Ripot Long Wok Bilong Kingdom

India—“Pasin Wanbel Namel Long Kain Kain Lain”

“PASIN wanbel namel long kain kain lain,” em wanpela tok planti i save mekim bilong makim pasin bilong kain kain lain long India long bung wantaim. I hatwok tru long kamapim pasin wanbel insait long dispela traipela kantri i gat narapela narapela pasin, tok ples, lotu, lain, klos na bilas, na kaikai. Tasol kain pasin wanbel olsem i stap long ofis bilong ol Witnes Bilong Jehova long India, maski ol volantia i wok na sindaun long dispela hap ol i bilong planti narapela narapela provins na teritori bilong gavman, na ol i mekim planti narapela narapela tok ples.

• Nau yumi ken kisim save long Rajrani​—⁠em i wanpela yangpela meri bilong Punjab, long hap not-wes bilong India. Taim Rajrani i skul, wanpela wanklas bilong em i kirap stadi long Baibel wantaim ol Witnes Bilong Jehova. Dispela yangpela meri i traim kirapim Rajrani long kisim save long Baibel. Dispela wanklas i no save gut long tok Inglis na long dispela taim ol i no wokim nius Wastaua long tok Punjabi, olsem na em i askim Rajrani long tanim tok bilong dispela nius long em. Ol tok Rajrani i ritim long Wastaua i kirapim tru bel bilong em, na maski papamama bilong em i birua long em, Rajrani i kamap strong na em i dediket long God Jehova. Nau em i wok long Betel long India, na em i mekim dispela wok i bin helpim em long luksave long tok i tru. Em i tanim tok bilong ol buk na nius Kristen i go long tok Punjabi!

• Tingim tu Bijoe, em i bilong narapela hap bilong India, long provins Kerala i stap long hap saut-wes. Ol i rausim Bijoe long haiskul, long wanem, em i no insait long pasin bilong litimapim kantri. Ol i kot long dispela samting inap longpela taim, tasol lotu i tru i winim kot na Bijoe i go bek long skul.a Em i go long koles tu. Tasol bel bilong em i gat tok long pasin sem ol man i mekim na toktok long en long skul, olsem na em i lusim skul long namba wan yia bilong em long skul. Nau em i bin stap long Betel inap 10-pela yia pinis, na em i pilim olsem em i bin kisim planti gutpela samting taim em i stap long Betel i gat ol man bilong kain kain lain tasol ol i stap wanbel, winim ol samting em inap kisim sapos em i bin kisim bikpela skul.

• Krismas bilong Norma na Lily i winim 70, na tupela i bin stap wanpis inap planti yia pinis. Tupela i bin mekim wok bilong God long olgeta de winim 40 yia nau. Lily i bin wok long brens-ofis inap 20 yia na em i tanim tok long tok Tamil. Norma i kam long Betel long 13 yia i go pinis, taim man bilong em i dai. Ol i stap olsem gutpela piksa long pasin bilong wok strong na mekim gut wok, na tu, ol i save helpim famili Betel long stap wanbel wantaim. Ol i save amamas long singautim ol narapela long rum bilong ol, na ol i laik pren wantaim ol yangpela bilong famili Betel na stori long ol amamas ol i kisim taim ol i stap olsem Kristen inap planti yia. Na ol yangpela i laik mekim gut long ol tu na ol i singautim ol long rum bilong ol bilong bung wantaim tupela, na ol i save helpim tupela long sampela wok samting taim ol i mas kisim helpim. Ol i stap olsem gutpela piksa tru, a?

Ol dispela volantia i bin winim ol hevi em pasin birua na pait i save kamapim long planti hap, na ol i amamas long wok wantaim bilong helpim ol narapela man, olsem wanpela famili Betel i stap wanbel wantaim long India.​—⁠Song 133:⁠1.

[Futnot]

[Piksa Kredit Lain long pes 8]

Background: Mountain High Maps® Copyright © 1997 Digital Wisdom, Inc.