Gutpela Samting i Stap Hait i Kamap Ples Klia
Stori Bilong Baibel Makarios
LONG 1993 wanpela man bilong skelim tok bilong ol buk, em i painim planti olpela nius (Orthodox Review) i hip i stap insait long Haus Buk Nesenel Bilong Rasia long Sen Pitasbek. Insait long ol nius bilong 1860 i kam inap 1867, dispela man i painim wanpela gutpela samting tru i bin stap hait long ol manmeri bilong Rasia inap wan handet yia pinis. Em olgeta buk bilong Ol Skripsa Hibru, olsem “Olpela Testamen,” bilong Baibel ol i bin tanim long tok Rasia!
Ol man i bin tanim dispela Baibel em Mikhail Iakovlevich Glukharev, em ol i kolim em olsem Bikpris Makarios, na Gerasim Petrovich Pavsky. Tupela ol i gat nem insait long Misin Otodoks Bilong Rasia, na tupela i saveman bilong ol tok ples. Taim tupela i bin kirapim dispela wok bilong ol olsem 170 yia samting i go pinis, i no gat wanpela man i bin tanim Baibel olgeta i go long tok Rasia.
Tru, dispela Baibel i stap long tok ples Slavonik, em tok ples Rasia bilong nau i kamap long en. Tasol ol man i wok long lusim tok ples Slavonik, na long yia olsem 1850 samting, ol man nating i lusim pinis—long taim bilong lotu tasol ol pris i mekim wok long en. Na wankain pasin i bin stap long hap bilong Wes—Misin Katolik i bin wok strong bambai Baibel i ken stap long tok Latin tasol, maski ol manmeri i no mekim moa dispela tok ples.
Makarios na Pavsky i laik mekim na bai ol manmeri nating inap kisim Baibel. Olsem na taim dispela Baibel bilong ol i kamap ples klia pinis na i no stap hait moa, dispela i opim rot bilong kamapim bek pasin bilong ol Rasia bipo long wokim ol buk na pasin bilong lotu bilong ol tu, em ol bikpela samting bilong Rasia.
Tasol Makarios na Pavsky ol i husat? Na bilong wanem sampela lain i bin sakim strong dispela bikpela wok bilong tupela long tanim Baibel long tok ples bilong ol man nating? Stori bilong tupela bai kirapim tru tingting bilong ol manmeri i save laikim tumas Baibel, na em inap strongim bilip bilong ol long Baibel.
I Mas i Gat Baibel Long Tok Rasia
Makarios na Pavsky i no namba wan lain bilong lukim olsem ol i mas i gat wanpela Baibel long tok ples bilong ol manmeri bilong Rasia. Wan handet yia paslain long dispela taim, king bilong Rasia, em Pita Namba Wan, em tu i ting olsem. Em i bin tingim gut Baibel, na ol i tok em i bin mekim wanpela tok long Baibel olsem: “Baibel em i winim tru olgeta narapela buk, na em i kolim olgeta samting ol man i mas mekim long God na ol narapela man.”
Olsem na long yia 1716, Pita i putim tok long ol lain long haus king bilong em ol i mas kirapim wok bilong prinim wanpela Baibel long hap bilong Amstedam, na em yet bai tromoi mani bilong mekim dispela wok. Long olgeta pes bilong dispela Baibel, ol i mas wokim olsem tupela blok i kam daun olgeta long pes—long narapela blok i gat rait long tok Rasia, na long narapela blok i gat rait long tok Holan. Inap wanpela yia bihain long en, long yia 1717, ol i wokim pinis hap bilong Baibel ol i kolim Ol Skripsa Grik, olsem “Nupela Testamen.”
Long 1721 ol i prinim pinis Ol Skripsa Hibru long tok Holan i gat fopela buk, olsem volyum, bilong en. Long olgeta pes ol i larim wanpela blok i stap nating bilong raitim ol ves long tok ples Rasia long bihain. Pita i putim ol dispela Baibel long han bilong Lain Bilong Bosim Misin Otodoks Bilong Rasia bambai ol i ken pinisim wok bilong prinim dispela Baibel na bosim wok bilong tilim long ol man. Tasol dispela lain bilong bosim misin ol i no mekim olsem.
Orait klostu olsem 4-pela yia bihain, Pita i dai. Orait olsem wanem long ol Baibel bilong em? Ol blok ol i mas raitim ol tok bilong Baibel long en long tok Rasia, ol i stap nating—ol i no raitim ol dispela tok long en. Ol i hipim ol dispela Baibel long wanpela rum daunbilo na ol i stap i stap na bihain ol i sting. Bihain ol i no inap painim wanpela Baibel i no gat sampela bagarap long en! Orait lain bilong bosim misin ol i pasim tok olsem “ol bisnisman i ken baim olgeta Baibel i stap yet.”
Ol i Kirap Long Tanim Baibel
Long yia 1812, John Paterson, em bilong wanpela Baibel-sosaiti bilong wokim ol Baibel (British and Foreign Bible Society), em i kam long Rasia. Paterson i kirapim tingting bilong ol saveman bilong Sen Pitasbek na ol i kamapim wanpela Baibel-sosaiti. Long Disemba 6, 1812—long yia stret em ami bilong Rasia i bin rausim ol ami bilong Napoléon Namba Wan—King Aleksandr Namba Wan i tok orait long ol i ken kamapim wanpela Baibel-sosaiti bilong Rasia. Long yia 1815 king i tok long siaman bilong dispela sosaiti, em Bikman Alexsandr Golitsyn, long tokim lain bilong bosim misin olsem “ol Rasia tu i mas i gat rot long kaunim Tok Bilong God long tok Rasia, em tok ples bilong ol yet.”
Gutpela tru, dispela lain i tok orait long ol i ken tanim Ol Skripsa Hibru long tok Rasia, na ol i mas kisim ol dispela tok long Baibel ol i bin raitim long tok Hibru bilong pastaim tru. Bipo, taim ol i bin tanim Ol Skripsa Hibru long tok Slavonik, ol i bin lukim Baibel Grik bilong bipo yet, ol i kolim Septuagint. Ol i tokim ol man bilong tanim Baibel long tok Rasia olsem ol i mas bihainim sampela bikpela lo bilong mekim dispela wok, olsem ol i mas tanim stret, na tok i mas klia tru, na no ken paulim sampela tok. Orait wanem samting i kamap long dispela wok bilong ol long kamapim wanpela Baibel long tok Rasia?
Ol i Kilim Wok Bilong Tanim Baibel?
Sampela lain insait long misin na gavman ol i no laikim ol nupela senis i kamap, na i no longtaim na ol i pilim olsem dispela inap mekim na ol lotu na tingting politik bilong ol narapela kantri bai pulim tingting bilong ol man bilong Rasia. Na sampela bikman bilong misin i tok tu olsem tok Slavonik—em tok ples ol i mekim insait long lotu—em i kamapim klia ol tok bilong Baibel, winim tok Rasia.
Olsem na long 1826 ol i pinisim Baibel-Sosaiti Bilong Rasia. Ol i kisim sampela tausen Baibel em dispela Baibel-sosaiti i bin tanim na prinim, na ol i kukim long paia. Olsem na Baibel i kamap olsem namba tu tasol, na ol bilaspasin bilong lotu na ol pasin bilong bipo em misin i bihainim, ol i stap namba wan. Lain bilong bosim dispela misin ol i bihainim pasin bilong Misin Katolik, na long yia 1836 dispela lain i putim lo olsem: “I orait long ol man nating i bilip long God ol i ken harim [pris] i kaunim Baibel, tasol i tambu long wanpela man i kaunim sampela hap bilong Baibel—na i tambu tru long ol i kaunim Olpela Testamen—sapos i no gat wanpela bilong soim rot long em.” Em nau, i olsem ol i kilim pinis wok bilong tanim Baibel long tok Rasia.
Wok Bilong Pavsky
Orait, long dispela taim Gerasim Pavsky, em wanpela profesa bilong tok Hibru, em i kirap mekim wok bilong tanim Ol Skripsa Hibru i go long tok Rasia. Long yia 1821 em i pinisim wok bilong tanim Buk Song. Kwiktaim king i orait long en, na long Janueri 1822 ol i kamapim long ol Rasia. Wantu ol man i kisim ol dispela Baibel, na ol i mas prinim gen inap 12-pela taim moa—ol i prinim 100,000 olgeta!
Dispela wok Pavsky i mekim i kamapim bikpela save bilong em, na em i gat nem namel long planti saveman bilong ol tok ples na tisa bilong lotu. Ol i tok em i stretpela man na man bilong kamapim stret tingting bilong em, na maski ol man em i stap namel long ol ol i save pasim tok long mekim hait ol pasin giaman, em i no bihainim pasin bilong ol. Misin i birua long wok bilong Baibel-Sosaiti Bilong Rasia, na sampela i ting sampela kampani bilong ol narapela kantri i insait long dispela sosaiti, tasol taim em i givim ol bikpela tok long ol sumatin, em i wok yet long tanim ol ves bilong Baibel long tok Rasia. Ol sumatin i amamas long em na ol i raitim long han ol dispela tok em i bin tanim, na bihain ol i bungim ol dispela ves. Long yia 1839, ol i strongim bel na prinim 150 buk olsem long masin bilong skul, maski ol i no bin kisim tok orait long ol man bilong skelim tok bilong ol buk long skul.
Ol man i kaunim dispela hap Baibel bilong Pavsky ol i amamas tru long en, na planti man i singaut long kisim. Tasol long yia 1841, wanpela man ol i no save long nem bilong em, em i gat tok long dispela samting na em i tokim lain bilong bosim misin olsem ol i mas “lukaut” long dispela hap Baibel em Pavsky i bin tanim, long wanem, ol tok bilong en i no bihainim bilip bilong lotu Otodoks. Orait tupela yia bihain, dispela lain bilong bosim misin ol i putim lo olsem: “Kisim olgeta rait bilong Olpela Testamen em G. Pavsky i tanim na ol i bin raitim long han o prinim long masin, na bagarapim olgeta.”
Litimapim Nem Bilong God
Tasol wok bilong Pavsky i bin kirapim gen laik bilong ol man long tanim tok bilong Baibel. Na em i bin go pas na soim rot long ol man bilong tanim Baibel ol bai kamap bihain long em na bai ol i ken tingim narapela bikpela samting—nem bilong God.
Korsunsky, em wanpela saveman bilong Rasia, em i tok: ‘Nem tru bilong God, em wanpela nem holi tru bilong em, i gat 4-pela leta Hibru long en יהוה na nau ol i save kolim olsem Jehova.’ Long ol Baibel ol i bin raitim long bipo yet, ol i bin raitim dispela nem bilong God inap planti tausen taim long Ol Skripsa Hibru. Tasol bihain ol Juda i kisim tingting kranki na ol i bilip olsem nem bilong God i holi tumas na ol i no ken raitim o kolim long maus. Korsunsky i tok long dispela olsem: ‘Taim ol i laik kolim o raitim dispela nem, ol i senisim na putim Adonai, em wanpela tok ol i save tanim olsem “Bikpela.” ’
Em nau, samting i kamap ples klia i olsem: Bilip giaman bilong ol tumbuna i pretim ol na ol i lusim pasin bilong kamapim nem bilong God—i no olsem ol i pret long God na daun long em, nogat. I no gat wanpela tok long Baibel i tok yumi no ken kamapim nem bilong God. God yet i bin tokim Moses: “Yu mas tok olsem long ol manmeri bilong Israel, ‘[“Jehova,” NW], em God bilong ol tumbuna bilong yupela . . . em i bin salim mi na mi kam long yupela.’ Na God i tok moa long Moses olsem, ‘[“Jehova,” NW], em i nem bilong mi oltaim oltaim, na ol lain tumbuna i kamap bihain i mas kolim mi olsem.’ ” (Kisim Bek 3:15) Planti taim Baibel i strong long tokim ol man i lotuim God: “Kolim nem bilong Bikpela [olsem Jehova] na singaut long em na tok tenkyu long em.” (Aisaia 12:4) Tasol planti man bilong tanim tok bilong Baibel ol i bihainim pasin bilong ol Juda bipo na ol i no laik kamapim nem bilong God.
Tasol Pavsky i no bihainim dispela pasin bilong ol. Long Buk Song em i bin tanim, nem bilong Jehova i stap olsem 35 taim samting. Pasin bilong em, olsem em i gat strongpela bel na i no pret, bihain dispela i stiaim tingting bilong wanpela man i stap long taim bilong em.
Bikpris Makarios
Dispela man i stap long taim bilong Pavsky em bikpris Makarios, em wanpela misineri bilong Misin Otodoks Bilong Rasia. Em i wanpela saveman tru bilong mekim ol tok ples. Taim em i gat 7-pela krismas tasol, em inap tanim sampela hap tok Rasia i go long tok Latin. Taim em i gat 20 krismas, em i gat save long tok Hibru, tok Jeman, na tok Frans. Tasol em i gat pasin daun, na em i pilim olsem em i gat bikpela wok bilong God em i mas mekim, na dispela i helpim em long abrusim pasin bilong bilip tumas long save bilong em yet. Planti taim em i save askim ol narapela saveman bilong ol tok ples samting long givim sampela tingting long em.
Makarios i laik stretim wok misineri long Rasia. Em i ting, sapos misin i laik bringim lotu Kristen i go long ol lain Muslim na Juda long Rasia, pastaim misin i mas “kamapim sampela skul na tilim Baibel long ol man long tok ples Rasia bilong givim save long ol dispela lain.” Long Mas 1839, Makarios i kamap long Sen Pitasbek. Em i laik kisim tok orait long tanim Ol Skripsa Hibru i go long tok Rasia.
Long dispela taim Makarios i tanim pinis tupela buk bilong Baibel, olsem Aisaia na Jop. Tasol lain bilong bosim misin i no givim tok orait long em long tanim Ol Skripsa Hibru i go long tok Rasia. Na ol i tokim Makarios long rausim dispela tingting bilong em long tanim Ol Skripsa Hibru i go long tok Rasia. Dispela lain bilong bosim misin ol i putim wanpela tok na raitim de bilong en olsem Epril 11, 1841, i tok long Makarios i mas “mekim wok sori inap 3 i go 6-pela wik long haus bilong wanpela bisop long Tomsk bambai em i ken mekim bel bilong em i kamap klin long rot bilong beten na brukim skru long mekim lotu.”
Makarios i Sanap Strong na i No Pret
Kirap long Disemba 1841 i go inap Janueri 1842, Makarios i mekim dispela wok sori. Tasol taim em i mekim pinis, kwiktaim em i kirap tanim ol narapela tok bilong Ol Skripsa Hibru. Em i kisim Ol Skripsa Hibru em Pavsky i bin tanim na em i mekim wok long en bilong skelim ol tok em yet i bin tanim. Em i bihainim pasin bilong Pavsky na em i no laik haitim nem bilong God. Long Baibel em Makarios i bin tanim, nem Jehova i kamap olsem 3,500 taim!
Makarios i salim sampela rait bilong em long ol pren bilong em ol i orait long dispela wok em i mekim. Tru, em i tilim wan wan Baibel em i bin raitim long han, tasol misin i wok long pasim rot bilong em long prinim na kamapim long ol man. Orait Makarios i tingting long bringim Baibel bilong em i go long narapela kantri na kirapim ol man long kisim. Tasol long de paslain long taim em i laik i go, sik i painim em na bihain liklik em i dai, long yia 1847. Taim em i stap laip yet, ol i no bin prinim na kamapim Baibel bilong em long ol man.
Em Nau, Ol i Kamapim Pinis!
Bihain ol tingting bilong wok politik na lotu i senis. Ol lain bilong Rasia i no laik pas moa long ol tingting na pasin bilong bipo, na long 1856 lain bilong bosim misin ol i tok orait gen long tanim Baibel i go long tok Rasia. Olsem na namel long yia 1860 na 1867, ol i kamapim wanpela hap bilong Baibel Makarios long olgeta wan wan nius Orthodox Review, aninit long het-tok Ol i Traim Long Tanim Baibel i Go Long Tok Rasia.
Asbisop Filaret bilong Senigov, em wanpela saveman bilong ol buk lotu bilong Rasia, em i mekim gutpela tok long Baibel Makarios, olsem: “Baibel bilong em i bihainim gut tok bilong Baibel Hibru, na tok bilong en i no paul liklik, na tok i stret tru wantaim ol samting em i stori long en.”
Tasol ol i no bin kamapim dispela Baibel Makarios long ol man. I olsem ol i lusim tingting long en. Orait long 1876, ol i tanim Baibel olgeta, em Ol Skripsa Hibru na Ol Skripsa Grik wantaim, i go long tok Rasia, na lain bilong bosim misin ol i orait long dispela wok. Planti man i save kolim dispela Baibel olsem Baibel bilong lain bilong bosim misin. Tasol ol lain bilong tanim dispela Baibel bilong Misin Otodoks Bilong Rasia ol i bin kisim klostu olgeta tok bilong en long Baibel bilong Makarios na bilong Pavsky. Tasol ol i no raitim nem bilong God long olgeta hap em i stap long en long Baibel Hibru—ol i raitim long wan wan hap tasol.
Baibel Makarios Long Nau
Baibel Makarios i stap hait i kam inap long 1993. Olsem yumi bin tok long kirap bilong dispela stori, long dispela taim ol i painim pinis ol rait bilong en long ol olpela nius Orthodox Review i stap long Haus Buk Nesenel Bilong Rasia. Ol Witnes Bilong Jehova i save, em i bikpela samting long ol manmeri i mas kisim dispela Baibel. Dispela haus buk i tok orait long Oganaisesen Lotu Bilong Ol Witnes Bilong Jehova long Rasia i ken kisim wanpela Baibel Makarios bambai ol i ken redim bilong prinim na tilim long ol man.
Orait nau ol Witnes Bilong Jehova i stretim rot bambai ol i ken wokim 300,000 bilong dispela Baibel long Itali bilong tilim long olgeta hap bilong Rasia na long ol narapela kantri ol i save mekim tok Rasia. Long dispela Baibel i gat hap bilong Ol Skripsa Hibru em Makarios i bin tanim, na Buk Song em Pavsky i bin tanim, na Ol Skripsa Grik em Misin Otodoks Bilong Rasia i putim tok long lain bilong bosim misin i tanim.
Long Janueri bilong dispela yia, ol i kamapim dispela Baibel long wanpela kibung bilong ol niusman long Sen Pitasbek long Rasia. (Lukim pes 26.) Yumi save, ol manmeri bilong Rasia i kaunim dispela nupela Baibel, bai ol i kisim gutpela save long en.
Olsem na wok bilong kamapim dispela Baibel long ol man em i win tru long ol samting bilong lotu na wok bilong raitim buk! Na em i strongim bilip bilong yumi taim yumi tingim tok bilong Aisaia 40:8, em i tok stret tru olsem: “Gras i save drai, na ol plaua i save pundaun. Tasol tok bilong God bilong yumi i save stap oltaim oltaim.”
[Blok/Piksa long pes 26]
Ol i Litimapim Nem Bilong Baibel Makarios
“OL I kamapim narapela buk i win tru: em Baibel Makarios.” Nius Komsomolskaya Pravda i mekim dispela tok taim em i tokaut olsem nau ol man inap kisim Baibel Makarios.
Pastaim nius i tok, dispela Baibel i bin kamap namba wan taim long tok Rasia inap olsem “120 yia i go pinis,” tasol nius i tok tu olsem: “Inap planti yia misin i birua long wok bilong tanim ol buk holi i go long wanpela tok ples i no gat hatwok long kaunim. Misin i bin sakim sampela Baibel ol i bin tanim, tasol bihain, long 1876, misin i orait long wanpela, na ol i kolim olsem Baibel bilong lain bilong bosim misin. Tasol i tambu long putim dispela Baibel insait long ol haus lotu. Inap long nau, insait long Misin Otodoks Bilong Rasia i gat wanpela Baibel tasol ol i orait long en—em Baibel long tok ples Slavonik.”
Narapela nius tu (St. Petersburg Echo) i tokaut olsem em i gutpela samting tru long ol i bin wokim Baibel Makarios, na nius i tok: ‘Ol saveman i gat namba, em ol i bilong Stet Yunivesiti Bilong Sen Pitasbek, na Pedagogikal Yunivesiti Hetsen, na Stet Haus Tumbuna Bilong Stori Bilong Ol Lotu Long Bipo, ol i mekim gutpela tok long dispela nupela edisen bilong Baibel.’ Dispela nius i stori long Makarios na Pavsky i bin tanim Baibel i go long tok Rasia long yia 1820 samting, na nius i tok: “I kam inap long dispela taim, long Rasia i gat Baibel long tok Slavonik tasol, na ol pris tasol inap kisim gut dispela tok ples.”
Long wanpela kibung bilong ol niusman long Sen Pitasbek long dispela yia, ol i tokaut olsem ol Witnes Bilong Jehova i bin prinim Baibel Makarios na nau ol man inap kisim. Wanpela nius bilong dispela ples (Nevskoye Vremya) em i tok: ‘Ol saveman i gat namba ol i tok strong olsem ol man i mas tingim dispela Baibel olsem em bai mekim bikpela samting tru long i stap bilong ol manmeri long Rasia na Sen Pitasbek. Maski yumi gat wanem tingting long wok bilong dispela oganaisesen lotu [ol Witnes Bilong Jehova], wok bilong ol long prinim dispela Baibel ol man i no bin save long en, em bai helpim gut tru ol man.’
Yumi save, olgeta manmeri i laikim tumas God ol i amamas long ol man inap kisim Tok bilong em long wanpela tok ples ol man nating inap kaunim na kisim gut tok bilong en. Ol man bilong olgeta hap em ol i laikim tumas Baibel, ol i amamas long ol planti milion manmeri long olgeta hap ol i save mekim tok Rasia em ol inap kisim narapela Baibel ol i tanim pinis.
[Piksa]
Long dispela kibung bilong ol niusman ol i tokaut olsem ol man inap kisim Baibel Makarios
[Piksa long pes 23]
Long dispela Haus Buk Nesenel Bilong Rasia ol i bin painim dispela gutpela samting i stap hait
[Piksa long pes 23]
King Pita i laik kamapim Baibel long tok Rasia
[Kredit Lain]
Corbis-Bettmann
[Piksa long pes 24]
Gerasim Pavsky, em i bin helpim wok bilong tanim Baibel i go long tok Rasia
[Piksa long pes 25]
Em bikpris Makarios, ol i bin putim nem bilong em long dispela nupela Baibel bilong tok ples Rasia