Gutnius Bilong Kingdom—Em i Wanem Samting?

Long yia i go pinis long 235 kantri, 6,035,564 manmeri, em ol yangpela na ol lapun, ol i lusim 1,171,270,425 aua bilong toktok wantaim ol narapela long en. Na ol i no toktok tasol long dispela samting, ol i bin lusim 700 milion ol buk na nius i kamapim stori bilong dispela samting na insait bilong en. Na tu, ol i bin tilim planti tausen kaset na video bilong helpim stori bilong dispela samting i go long planti hap moa. “Dispela samting” i wanem samting?

“DISPELA SAMTING” i makim gutnius bilong Kingdom bilong God. I no gat wanpela taim bipo em wok bilong “autim dispela gutnius bilong kingdom” i bikpela tru olsem yumi lukim long nau.​—⁠Matyu 24:⁠14.

Ol man i mekim dispela wok bilong autim tok na skulim ol man, em ol i mekim wok volantia. Tasol long tingting bilong sampela man, ating i olsem ol dispela volantia i no bin winim mak bilong mekim dispela wok. Sapos i olsem, orait i gat wanem as na wok bilong ol i save karim kaikai na ol i no pret long mekim? Wanpela bikpela as em strong bilong dispela gutnius yet, long wanem, em i gutnius bilong ol blesing ol manmeri bai kisim. Em ol blesing ol manmeri i gat laik tru long kisim​—⁠stap amamas, no gat hevi long mani, gutpela gavman, bel isi na gutpela sindaun, na wanpela narapela samting planti i ting ol i no inap tru long kisim​—⁠em laip oltaim! Dispela em i gutpela nius tru long ol manmeri i wok long painim as bilong laip. Yu inap kisim ol dispela blesing na sampela blesing moa, sapos yu harim na mekim ol wok i stret long gutnius bilong Kingdom ol i autim.

Kingdom Em i Wanem Samting?

Tasol dispela Kingdom ol i autim gutnius bilong en i wanem samting? Em dispela Kingdom planti milion manmeri i lain pinis long beten askim God long en, olsem: “Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”​—⁠Matyu 6:​9, 10.

Em dispela Kingdom profet Daniel bilong ol Hibru i bin stori long en inap 2,500 yia bipo, em i tok: “Na taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”​—⁠Daniel 2:⁠44.

Olsem na gutnius em i stori bilong Kingdom, o gavman, em long rot bilong en God bai pinisim olgeta pasin nogut na bosim olgeta hap bilong graun long gutpela pasin. Kingdom bai kamapim laik bilong God bilong pastaim long i stap bilong ol manmeri na graun.​—⁠Stat 1:⁠28.

“Kingdom Bilong Heven Em i Kam Klostu Pinis”

Klostu 2,000 yia i go pinis, wanpela man bilong givim bel long wok em i autim gutnius bilong Kingdom long namba wan taim, bilas na pasin bilong em i pulim ai bilong planti man. Dispela man em Jon Bilong Baptais, em i pikinini bilong wanpela pris bilong Juda, em Sekaraia na meri bilong em, Elisabet. Jon i pasim klos ol i bin wokim long gras bilong kamel na wanpela let i raunim bel, kain olsem profet Elaija i bin mekim, em man bilong bipo i makim Jon. Tasol klos bilong Jon i no kirapim ol man long putim yau long em, nogat; em tok Jon i autim. Em i tokaut olsem: “Yupela tanim bel. Kingdom bilong heven em i kam klostu pinis.”​—⁠Matyu 3:​1-6.

Ol man i harim tok bilong Jon i bilong lain Juda, na ol i tok olsem ol i lotuim trupela God, Jehova. Inap 1,500 yia samting paslain long taim bilong Jon, lain Israel i bin kisim kontrak bilong Lo long rot bilong Moses. Gutpela tempel bilong ol i stap yet long Jerusalem, na ol i mekim yet ol ofa olsem Lo i makim. Ol Juda i gat strongpela tingting olsem ol i mekim lotu i stret long ai bilong God.

Tasol taim ol man i harim tok bilong Jon, isi isi sampela i kisim tingting olsem pasin bilong ol long lotuim God i no stret olsem ol i bin tingim long pastaim. Tingting na pasin bilong ol Grik i bin go insait long lotu Juda. Dispela i mekim na nau ol bilip bilong ol man na pasin bilong tumbuna i paulim na bagarapim lo ol i bin kisim long God long han bilong Moses. (Matyu 15:⁠6) Wok nogut bilong ol hetman bilong lotu i no gat pasin sori i paulim ol Juda na planti bilong ol i no bihainim moa lotu God i laikim. (Jems 1:27) Olsem na ol Juda i mas tanim bel na hevi long ol rong ol i bin mekim long God na long kontrak bilong Lo.

Long dispela taim planti Juda i wetim Mesaia o Krais long kamap, na sampela i gat tupela tingting long Jon, ol i tok: “Ating Jon em i dispela man God i makim bilong kisim bek ol manmeri bilong en?” Tasol Jon i no wanbel long dispela tok, em i kirapim ol long tingim narapela man, na em i stori long dispela man, olsem: “Mi no gutpela man inap long mi lusim string i pasim su bilong en.” (Luk 3:​15, 16) Taim Jon i laik bai ol disaipel bilong em i kam na bungim Jisas em i tokaut olsem: “Lukim. Em i Pikinini Sipsip Bilong God. Em i kam bilong rausim sin bilong olgeta manmeri bilong graun.”​—⁠Jon 1:⁠29.

Tru tumas, dispela em i gutnius, long wanem, Jon i laik stiaim ol manmeri i go long rot bilong kisim laip na amamas​—⁠em Jisas, dispela man bilong “rausim sin bilong olgeta manmeri bilong graun.” Olgeta tumbuna pikinini bilong Adam na Iv i kisim hevi bilong sin na dai taim mama i karim ol. Rom 5:19 i stori olsem: “Wanpela man i bin sakim tok, na long dispela pasin bilong em planti manmeri i kamap manmeri bilong mekim sin. Olsem tasol, wanpela man i bihainim tok, na long dispela pasin bilong em planti manmeri bai i kamap stretpela manmeri.” Jisas i wanpela pikinini sipsip ol i kilim olsem ofa bilong “rausim sin” na pinisim olgeta hevi bilong ol man. Baibel i tok: “Sin i save givim pe long ol wokboi bilong en. Dispela pe em dai tasol. Tasol God i save givim nating presen long yumi, em laip i stap oltaim. Dispela laip yumi kisim long wok bilong Jisas Krais, Bikpela bilong yumi.”​—⁠Rom 6:⁠23.

Jisas em i gutpela olgeta, em i nambawan man tru i winim olgeta narapela man, na em i bin autim tok bilong gutnius. Stori bilong Baibel long Mak 1:​14, 15 i tok: “Taim ol i kalabusim Jon pinis, Jisas i kam kamap long distrik Galili na i wok long autim gutnius bilong God. Em i tok olsem, ‘Taim God i makim em i kamap pinis, na Kingdom bilong God em i kam klostu pinis. Yupela i mas tanim bel na bilip long gutnius.’ ”

Ol man i bin amamas long harim tok bilong Jisas na bilip long gutnius, ol i kisim bikpela blesing. Jon 1:12 i tok: “Tasol sampela manmeri i kisim [Jisas], em ol lain i bilip long nem bilong em. Na em i givim namba long ol bai ol i ken kamap pikinini bilong God.” Ol dispela pikinini bilong God ol bai kisim laip oltaim.​—⁠1 Jon 2:25.

Tasol ol dispela gutpela blesing bilong Kingdom i no bilong ol lain i stap long taim bilong ol aposel tasol. Olsem dispela stori i kamapim pinis, long olgeta hap bilong graun ol lain i autim na skulim ol man long gutnius bilong Kingdom bilong God long nau. Olsem na rot i op yet bilong kisim ol blesing bilong dispela Kingdom. Yu mas mekim wanem bilong kisim ol dispela blesing? Stori i kamap bihain bai toktok long dispela samting.