Yu Ting i Gat Wanpela Man i Tingim Yumi?
‘Ol manmeri, em ol narapela i save daunim ol, ol i krai nogut tru.’ Ol dispela tarangulain ol narapela i save mekim “olkain pasin i no stret” long ol, ol i stap long olgeta hap bilong graun. Planti taim ol i pilim olsem “i no gat man bilong helpim ol,” olsem i no gat man i tingim ol.—Saveman 4:1.
MASKI dispela lain i krai nogut tru ol i planti, sampela ol i no save tingim bikpela pen na hevi bilong ol. Ol i no laik tru long tingim bikpela pen bilong ol narapela, wankain olsem wanpela pris na wanpela Livai em Krais Jisas i bin mekim tok piksa long ol—ol i no laik tru long tingim wanpela man i slip long rot, em ol narapela i bin paitim em nogut tru, na stilim ol samting bilong em, na klostu em i laik dai. (Luk 10:30-32) Sapos ol yet na famili bilong ol i no gat hevi, orait ol i no tingim ol narapela. I olsem ol i tok, “I no samting bilong mipela.”
Yumi no ken kirap nogut long dispela. Aposel Pol i bin tok profet olsem long “taim bilong las de,” planti man bai ol “i no save long pasin bilong i stap pren bilong ol arapela.” (2 Timoti 3:1, 3) Wanpela man i toktok long dispela pasin i bin kamap, olsem narapela i no save tingim narapela, na em i tok: ‘Pasin bilong ol man bilong kantri Aialan long bipo i olsem, ol i save tingim ol narapela na helpim ol, tasol nau wanpela nupela tingting i wok long kisim ples bilong dispela pasin—nau ol man i save tingim na helpim ol yet tasol.’ Long olgeta hap bilong graun, ol man i save kisim ol samting bilong helpim ol yet tasol—ol i no tingim tumas hevi bilong ol narapela.
Yumi Mas i Gat Man i Tingim Yumi
Em nau, yumi mas i gat wanpela man i tingim yumi. Olsem: Tingim wanpela man long Jemani i stap wanpis. Ol i “painim em long sia long ai bilong televisen—faipela yia bihain long em i dai pinis long taim bilong Krismas.” Dispela man i bin bel hevi long ol samting nogut i bin painim em—“marit bilong em i bruk, hap skin bilong em i bagarap”—na i no gat wanpela man i bin tingting long em i go inap long taim i no gat hap mani moa i stap long pasbuk long baim rent bilong em.
Tingim tu ol tarangulain em ol bikman i bin pulim ol samting bilong ol. Long wanpela hap, 200,000 manmeri (olsem 25 pesen bilong olgeta man long dispela hap) ol ‘i bin dai long hangre samting’ taim ol man i pait na stilim graun bilong ol. O tingim ol pikinini i bin lukim planti samting i nogut tru. Wanpela nius i tok: ‘Planti pikinini moa yet long [wanpela kantri] i bin lukim kain kain samting nogut—pasin bilong kilim man i dai, paitim narapela, reip, em sampela taim ol pikinini yet i bin mekim.’ Dispela i helpim yumi long save long as na man i bin kisim nogut long han bilong narapela em i krai na askim olsem, “I gat wanpela man i tingim mi?”
Lain Yunaitet Nesen i kamapim wanpela ripot i tok olsem, inap 1.3 bilion manmeri long ol kantri i stap rabis liklik, ol i save kisim liklik mani olsem wan dola tasol long wanpela de bilong baim kaikai samting. Ating ol dispela man i laik save, i gat man i tingim ol o nogat. I gat planti tausen refyuji na ol tu i ting i no gat man i tingim ol. Wanpela nius (The Irish Times) i kamapim ripot long ol olsem: ‘Ol i mas tinging, ol bai stap long wanpela refyuji-kem o long wanpela kantri i no amamas long ol, o ol bai go bek long as ples bilong ol i gat pait i stap o i gat ol lain i no stap wanbel.’ Ripot i tok moa: ‘Pasim ai, na kaunim ol namba kirap long wan i go inap tri. Insait long dispela liklik hap taim, wanpela pikinini i dai pinis. Em wanpela tasol bilong 35,000 pikinini ol bai dai long dispela de stret, long wanem, ol i sot long gutpela kaikai, o ol i gat wanpela kain sik i gat rot bilong pasim.’ Olsem na yumi ken save i gat as na planti man ol i krai nogut tru—ol i karim bikpela hevi tumas!—Skelim wantaim Jop 7:11.
Olsem wanem? Em laik bilong God long ol samting i stap olsem? I gat wanpela man i tingim yumi na em i gat strong tu bilong pinisim ol hevi na tekewe olgeta pen ol manmeri i bin kisim?
[Piksa Kredit Lain long pes 2]
Cover and page 32: Reuters/Nikola Solic/Archive Photos
[Piksa Kredit Lain long pes 3]
A. Boulat/Sipa Press