Krismas—Bikpela De Bilong Graun o De Holi Bilong Lotu?
LONG Saina ol i kolim em Lapun Man Bilong Krismas. Long Inglan em i gat nem Papa Krismas. Ol manmeri long Rasia i kolim nem Bubu Ais long em, na long Yunaitet Stets, em i gat nem Santa Klaus.
Planti man i ting dispela lapun man bilong amamas i gat bikpela bel na waitpela mausgras, em i makim tru Krismas. Tasol planti man i save olsem, Santa Klaus i no wanpela man tru—stori bilong em i wanpela stori nating bilong bipo—as bilong dispela stori em wanpela bisop bilong Maira (long Turki) em i bin i stap long yia 350 samting.
Long bipo i kam inap nau, pasin bilong ples na pasin bilong ol tumbuna i gat bikpela strong long stiaim tingting bilong ol man long ol samting ol i mekim long ol bikpela de, na i wankain long Krismas tu. Dispela stori nating bilong Santa em i wanpela bilong planti stori nating em ol i as bilong wanpela bikpela de em planti man i save tingim. Sampela man i tok, ol stori bilong Baibel i as bilong ol pasin bilong Krismas, tasol nogat; klostu olgeta pasin bilong Krismas, em ol haiden yet i as bilong en.
Narapela pasin, em diwai bilong Krismas. Wanpela buk (The New Encyclopædia Britannica) i tok: “Ol haiden bilong Yurop i bin lotuim diwai, na taim ol i kamap Kristen dispela pasin i no pinis—em i stap yet long pasin ol Skandinevia i save bihainim, olsem ol i save bilasim haus na haus bulmakau samting long ol lip na han bilong diwai long taim bilong Nu Yia bilong pretim Satan na bai em i lusim ol, na ol i bin sanapim wanpela diwai bilong ol pisin i ken sindaun long en long taim bilong Krismas.”
Narapela pasin bilong Krismas planti man i save bihainim, em ol i save kisim han bilong wanpela kain liklik diwai na ol i pasim olsem ring na bilasim haus. Lotu bilong ol haiden i as bilong dispela samting tu. Ol Rom bilong bipo i bin bilasim ol haus lotu long en long taim bilong Saturnalia. Inap wanpela wik olgeta ol i save mekim ol bikpela amamas bilong tingim Saturn, em god bilong gaden. Dispela bikpela de bilong ol haiden em i wanpela bikpela taim bilong mekim ol amamas na pati nogut na mekim pasin sem.
Sampela i ting pasin bilong Krismas long kis aninit long lip bilong diwai miselto (olsem yu lukim hia) i olsem pasin bilong man i laikim meri, tasol nogat; em i wanpela pasin ol man bilong bipo i bin bihainim namel long yia 500 na yia 1500. Ol Druit bilong Briten long bipo tru, ol i bilip olsem diwai miselto i gat strong bilong lukautim man, olsem na ol i bin mekim wok long en bilong lukautim ol na bai ol spirit nogut na marila posin samting i no inap bagarapim ol. Bihain wanpela bilip kranki i kamap, olsem pasin bilong kis aninit long diwai miselto bai helpim man long painim poroman bilong marit long en. Inap long nau sampela man i save bihainim yet dispela pasin long taim bilong Krismas.
Em sampela pasin bilong Krismas i stap long nau em ol bilip haiden i as bilong en. Tasol olsem wanem ol dispela samting i bin kamap? Olsem wanem ol pasin i no Kristen ol i kam insait long wanpela bikpela de ol i tok em de bilong tingim taim mama i karim Krais? Na bikpela samting moa, God i ting olsem wanem long ol dispela pasin bilong Krismas?
[Ol Piksa Kredit Lain long pes 2]
Pes 3: Santa Klaus: Thomas Nast/Dover Publications, Inc., 1978; lip bilong diwai miselto long pes 3 na piksa long pes 4: Discovering Christmas Customs and Folklore by Margaret Baker, published by Shire Publications, 1994