Dispela Graun—I Gat Wanem As na Em i Stap?

I gat wanpela askim i gutpela yu ken tingim, olsem: Dispela gutpela graun bilong yumi, i gat wanpela Man i bin wokim na em i gat wanpela laik bilong mekim long dispela graun na ol manmeri i stap long en? Sapos yu inap painim gutpela bekim bilong dispela bikpela askim, dispela bai helpim yu long save, wanem samting bai painim dispela graun bilong yumi long bihain.

PLANTI saientis em ol i bin stadi gut long ol samting bilong ples antap na graun, ol i bin lukim ol samting i makim olsem i gat wanpela Man bilong wokim olgeta samting em i stap​—⁠em God yet i as bilong ol dispela samting. Yumi ken tingim tok bilong wanpela saientis:

Profesa Paul Davies i raitim tok long wanpela buk (The Mind of God) olsem: ‘Yumi lukim olgeta samting bilong ples antap na graun ol i mekim stret wok bilong ol na narapela i helpim narapela, na i gat ol kain kain samting long en na olgeta wan wan i wok stret, olsem na ol dispela samting i mas i gat ol bikpela lo tru i bosim ol na bai ol i ken wok gut olsem.’

Pastaim Profesa Davies i toktok long sampela samting “i kamap nating na i wok nating wantaim” olsem sampela saveman i bin tok, na bihain Profesa Davies i tok: ‘Taim yumi tingim dispela olgeta samting wantaim, ol i kamapim klia tru olsem ol samting i gat laip ol i mas i gat ol lo bilong graun i bosim ol, na ol i mas bihainim olgeta liklik liklik samting bilong ol dispela lo na bai ol i ken i stap, na ol i stap laip tu long strong bilong sampela samting i bin kamap nating tasol na i gat mak stret bilong en long ol liklik atom samting na ol narapela samting i gat strong. Em nau, sapos yumi inap mekim olsem yumi God, na yumi mekim nating tasol na makim nating hamas hamas samting yumi mas bungim wantaim, na strong bilong en bai i olsem wanem, na yumi mekim olsem i go, bai yumi lukim olsem maski yumi bin mekim ol dispela bikpela wok, bai i no gat wanpela samting inap i stap laip long dispela graun. Long sampela samting yumi lukim olsem i mas i gat olgeta liklik liklik samting i wok stret long mak tru bilong en na i no abrus liklik, na long dispela rot tasol ol samting inap i stap laip long dispela graun. Sapos i gat sampela liklik senis tru i kamap long ol lo i bosim ol samting bilong ples antap na graun, bai ol man bilong graun i no inap lukim wanpela samting long ples antap, na yumi mas tingim gut dispela samting.’

Long planti man, dispela i makim olsem wanpela Man bilong wokim olgeta samting em i bin kamapim dispela graun bilong yumi na olgeta samting i stap antap, na em i gat wanpela laik na em i bin kamapim ol dispela samting. Sapos olsem, orait yumi mas kisim save olsem, i gat wanem as na em i bin wokim dispela graun. Na sapos inap, yumi mas kisim save olsem em i gat wanem laik na em i bin wokim graun. Orait nau yumi lukim narapela kain samting tru i kamap. Maski planti planti man i bilip olsem i no gat God i stap, planti man liklik ol i bilip yet olsem i gat wanpela Man i bin wokim olgeta samting. Tru, planti lotu ol i kolim Kristen ol i save toktok long wanpela God i gat olgeta strong, em Man bilong wokim ples antap na graun. Tasol i no planti taim ol dispela lotu i save toktok long ol samting bai painim dispela graun long bihain bilong kamapim laik bilong God, na taim ol i stori long en, i olsem ol i no bilip long dispela tok.

Baibel i Tok Wanem?

Bilong save long samting bai painim dispela graun long bihain, i gutpela yumi ken lukim wanpela buk em planti man i bilip olsem em i bin kam long dispela Man bilong wokim olgeta samting. Dispela buk em Baibel. I gat wanpela tok long Baibel long Saveman 1:​4 i tokaut klia tru long samting bai painim dispela graun long bihain. Em i tok: “Ol manmeri i save dai na nupela lain i save kamap na senisim ol. Tasol graun i no save senis. Oltaim em i stap olsem tasol.” Baibel i save tokaut stret olsem i gat wanem as na God Jehova i bin wokim graun. Na Baibel i soim yumi tu olsem em i bin putim graun long ples i stret tru, olsem i no klostu tumas long san na i no longwe tumas long en, bambai ol samting i gat laip ol i ken i stap long en. God i Gat Olgeta Strong em i bin kirapim profet Aisaia long raitim tok olsem: “Bikpela . . . i bin wokim skai na graun i kamap strong tru. Em i no wokim graun bilong i stap nating. Nogat. Em i bin wokim bilong olgeta samting i ken i stap long en.”​—⁠Aisaia 45:⁠18.

Tasol long nau ol man i kisim save long wokim ol samting inap bagarapim olgeta samting i stap laip long graun. Orait, olsem wanem long dispela? Long gutpela tingting na save bilong em i winim save bilong olgeta man, God i tokaut olsem em bai kirap mekim wanpela samting bilong pasim ol man na bai ol i no inap bagarapim olgeta samting i stap laip long dispela graun. Tingim dispela gutpela tok promis i stap long laspela buk bilong Baibel, em Kamapim Tok Hait: “Ol haiden i belhat tru, tasol taim bilong yu long belhat em i kamap pinis. Nau em i taim bilong ol man i dai pinis ol i mas kamap long kot bilong yu. Nau em i taim bilong givim gutpela pe long ol wokman bilong yu, em ol profet, na long ol manmeri bilong yu, na long olgeta man i save pret long yu na i stap aninit long yu, em ol man i gat nem na ol man i no gat nem tu. Nau em i taim bilong bagarapim ol man i bin bagarapim graun.”​—⁠KTH 11:⁠18.

Jehova i kamapim long yumi olsem em i gat wanem laik na em i bin wokim dispela graun, em wanpela man bilong raun long roket long ples antap i kolim olsem wanpela naispela bis i lait moa. God i laik bai graun olgeta i kamap wanpela paradais, i gat ol man na meri i stap long en na ol inapim olgeta hap, na olgeta i sindaun gut wantaim na i stap wanbel. Em i laik bai isi isi ol manmeri i ken pulap long graun, olsem na em i larim namba wan man na meri i kamapim ol pikinini. Bilong givim amamas long namba wan man na meri, Jehova i mekim wanpela liklik hap bilong graun i kamap olsem wanpela paradais. Orait bihain, insait long planti handet yia, ol manmeri bai wok long kamap planti na ol bai skruim dispela gaden Iden i go i go inap long taim wanpela tok bilong Stat 1:28 i kamap tru, olsem: “[God] i tokim ol olsem, ‘Yupela i mas kamap planti na i go sindaun long olgeta hap bilong graun na bosim olgeta samting i stap long en.’ ”

Tasol nau yumi lukim dispela graun na ol manmeri bilong en i stap nogut tru. Orait yu ting dispela i makim olsem God i lus pinis long kamapim laik bilong em long dispela graun? O yu ting em i senisim pinis laik bilong em na em i ting, ol man i mekim pasin bikhet na long dispela as em bai larim graun i bagarap olgeta na bihain em bai kirap wokim gen? Nogat. Yumi inap bilip tru olsem God i no lus long kamapim laik bilong em bilong pastaim tru, na em i no senisim laik bilong em tu. Baibel i tokim yumi, ol samting Jehova i gat laik long mekim, bihain ol dispela samting i mas kamap tru, na taim em i tingting pinis long mekim wanpela samting, i no gat wanpela man o wanpela samting inap pasim em long mekim. Em yet i tok olsem: “Tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.”​—⁠Aisaia 55:⁠11.

God i No Senisim Laik Bilong Em

Taim Adam na Iv i bikhet na God i rausim tupela long gaden Iden, nau em i no ken mekim wok long tupela bilong kamapim laik bilong em long mekim graun i kamap olsem paradais. Tasol long dispela taim stret long Iden Jehova i makim olsem sampela pikinini bilong tupela bai mekim dispela wok em i bin givim long tupela long pastaim. Tru, bilong kamapim dispela samting, planti handet handet yia bai lus pastaim, tasol sapos Adam na Iv wantaim i stap laip yet na skin bilong ol i gutpela olgeta, Baibel i no makim hamas yia bai lus pastaim na tupela i ken inapim tru dispela wok God i bin givim long ol long kamapim planti pikinini na kamapim Paradais long olgeta hap. Long pinis bilong Wan Tausen Yia Bilong Krais i Stap King​—⁠olsem wan tausen yia samting bihain long dispela taim nau yumi stap long en​—⁠dispela Paradais bilong Iden em bai inapim olgeta hap bilong graun, na ol manmeri i stap long graun long dispela taim, em ol tumbuna pikinini bilong namba wan man na meri, ol bai stap isi wantaim na i stap amamas. Em nau, inap long olgeta taim bihain dispela bai kamapim long ples klia tru olsem Jehova em i Man bilong kamapim laik bilong em na em i no inap popaia liklik long mekim!

Long dispela taim bihain ol gutpela tok profet em God i bin kirapim ol man long raitim long bipo yet ol bai kamap tru. Truim bilong ol tok bilong Baibel olsem i stap long Aisaia 11:​6-9 bai kamap, olsem: “Ol wel dok na ol pikinini sipsip bai i stap gut wantaim, na ol lepat bai i slip wantaim ol pikinini meme. Ol pikinini bulmakau wantaim ol yangpela laion bai i raun na kaikai wantaim, na ol liklik manki bai i was long ol. Ol bulmakau na ol bea bai i kaikai wantaim, na ol pikinini bilong ol bai i slip wantaim. Na ol laion bai i kaikai gras olsem ol bulmakau. Ol liklik pikinini i dring susu yet, ol bai i pilai klostu long ol hul bilong ol snek nogut. Long olgeta ples antap long maunten bilong Bikpela, olgeta samting bai i stap gut wantaim. Bai i no gat wanpela i mekim nogut long narapela, long wanem, olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.”

Ol kain kain sik, na ol sik bilong i dai tu, ol bai pinis olgeta, na dai tu bai pinis. Tok i stap long laspela buk bilong Baibel i klia tru, em i tok: “Haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​—⁠KTH 21:​3, 4.

Yes, yumi ken strongim bel​—⁠dispela gutpela graun bilong yumi bai stap oltaim oltaim. I gutpela tru sapos yu inap abrusim bagarap long pinis bilong dispela taim nogut bilong nau wantaim olgeta pasin bilong en i save bagarapim graun. Klostu nau God bai kamapim nupela taim i no gat wanpela samting nogut long en. Na planti manmeri yumi save laikim ol tumas na ol i dai pinis, ol bai lusim matmat na kirap bek​—⁠em wanpela mirakel tru. (Jon 5:​28, 29) Tru tumas, dispela graun bilong yumi em bai stap oltaim, na yumi tu inap i stap oltaim wantaim dispela graun na kisim amamas long en.