Ol i Sanap Long Dua Bilong Go Insait Long Bikpela Wok Moa
“NARAPELA i no resis long winim narapela. Ol i laik bai olgeta i winim skul.” Richard na Lusia i tok olsem taim ol i stori long ol wanskul bilong ol long namba 105 klas bilong Wastaua Baibel Skul Bilong Gileat. Na tupela i tok: “Mipela olgeta i narapela narapela kain, tasol long tingting bilong mitupela, olgeta wan wan sumatin i olsem gutpela samting tru.” Wanpela wanklas bilong tupela, em Lowell, em i wanbel long tok bilong ol, na em i tok: “Mipela i narapela narapela kain, na dispela i mekim na mipela i pas gut wantaim.”
Tru tumas, ol sumatin bilong dispela klas i bin mekim bung bilong winim skul long Septemba 12, 1998, ol i narapela narapela kain. Sampela sumatin ol i bin mekim wok painia long ol hap i sot tru long ol manmeri bilong autim tok bilong Kingdom; na sampela ol i bin mekim wok klostu long hap bilong ol yet. Wan wan, olsem Mats na Rose-Marie, pastaim ol i mas wok strong tru na lusim planti aua moa long lain gut long tok Inglis na bai ol i ken i kam long dispela skul. Planti sumatin ol i bin tingting long mekim wok misineri kirap long taim ol i liklik yet. Inap 12-pela taim tupela sumatin marit i bin wokim pepa bilong kam long skul; ol i amamas tru taim ol i kisim pas i singautim ol i go long namba 105 klas!
Inap 20 wik ol i wok strong tru long lain na kisim save, na dispela taim i pinis hariap tru. Taim ol i raitim laspela tes bilong ol na mekim laspela tok long skul, em nau, ol i pilim tru olsem skul bilong ol i pinis na nau de i kamap bilong mekim bung bilong winim skul.
Siaman bilong program, Albert Schroeder, em i bilong Lain Bilong Bosim Ol Witnes Bilong Jehova, em i tokim klas olsem ol i “sanap long dua bilong go insait long bikpela wok moa bilong skulim ol man long tok bilong Baibel,” na ol bai bihainim 7,000 narapela em ol i bin i go pas long ol long Gileat. Em i tok, gutpela samting tru i bin painim ol sumatin bilong dispela klas, olsem ol i gat rot long bung wantaim ol misineri bilong longtaim em ol i kam raun na lukim hetkota bilong Sosaiti Wastaua taim ol i kam long ol kibung intenesenel.
Orait nau Brata Schroeder i singautim Max Larson, em wanpela bilong Komiti Bilong Lukautim Ol Wok Long Betel. Em i mekim wanpela tok, “Skul i Bringim Man Long Laip i Stap Oltaim.” Brata Larson i kamapim tok bilong Sindaun 1:5, i tok: “Dispela buk bai i helpim ol man i gat save na bai ol i kisim save moa yet, na em bai i skulim ol man i gat gutpela tingting long ol gutpela rot ol i ken bihainim.” Man i mas i gat save long mekim wok misineri na bai em inap mekim gut dispela wok. Ol man i gat save long mekim wok, ol i save kamap wokman bilong ol king. (Sindaun 22:29) Ol sumatin i bin kisim skul inap 5-pela mun pinis, na nau ol inap tru long i stap olsem maus bilong ol bikpela King tru, em God Jehova na Krais Jisas.
Bihain long em, David Olson bilong Dipatmen Bilong Wok Autim Tok em i mekim wanpela tok, “Mekim Bel Bilong Jehova i Amamas.” Em i mekim wanpela askim olsem: ‘Ol man bilong graun ol inap mekim wanem bilong mekim bel bilong God i amamas?’ Em i bekim dispela askim olsem wanem? Em i tok, ol inap mekim wok bilong em na stap gut long dispela wok, na amamas long mekim. Jehova i laik bai lain bilong em i amamas long mekim wok bilong em. Taim yumi amamas long mekim laik bilong God, yumi save mekim bel bilong em i amamas. (Sindaun 27:11) Brata Olson i kaunim pas bilong tupela misineri marit em ol i bin winim namba 104 klas bilong Gileat. Olsem wanem? Ol i amamas long nupela ples wok bilong ol? Tupela i stori long kongrigesen bilong ol na tupela i tok: “Mipela i gat olsem 140 pablisa, na i gat 250 i go inap 300 ol i save kam long ol miting. Wok bilong autim tok i gutpela tru. Mitupela wan wan i gat 4-pela stadi, na sampela i kirap pinis long kam long ol miting.”
Lyman Swingle, em i bilong Lain Bilong Bosim Ol Witnes, em i mekim wanpela tok, “Em Taim Bilong Tingim Ol Gutpela Blesing Yu Kisim.” Ol i bin kisim planti gutpela blesing long skul bilong ol long Gileat. Dispela skul i bin helpim ol sumatin long kisim sampela save moa, na long amamas moa long oganaisesen bilong Jehova, na long kisim sampela pasin i bikpela samting tru, olsem pasin daun. Brata Swingle i tok: “Taim yupela i kam long dispela skul na yupela i wok long putim yau long ol tok bilong skulim yupela, dispela i mekim na yupela i daunim yupela yet.” Na em i tok moa olsem: “Taim yupela i lusim skul, bai yupela inap tru long litimapim nem bilong Jehova.”
Daniel Sydlik, em tu i bilong Lain Bilong Bosim Ol Witnes, em i mekim wanpela tok, “Yu Gat Bikpela Amamas Tru—Olsem na Bilong Wanem Bai Yu Tingting Planti?” Em i tok, taim ol hevi i kamap, wok long painim ol tok bilong Baibel bilong soim rot long yu. Brata Sydlik i kamapim sampela ves long Matyu sapta 6 na em i stori long olsem wanem ol inap mekim olsem. Sapos yumi no bilip tumas, dispela inap mekim na bai yumi tingting planti long ol samting bilong skin, olsem kaikai na klos samting. Tasol Jehova i save pinis long ol samting yumi mas kisim. (Matyu 6:25, 30) Sapos yumi tingting planti, dispela bai skruim sampela hevi moa long ol hevi i save painim yumi long olgeta wan wan de. (Matyu 6:34) Tasol i gat sampela samting bilong bihain em yumi mas tingim. (Skelim wantaim Luk 14:28.) Brata Sydlik i tok, “Jisas i no tambuim yumi long bihainim gutpela tingting na skelim ol samting bilong bihain—em i tambuim pasin bilong tingting planti long en, em pasin i no gat gutpela tingting long en.” Na em i tok: “Wok em i wanpela gutpela samting bilong daunim pasin bilong tingting planti. Taim yumi tingting planti long ol samting, i gutpela sapos yumi kirap na toktok wantaim ol man long tok i tru.”
Laspela Tok Ol Tisa i Givim Long Ol
Orait nau 3-pela tisa bilong Skul Gileat i mekim ol tok. Pastaim Karl Adams i mekim wanpela tok, “Bai Yu Bekim Wanem Samting Long Jehova?” Em i kisim tok bilong em long Song 116, ating Jisas i bin mekim dispela singsing long nait paslain long taim em i dai. (Matyu 26:30) Jisas i gat wanem ol tingting taim em i kolim tok bilong dispela singsing, olsem: “Bikpela i bin mekim gut tru long mi. Olsem na bai mi givim wanem samting long em”? (Song 116:12) Ating em i bin tingting long gutpela bodi olgeta em Jehova i bin redim bilong em. (Hibru 10:5) Long de bihain long en, em bai givim dispela bodi olsem ofa, na dispela bai kamapim klia pasin bilong em long laikim tru ol man. Ol sumatin bilong namba 105 klas ol i bin pilim tru gutpela pasin Jehova i mekim long ol insait long dispela 5-pela mun. Orait nau bai ol i wok strong long ples ol bai mekim wok misineri long en, na long dispela rot ol bai kamapim klia olsem ol i laikim tru God.
Mark Noumair, em namba tu tisa bilong Skul Gileat long mekim tok, em i tokim ol sumatin long “Wok Yet Long Mekim Ol Samting i Stret.” Taim ol Isip i baim Josep olsem wanpela wokboi nating, ol i mekim pasin i no stret long em inap 13 yia. Orait yu ting em i larim ol dispela rong bilong ol i daunim em na em i lusim wok bilong God? Nogat. Em i wok yet long mekim ol samting i stret. Orait bihain, long taim God i bin makim, em i kisim bek Josep long ol dispela hevi bilong em. Wantu i stap bilong em i senis olgeta. Pastaim em i stap long wanpela haus kalabus, na bihain em i sindaun long haus bilong king. (Stat, sapta 37-50) Tisa i askim ol sumatin bilong em: “Ol samting yu bin ting bai kamap long wok misineri bilong yu, sapos ol i no kamap, bai yu lusim wok misineri? Bai yu larim bel hevi i daunim yu olgeta? O bai yu sanap strong na karim ol dispela hevi, olsem Josep i bin mekim?”
Orait laspela tisa bilong mekim tok, em Wallace Liverance, em kuskus bilong Skul Gileat, em i mekim wanpela gutpela tok ol sumatin bilong klas i insait long en, nem bilong tok, “Autim Tok Long King na Kingdom.” Sampela sumatin i stori long ol samting i bin kamap taim ol i autim tok long ol haus, na long ol stua, na long ol rot. Na sampela i stori long olsem wanem ol i bin autim tok long ol man i save mekim narapela tok ples. Sampela ol i mekim soim long pasin bilong autim tok long ol man bilong narapela narapela lotu. Olgeta sumatin i amamas long ol i ken insait tru long wok bilong autim tok long ples wok ol bai go long en olsem misineri.
Ol Misineri Bilong Longtaim i Amamas
Orait nau Robert Wallen i lukautim narapela hap bilong program, nem bilong en “Ol Gutpela Samting Bilong Amamas i Kamap Long Wok Misineri.” Em i toktok wantaim 4-pela brata i wok long hetkota, na i no longtaim i go pinis ol i bin bung na toktok wantaim sampela misineri i gat save pinis long mekim dispela wok. Ol dispela misineri i tokaut olsem ol i bin hatwok long lainim nupela tok ples, na lain long sindaun namel long ol man i gat ol narapela kain pasin, na lain long mekim wok long ples hat, o ples kol samting, i narapela kain long ples bilong ol yet. Na ol i sori long ples bilong ol na sampela taim dispela i mekim na ol i bel hevi. Sampela taim sik i painim ol. Tasol ol dispela misineri i karim ol dispela hevi na ol i holimpas stretpela tingting, na ol i kisim ol gutpela blesing long en. Sampela i bin helpim planti manmeri long kisim save long Jehova. Na sampela i bin mekim wok long kain kain rot bilong helpim wok bilong Kingdom long go bikpela long kantri ol i stap long en.
Laspela brata bilong mekim tok, em Carey Barber, em i bilong Lain Bilong Bosim Ol Witnes. Em i kamapim gen sampela bikpela tok long program bilong kibung distrik “Bihainim Rot God i Makim.” Em i askim ol manmeri i stap long dispela bung: “Program bilong dispela kibung i bin helpim yu olsem wanem long pas gut wantaim Jehova?” Brata bilong mekim dispela tok em i skelim ol gutpela samting i save kamap taim man i bihainim rot God i makim, na ol samting nogut i kamap long ol man i bihainim pasin bilong ol man bilong dispela graun. Em i stori long rong Moses i bin mekim long Meriba na em i givim tok lukaut long ol olsem: “Maski man i mekim gut wok bilong Jehova inap planti yia, sapos em i lusim liklik ol stretpela lo bilong Jehova, Jehova i no ken ting dispela em i samting nating, nogat.” (Namba 20:2-13) Em nau, olgeta wokboi bilong God long olgeta hap ol i mas holim strong ol gutpela wok bilong God ol i bin kisim!
Nau taim i kamap bilong ol sumatin i ken kisim pepa bilong makim olsem ol i bin winim skul. Bihain long en wanpela sumatin bilong klas i kaunim wanpela pas bilong tok tenkyu long gutpela skul ol sumatin i bin kisim. Orait nau ol i mekim wanpela singsing na beten, na dispela program i pinis. Tasol long ol sumatin bilong dispela namba 105 klas, em i kirap tasol bilong wanpela wok ol bai mekim, long wanem, ol dispela nupela misineri ol i “sanap long dua bilong go insait long bikpela wok moa.”
[Blok long pes 23]
Ol Samting Bilong Ol Sumatin
Hamas kantri ol i kam long en: 9
Hamas kantri ol bai go long en: 17
Hamas sumatin: 48
Hamas ol i marit: 48
Krismas bilong ol, averes: 33
Hamas yia long tok i tru, averes: 16
Hamas yia long wok painia, averes: 12
[Blok long pes 24]
Ol i Laik Mekim Wok Painia
Ben, em wanpela sumatin bilong namba 105 klas, em i tok: “Taim mi yangpela yet, mi no gat tingting long mekim wok painia.” Na em i tok: “Mi ting ol man i gat bikpela save na i no gat sampela hevi samting long i stap bilong ol, ol tasol inap mekim wok painia. Tasol bihain mi lain long laikim tru wok bilong autim tok. Orait wanpela taim mi tingting olsem, bilong i stap olsem painia, mi mas mekim bikpela wok moa long autim tok na em tasol—i no gat planti samting mi mas mekim. Em nau, mi save mi inap mekim wok painia.”
Lusia i tok: “Famili bilong mi ol i save tingim tru ol manmeri i mekim wok painia.” Em i tok, taim ol misineri i save kam na ol i go lukim kongrigesen bilong em, ol manmeri bilong kongrigesen ol i amamas tru. Em i tok: “Taim mi wok long go bikpela, famili bilong mi i ting olsem wok painia bai insait long ol samting mi tingting long mekim bihain.”
Taim Theodis i gat 15 krismas, mama bilong em i dai. Em i tok: “Long dispela taim kongrigesen i sambai tru long mi, olsem na mi askim skin bilong mi, ‘Mi ken mekim wanem bilong kamapim olsem mi tenkyu tru long kongrigesen i bin helpim mi olsem?’ ” Dispela i mekim na bihain em i go insait long wok painia, na nau em i go insait long wok misineri.
[Piksa long pes 25]
Klas Namba 105 Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 8 lain i sanap baksait tru. Taim yu kaunim nem bilong ol na lukim pes bilong ol, kirap long han kais na i go long han sut.
(1) Sampson, M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.