanpela pris. Em i mekim sampela tok nogut tru long mi na Papa. Man! Mi kirap nogut long pikinini meri bilong wanpela pris i mekim kain tok nogut olsem!
Sampela taim ol narapela Sumatin Bilong Baibel, em nem bilong ol Witnes Bilong Jehova long dispela taim, ol i kam long Kopervik, olsem Theodor Simonsen, wanpela brata i bin save gut long mekim tok. Mi save singautim ol man i kam harim ol tok em i mekim long haus bilong mipela. Paslain long mekim tok em i bin pilaim musik na singsing, na taim em i mekim pinis tok em i mekim wanpela singsing bilong pinisim miting. Mipela i laikim tru dispela brata.
Narapela pren i bin kam lukim mipela em Anna Andersen, wanpela kolpota, olsem wanpela sista i save autim tok long olgeta de. Em i bin raun long ol taun long olgeta hap bilong Nowe, planti taim long wilwil, na em i tilim ol buk na nius bilong Baibel long ol man. Bipo em i bin wok olsem ofisa bilong Salvesen Ami na em i bin save long sampela ofisa bilong Salvesen Ami long Kopervik. Ol i orait long em i mekim wanpela tok bilong Baibel long haus bung bilong ol, na mi singautim ol man i kam harim tok bilong em.
Narapela kolpota i bin kam lukim mipela long Kopervik em Karl Gunberg. Em i gat pasin daun na pasin isi, tasol em i man bilong lap, na sampela taim em i bin mekim wok long tanim tok long brens-ofis long Oslo. Sampela yia bihain mipela i bin wok wantaim long Betel.
Ol Narapela Bilip i Pulim Tingting Bilong Mi
Long dispela taim planti man i bilip strong long God na long Baibel, tasol planti ol i kalabus long ol bilip bilong ol lotu, olsem bikpaia na God Triwan. Olsem na taim ol Sumatin Bilong Baibel i tok ol dispela bilip i no stret wantaim tok bilong Baibel, dispela i kirapim bikpela toktok. Ol man i sindaun klostu long mipela i sutim tok long Papa olsem em i man bilong bikhet na lusim bilip, na tok bilong ol i pulim mi. Wanpela taim mi tokim em: “Tok yu autim i no tru. Em kain tok bilong man i lusim bilip!”
Em i strongim mi na i tok: “Ottilie, yu kam na lukim tok bilong Baibel.” Nau em i kaunim ol tok bilong Baibel long mi. Olsem na bilip bilong mi long em na ol tok em i lainim mi long en i go bikpela. Em i strongim mi long kaunim ol buk Studies in the Scriptures, olsem na long taim bilong san long yia 1914, planti taim mi sindaun long wanpela liklik maunten klostu long taun na kaunim ol buk.
Long Ogas 1914 ol manmeri i bung ausait long haus niuspepa na ol i kaunim ol toksave long Namba Wan Pait i kirap. Papa i kamap na em i kisim save long ol samting i bin kamap. Em i tok: “Tenkyu God!” Em i save olsem pait i kirap na dispela i truim ol tok profet bilong Baibel em i bin autim tok long en. (Matyu 24:7) Long dispela taim planti Sumatin Bilong Baibel i bilip olsem nau God bai kisim ol i go long heven. Taim dispela samting i no bin kamap, sampela i bel hevi.
Mi Kam Insait Long Tok i Tru
Long 1915, taim mi gat 17 krismas, mi pinisim haiskul na mi kirap mekim wok mani long wanpela ofis. Nau mi kirap kaunim ol Wastaua long olgeta taim. Tasol long 1918 tasol ol i kirap wokim ol miting long Kopervik long olgeta taim. Pastaim mipela 5-pela tasol i bung. Mipela i bin kaunim ol buk na nius bilong Sosaiti Was Taua, olsem ol buk Studies in the Scriptures, na long rot bilong ol askim na bekim mipela i stori long ol samting mipela i kaunim. Mama i litimapim nem bilong ol Sumatin Bilong Baibel, tasol em yet i no bin kamap wanpela Witnes.
Long ofis mi bin wok long en, kirap long 1918, mi bungim Anton Saltnes, na mi inap helpim em long kamap wanpela Sumatin Bilong Baibel. Long dispela taim mi kamap pablisa na mi autim tok long olgeta taim na mi kisim baptais long wanpela kibung long Bergen long 1921.
Long Me 1925 i gat wanpela kibung bilong olgeta man bilong Skandinevia long Erebro, long Swiden. Winim 500 man i kam, na Joseph F. Rutherford, em presiden bilong Sosaiti Was Taua, em tu i kam. Mipela olsem 30 brata sista bilong Oslo i baim tren na i go.
Long dispela kibung ol i toksave olsem ol bai wokim wanpela brens-ofis bilong Noten Yurop long Kopenhagen, long Denmark, bilong lukautim wok bilong autim tok long olgeta hap bilong Skandinevia na ol kantri bilong Boltik. Ol i makim William Dey bilong Skotlan long lukautim dispela wok. Mipela olgeta i laikim tru dispela brata, na i no longtaim na mipela i kolim em olsem Bikpela Man Skotlan. Pastaim Brata Dey i no bin save long ol tok ples bilong Skandinevia, olsem na long taim bilong ol miting na kibung em i sindaun long baksait na em i lukautim ol pikinini bambai papamama bilong ol i ken harim gut ol tok brata i mekim long pletfom.
Wastaua bilong Mas 1, 1925, i bin toktok long Kamapim Tok Hait sapta 12, na em i kamapim olsem dispela sapta i stori long taim Kingdom bilong God i kamap long heven long 1914. Wastaua i tok dispela samting i bin kamap long 1914. Mi hatwok long kisim gut as bilong dispela tok, olsem na mi kaunim dispela stori planti taim. Taim mi kisim gut dispela tok, mi amamas tru.
Taim ol i stretim sampela tok bilong Baibel em mipela i no bin klia gut long en, sampela i bin pundaun na lusim lain bilong God. Tasol sapos mi hatwok long kisim gut sampela nupela save olsem, long olgeta taim mi kaunim kaunim ol dispela tok bambai mi ken save gut long as bilong en. Na sapos mi no kisim gut as bilong nupela save, mi wet inap long taim ol i kamapim gut insait bilong en. Planti taim mi kisim gutpela blesing long dispela pasin.
Wok Long Betel
Inap sampela yia mi bin mekim wok olsem kuskus na mi lukautim ol akaun bilong gavman. Long 1928 brata i bin lukautim ol akaun bilong Sosaiti i kisim sik na em i mas lusim Betel. Ol i bin askim mi long mekim dispela wok, long wanem, mi gat save pinis long mekim kain wok olsem. Mi kirap mekim wok long Betel long Jun 1928. Sampela taim, Brata Dey i kam lukim mipela na em i glasim ol akaun mi bin wokim. Na famili bilong Betel i go pas long mekim wok autim tok long Oslo, em mipela i gat wanpela kongrigesen tasol long en long dispela taim.
Sampela bilong mipela i bin helpim Brata Sakshammer, em brata i bin lukautim wok long Betel bilong salim ol buk samting i go long ol narapela hap—mipela i bin pulimapim ol nius The Golden Age (nau em Kirap!) long ol katon na salim i go. Brata Simonsen na Brata Gunberg em sampela bilong ol brata i bin helpim mipela. Taim mipela i wok, planti taim mipela i save singsing. Em gutpela amamas tru mipela i kisim.
Bilip Tru Long Kingdom
Long 1935 mipela i kisim save olsem ‘bikpela lain manmeri’ i no olsem nambatu lain bilong i go long heven. Mipela i kisim save olsem em i wanpela lain bai abrusim bikpela hevi na ol i gat rot long kisim laip oltaim long Paradais long graun. (KTH 7:9-14) Dispela nupela save i mekim na sampela brata em bipo ol i bin kisim bret na wain long taim bilong Memorial, nau ol i gat tingting long kisim laip oltaim long graun, olsem na ol i no kisim moa bret na wain.
I no gat wanpela taim mi gat tupela tingting long go long heven, tasol planti taim mi bin ting, ‘Olsem wanem na God i singautim mi?’ Mi pilim olsem mi no gutpela inap long kisim kain gutpela samting olsem. Mi wanpela liklik meri i save sem, olsem na mi tingting planti, olsem wanem na mi bai mekim wok king wantaim Krais long heven. (2 Timoti 2:11, 12; KTH 5:10) Tasol mi tingim tok bilong aposel Pol olsem God i no singautim ol man “i gat strong . . . tasol ol man God i makim, em ol man i gat kranki tingting long ai bilong ol arapela man, na long dispela pasin God i semim tru ol saveman bilong dispela graun.”—1 Korin 1:26, 27.
Wok Long Taim Bilong Namba Tu Pait
Long Epril 9, 1940, ami bilong Jemani i kam insait long Nowe, na i no longtaim na ol i kisim kantri olgeta. Dispela pait i mekim na planti man i amamas long harim tok bilong Kingdom. Kirap long Oktoba 1940 na i go inap long Jun 1941, mipela i tilim planti buk na buklet, winim 272,000. Long dispela taim i gat 470 Witnes long Nowe, olsem na olgeta wan wan i tilim olsem 570 buk na buklet insait long dispela 9-pela mun!
Long Julai 8, 1941, lain polis bilong Hitler ol i kolim Gestapo ol i go lukim olgeta wasman siaman na ol i tokim ol sapos ol i no lusim wok autim tok, ol bai salim ol i go long ol banis kalabus nogut. Faipela ofisa bilong ol polis bilong ol Jeman ol i bin kam long Betel na kisim planti samting bilong Sosaiti Was Taua. Ol i kisim famili bilong Betel na sutim planti askim long mipela, tasol ol i no kalabusim wanpela. Long Julai 21, 1941, ol i kisim haus bilong Sosaiti long Inkognitogaten 28 B, na ol i tambuim wok bilong mipela long autim tok. Mi go sindaun gen long Kopervik na kisim wok mani bilong lukautim mi.
Long dispela taim Papa i bin mekim wok painia. Wanpela taim ol Natsi i kam na painim painim ol samting long haus bilong Papa. Ol i kisim olgeta buk na ol Baibel bilong em. Long dispela taim mipela i no kisim planti kaikai bilong spirit. Olsem na bilong stap strong long ol samting bilong spirit, mipela i stadi planti taim long ol olpela buk, olsem buk Government, na mipela i mekim yet wok autim tok.
Tasol sori tru, long planti hap ol brata i no gat wankain tingting. Sampela i ting mipela i mas autim tok long ol haus, tasol sampela i ting mipela i mas mekim wok long pasin hait na toktok wantaim ol man long ol narapela narapela rot. Olsem na sampela brata i gat nem, em pastaim ol i bin wok gut wantaim na mipela i bin laikim tru ol, ol i no toktok moa wantaim. Dispela pasin bilong ol long brukim lain i bin givim bikpela bel hevi long mi, winim olgeta narapela hevi i painim mi olsem Witnes.
Wok Bihain Long Pait
Bihain long pait, long Julai samting bilong 1945, Brata Dey i kam long Nowe na em i mekim sampela miting long Oslo, Sean, na Bergen. Em i askim ol brata long stretim kros bilong ol na em i tokim olgeta brata i laik mekim olsem long kirap sanap. Olgeta i kirap sanap! Long Disemba 1945 ol i stretim dispela kros inap long olgeta taim bihain, em bihain long taim Brata Nathan H. Knorr i kam lukim mipela, em presiden bilong Sosaiti Was Taua long dispela taim.
Long Julai 17, 1945, mi kisim wanpela telegram long brata i lukautim brens, em Brata Enok Öman, em i tok: ‘Long wanem taim yu inap kam bek long Betel?’ Sampela i tok i gutpela mi stap wantaim famili bilong mi bambai mi ken lukautim papa, long dispela taim em i winim pinis 70 krismas. Tasol Papa i strongim mi long mekim gen wok long Betel, olsem na mi kirap mekim dispela wok. Long 1946, Marvin F. Anderson, wanpela brata bilong Yunaitet Stets, em i kamap wasman bilong brens, na ol i stretim gen ol samting bilong wok autim tok.
Long taim bilong malolo mi save go bek long Kopervik long lukim famili bilong mi. Tupela brata na tupela susa bilong mi i no bin kamap Witnes, tasol long olgeta taim ol i bin mekim gutpela pasin pren long mitupela Papa. Wanpela brata bilong mi i lukautim wok long bris na long stiaim ol sip i kam insait long pasis, na narapela i mekim wok olsem tisa. Maski mi gat liklik samting tasol bilong skin, Papa i tokim ol: “Ottilie i gat planti samting moa, winim yupela.” Na dispela tok i tru! Ol samting bilong skin ol i bin kisim i olsem samting nating sapos mi skelim wantaim ol gutpela samting bilong spirit mi bin kisim! Papa i dai long 1951, taim em i gat 78 krismas. Mama i dai long 1928.
Wanpela gutpela samting i kamap long i stap bilong mi, em long 1953 mi go long kibung intenesenel bilong lain bilong Jehova long Nu Yok. Long dispela yia namba bilong ol pablisa long olgeta hap i winim 500,000, na 165,000 i kam long kibung! Paslain long kibung long 1953 mi bin wok wanpela wik long Betel long Bruklin, em hetkota bilong oganaisesen bilong Jehova long graun.
Mekim Wok Inap Long Skel Bilong Mi
Inap sampela yia pinis ai bilong mi i no gutpela tumas, long wanem, ol katarak i kamap long ai. Taim mi putim aiglas na mi lukluk long wanpela kain glas i save mekim rait i kamap bikpela, mi inap kaunim liklik ol bikpela rait. Na tupela taim long olgeta wik ol sista Kristen i save kam lukim mi na ol i kaunim ol tok long mi, na mi amamas tru long dispela.
Nau mi no inap mekim moa bikpela wok autim tok. Long taim bilong san sampela taim ol sista Kristen i putim mi long wilsia na ol i kisim mi i go long ol hap mi ken autim tok long en. Na tu, long olgeta taim mi salim ol magasin na buklet i go long ol skul bilong Kopervik, olsem long komyuniti skul em mi bin skul long en klostu 100 yia i go pinis. Mi amamas mi inap mekim yet wok bilong autim tok long olgeta mun.
Gutpela tru, ples kaikai na Haus Kingdom i stap long wankain plua olsem rum bilong mi long Betel. Kirap long 1983 i kam inap nau haus Betel i stap long Itre Enebak, ausait long Oslo. Olsem na taim mi mekim wok long wanpela samting olsem stik wokabaut mi inap go long bung bilong lotu long moningtaim, na long ol kaikai, na ol miting bilong mipela. Na mi amamas mi inap go yet long ol kibung. Mi amamas long bungim ol pren mi save long ol inap planti yia, na mi amamas long bungim ol nupela brata sista na planti ol gutpela pikinini.
Holimpas Bilip Inap Long Pinis
Em wanpela gutpela blesing long stap long Betel namel long ol manmeri i strong long mekim ol wok na ol i save amamas na tingim ol samting bilong God. Taim mi kirap mekim wok long Betel, famili olgeta bilong Betel ol i bilong lain i gat tingting long i go long heven. (Filipai 3:14) Nau olgeta brata sista long Betel ol i gat tingting long i stap laip oltaim long graun—mi wanpela tasol i gat tingting long i go long heven.
Tru, yumi bin ting olsem longtaim pinis Jehova bai pinisim ol pasin nogut long graun. Tasol mi amamas long lukim bikpela lain i wok long go bikpela moa. Man! Mi lukim lain i go bikpela tru! Taim mi bin autim tok long namba wan taim, i gat olsem 5,000 pablisa long olgeta hap bilong graun. Nau i gat planti tru, winim 5,400,000! Tru tumas, mi lukim “lain i liklik tru . . . ol i kamap planti moa.” (Aisaia 60:22) Yumi mas wetim Jehova, olsem profet Habakuk i tok: “Yu ting bai em i no inap kamap kwik, tasol yu mas wet liklik na em bai i kamap.”—Habakuk 2:3.