Graun—Ples Bilong Kisim Ol Traim Tasol?
GUTPELA tru! Em i kisim ol gutpela mak. Inap long tupela wik dispela sumatin i wokim ol tes i gat bikpela hatwok long winim, olsem na bihain em i amamas long kisim toksave olsem em i bin wokim gut. Nau em i ken kisim dispela wok skin em i bin laik long kisim.
Planti manmeri i ting laip bilong ol long dispela graun i wankain. Ol i ting i olsem wanpela traim ol i mas kisim pastaim. Ol lain i “winim” dispela traim bai kisim gutpela samting moa bihain long taim ol i dai. Na tru tumas, em bai i nogut sapos i no gat ol gutpela samting i painim ol man long bihain, long wanem, planti man long nau ol i stap nogut. Maski inap planti yia Jop i bin stap strong long skin na em i gat planti mani samting, em i tok olsem: “Mipela ol manmeri i save stap sotpela taim tasol long graun, na stat long taim mama i karim mipela, ol kain kain trabel [olsem hevi] i save kamap long mipela.”—Jop 14:1.
Wanpela buk New Catholic Encyclopedia, i kamapim wankain tingting bilong planti man, olsem: “Laip long heven, em samting God i makim pinis bilong olgeta man. . . . Rot bilong man long kisim amamas, em long i stap laip long heven tasol.” I no longtaim na wanpela lotu, em Sios Bilong Krais, ol i bin givim sampela askim long ol man long Amerika, na Sios i tok olsem 87 pesen bilong ol dispela man ol i bilip olsem ol bai go long heven bihain long ol i dai.
Planti lain i no Kristen, ol tu i bilip olsem taim ol i dai ol bai lusim graun na kisim gutpela sindaun moa long narapela hap. Olsem ol Muslim, ol i bilip olsem ol bai i go long wanpela heven em i ples paradais. Ol lain i insait long wanpela lotu bilong Buda long Japan na Saina, ol i bilip olsem ol bai i kamap nupela gen na stap amamas tru long wanpela klinpela graun o ples paradais bilong wes sapos oltaim ol i kolim dispela tok “Amida,” em God Buda bilong lait.
Baibel i winim olgeta narapela buk ol man i bin tanim long planti tok ples na tilim i go long olgeta hap, na em i no stori olsem i gutpela long lusim graun, o graun em i ples bilong stap pastaim na bihain ol bai go long narapela hap. Baibel i tok: “Ol stretpela man bai i kisim graun God i givim ol, na bai ol i stap oltaim long en.” (Song 37:29) Na tu, long Baibel yumi inap painim tok bilong Jisas olsem: “Ol manmeri i save daunim nem bilong ol yet, em ol i ken amamas. Bai God i givim olgeta graun long ol.”—Matyu 5:5.
Bilip bilong planti man olsem i stap bilong yumi long graun em i bilong sotpela taim tasol, dispela bilip i kirapim dispela tingting olsem i dai em i rot bilong kisim gutpela laip tru long bihain. Sapos dispela tok i tru, i dai bai stap olsem wanpela gutpela samting. Tasol olsem wanem? Ol manmeri i ting dai i gutpela samting, o yu ting ol i laik i stap laip? Yumi save pinis olsem, taim ol manmeri i stap strong liklik long skin na sindaun bilong ol i gutpela liklik, ol i no laik i dai.
Tasol maski i olsem, pasin nogut na planti hevi bilong graun i mekim na long tingting bilong planti manmeri heven tasol em i ples bilong stap amamas. Tasol olsem wanem long heven? Em i ples bilong stap bel isi tasol na i no gat rot long pasin nogut o pasin pait i ken kamap long en? Na olsem wanem long laip bihain long i dai—em bai kamap long heven tasol? Ating yu bai kirap nogut long bekim bilong Baibel long ol dispela askim. Plis ritim stori i kamap bihain long dispela.