Yu Tingim Yet?

Olsem wanem? Yu bin amamas long kaunim ol tok bilong ol nupela Wastaua? Orait, yu ken traim bekim ol dispela askim i stap daunbilo:

• Taim kros i kamap namel long yumi yet na narapela, yumi mas mekim wanem bikpela samting?

Pastaim yumi mas save olsem yumi inap kisim tingting na pasin kranki. Bihain yumi mas skelim gut ol samting bilong save olsem yumi yet i as bilong dispela hevi o nogat.​​—⁠8/15, pes 23.

• ‘Dispela taim bilong mekim olgeta samting i kamap nupela gen’ em Aposel 3:​21 i stori long en, em bai kamap long wanem taim?

Wok bilong mekim olgeta samting i kamap nupela gen i gat tupela hap bilong en. Namba wan hap em olsem: Kirap long yia 1919 na i kam inap long nau, ol samting bilong spirit i wok long kamap gutpela gen. Bihain long dispela, olsem namba tu hap, em graun bilong yumi bai kamap wanpela gutpela ples paradais.​​—⁠9/1, pes 17, 18.

• Maski ol anis i no gat hetman bilong bosim ol, olsem Sindaun 6:​6-8 i tok, olsem wanem ol i stap olsem gutpela piksa yumi ken bihainim?

Ol lain anis i gat kwin, tasol em i save karim kiau tasol na em i stap olsem mama bilong ol anis. Ol anis i save wok strong, na yumi tu i mas mekim wankain pasin. Maski man i skelim wok bilong yumi o nogat, yumi mas taitim bun long mekim wok bilong yumi i kamap gutpela moa.​​—⁠9/15, pes 26.

• Josaia i kisim bagarap na i dai long pait, tasol long 2 King 22:20 Hulda i tok profet olsem Josaia bai “stap gut” na dai. Olsem wanem? Tok profet bilong em i stret?

Em i stret. Josaia i stap gut na dai, long wanem, em i dai paslain long taim dispela bagarap bilong 609-​607 B.C.E. i kamap, taim ol Babilon i kam banisim na daunim Jerusalem.​​—⁠9/15, pes 30.

• Olsem wanem Solomon i mekim gutpela tok taim em i stori long wanpela meri olsem em i “wanpela gutpela dia na wanpela naispela meme bilong maunten”? (Sindaun 5:​18, 19, NW )

Meme meri bilong maunten i save stap isi na em i gat gutpela skin. Tasol em inap long stap na karim pikinini long ol bikpela ston bilong ples maunten, em ol ples ol man i no inap i go long en, na i no gat planti kaikai long dispela hap.​​—⁠10/1, pes 30, 31.

• Henry Grew na George Storrs ol i husat?

Dispela tupela man i bin stap namel long yia 1781 na 1879, na tupela wantaim i bin wok strong tru long stadi long Baibel. Grew i kisim save olsem Baibel i no as bilong ol bilip bilong God Triwan, na man i gat tewel i no save dai, na bikpaia. Storrs i kisim save olsem sampela manmeri bai kisim laip oltaim long graun. Wok bilong dispela tupela man i bin helpim Charles Taze Russell, em i bin kirap raitim dispela nius long 1879.​​—⁠10/15, pes 26-​30.

• Ol Witnes Bilong Jehova i ting olsem wanem long pasin bilong mekim wok long blut bilong ol yet taim ol dokta i mekim samting bilong oraitim sik bilong ol?

Ol i save larim Baibel i stap olsem as bilong bilip bilong ol, na ol i no save givim sampela blut bilong ol yet na bihain ol i orait long kisim gen dispela blut. Em i samting bilong wan wan Kristen yet long makim ol samting ol dokta i ken mekim long blut bilong em taim ol i katim em, o glasim blut, o mekim samting bilong oraitim sik. Kristen i mas tingim ol tok bilong Baibel long blut na em i mas tingim olsem em i bin dediketim laip bilong em long Jehova.​​—⁠10/15, pes 30, 31.

• Wanpela ripot ol i bin mekim long kirap bilong dispela yia i kamapim klia ol Witnes Bilong Jehova long olgeta hap ol i sot tru long wanem samting?

Ol i sot tru long 11,000 Haus Kingdom long ol kantri i stap rabis liklik. Ol i save mekim wok long ol kontribusen i kam long ol Kristen long planti hap bilong wokim ol gutpela haus bilong mekim miting long en.​​—⁠11/1, pes 30.

• Wanem sampela tok Grik ol i bin raitim Baibel long en long pastaim ol i makim ol samting bilong lotu?

Wanpela tok em lei·tour·giʹa, em ol i tanim olsem “wok bilong helpim ol man.” Narapela tok em la·treiʹa, ol i tanim olsem “wok bilong God.” (Hibru 10:11; Luk 2:​36, 37)​​—⁠11/15, pes 11, 12.

• Stori bilong Adam na Iv long Baibel inap skulim yumi long wanem bikpela samting?

Yumi mekim pasin kranki tru sapos yumi no laik stap aninit long God Jehova.​​—⁠11/15, pes 24-​27.

• Olsem wanem Baibel i kamapim klia olsem God i save givim strong long ol wokman bilong em?

Devit, Habakuk, na aposel Pol ol i tokaut olsem God Jehova i bin givim strong long ol. (Song 60:12; Habakuk 3:​19; Filipai 4:​13) Olsem na yumi inap bilip tru olsem God i gat laik long strongim yumi na em inap long mekim olsem.​​—⁠12/1, pes 10, 11.