Ripot Long Wok Bilong Kingdom
Jehova i Givim Ples Malolo Long Lain Bilong Em
WANPELA ples malolo bilong haitim man long bikpela san na i stap long liklik rot bilong maunten, em i gutpela samting tru long man i wokabaut longwe na skin bilong em i les. Long Nepal, nem bilong kain ples olsem em chautara. Planti kain ples olsem i stap klostu long wanpela gutpela diwai ol i kolim banyan, na em i gutpela ples bilong sindaun na malolo long en. Man i wokim kain ples olsem em i mekim gutpela pasin tru. Yumi no save long nem bilong ol man i bin wokim planti bilong ol dispela ples chautara.
Ol stori i kam long Nepal i soim olsem wanem God Jehova i kamap olsem As bilong kisim amamas na nupela strong long ol samting bilong spirit long planti man bilong dispela graun.—Song 23:2.
• Lil Kumari i save sindaun long naispela taun Pokara. Long dispela taun ol inap lukim ol traipela maunten Himaleya em ais i karamapim het bilong ol. Tasol Lil Kumari i tingting planti long hevi bilong mani bilong famili, olsem na em i ting i no gat planti gutpela samting bilong wet long en. Taim wanpela Witnes Bilong Jehova i kam lukim em, tok bilong Baibel long ol gutpela samting bai kamap bihain i kirapim bel bilong em, na wantu em i laik stadi long Baibel.
Lil Kumari i laikim tru stadi, tasol em i hatwok long mekim yet i go, long wanem, famili bilong em i birua long em. Tasol em i no les na lusim stadi. Em i go long ol miting Kristen long olgeta taim na bihainim ol tok em i kisim save long en, na em i bihainim moa yet tok bilong Baibel olsem meri i mas daun long man bilong em. Olsem na man na mama bilong Lil Kumari ol i luksave olsem Baibel-stadi i helpim famili olgeta.
Nau man bilong em na sampela wanblut ol i stadi long Baibel. I no longtaim i go pinis long wanpela kibung long Pokara, Lil Kumari wantaim 15 wanblut bilong em ol i amamas long harim program. Em i tok: “Haus bilong mi i bin kamap gutpela ples malolo, long wanem, nau famili bilong mi ol i wanbel long lotuim God, na mi painim pinis bel isi tru.”
• Long Nepal, lo i tambuim ol man long daunim ol man bilong narapela lain, tasol dispela lo i stiaim strong yet i stap bilong ol man. Olsem na planti man i laik save, Baibel i tok wanem long pasin bilong stap wankain, olsem narapela i no winim narapela, na long pasin bilong mekim wankain pasin long olgeta man. Taim Surya Maya i kisim save olsem “God i save mekim wankain pasin long olgeta manmeri,” dispela i senisim tru i stap bilong em na famili bilong em.—Aposel 10:34.
Surya Maya i bel hevi long pasin bilong ol man long daunim man bilong narapela lain na long ol hevi em pasin bilong ples i save kamapim. Em i wanpela strongpela bilipmeri, olsem na inap planti yia em i bin askim ol god giaman long helpim em. Tasol ol i no harim beten bilong em. Wanpela de em i singaut strong bilong kisim helpim, na tumbuna pikinini meri bilong em i gat 6-pela krismas, em Babita, em i askim em olsem: “Bilong wanem yu singaut long ol imis bilong helpim yu, ol i no inap mekim wanpela samting?”
Mama bilong Babita i stadi long Baibel wantaim ol Witnes Bilong Jehova. Babita i singautim bubu meri bilong em long kam long wanpela miting Kristen. Taim Surya Maya i go long miting, em i kirap nogut long lukim ol manmeri bilong kain kain lain ol i amamas long stap wantaim, na narapela i no bel nogut long narapela. Wantu tasol em i askim ol Witnes long stadi wantaim em long Baibel. Dispela i mekim na ol man i stap klostu long em ol i givim baksait long em, tasol em i no bel hevi long dispela. Na tu, maski em i no save gut long rit na rait, dispela i no pasim em long kamap strong long ol samting bilong spirit.
Inap 8-pela yia i go pinis na 6-pela long famili bilong em—man na 3-pela pikinini bilong em tu—ol i kamap Witnes Bilong Jehova. Nau Surya Maya i mekim wok bilong God long olgeta de, olsem wanpela painia oltaim, na em i amamas long helpim ol narapela long putim hevi bilong ol i go long Jehova, em Man bilong givim ples malolo tru long ol man.